1 CORINTIOS 13:12 - Chatino Zona Alta Occidental

¹² Ngwañaꞌan nka chaꞌ ꞌñaan seꞌen ndiꞌian lo chalyuu re; siyaꞌ ti ndyiji ska chaꞌ ꞌin Ndiose ꞌñaan, siꞌi sa ñi ti nnaan chaꞌ kanꞌ. Ñaꞌan tiꞌ si ñaꞌaan ꞌñaan ti ykwiꞌ tian lo ska kunaan, ska ndijin ti ñaꞌaan ꞌñaan bra kanꞌ; nde loo la ka biyaꞌ ji tianꞌ nchga chaꞌ kanꞌ. Wa lka ti chaꞌ jlyo tianꞌ ni, nde loo la kiꞌyaan suꞌwean kwenta nchga loo chaꞌ; bra kanꞌ xuꞌwi lyoan ꞌin Ndiose ti kwiꞌ sa ñaꞌan nu nsuꞌwi lyo Ni ꞌñaan.

1 CORINTIOS 13:12 Referans Kwoze

1 SAN JUAN 3:2

ꞌWan neꞌ taꞌaan nu ndiya ꞌa tiǎnꞌ ꞌwan, wa lkaan sñiꞌ Ndiose ni, ni siya ja ya ka biyaꞌ tianꞌ sa ñaꞌan ka suꞌwe la chaꞌ ꞌñaan, bra nu tyiꞌian loꞌo Ndiose nde loo la. Sa ñaꞌan lka ykwiꞌ Jesucristo, kwiꞌ ngwañaꞌan kaan bra nu kwaꞌu tloo Jesucristo ꞌñaan xa wa mdyii chalyuu re; bra kanꞌ ka ñaꞌaan ꞌin Jesucristo sa ñaꞌan nu lka ykwiꞌ Ni. Sa kanꞌ ti chaꞌ nchka biyaꞌ tianꞌ ni.

2 CORINTIOS 3:18

Kwiꞌ ngwañaꞌan lka chaꞌ ꞌñaan, taꞌaan nu ndiꞌin chaꞌ ꞌñaan loꞌo Jesús, chkanꞌ tijyuꞌ chaꞌ wa nda Xꞌnaan ska xaa nu xuꞌwi tloan. Ja nꞌni chaꞌ chkunꞌ ska teꞌ tloan, chaꞌ ti kwiꞌ chaꞌ tnun kanꞌ lka nu ti ngiꞌni tñan loꞌoan, loꞌo lye la ngiꞌni chaꞌ kanꞌ tñan ni, chaꞌ xaꞌan tyukwi ñaꞌaan, chaꞌ kaan sa ñaꞌan lka Ndiose Xꞌnaan siyaꞌ ti. Nde seꞌen ndiꞌin ykwiꞌ Xꞌnaan nu lka Tyiꞌi ykwiꞌ Ni, nde kwa ndyoꞌo chaꞌ tnun kanꞌ.

FILIPENSES 3:12

Ja chkwiǐnꞌ chaꞌ wa mdyii ngwa suꞌwe kasiya ꞌñaǎn tloo Ndiose siyaꞌ ti, loꞌo ni, ja ndiꞌin ꞌa kiꞌya ꞌñaǎn; ja chkwiǐnꞌ ngwañaꞌan. Nan wa ykwiꞌ Jesucristo loꞌoan chaꞌ lkaan nten ꞌin Ndiose, kanꞌ chaꞌ lye ꞌa ngiꞌniǐn tñan chaꞌ ka suꞌwe ji kasiya ꞌñaǎn.

EL APOCALIPSIS 22:4

Xuꞌwi lyo suꞌwe neꞌ ꞌin Ndiose bra kanꞌ, chaꞌ la kwa kala nchga nten nu ndukwa nin Ni chkan neꞌ.

