SAN MATEO 8:9 - Chatino Tataltepec

⁹ Xu'na sendaru laca na'; laca na' loo ji'i̱ sca siyento tya'a sendaru, lo'o jua'a̱ ntsu'u nu laca loo jna'. Si culo na' cña ji'i̱ tsaca sendaru bi' ndi'ya̱: “Yaa clya nu'u̱”, hora ti tsaa yu, cha' nti' na' cha' tsaa yu. Jua'a̱ si chcui' na' lo'o chaca yu: “Ca̱a̱ nu'u̱ ca nde”, hora ti ca̱a̱ yu slo na' li'. Jua'a̱ si culo na' cña ji'i̱ msu 'na: “Cua'ni sca cña 'na”, ñacui̱ na' ji'i̱; hora ti cua'ni yu cña bi' 'na ―nacui̱ capitán ji'i̱ Jesús―. Jua'a̱ nu'u̱ ni, jlo ti' na' cha' taca jinu'u̱ culo cña cha' cati̱ quicha bi'.

SAN MATEO 8:9 Referans Kwoze

TITO 2:9

Chcui' nu'u̱ lo'o ngu' nu laca msu nu ngüi'ya ñati̱ cha' taquiya' ngu' ji'i̱ lcaa cha' nu nchcui' xu'na ngu', cha' tso'o ti cua'ni ngu' lcaa cña ji'i̱ ngu', cha' ná xlyú ngu' cha' hichu̱' nu laca xu'na ngu'.

COLOSENSES 3:22

Cu'ma̱ ngu' msu nu ndyu'ni cña ji'i̱ ngu' laja ti, taquiya' ma̱ lcaa cña nu culo ñati̱ nu laca loo ji'i̱ ma̱ nde chalyuu. Si'i na cua'ni ti ma̱ jua'a̱ cha' tyanu tso'o cha' ji'i̱ ma̱ lo'o ngu' lo'o ndu̱ ti ngu' slo ma̱, cha' ndyi'ya ngu' cuentya ji'i̱ ma̱ si ndu'ni ma̱ cña; pana tyucui tyiquee ma̱ cua'ni ma̱ cña bi', xqui'ya cha' lcaa hora ndube ti' ma̱ ji'i̱ ycui' nu Xu'na na.

SAN LUCAS 7:8

Chaca cha' nacui̱ yu ji'i̱ cua: “Lo'o jua'a̱ na'”, nacui̱ yu, “ntsu'u xa' ñati̱ nu laca loo la nu nclyo cña 'na. Lo'o jua'a̱ nclyo na' cña ji'i̱ sendaru nu cuentya jna'”, nacui̱. “Tsaa ngu' lquichi̱ 'na, si culo na' cña ji'i̱ ngu' cha' tsaa ngu'; lijya̱ ngu' slo na', si xi'ya na' ji'i̱ ngu' cha' ca̱a̱ ngu'; hora ti cua'ni msu jna' sca cña, si culo na' cña bi' ji'i̱ yu”, nacui̱ nu capitán bi'. “Jua'a̱ nu'u̱ ni, jlo ti' na' cha' taca jinu'u̱ culo nu'u̱ cña cha' cati̱ quicha bi'.” Tsa bi' ti cha' nti' capitán chcui' lo'o nu'u̱ ―nacui̱ ngu' tya'a tso'o nu capitán bi' ji'i̱ Jesús.

SAN LUCAS 4:39

Ndu̱ ti Jesús slo ma' ña'a̱ tsa yu ji'i̱ ma'. Li' ngua'a yu ji'i̱ tyique' bi', cha' tyu'u tyique' ji'i̱ ma'. Hora ti ndaca'a̱ ma', ngua'ni cña ti' ma' cha' caja xi na cacu ngu'.

SAN MATEO 8:8

Hora ti nguxacui̱ capitán cha' ji'i̱ Jesús li': ―Xu'na ―nacui̱ yu ji'i̱ Jesús―, ná tso'o tsaa nu'u̱ to' tyi na', cha' si'i ñati̱ tso'o laca na'. Tsa bi' ti cha' nti' na', cha' culo nu'u̱ cña cha' cati̱ quicha bi' tsiya' ti; jlo ti' na' cha' caca tso'o msu 'na li', masi tyijyu' ti tyu̱ nu'u̱ chcui'.

SAN MATEO 8:10

Ndube tsa ti' Jesús lo'o ndyuna cha' nu nchcui' capitán bi'. Li' nchcui' Jesús lo'o nu quiña'a̱ tsa ñati̱ nu lca'a̱ ji'i̱: ―Liñi tsa cha' nchcui' na' lo'o ma̱ juani ―nacui̱ Jesús ji'i̱ ngu'―. Bilya ña'a̱ na' tsiya' ti ji'i̱ sca ñati̱ nu tso'o tsa jlya ti' ji'i̱ ycui' Ndyosi, ñi'ya̱ jlya ti' nu capitán re; tyucui ña'a̱ nasiyu̱ Israel re ná ntsu'u ngu' nu jlya ti' jua'a̱.

SAN MARCOS 1:27

Ndyutsi̱i̱ tsa lcaa ngu' li'. Nchcui' ngu' lo'o tya'a ngu' ndi'ya̱: ―¿Ñi'ya̱ laca cha' re? ―nacui̱ ngu'―. ¿Ha xa' cha' nclyu'u nu jua ji'i̱ ñati̱? ―nacui̱ ngu'―. Nchca ji'i̱ yu jua culo yu cña, masi ji'i̱ cui'i̱ cuxi nclyo yu cña; hora ti nduna bi' cña nu ngulo yu ji'i̱, ndu'u nu cui'i̱ bi', ndyaa li'.

SAN LUCAS 9:1

Nguxuti'i̱ Jesús ji'i̱ nu tii tyucuaa tya'a ngu' nu ndyaca tsa'a̱ bi', cha' ta yu chacuayá' ji'i̱ ngu' cha' culo ngu' ji'i̱ lcaa lo cui'i̱ cuxi nu ntsu'u ji'i̱ ñati̱, lo'o jua'a̱ cua'ni ngu' jo'o ji'i̱ lcaa lo quicha nu ntsu'u ji'i̱ ñati̱.