SAN MATEO 26:41 - Chatino Tataltepec

⁴¹ Tii ti ti' ma̱ tyi'i̱ ma̱ juani lacua, cha' chcui' ma̱ lo'o ycui' Ndyosi cha' ná tyiji̱loo nu cuiñaja ji'i̱ ma̱. Jlo ti' na' cha' tyucui tyiquee ma̱ ntaja'a̱ ma̱ cua'ni ma̱ cña re 'na, pana ná tyu'u scua juersa ji'i̱ ma̱, yala tsa ndyaja' ma̱.

SAN MATEO 26:41 Referans Kwoze

SAN LUCAS 22:46

Li' nacui̱ yu ji'i̱ ngu': ―¿Ni cha' laca ndi'i̱ ma̱ laja' ti ma̱? Tyatu̱ clya ma̱ cha' chcui' ma̱ lo'o ycui' Ndyosi, cha' ná tyiji̱loo nu xña'a̱ ji'i̱ ma̱.

SAN MARCOS 14:38

Tii ti ti' ma̱ tyi'i̱ ma̱ juani. Chcui' ma̱ lo'o ycui' Ndyosi cha' ná cua'ni nu cuiñaja ngana ji'i̱ ma̱. Jlo ti' na' cha' tyucui tyiquee ma̱ ntaja'a̱ ma̱ cua'ni ma̱ cña re 'na; pana ná tyu'u scua juersa ji'i̱ ma̱, bi' cha' yala tsa ndyaja' ma̱.

EFESIOS 6:18

Chcui' ma̱ lo'o ycui' Ndyosi nu lo'o nxu̱u̱ tya'a ma̱ lo'o nu cuxi, cha' jña ma̱ chacuayá' ji'i̱ Ni; lcaa tyempo xtyucua Xtyi'i ycui' Ndyosi ji'i̱ ma̱ cha' taca chcui' ma̱ lo'o Ni. Lo'o jua'a̱ chcui' ma̱ lo'o Ni cuentya ji'i̱ lcaa ñati̱ nu cua ngusñi cha' ji'i̱ Ni. Bi' cha' lacua, tii ti ti' ma̱ chcui' ma̱ lo'o Ni, cha' ná ca taja ti' ma̱.

SAN MATEO 6:13

Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni. Jua'a̱ ñacui̱ ma̱ ji'i̱ ycui' Ndyosi.

SAN LUCAS 21:36

Tii ti ti' ma̱ tyi'i̱ ma̱ chalyuu lacua. Lcaa tyempo chcui' ma̱ lo'o ycui' Ndyosi cha' xtyucua Ni ji'i̱ ma̱, cha' talo ma̱ lo'o caca cha' cuxi bi' chalyuu. Lo'o li' caja ñi'ya̱ nu tyalaa ma̱ su tyucua ycui' na' nu cua nda Ni 'na lijya̱a̱ cha' caca na' ñati̱, cha' cua'ni cuayá' na' ji'i̱ ma̱ ―nacui̱ Jesús ji'i̱ ngu'.

APOCALIPSIS 16:15

“Cua'a̱ jyaca̱ ma̱”, nacui̱ Jesús, “tsiya' ca tyu'u tucua na' tya̱a̱ na' ñi'ya̱ nti' sca nu cuaana. Tso'o caca tyiquee ñati̱ nu tii ti ti' tyi'i̱ chalyuu, xqui'ya cha' ngusñi ngu' cha' jna'; nga'aa ca tyuju'u ti' ngu' bi' slo ñati̱ lo'o tyalaa hora nu tya̱a̱ na' li'.” Jua'a̱ nacui̱ Jesús ji'i̱ ñati̱ ji'i̱ Ni.

1 CORINTIOS 16:13

Tii ti ti' ma̱ tyi'i̱ ma̱ chalyuu. Xñi tso'o ma̱ cha' ji'i̱ Jesús. Cua'ni tlyu tyiquee ma̱, ná cutsi̱i̱ ma̱.

