SAN MATEO 6:30 - Chatino Tataltepec

³⁰ Ñi'ya̱ lo'o tso'o tsa ngüiñá ycui' Ndyosi ji'i̱ queé cua, cha' nda Ni sca lo ste' bi', masi sca ti tsa̱ talo queé bi' lo'o li' tyaqui̱ ntsu'u quiya'; la cui' jua'a̱ ta ycui' Ni late' cacu' ma̱, masi xti tsa cha' jlya ti' ma̱ ji'i̱ ycui' Ni.

SAN MATEO 6:30 Referans Kwoze

SAN LUCAS 12:28

La cui' jua'a̱ lo'o quii nu ndi'i̱ ne' quixi̱' jua juani, ndyaluu quii bi' tso'o ti; pana chaca tsa̱, li' nga'aa tyaca̱' cha' cua ndyaqui̱. Ycui' Ndyosi ndu'ni cha' tso'o tsa ña'a̱ quii; jua'a̱ cu'ma̱ ni, chañi cha' ta ycui' Ni late' cacu' ma̱, masi xti tsa cha' jlya ti' ma̱ ji'i̱ Ni.

SAN MATEO 14:31

Hora ti ngusñi Jesús ya' Pedro. ―Xti tsa tyempo ndalo nu'u̱ cha' jlya ti' nu'u̱ 'na ―nacui̱ Jesús ji'i̱ Pedro bi'―. ¿Ni cha' ná jlya tso'o ti' 'na?

1 PEDRO 1:24

Ndi'ya̱ nscua cha' lo quityi ji'i̱ ycui' Ndyosi: Ñi'ya̱ laca quixi̱', jua'a̱ laca ñati̱ chalyuu. Lcaa na nu tso'o ña'a̱ nu ntsu'u ji'i̱ ñati̱ laca ñi'ya̱ nti' sca queé nu ndyu'ú ne' quixi̱' ti; ndyanaa quixi̱' bi', li' ndye queé bi', ngüityi tsiya' ti. Lo'o jua'a̱ laca lo'o ñati̱ lo'o lcaa cha' tso'o nu ntsu'u ji'i̱ ngu' nde chalyuu, tye cha' tso'o bi' ji'i̱ ngu' stu'ba ti lo'o ycui' ngu'.

SAN MATEO 16:8

Pana, ngua tii Jesús cha' ná ngua cuayá' ti' ngu' bi'. ―¿Ni cha' ndube ti' ma̱ cha' ná lo'o xlyá teje' lijya̱ ma̱? ―nacui̱ ji'i̱ ngu' bi'―. Xti tsa cha' jlya ti' ma̱ ji'i̱ ycui' Ndyosi.

SAN MATEO 8:26

Li' nguxacui̱ Jesús cha' ji'i̱ ngu' bi': ―¿Ni cha' ntsi̱i̱ tsa ma̱? ―nacui̱ ji'i̱ ngu'―. ¡Xi tsa tyempo ndalo ma̱, cha' ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni cña! Lo'o li' ndyatu̱ Jesús, nchcui' lo'o cui'i̱ lo'o clyoo' cha' cua'a ji'i̱ cha' bi'; hora ti ngua ti̱ bi' li'.

SAN JUAN 20:27

Li' nchcui' Jesús lo'o ycui' Tomás: ―Cua̱a̱ nu'u̱ ca nde, cojo' sne ya' nu'u̱ su ntucua cuityu ya' na' ―nacui̱―. Ña'a̱ tso'o nu'u̱ su ntucua cuityu ya' na' re. Cua̱a̱ nu'u̱, cojo' ya' sii' na'. Nga'aa cua'ni nu'u̱ cha' ná jlya ti' nu'u̱ 'na, taca jlya tso'o ti' nu'u̱ 'na juani ―nacui̱ Jesús.

SAN MARCOS 4:40

Lo'o li' nchcui' Jesús lo'o ngu' nu ndyaca tsa'a̱ ji'i̱: ―¿Ni cha' ntsi̱i̱ tsa ma̱? ―nacui̱ Jesús ji'i̱ ngu'―. ¿Ni cha' laca ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni jua'a̱? ―nacui̱.

HEBREOS 3:12

Cu'ma̱ tya'a ngusñi na cha' ji'i̱ Jesús, ña'a̱si̱i̱ ma̱ ji'i̱ ycui' ca ma̱, cha' ni tsaca ma̱ ná tya'a̱chu̱' ma̱ ji'i̱ cha' ji'i̱ ycui' Ndyosi nu lu'ú ca, cha' ná caca cuxi cresiya ji'i̱ ma̱, ñi'ya̱ si nga'aa taquiya' ma̱ cha' ji'i̱ Ni.

SAN LUCAS 9:41

Li' nguxacui̱ Jesús cha' ji'i̱ ngu': ―Ná jlya ti' ma̱ 'na tsiya' ti, cu'ma̱ ñati̱ chalyuu ―nacui̱ Jesús―, cha' cuxi tsa cresiya ji'i̱ ma̱. Nga'aa tso'o tyanu na' slo ma̱, nga'aa talo tyiquee na' ji'i̱ ma̱ tsiya' ti ―nacui̱ Jesús ji'i̱ ngu'―. Ca̱a̱ lo'o ji'i̱ sñi' slo na' ―nacui̱ Jesús ji'i̱ sti nu quicha bi' li'.

SAN MARCOS 9:19

―Ná jlya ti' cu'ma̱ tsiya' ti ―nacui̱ Jesús ji'i̱ ngu' bi'―. Cuxi tsa cresiya ji'i̱ ma̱. Nga'aa tso'o tyanu na' slo cu'ma̱, nga'aa talo na' ji'i̱ ma̱ tsiya' ti. Pana ca̱a̱ lo'o ma̱ ji'i̱ nu quicha jua slo na' juani.

SAN MATEO 17:17

―Ná jlya ti' cu'ma̱ tsiya' ti ―nacui̱ Jesús ji'i̱ ngu' bi'―. Cuxi tsa cresiya ji'i̱ ma̱. Nga'aa tso'o tyanu na' slo cu'ma̱, nga'aa talo na' ji'i̱ ma̱ tsiya' ti. Pana ca̱a̱ lo'o ma̱ ji'i̱ nu quicha jua slo na' juani.