SAN MATEO 5:37 - Chatino Tataltepec

³⁷ Tsa bi' ti cha' ñacui̱ ma̱: “Chañi”, si cha' liñi laca; lo'o jua'a̱ ñacui̱ ma̱: “Si'i”, si cha' cuiñi. Cua ña'a̱ ca cha' nu chcui' ma̱ nu lo'o ndu'ni ma̱ jura, cha' ji'i̱ nu xña'a̱ laca bi'.

SAN MATEO 5:37 Referans Kwoze

SANTIAGO 5:12

Nde laca sca cña nu ná nga'a̱ cha' cua'ni na tsiya' ti, cu'ma̱ tya'a ngusñi na cha' ji'i̱ ycui' Ndyosi: Ná cua'ni ma̱ jura laja ti lo'o xtañi ycui' Ni lo'o cua quiñi ti sca cha' ji'i̱ ma̱ lo'o xa' ñati̱; ná ñacui̱ ma̱: “Chacuayá' ji'i̱ ycui' Ndyosi nu ntucua nde cua̱”, ni ná ñacui̱ ma̱: “Chacuayá' ji'i̱ ndyosi nde lo yuu”. Ná culotu̱ ma̱ ni sca xtañi Ni tsiya' ti, cha' caja ñi'ya̱ nu tyanu tachaa cha' ji'i̱ ma̱ lo'o ñati̱. Tsa bi' ti cha' ñacui̱ ma̱ ji'i̱ ñati̱: “Cua'ni na'”, ñacui̱ ma̱, si taca cua'ni ma̱ ji'i̱; lo'o jua'a̱ “Ná cua'ni na'”, ñacui̱ ma̱, si ná nchca cua'ni ma̱ ji'i̱. Ná caja ñi'ya̱ sta Ni qui'ya ji'i̱ ma̱ li'.

COLOSENSES 4:6

Laja lo'o nchcui' ma̱ lo'o ngu' ni, tso'o ti chcui' ma̱ ña'a̱ cuayá' nu cua'a̱ jyaca̱ ngu' ji'i̱ cha' nu nchcui' ma̱; tso'o si caja ñi'ya̱ nu xacui̱ ma̱ cha' ji'i̱ lcaa ngu'.

COLOSENSES 3:9

nga'aa ta ma̱ cha' cuiñi lo'o tya'a ma̱; na cua nguxtyanu ma̱ ji'i̱ chalyuu cusu' ji'i̱ ma̱, jua'a̱ cua nguxtyanu ma̱ ji'i̱ lcaa cha' cuxi nu ngua'ni ma̱ tya tsubi' la,

SAN JUAN 8:44

Ycui' nu xña'a̱ laca sti cu'ma̱, lo'o jua'a̱ nti' ma̱ cua'ni ma̱ la cui' cña nu ngulo nu bi' ji'i̱ ma̱. Tya lo'o nguxana chalyuu, tya li' nguxana ndyu'ni ñu'u̱ nu bi' ji'i̱ cresiya ji'i̱ ñati̱ ―nacui̱ Jesús―. Ná ngutu'u nu bi' ca su ntsu'u su̱u̱ cha' liñi, ná ntsu'u cha' liñi ji'i̱ nu bi' tsiya' ti ―nacui̱―. Lo'o ñilo'o nu bi' ji'i̱ ñati̱, xquicha' ycui' ca laca cha' cuiñi nu nda nu bi' lo'o ngu'. Sca nu cuiñi laca nu xña'a̱, bi' laca sti lcaa nu cuiñi.

EFESIOS 4:25

Juani nga'aa chcui' ma̱ cha' cuiñi lo'o tya'a ñati̱ ma̱ lacua; xcui' cha' liñi chcui' scaa ma̱ lo'o tya'a ma̱, cha' sca ti ñati̱ laca na, sca ti cha' ntsu'u ji'na lo'o tya'a na.

2 TESALONICENSES 3:3

Chañi cha' ndu'ni nu Xu'na na lcaa cha' nu ñacui̱ Ni ji'na, cua'ni Ni cha' caca tlyu tyiquee ma̱, cua'a Ni ji'i̱ ma̱ cha' ná cala' nu xña'a̱ ji'i̱ ma̱.

SAN MATEO 13:19

Lo'o cuna ñati̱ cha', ñi'ya̱ nu caca lo'o laca ycui' Ndyosi loo ne' cresiya ji'i̱ ngu', pana ná nchca cuayá' ti' ñati̱ bi' ni cha' laca bi', hora ti cua'ni xu'na cuiñaja cha' cuityi̱ cha' tso'o bi', cha' nga'aa xñi ngu' bi' cha' tso'o bi'. Laca ñati̱ bi' ñi'ya̱ laca lo'o ndyú si'yu to' tyucui̱i̱ ti.