1 PEDRO 5:8

¡Tii ti ti' ma̱ tyi'i̱ ma̱ chalyuu! Ná caja' ma̱, cha' tya'a cusu̱u̱ ma̱ laca ycui' nu xña'a̱, lo'o jua'a̱ cacua tsa ndu̱ bi' slo ma̱. Ñi'ya̱ nti' sca cuichi nu tyaala tsa nu nclyana ji'i̱ sca ñati̱ cha' cacu ni', jua'a̱ nti' ndya'a̱ yu'u nu xña'a̱ bi' chalyuu.

1 CORINTIOS 10:13

Lcaa quiya' lo'o tyacua sca cha' cuxi ji'i̱ ma̱, ná cube ti' ma̱ li', la cui' jua'a̱ ndyaca ji'i̱ cua ña'a̱ ca ñati̱ chalyuu. Pana ná cube ti' ma̱, ña'a̱ ycui' Ndyosi ji'na; lcaa cña nu nacui̱ Ni cha' cua'ni Ni cuentya ji'na, ndu'ni Ni cña bi'. Ná ta Ni chacuayá' cha' tyiji̱loo sca cha' cuxi ji'i̱ ma̱ ña'a̱ cuayá' nu nga'aa caca xtyanu ma̱ ji'i̱; pana la cui' hora lo'o cua cñilo'o ti cha' cuxi bi' ji'i̱ ma̱, li' xtyucua Ni ji'i̱ ma̱ cha' ná cua'ni ma̱ ji'i̱, lo'o li' taca clyaá ma̱ ji'i̱ cha' cuxi bi'.

2 PEDRO 2:9

Jua'a̱ caca cuayá' ti' na cha' nchca ji'i̱ ycui' nu Xu'na na cua'ni lyaá Ni ji'i̱ ñati̱ nu tso'o cresiya ji'i̱, cha' ná tyiji̱loo nu cuxi ji'i̱ ngu' bi'. Nu lo'o cua'ni cuayá' Ni ji'i̱ lcaa ñati̱ ni, jlo ti' Ni ti ji'i̱ xcube' Ni. Cua jlo ti' Ni tilaca laca nu ntsu'u cha' cuxi tyiquee.

SAN MATEO 24:42

’Bi' cha' cua'ni tii ti' ma̱, cha' ná jlo ti' ma̱ tsiya' ti ni tsa̱ laca nu ca̱a̱ ycui' nu Xu'na ma̱.

APOCALIPSIS 3:10

Cua ndyi'u ti' ma̱ cha' nu nacui̱ na' ji'i̱ ma̱ tsubi', cha' talo tyiquee ma̱ cha' tu̱ ti' ma̱ 'na ni tsa̱ tya̱a̱ na' chaca quiya'; bi' cha' juani cua'ni na' cha' ná sca caca ji'i̱ ma̱ lo'o tyalaa tyempo cuxi nde chalyuu. Cua lijya̱ caca cha' cuxi bi', nu cua'ni cuayá' ji'i̱ lcaa ñati̱ chalyuu.

1 PEDRO 4:7

Cua tye ti cha' ji'i̱ lcaa na nu ntsu'u chalyuu; bi' cha' tso'o la si cua'a ma̱ ji'i̱ ycui' ca ma̱, tii ti ti' ma̱ tyi'i̱ ma̱ chalyuu cha' taca cua'ni ma̱ cña tso'o, cha' lu'ba ti taca chcui' ma̱ lo'o ycui' Ndyosi.

SAN LUCAS 22:40

Nu lo'o ndyalaa ngu' ca bi', li' nacui̱ Jesús ji'i̱ ngu': ―Chcui' ma̱ lo'o ycui' Ndyosi Sti na' cha' ná tyiji̱loo nu xña'a̱ ji'i̱ ma̱ ―nacui̱.

GÁLATAS 5:24

Cua ngujuii Cristo lo crusi cha' cati̱ qui'ya nu ntsu'u ji'na; bi' cha' cua ngua'ni tye na ji'i̱ lcaa cha' cuxi nu ntsu'u ne' cresiya ji'na tya tsubi' la, lcaa na nu ndacui ti' na ji'i̱ nquicha', ngua'ni tye na ji'i̱ xqui'ya cha' ntsu'u cha' ji'na lo'o ycui' Cristo. Lo'o jua'a̱ lcaa cha' nu tiji̱' ti' na ji'i̱, cua nguxtyanu na ji'i̱ cha' cuxi bi' juani.

