1 CORINTIOS 3:9 - Chatino Zona Alta Occidental

⁹ Taꞌa ngiꞌni ba tñan ꞌin Ndiose lka bare; loꞌo ꞌwan, ngiꞌni Ni tñan niꞌ kasiya ꞌwan, ti kwiꞌ tñan ꞌin Ndiose lka kanꞌ. Nchka tiǎnꞌ chkwiǐnꞌ ska chaꞌ tiya loꞌo wan ni: ñaꞌan tiꞌ ska naꞌan tnun nu ndyaꞌ chaꞌ ꞌin Ndiose, ngwañaꞌan lka wan;

1 CORINTIOS 3:9 Referans Kwoze

1 SAN PEDRO 2:5

chaꞌ loꞌo wan ka wan ñaꞌan tiꞌ tyuu chaꞌ tyaꞌ ska naꞌan ꞌin Ndiose, ni siya ñaꞌan luꞌu ti wan. Bra kanꞌ xñi Ndiose tyuu kanꞌ, chaꞌ kwiñan Ni ska naꞌan nu kti ꞌa chaꞌ ꞌin Ni. Ti kwiꞌ ti chaꞌ, nchga wan lka wan ñaꞌan tiꞌ sti joꞌo nu luwi ꞌa kasiya ꞌin, chaꞌ ka ꞌwan xtya wan lomstan tloo Ndiose seꞌen ndukwa Ni nde niꞌ kwan chunꞌ Jesucristo; lomstan kanꞌ lka wan, ti ykwiꞌ ti wan, si chañi chaꞌ tyukwi ti tiye wan nchka tiꞌ wan tukwa wan chaꞌ nu nchkwiꞌ Ni.

2 CORINTIOS 6:1

Taꞌa ngiꞌnian tñan ꞌin Ndiose lka wan; kanꞌ chaꞌ nchkwiꞌ ꞌa ba loꞌo wan, chaꞌ ja tnaꞌ wan chaꞌ suꞌwe ꞌin Ndiose ngwa ti ñaꞌan, ti kwiꞌ chaꞌ suꞌwe kanꞌ nu wa nda Ni chaꞌ kanun niꞌ kasiya ꞌwan. Wa msñi wan chaꞌ kanꞌ ska yaꞌ, kanꞌ chaꞌ ti tukwa la wan chaꞌ kanꞌ ni.

1 CORINTIOS 3:16

Loꞌo laa tnun seꞌen ngiꞌni tnun neꞌ judío ꞌin Ndiose ni, ndiya ꞌa tiꞌ Ndiose ꞌin laa kanꞌ, chaꞌ ꞌin Ni ndyaꞌ naꞌan kanꞌ; tlá ꞌa Ndiose si kuꞌni ñuꞌun nten ꞌin laa kanꞌ. Loꞌo ꞌwan ni, nchga ta wan nu msñi wan chaꞌ ꞌin Krixtu, lka wan sa ñaꞌan lka laa tnun kanꞌ, chaꞌ ndiya ꞌa tiꞌ Ndiose ꞌwan; kwiꞌ ngwañaꞌan wa nganun Tyiꞌi Ndiose niꞌ kasiya ꞌwan. Kuꞌni tyii Ndiose ꞌin nchga nten nu kuꞌni ñuꞌun ꞌwan taꞌa msñian chaꞌ ꞌin Jesús.

SAN MARCOS 16:20

Loꞌo mdoꞌo neꞌ nu wa yꞌni xaꞌan chaꞌ ꞌin Jesús ndyaa neꞌ bra kanꞌ, nchga kichen ykwiꞌ neꞌ chaꞌ ꞌin Ni loꞌo nten. Lye ꞌa mdayaꞌ Xꞌnaan ꞌin neꞌ, chaꞌ ngwa biyaꞌ suꞌwe tiꞌ nten nchga kichen seꞌen ndyaa neꞌ kanꞌ, chaꞌ chañi ꞌa chaꞌ ꞌin Ndiose nu ngwaꞌu neꞌ; ngwa biyaꞌ tiꞌ nten kichen kanꞌ xa nu naꞌan neꞌ chaꞌ tnun nu yꞌni neꞌ kanꞌ chabiyaꞌ ꞌin Ndiose. Ngwañaꞌan ka chaꞌ.