SAN MATEO 13:38

Lo'o xtya̱ 'na ni, bi' laca tyucui ña'a̱ chalyuu; lo'o jua'a̱ calya trigo nu ndyaluu lo'o ntyucua si'yu tso'o, bi' laca ñi'ya̱ laca ñati̱ nu cua nda chacuaya' cha' caca Ni loo ne' cresiya ji'i̱ ngu'. Lo'o nu quixi̱' bi' ni, bi' laca ñi'ya̱ laca ñati̱ nu ntsu'u cha' ji'i̱ lo'o nu xña'a̱,

1 JUAN 5:18

Jlo ti' na cha' nga'aa ndu'ni ñati̱ ji'i̱ Jesucristo cha' cuxi. Jesucristo nu laca nu sca ti Sñi' ycui' Ndyosi, bi' laca nu ndaca'a ji'i̱ ngu', cha' ná taca cala' nu xña'a̱ ji'i̱ ngu' bi' li'.

SAN MATEO 6:13

Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni. Jua'a̱ ñacui̱ ma̱ ji'i̱ ycui' Ndyosi.

1 JUAN 2:13

Nscua na' quityi re cha' ca̱a̱ slo cu'ma̱ ngu' cusu', cha' cua ngujui ñi'ya̱ nu tyu'u cha' ji'i̱ ma̱ lo'o Jesucristo nu stu'ba ti ntucua lo'o ycui' Ndyosi Sti yu tya lo'o nguxana chalyuu. Lo'o jua'a̱ nscua na' quityi re cha' ca̱a̱ slo cu'ma̱ ngu' cuañi', cha' cua ntiji̱loo ma̱ ji'i̱ nu xña'a̱. Cu'ma̱ sñi' na', cua ngujui ñi'ya̱ nu tyu'u cha' ji'i̱ ma̱ lo'o ycui' Ndyosi Sti na, bi' cha' nscua na' quityi re cha' ca̱a̱ slo ma̱.

1 JUAN 3:12

Ná cua'ni na ñi'ya̱ nu ngua'ni jyo'o Caín; sñi' ycui' nu xña'a̱ ngua yu bi', cha' ndyujuii yu ji'i̱ tya'a yu. ¿Ni cha' laca ngua'ni yu jua'a̱? Ndyujuii yu ji'i̱ tya'a yu xqui'ya cha' xcui' cha' cuxi ngua'ni jyo'o Caín bi', bi' cha' ná ndiya ti' yu cha' xcui' cha' tso'o ngua'ni yu tya'a yu bi'.

SAN JUAN 17:15

Bi' cha' chcui' na' lo'o nu'u̱ juani, Sti na' ―nacui̱ Jesús―, cha' nti' na' cha' ña'a̱si̱i̱ nu'u̱ ji'i̱ ngu' bi', cha' ná cua'ni lya' ti' nu xña'a̱ ji'i̱ ngu', masi si'i cha' ca̱a̱ ca̱qui'ya nu'u̱ ji'i̱ ngu' bi' chcui' na' lo'o nu'u̱.

SAN MATEO 15:19

Ca ne' cresiya ji'i̱ ñati̱ ni, ca bi' ntsu'u su̱u̱ lcaa cha' cuxi: masi cujuii ngu' ji'i̱ tya'a ngu', masi tyu'u cha' ji'i̱ ngu' lo'o clyo'o xa' ñati̱, masi cua'ni suba' ngu' lo'o xa' ñati̱, masi cuaana ngu' na nu ntsu'u ji'i̱ tya'a ngu', masi chcui' ngu' cha' cuiñi ji'i̱ tya'a ngu', masi chcui' ngu' cuentyu ji'i̱ tya'a ngu'.

SAN MATEO 5:36

La cui' ti cha' ná cua'ni ma̱ jura cuentya ji'i̱ scua' que ycui' ca ma̱, cha' sca ti ycui' Ni ngüiñá Ni ji'i̱ cu'ma̱, lo'o ná caca ji'i̱ ma̱ cuiñá ma̱ ni sca ca quicha̱' hique ma̱, ni nu ngata, ni nu ngati̱. Ná tso'o cuentya ji'i̱ ycui' Ndyosi tsiya' ti cha' cua'ni ma̱ jura.

EFESIOS 6:16

Lo'o jua'a̱ ndacui sca chcua̱ cuaja' ya' sendaru; nu lo'o cu̱ tya'a cusu̱u̱ yu clya nu nga'a̱ quii' lo ji'i̱ yu, li' cua'a yu ji'i̱ ycui' ca yu lo'o chcua̱ cuaja' bi'. Jua'a̱ caca ji'i̱ ma̱ si chañi cha' ngusñi ma̱ cha' ji'i̱ ycui' Ndyosi, taca cua'a ma̱ ji'i̱ ycui' ca ma̱ lcaa hora cha' ná cua'ni lya' ti' nu cuxi ji'i̱ ma̱.