Ешая 44:3 - Мукъаддес Китап

³ Сувсагъан топракъкъа сувларны, къуру ерге озенлерни акъызаджагъым. Балаларынъа Рухумны тёкеджегим, эвлятларынъа багъышлавымны береджегим.

Ешая 44:3 Referans Kwoze

Ёэль 2:28

– Ондан сонъ Мен эр бир джангъа Рухумны береджегим, ве огъулларынъызнен къызларынъыз пейгъамберлик этеджек, сизинъ къартларынъыз тюшлер кореджек, ве йигитлеринъиз руялар кореджек.

Фаалиет 2:17

Мына, сонъки куньлерде бойле шей оладжакъ, – дей Алла: – Мен эписи адамларнынъ устюне Озь Рухумны ягъдыраджагъым. Сизинъ огъул ве къызларынъыз пейгъамберлик япаджакълар, йигитлеринъиз руялар кореджеклер, къартларынъыз беджериледжек тюшлер кореджеклер.

Ешая 59:21

– Оларгъа берген васиетим будыр, – дей РАББИ. – Сеннен булунгъан Рухум ве агъзынъа къойгъан сёзлерим эбедиен эм сенинъ агъзынъда, эм балаларынънынъ агъзында, эм торунларынънынъ агъызларында къаладжакъ. Шимдиден ве эбедиен ойле оладжакъ!

Икметли сёзлер 1:23

Меним опькеме къулакъ асынъыз, сонъ мен сизге озь рухумны тёкеджегим, сёзлеримни айтаджагъым.

Сырларнынъ ачылувы 21:6

Сонъ манъа бакъып, деди: – Эр шей ерине кельди! Мен – Альфа ве Омега, эр шейнинъ Башы ве Сонъу. Сувсагъан адамгъа яшайыш чокърагъындан бедава сув берерим.

Фаалиет 2:39

Бу ваде сизлернен балаларынъызгъа ве даа узакъта олгъан, бизим Алла Раббимиз чагъыргъан эписи адамларгъа берильген, – деди.

Зекерья 12:10

Давутнынъ союна ве Ерусалимде яшагъанларгъа исе мерамет ве ярдым рухуны ёллайджагъым. Олар Онъа, озьлери тешип ольдюрген инсангъа бакъаджакълар ве Онынъ ичюн, бирден-бир ольген огълу артындан агълагъанлар киби, агълайджакъ, ольген биринджи догъгъан балагъа киби янаджакъ.

Ехезкель 39:29

Олардан бир даа юзюмни сакъламайджагъым, лякин Рухумны Исраиль халкъына тёкеджегим, – дей РАББИ-ТААЛЯ.

Ешая 32:15

Бойле ал чокъкъа сюреджек, амма сонъундан устюмизге юкъарыдан Рух энеджек, сахра багъ-багъчагъа чевириледжек, багъча да орман киби юксек оладжакъ.

Фаалиет 10:45

Пётрнен кельгенлер Исагъа инангъан сюннет этильген еудийлер эди. Олар Мукъаддес Рух башкъа халкъларнынъ устюне энгенини корип, шашып къалдылар,

Ешая 41:17

Ёкъсулларнен фукъарелер сув къыдыраджакълар, амма тапалмайджакълар. Сувсузлыкътан тиллери къуруйджакъ. Мен, РАББИ, оларгъа джевап береджегим, Мен, Исраильнинъ Алласы, оларны къалдырмайджагъым.

Ёэль 3:18

О куню дагълардан юзюм шырасы тамлайджакъ, байырлардан сют акъаджакъ, Ехуданынъ эписи озенлери сувгъа толаджакъ. РАББИнинъ Эвинден бир чокъракъ чыкъаджакъ ве Шиттим вадийине сув береджек.

Фаалиет 2:33

О, Алланынъ къудретинен юксельтильгенден сонъ, Бабанынъ вадеси боюнджа Мукъаддес Рухны алып, бизге ягъдырды. Шимди сизлер буны корип, эшитип турасыз.

Ехезкель 34:26

Оларны да, Меним дагъымнынъ чевресини де берекетли япаджагъым ве вакътында ягъмурларны ягъдыраджагъым. Ягъмурлар берекет кетиреджеклер.