SANTIAGO 1:23

Nchga nten nu nchka tiꞌ kunan chaꞌ nu nchkwiꞌ Ni loꞌoan, loꞌo bra kanꞌ ja xlyaa neꞌ kuꞌni neꞌ kasu ꞌin chaꞌ kanꞌ, lka nten kanꞌ ñaꞌan tiꞌ nten nu nduun ñaꞌan kwiꞌya ꞌin neꞌ, ti ykwiꞌ ti neꞌ lo ska kunan;

2 CORINTIOS 5:7

Xꞌni ndaloan seꞌen ndiꞌian lo chalyuu chunꞌ ndyaa ñaꞌan tianꞌ chaꞌ nu wa ykwiꞌ Ni loꞌoan, ni siya ja ya ñaꞌaan sa ñaꞌan ka chaꞌ kanꞌ chunꞌ ndiꞌin la.

SAN MATEO 5:8

’Kwiꞌ ngwañaꞌan, ka suꞌwe nka tiye nten nu luwi kasiya ꞌin, chaꞌ wa lka nda Ndiose chabiyaꞌ ꞌin neꞌ kanꞌ, chaꞌ ñaꞌan neꞌ ꞌin ykwiꞌ Ni nde loo la.

1 CORINTIOS 8:3

Si suꞌwe nka tiyean ñaꞌaan ꞌin Ndiose, xuꞌwi lyo Ni ꞌñaan bra kanꞌ.

ROMANOS 8:18

Ndiya bra ndijian chinꞌ nu tiꞌí bra nu ndiꞌian lo chalyuu; chinꞌ ti chaꞌ lka chaꞌ kanꞌ, loꞌo ja suꞌwa chaꞌ tiꞌí kanꞌ loꞌo chaꞌ suꞌwe nu kaja ꞌñaan nde loo la, nxkeꞌ tiǎnꞌ. Loꞌo ngwañaꞌan, ti ji kwaꞌu Ni nchga chaꞌ ꞌñaan, sa ñaꞌan ka chaꞌ suꞌwe kanꞌ nde loo la.

SAN MATEO 18:10

’Ja suꞌwe xa nu ja kuwe tiꞌ wan ꞌin ska nten ꞌñaǎn, ñaꞌan tiꞌ ska nu xuwe ti re. Chañi chaꞌ nchkwiǐnꞌ loꞌo wan, chaꞌ ndiya angajle seꞌen ndiꞌin Ndiose nu ndiꞌin kwan ꞌin nchga nu xuwe ti kanꞌ; nchga bra nsuꞌwi chabiyaꞌ chkwiꞌ angajle kanꞌ loꞌo Stiǐn Ndiose chaꞌ ꞌin nu xuwe kanꞌ.

SAN JUAN 10:15

Sa ñaꞌan nu nsuꞌwi lyo Stiǐn ꞌñaǎn, kwiꞌ ngwañaꞌan nsuꞌwi lyoǔn ꞌin Stiǐn; sa ñaꞌan nu ndiꞌin chaꞌ ꞌñaǎn loꞌo Stiǐn, ngwañaꞌan ndiꞌin chaꞌ ꞌñaǎn loꞌo nten ꞌñaǎn. Loꞌo naꞌ, xlyaǎn kajaǎn chaꞌ ja kanaꞌ kasiya ꞌin nten ꞌñaǎn ―ndukwin Jesús ꞌin neꞌ―.

1 CORINTIOS 13:11

Bra nu ti kuneanꞌ, xkwiꞌ tñan nu ngiꞌni nu kuneꞌ yꞌnian; sa ñaꞌan nu ndaꞌan chaꞌ tiye ska nu kuneꞌ, ngwañaꞌan ykwianꞌ bra kanꞌ, ngwañaꞌan mdaꞌan chaꞌ tiyeen, ngwañaꞌan mskeꞌ tianꞌ. Xa wa kulaan, bra kanꞌ ja ndaꞌan ꞌa chaꞌ tiyean sa ñaꞌan nu ndaꞌan chaꞌ tiye ska nu kuneꞌ.