Juan 3:16 - Porciones del Nuevo Testamento

¹⁶ Daizezebara ẽjũãne bꞌera kꞌãbãẽã kʉãgꞌaba diasia zhi Warra abꞌa bꞌʉta, izhidꞌebemata ĩjãbʉrʉra adua ẽbamarẽã, awuarabʉrʉ erubꞌamarẽã Daizeze ũme bꞌai jõ ẽãta.

Juan 3:16 Referans Kwoze

Romanos 5:8

Mawũãmina Daizezebara izha dazhira kʉãgꞌata kꞌawuabibʉrʉta wadꞌi kꞌazhirua omiãta bꞌedꞌe Cristota beubisia dazhibari.

Juan 3:15

Aramaʉ̃ne mʉnebemata ĩjãbʉrʉra adua ẽbamarẽã, awuarabʉrʉ erubꞌamarẽã Daizeze ũme bꞌai jõ ẽãta.

Romanos 8:32

Daizezebara miã zhi Warrasidꞌa wããgꞌa ẽbasia, awuarabʉrʉ bebuidꞌu chãbꞌarisia dazhirã jõmaʉ̃bari. ¿Mawũẽ dazhirãã sãwũã ne jõma dia ẽbaipe zhi Warra bawaraua?

Juan 6:40

Mʉ Zeze mʉ zokꞌadꞌabara krĩña bꞌʉa zhi Warra mʉta krĩcha bꞌebara, mʉnebemata ĩjã bꞌebara jõmaʉ̃ba erubꞌeamarẽã Daizeze ũme bꞌai jõ ẽãta. Aramaʉ̃nerã maʉ̃rãta beudꞌapeadꞌara mʉã piradrʉbigaya ewari nʉmʉta jõbʉrʉdꞌera.

Juan 3:36

Zhi Warradꞌebemata ĩjã bꞌʉbara erubꞌʉa Daizeze ũme bꞌai jõ ẽãta, mawũãmina zhi Warradꞌebemata ĩjã ẽãbara erubꞌa ẽã Daizeze ũme bꞌai jõ ẽãrã, awuarabʉrʉ Daizezeba kĩrũbiba pua kꞌawua oya.

Juan 10:28

Mʉãrã dedꞌekaya Daizeze ũme bꞌai jõ ẽãta, mawũẽ aduadꞌa ẽã, miõba jãrĩkua ẽã mʉ juwuadꞌebara.

Romanos 5:10

Izhi ũme zhi jurata bꞌedꞌe Daizezebara dazhira izhi bawara zhibiata bꞌʉsia zhi warra bebudꞌeba, mawũã zhibiata bꞌʉdꞌaba ẽdrʉdꞌaya Cristota bꞌʉdꞌeba.

Juan 1:29

Nrũẽma Juanbara Jesús izhima uruta ũdupe mawũãsia: Akaudua, kꞌãʉ̃ta Oveja zake Daizezedꞌea, naʉ̃bara kꞌazhirua ne ẽã oya ẽjũãne zhãrã bꞌeta.

Mateo 9:13

Mawũẽ wãũdua, mobe sãwũãta kꞌawaudua Daizezeba mawũãnata: Mʉãrã krĩña bꞌʉa zhãrã sozuburia bꞌeaita mʉĩta nendʉwʉrʉta babue bꞌeai kꞌãñabara. Daizezeba mawũãnaneba mʉãrã jʉrʉdꞌe ze ẽbasia ãzhikusa biata bꞌeta, awuarabʉrʉ ẽdrʉbigaita jʉrʉdꞌe zesia kꞌazhirua omiãrãta, kꞌazhiruara ãmape Daizezeta pẽwãnamarẽã.

Juan 1:14

Bedꞌeara Beubari Bape dazhirãne edꞌa bꞌasia, kʉãgꞌaba bira bꞌʉba kꞌawuabiga bꞌasia Daizezedꞌebema wãrãta. Daibara ũdusidꞌa izhira zhi zromata, zhi Warra abꞌa bꞌʉta zhi zroma basia zhi Zezedꞌeba.

Juan 1:18

Daizezera miõba ũdukꞌa, mawũãmina zhi Warra abꞌa bꞌʉta zhi Zeze ũme bꞌʉba dazhirãã kꞌawuabisia sãwũã bꞌʉta.

Marcos 12:6

Wadꞌi abꞌa erubꞌʉta erubꞌasia zhi warra izha kʉãgꞌata. Maʉ̃sidꞌa maʉ̃rãma zokꞌabʉrʉta mawũãsia: Wawiadꞌaya mʉ warrara.

Lucas 2:14

¡Daizezera ibia jaraudua ʉ̃trera, druadꞌera adu-a bꞌeaya izha bia erunʉmʉta bꞌera!

Juan 3:18

Izhidꞌebemata ĩjãbʉrʉra adua ẽã, mawũãmina zhi ĩjã ẽãrã aduaya, ĩjã ẽãba Daizeze Warra abꞌa bꞌʉdꞌebemata.