SAN MATEO 9:37

Bra kanꞌ ykwiꞌ Jesús loꞌo neꞌ nu ngiꞌni xaꞌan chaꞌ ꞌin yu, ytsaꞌ yu ska chaꞌ ꞌin neꞌ chaꞌ ꞌin nten kaꞌan kanꞌ. Ykwiꞌ yu chaꞌ ja ya kunan suꞌwe nten kanꞌ chaꞌ ꞌin Ndiose, chaꞌ ñaꞌan tiꞌ ska jyan nu suꞌwe ꞌa ngutsi chaꞌ wa ndla ti kuꞌni neꞌ kwa ꞌin ran, ngwañaꞌan lka nten kanꞌ. ―Chañi chaꞌ nsuꞌwi ꞌa tñan re chaꞌ chkwianꞌ loꞌo nten chaꞌ sten neꞌ chaꞌ ꞌñaǎn ―ndukwin Jesús ꞌin neꞌ kanꞌ―. Loꞌo chinꞌ ti nten ndiya nu ka kuꞌni tñan re.

1 CORINTIOS 3:6

Ñaꞌan tiꞌ ska nten nu kata ska loo nan, loꞌo kanꞌ xka nten nsuꞌwa tyiꞌa suun nan kwiñii kanꞌ, ngwañaꞌan ngiꞌni bare loꞌo wan; naꞌ lkaǎn nu yiꞌaǎn ytsaǎnꞌ chaꞌ kanꞌ ꞌwan kulo ndukwa la, loꞌo chunꞌ ndiꞌin la yaa Polo chaꞌ kwaꞌu la chaꞌ kanꞌ ꞌwan. Loꞌo ska ti Ndiose ngiꞌni Ni chaꞌ kaluu suꞌwe chaꞌ kanꞌ niꞌ kasiya ꞌwan.

COLOSENSES 2:7

Ngwañaꞌan xñi suꞌwe wan chaꞌ ꞌin Jesús, chaꞌ ka biyaꞌ tiꞌ wan nchga seꞌen ndukwa kiyaꞌ chaꞌ kanꞌ; chaꞌ Jesús ni, kanꞌ lka kiyaꞌ nchga chaꞌ nu wa msñian, ti kwiꞌ chaꞌ nu ngwaꞌu neꞌ ꞌwan nu ngwa bra kanꞌ. Loꞌo ngwañaꞌan, nchga tsan tya wan xuꞌwe ꞌin Krixtu bra kanꞌ.

EFESIOS 2:10

Ndiose ngwiñan Ni ꞌñaan taꞌaan, kwiꞌ Ni yꞌni suꞌwa Ni chaꞌ ꞌñaan loꞌo Jesucristo; loꞌo ni, nchka tiꞌ Ni chaꞌ xkwiꞌ chaꞌ suꞌwe ti kuꞌnian xa nu tyiꞌian lo chalyuu, chaꞌ wa lka nda Ni ska tñan suꞌwe nu ka kuꞌnian kwenta skaan lo chalyuu re.

1 CORINTIOS 6:19

¿Ja ndiꞌya wan kwenta chaꞌ ndiya ꞌa tiꞌ Ndiose ꞌwan, chunꞌ wa nda Ni Tyiꞌi Ni chaꞌ kanun Ni niꞌ kasiya ꞌwan a? Loꞌo ni, siꞌi ti ykwiꞌ ti wan ndlo wan tñan ꞌwan, Ndiose ndlo Ni tñan ꞌwan. Kaꞌan ꞌa chaꞌ suꞌwe yꞌni Ni loꞌo wan chaꞌ mdoꞌo laa wan ꞌin chaꞌ kuxi, chaꞌ lka wan nten ꞌin Ndiose; kanꞌ chaꞌ kuꞌni tnun wan ꞌin Ndiose nchga seꞌen ndiꞌin wan, tyuꞌwi tiꞌ wan ꞌin Ni, kwiꞌ ngwañaꞌan tyukwi ti tiye wan kuꞌni wan nchga tñan nu kulo Ndiose ꞌwan.