Ешая 61:9

Миллетлер арасында оларнынъ балаларыны биледжеклер, халкъларнынъ арасында эвлятлары намлы оладжакълар. Оларны корьген эр кес биледжеклер ки, олар – РАББИнинъ багъышлагъан эвлятларыдыр.

Сырларнынъ ачылувы 22:17

Рух ве келин: – Кель! – дейлер. Эшиткен адам да: – Кель! – десин. Сувсагъан адам кельсин, истеген адам яшайыш сувуны бедава алсын.

Ешая 48:21

РАББИ оларны сахрадан кечиргенде, сувсузлыкънен чекиштирмеди, оларгъа къаядан сувны чыкъарды, къаяны ярды да, сувлар фышкъырды.

Ешая 65:23

Бошуна чалышмайджакълар, беля ичюн де бала тапмайджакълар. Озьлери де, эвлятлары да РАББИ яхшылыкъ этильген халкъы оладжакъ.

Зебур 63:1

Баш чалгъыджы ичюн. Давутнынъ зебуры.

Ешая 49:10

Ачлыкъ чекмейджеклер, сувсамайджакълар, оларны сыджакънен кунь къырмайджакъ. Оларны Аджыгъан оларгъа ёл косьтереджек, сув чокъракъларына алып келеджек.

Ешая 32:2

Эр бири ельге къаршы бир къорув киби, борандан сакъланув ери, сувсуз топракъта бир чокъракъ, къуругъан топракътаки юксек къаянынъ аткъан талдасы киби оладжакъ.

Матта 12:43

Арам рух инсандан чыкъкъан сонъ, сувсуз ерлерде быралкъыланып юре, озюне раатланмагъа ер къыдыра, амма тапалмай.

Эюп акъкъында китап 5:25

Балаларынъ чокълашаджакъ, эвлятларынъ да ер юзюндеки от киби оладжакъ.

Ешая 48:19

Эвлятларынъ – къум киби, сенинъ торунларынъ – къум данелери киби чокъ сайылы олур эди. О заман адлары Меним огюмден силинмез, ёкъ олмаз эди.

Ешая 55:1

Эй, сувсагъанлар! Эпинъиз сувларгъа келинъиз! Кумюши олмагъанлар! Барынъыз, сатын алынъыз, ашанъыз! Барынъыз, шарап ве сютни кумюшсиз, парасыз алынъыз.

Ехезкель 36:27

Ичинъизге Озь Рухумны къояджагъым ве ойле япарым ки, сизлер низамнамелериме коре яшайджакъсынъыз, къарарларымны беджереджексинъиз.

Ехезкель 47:8

О манъа шойле деди: – Бу сувлар куньдогъуш топракъларына акъа. Олар Арава тарафына тюшеджек ве Олю денъизге, онынъ кирли сувларына тёкюледжек де, денъиз суву татлы оладжакъ.

Хошеа 10:12

Озьлеринъиз инсафлы ишлер сачынъыз ве ишанчлы севгини джыярсынъыз. Юреклеринъизнинъ къазылмагъан топрагъыны къазынъыз, чюнки РАББИни къыдырмагъа вакъыт кельди. О заман РАББИ кельгенде, сизге акъикъатны ягъдыраджакъ.

Микъа 5:7

Якъупнынъ сагъ къалгъан огъуллары бир чокъ халкъларнынъ арасында РАББИ ёллагъан чыкъ киби, отларгъа ягъгъан ягъмур киби оладжакъ. Олар ич бир адамгъа таянмаз, ич кимсени беклемез.

Ешая 27:3

– Мен, РАББИ, юзюм багъыны къорчалайым, оны кереккенде суварайым, анда кимсе кирмесин деп, гедже-куньдюз къаравуллайым.

Ёэль 2:27

О вакъыт Мен Исраильнинъ арасында олгъанымны биледжексинъиз, Мен – РАББИм, сизинъ Алланъыз, башкъа бири ёкъ. Халкъым омюрлик бир даа масхара олмайджакъ.

Ёэль 3:1

Мына, о куньлерде ве о заманларда Ехуда ве Ерусалим халкъыны сюргюнликтен къайтараджагъым.