1 CORINTIOS 9:27

Nchcube' na' ji'i̱ ycui' ca na', cha' talo chalyuu 'na, cha' ná xtyanu ti'i̱ Ni 'na tsiya' ti. Quiña'a̱ tsa cha' cua ngulu'u na' ji'i̱ xa' ñati̱ cuentya ji'i̱ ycui' Ni, lo'o jua'a̱ ntsu'u cha' taquiya' ycui' na' ji'i̱ cha' bi'.

SAN MATEO 25:13

Tya nchcui' la xi Jesús lo'o ngu' li': ―Bi' cha' tii ti ti' tyi'i̱ ma̱ lcaa hora, cha' ná jlo ti' ma̱ ni tsa̱ ni hora ca̱a̱ na' chaca quiya', na' nu cua nda Ni 'na lijya̱a̱ cha' caca na' ñati̱.

SAN MATEO 26:38

Li' nchcui' Jesús lo'o nu sna tya'a ngu' bi': ―Ne' cresiya 'na ntsu'u sca cha' nu xñi'i̱ ti' na'. Nga'aa talo na' cha' xñi'i̱ tsa ti' na'. Tyanu cu'ma̱ nde ti, pana tii ti ti' ma̱ tyi'i̱ ma̱ lo'o na'.

ROMANOS 8:3

Cua ngua'ni Ni sca cha' tlyu nu ná ngua cua'ni nu cha' cusu' nu nda jyo'o Moisés lo'o ñati̱ nu ngua sa'ni. Ná ngua cña cha' bi', xqui'ya cha' cuxi tsa tyiquee ñati̱ chalyuu na; pana ngua ji'i̱ ycui' Ndyosi cua'ni cha' tlyu bi', nu lo'o nda Ni ji'i̱ Sñi' ycui' ca Ni ya̱a̱ chalyuu re cha' ngua ñati̱. Nda Ni ji'i̱ nu Jesús bi' ya̱a̱, cha' caca yu sca msta̱ lu'ú; bi' laca msta̱ nu ngua ji'i̱ cuityi̱ qui'ya nu ntsu'u ji'na. Ngua Jesús ñati̱; stu'ba ti ngua yu ñi'ya̱ laca cua ña'a̱ ca ñati̱ chalyuu, cha' jua'a̱ ngua ji'i̱ yu cua'ni tye yu ji'i̱ qui'ya nu ntsu'u ji'i̱ ñati̱ cuxi na. Bi' cha' ngua Ni ñati̱.

SAN LUCAS 11:4

Cui'ya nu'u̱ cha' clyu ti' ji'i̱ ya ji'i̱ lcaa cha' cuxi nu ngua'ni ya, cha' jua'a̱ cua ngüi'ya ya cha' clyu ti' ji'i̱ ñati̱ nu ngua'ni cha' cuxi lo'o ya. Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Jua'a̱ ngulu'u Jesús ji'i̱ nu ngu' nu ndyaca tsa'a̱ ji'i̱ bi'.

SAN LUCAS 8:13

Ñi'ya̱ laca nu chaca ycu' si'yu nu ndyú lo yuu lati tu'ba chu̱' quee, jua'a̱ laca lo'o ñati̱ nu tso'o tsa ntsu'u tyiquee ngu' lo'o ndyuna ngu' cha' tso'o bi' nquicha'. Pana ñi'ya̱ nti' nu calya sube bi', cha' ná qui'ñi ndyaa quiche su̱u̱ chu̱' quee bi', jua'a̱ nti' ñati̱ bi', cha' xti ti tyempo ndalo ngu' lo'o ngusñi ngu' cha' tso'o bi'; lo'o lya' ti' xa' ñati̱ ji'i̱ ngu' bi', yala ti tya'a̱chu̱' ngu' li'.