SAN MATEO 8:16 - Chatino Tataltepec

¹⁶ Lo'o cua ngusi̱i̱, li' ndyalaa quiña'a̱ ngu' slo Jesús, lijya̱ lo'o ngu' ji'i̱ ngu' quicha nu ngusñi cui'i̱ cuxi ji'i̱. Li' ngulo Jesús cña ji'i̱ cui'i̱ cuxi bi', cha' tyu'utsu' ji'i̱ ngu' quicha; lo'o li' ndyaca tso'o ngu' bi'. Lo'o jua'a̱ ngua'ni Jesús jo'o ji'i̱ lcaa ngu' quicha nu ndya'a̱ slo.

SAN MATEO 8:16 Referans Kwoze

SAN LUCAS 4:40

Lo'o ndyaa cuichaa, li' ndyaa lo'o ngu' ji'i̱ lcaa tya'a ngu' nu quicha tsa cha' ngusñi tyu̱u̱ lo quicha ji'i̱ ngu', ndyalaa ngu' ca slo Jesús. Li' ngusta ya' Jesús hichu̱' ngu' quicha cuentya scaa ti ngu'. Hora ti ndyaca tso'o ngu' li'.

SAN MATEO 14:14

Lo'o ndyalaa yaca ni'i̱ bi' to' hitya, li' ngutu'u Jesús; na'a̱ yu cha' cua ndyalaa quiña'a̱ tsa ñati̱ cajua li'. Tya'na tsa ti' yu ji'i̱ lcaa ngu' bi', bi' cha' ngua'ni yu cha' ndyaca tso'o ngu' quicha nu ndya'a̱ ngu' lo'o.

LOS HECHOS 5:15

Li' ndyaa ngu' quichi̱ bi', ndyaa qui'ya ngu' ji'i̱ ngu' quicha nu ntsiya slo ngu'. Li' ngusta ngu' ji'i̱ ngu' quicha bi' lo jaa', masi lo qui'ña, cha' tsaa lo'o ngu' ji'i̱ ngu' quicha bi' ca to' calle su tyeje tacui Pedro. Ngua ti' ngu' masi cua'a̱ ti tyacala' nu nda Pedro loo ngu' quicha bi', nu lo'o nteje tacui yu. Tyaca tso'o nu quicha bi' li'.

SAN MARCOS 5:8

Tsa̱ ti cua ngulo Jesús cña ji'i̱ cui'i̱ xña'a̱ bi', cha' tyatsu' ji'i̱ yu quicha bi', bi' cha' tya'na nchcui' lo'o Jesús juani cha' ná xcube' yu ji'i̱. ―Tyu'u nu'u̱, tyaa nu'u̱ tsiya' ti ―nacui̱ Jesús ji'i̱ cui'i̱ xña'a̱ tsa̱ la.

SAN MATEO 12:22

Lo'o li' ndyaa lo'o ngu' ji'i̱ chaca nu quicha slo Jesús; cua ngusñi cui'i̱ xña'a̱ ji'i̱, bi' cha' ngua cu'u̱ tu'ba yu, jua'a̱ ngua cuityi̱' yu. Hora ti ngua'ni Jesús jo'o ji'i̱ nu quicha bi', cha' xa' nchcui' yu, xa' nda Jesús xee ndyu'u cloo yu.

SAN MARCOS 2:3

Li' ndyalaa jacua tya'a ñati̱, ndi'ya ngu' ji'i̱ sca nu quicha nu nchcu̱' tyucuí̱ tyucui ña'a̱.

SAN MATEO 9:2

Lo'o ndyalaa quichi̱ bi', li' ñaa lo'o ngu' ji'i̱ sca nu quicha nu nchcu̱' tyucuí̱ tyucui ña'a̱ yu; ñaa ngu' slo Jesús cha' cua'ni jo'o ji'i̱ nu quicha bi'. Ntsiya nu quicha bi' ne' sca catya̱. Pana jlo ti' Jesús cha' jlya ti' ngu' bi' ji'i̱, bi' cha' nchcui' lo'o nu quicha ndi'ya̱: ―Ca tso'o nu'u̱, sñi' ―nacui̱ Jesús ji'i̱ nu quicha―. Cua ngua'ni clyu ti' na' ji'i̱ qui'ya nu ntsu'u jinu'u̱.

SAN MARCOS 9:25

Lo'o na'a̱ Jesús cha' quiña'a̱ la ñati̱ cua tyu'u ti'i̱ ti ngu' slo, li' ngulo yu cña ji'i̱ cui'i̱ cuxi bi': ―Cui'i̱ cuxi nu'u̱ ni, la cui' nu'u̱ laca nu ngua'ni cu'u̱ ji'i̱ nu quicha re ―nacui̱ Jesús―. Culo na' cña jinu'u̱ juani cha' tyu'u nu'u̱ ji'i̱ yu cuañi' re. Nga'aa xlyú nu'u̱ ji'i̱ yu tsiya' ti ―nacui̱ Jesús ji'i̱ cui'i̱ cuxi.

SAN MATEO 8:33

Lo'o na'a̱ ngu' nu ña'a̱si̱i̱ ji'i̱ cube' bi' ñi'ya̱ nu ngua ji'i̱ ni', ndyutsi̱i̱ tsa ngu' li'. Ngusna ngu' ca quichi̱ cha' cacha' ngu' ji'i̱ ngu' quichi̱ ñi'ya̱ nu ngua ji'i̱ ngu' quicha nu ngusñi cui'i̱ xña'a̱ ji'i̱, lo'o jua'a̱ ndacha' ngu' ñi'ya̱ nu ngua ji'i̱ cube' bi'.

SAN MATEO 8:15

Li' ngusta ya' Jesús chu̱' ya' ma' cusu' bi', lo'o hora ti ndyu'u tyique' ji'i̱; ndyatu̱ ma' cusu' bi' li', cha' caque' xi na cacu Jesús lo'o ngu'.

SAN LUCAS 4:41

Lo'o jua'a̱ ngutu'u cui'i̱ cuxi ji'i̱ tyu̱u̱ tya'a ngu' quicha bi' li'. Ndu'u si'ya cui'i̱ bi' lo'o ndu'u ji'i̱ ngu': ―Sca ti nu'u̱ laca Sñi' ycui' Ndyosi ―nacui̱ cui'i̱ bi' ji'i̱ Jesús. Li' ngua'a Jesús chacuayá' ji'i̱ cui'i̱ cuxi cha' nga'aa chcui' bi' tsiya' ti. Cua ndyuloo cui'i̱ bi' ji'i̱ Jesús, cha' la cui' Cristo nu cua nda ycui' Ndyosi ji'i̱ lijya̱ chalyuu laca yu bi'.

SAN LUCAS 13:12

Lo'o na'a̱ Jesús ji'i̱ ma' cusu' bi', li' nchcui' yu lo'o ma': ―Cua ndyaca tso'o nu'u̱ juani, nga'aa tyacua quicha jua jinu'u̱ chaca quiya' ―nacui̱ yu ji'i̱ ma' cusu' bi'.