SAN MATEO 26:42 - Chatino Tataltepec

⁴² Li' xa' ndyaa Jesús, nchcui' lo'o ycui' Ndyosi chaca quiya': ―Sti na' ―nacui̱ yu ji'i̱ Ni―, si ná ntsu'u xa' ña'a̱ nu cua'ni na' cña jinu'u̱, tso'o la si chcube' na' lacua, cha' nti' na' cua'ni na' lcaa cña nu nti' nu'u̱ cha' cua'ni na'.

SAN MATEO 26:42 Referans Kwoze

SAN MATEO 26:39

Li' tya ndyaa la xi yu ca nde bi' la. Nde loo ti yu ndyaa stii yu lo yuu cha' xñi'i̱ tsa ti' yu. Li' nchcui' yu lo'o ycui' Ndyosi, ndi'ya̱ nu nacui̱ yu: ―Sti na', ¿ha ná ntsu'u xi xa' la ña'a̱ nu cua'ni na' cña re, cha' nga'aa chcube' la na' lo'o cña tlyu re jinu'u̱? ―nacui̱ Jesús ji'i̱ ycui' Ndyosi Sti yu―. Pana nti' na' cua'ni na' cña nu nti' nu'u̱ cha' cua'ni na'.

HEBREOS 4:15

Laca Jesús sti jo'ó nu laca loo la cuentya ji'na, lo'o jua'a̱ tya'na tsa ti' Jesús ña'a̱ yu ji'na. Cua jlo ti' yu cha' ntsu'u tsa quiya' lo'o cua cua'ni ti nu cuxi ngana ji'na, cha' nu lo'o tya ndi'i̱ Jesús lo yuu chalyuu, la cui' jua'a̱ lye tsa ngua'ni cuayá' nu xña'a̱ ji'i̱ yu, si cua'ni yu cha' cuxi. Pana nu Jesús bi' ni, ni sca cha' cuxi ná ngua'ni yu, bi' cha' taca caca yu sti jo'ó nu laca loo la cuentya ji'na, cha' jlo ti' Jesús ñi'ya̱ nñilo'o tsa nu xña'a̱ ji'na.

SAN MATEO 6:10

Ca̱a̱ nu'u̱ nde chalyuu cha' caca nu'u̱ loo ji'i̱ ya. Cua'ni nu'u̱ cha' caca lcaa cha' nu nti' nu'u̱ cha' caca nde chalyuu; ñi'ya̱ nu ndu'ni nu'u̱ ca su ntucua nu'u̱, jua'a̱ caca nde lo yuu re li'.

SAN MATEO 20:22

Li' nchcui' Jesús lo'o tyucuaa nu qui'yu bi': ―Ná nchca cuayá' ti' ma̱ ñi'ya̱ laca cha' nu ndijña ma̱ 'na juani ―nacui̱ Jesús ji'i̱ ngu'―. ¿Ha taca ji'i̱ ma̱ chcube' ma̱ ñi'ya̱ nu chcube' na', ñi'ya̱ ca si ta ngu' sca taná nu clyaa' tsa cha' co'o na? ¿Ha talo ma̱ si xcube' ngu' ji'i̱ ma̱ ñi'ya̱ nu nga'a̱ cha' xcube' ngu' jna', nu lo'o cujuii ngu' 'na? ―Taca ji'i̱ cua ―nacui̱ ngu' bi' li'.

SAN MATEO 26:43

Li' xa' nxtyu̱u̱ yu ñaa yu slo ngu' bi'; lo'o li' na'a̱ yu ji'i̱ ngu' cha' laja' ngu' chaca quiya', cha' lye tsa ndyu'u xcalá ngu'.

SAN MARCOS 14:36

―Sti na' ―nacui̱ Jesús ji'i̱ ycui' Ndyosi―, lcaa lo cña nchca cua'ni nu'u̱. Bi' cha' juani, ná ta nu'u̱ chacuayá' tyacua cha' cuxi re 'na, si cajá la ñi'ya̱ nu caca cua'ni na' cña re ―nacui̱ Jesús ji'i̱ ycui' Ndyosi Sti yu―. Pana si'i ñi'ya̱ nu nti' na' cha' caca, masi cua'ni nu'u̱ lo'o na' ñi'ya̱ nu nti' ycui' nu'u̱.

SAN LUCAS 22:42

―Sti na' ―nacui̱ yu―, ¿ha ná ntsu'u xi xa' la ña'a̱ nu caca cua'ni na' cña re, cha' nga'aa chcube' la na' lo'o cña tlyu re jinu'u̱? ―nacui̱ Jesús ji'i̱ ycui' Ndyosi Sti yu―. Pana nti' na' cha' cua'ni na' cua ña'a̱ ca cña nu nti' nu'u̱ cha' cua'ni na'.

SAN JUAN 6:38

Cua ngutu'u na' nde slo ycui' Ndyosi Sti na', lijya̱ na' nde lo yuu cha' cua'ni na' cña nu ngulo Sti na' 'na; si'i cha' cua'ni na' ñi'ya̱ nu nta̱' cua'ni ta̱ ―nacui̱ Jesús―.