LOS HECHOS 4:11

Ñaꞌan tiꞌ ska nten nu nñan naꞌan, nu nxkwan ska kee tnun chaꞌ ja suꞌwe ran, nxkeꞌ tiꞌ yu, ni siya lkwa ꞌa ñaꞌaan loo ran, ngwañaꞌan lka wan chaꞌ ja xlyaa wan kunan wan chaꞌ nu ykwiꞌ Jesús loꞌo wan. Ñaꞌan tiꞌ kee nu wa nxkwan wan, ngwañaꞌan lka Jesús kanꞌ, chaꞌ ja ndukwa wan chaꞌ nu ykwiꞌ yu siyaꞌ ti. Loꞌo ni, ndloo la nka Jesús kanꞌ,

3 SAN JUAN 1:8

kanꞌ chaꞌ nan ni, taꞌa msñian chaꞌ ꞌin Krixtu, ndiꞌin chaꞌ tayaanꞌ ꞌin neꞌ kanꞌ. Kwiꞌ ngwañaꞌan ka suꞌwa chaꞌ ꞌñaan loꞌo neꞌ kanꞌ bra nu snean chaꞌ nu ñi nu wa ngwaꞌu Krixtu ꞌñaan nde kichen seꞌen tijyuꞌ la.

2 CORINTIOS 6:16

Ñaꞌan tiꞌ ꞌwan nu ndiya ꞌa tiꞌ Ndiose ꞌwan, ja ka suꞌwa chaꞌ ꞌwan loꞌo xka ta nten nu msñi chaꞌ ꞌin ya ñaꞌan ti joꞌo; kwiꞌ Ndiose nu luꞌu ndiya ꞌa tiꞌ ꞌñaan chunꞌ nganun Tyiꞌi Ni niꞌ kasiya ꞌñaan. Nde ndiya ska chaꞌ nu ykwiꞌ Ndiose: Tyiꞌiǐn nde seꞌen ndiꞌin nten kanꞌ, ndukwin Ni, kwiꞌ ngwañaꞌan tyaꞌaǎn loꞌo nten kanꞌ; kaǎn Ndiose chaꞌ ꞌin neꞌ kanꞌ, kanꞌ chaꞌ ka neꞌ kanꞌ nten ꞌñaǎn. Ngwañaꞌan ndukwin Ni.

HEBREOS 3:6

Loꞌo Krixtu ni, suꞌwe la ti tñan nu yꞌni yu, chunꞌ lka yu Sñiꞌ ykwiꞌ Ndiose, lka yu ndloo ꞌin nchga nten nu ndiꞌin chaꞌ ꞌin Ni. Loꞌo nan, ti kwiꞌ nten ꞌin Ndiose lkaan, xa nu ja ntsean ꞌaan tyukwi tyempu nu nsuꞌwian chalyuu, bra nu ti ndyaa ñaꞌan suꞌween tianꞌ ꞌin Ni chaꞌ ndiꞌin taan ꞌin Krixtu chaꞌ kulaa ji Ni ꞌñaan.

SAN MATEO 16:18

Tyu naan, kanꞌ chaꞌ nuꞌwin kaa sa ñaꞌan lka ska kee nu nsu kiyaꞌ naꞌan. Chañi ꞌa chaꞌ nu ykwiiꞌ tsan; kanꞌ lka suun chaꞌ ꞌin nten ꞌñaǎn, chaꞌ tsaa ꞌa nganun chaꞌ nu ykwiiꞌ ngwañaꞌan. Ja ka ꞌin kuneꞌ xaꞌan tyijin lyo ꞌin nten ꞌñaǎn; loꞌo kwiꞌin kuxi, loꞌo ayman, loꞌo nten, ja tukwin ka ꞌin tyijin lyo ꞌin nten ꞌñaǎn, ni siya kaja nten ꞌñaǎn siꞌya chaꞌ kuxi.

SAN MATEO 15:13

―Stiǐn Ndiose nu ndiꞌin nde niꞌ kwan, xkwan Ni nchga kixinꞌ nu siꞌi nan kwiñii nu yta Ni, chaꞌ ja suꞌwe kixinꞌ kanꞌ ―ndukwin Jesús ꞌin neꞌ―.