SAN MATEO 24:14 - Chatino Tataltepec

¹⁴ Ntsu'u cha' culu'u ma̱ cha' jna' ji'i̱ ñati̱, lcaa cha' tso'o nu nchcui' na', ñi'ya̱ caca lo'o laca ycui' Ndyosi loo ne' cresiya ji'i̱ ñati̱; ntsu'u cha' chcui' ma̱ cha' bi' lo'o ñati̱ tyucui ña'a̱ chalyuu, cha' caca cuayá' ti' ngu' ji'i̱ cha' bi' nde lcaa nasiyu̱. Lo'o li' tye chalyuu.

SAN MATEO 24:14 Referans Kwoze

APOCALIPSIS 14:6

Na'a̱ na' ndyaa chaca xca̱ ji'i̱ ycui' Ndyosi li', nu cua̱ tsa ndacui ndyaa; ndyalo'o bi' ji'i̱ sca cha' tso'o nu ngua ti' ycui' Ndyosi chcui' lo'o lcaa ñati̱ chalyuu, sca cha' nu ndulo tsa ji'i̱ ñati̱ cha' cuna ngu'. Lcaa tyempo ná tye chca cha' bi'. Slo lcaa lo ñati̱ chalyuu tyucui ña'a̱ chalyuu mala su ndi'i̱ ñati̱, cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ca bi' ndyaa xca̱ bi', cha' chcui' lo'o lcaa ñati̱.

ROMANOS 10:18

Nti' na' xcuane na' sca cha' ji'i̱ cu'ma̱: ¿Ha bilya cuna ngu' judío cha' ji'i̱ Cristo lacua? Cua ndyuna ngu', cha' cua nscua sca cha' lo quityi cusu' nu nchcui' ndi'ya̱: Tyucui ña'a̱ chalyuu nguañi cha' nu nda ngu' lo'o; lcaa se'i̱ ndyalaa cha' nu nchcui' ngu', masi ca su cua tyijyu' la cua ndyalaa cha' bi'. Jua'a̱ nchcui' quityi.

SAN LUCAS 24:47

Li' ntsu'u cha' ta ngu' cha' ji'i̱ ycui' na' lo'o ñati̱ tyucui ña'a̱ chalyuu. Nde Jerusalén xana ma̱ cacha' ma̱ cha' bi' ji'i̱ ngu' clyo. Nga'a̱ cha' chcui' ma̱ lo'o ñati̱ cha' ca tyuju'u ti' ngu' ji'i̱ cha' cuxi nu ntsu'u tyiquee ngu', cha' xtyanu ngu' ji'i̱ cha' cuxi nu ndu'ni ngu'; li' cua'ni clyu ti' ycui' Ndyosi ji'i̱ lcaa qui'ya nu ntsu'u ji'i̱ ngu'.

COLOSENSES 1:23

Pana juani ña'a̱ ti ndulo tsa cha' ji'i̱ ma̱ cha' tyanu tachaa la cha' ji'i̱ Cristo ne' cresiya ji'i̱ ma̱, cha' ycui' yu bi' laca su̱u̱ lcaa cha' bi'. Ná ta ma̱ chacuayá' cha' cñilo'o ngu' ji'i̱ ma̱, cha' si jua'a̱, nga'aa culacua ti' ma̱ ji'i̱ cha' tso'o nu tyacua ji'i̱ ma̱ nde loo la, la cui' cha' nu cua ndyuna ma̱ ji'i̱ tya clyo. Xqui'ya cha' tso'o ji'i̱ Cristo bi', bi' cha' ndya'a̱ ngu' tyucui ña'a̱ chalyuu nchcui' ngu' cha' bi' lo'o ñati̱. Lo'o jua'a̱ na', Pablo, ndya'a̱ tsa na' lo cña bi'.

SAN MATEO 10:7

Ta ma̱ cha' lo'o ngu' lcaa quichi̱ cha' cua tyalaa ti hora cha' caca ycui' Ndyosi loo.

SAN MATEO 9:35

Lo'o li' ndyaa Jesús lcaa quichi̱ sube, lcaa quichi̱ tonu, cha' culu'u ji'i̱ ngu' ne' laa ji'i̱ ngu' judío; quiña'a̱ tsa cha' nda Jesús lo'o ñati̱ ñi'ya̱ tso'o caca lo'o laca ycui' Ni loo ne' cresiya ji'i̱ ngu'. Lo'o jua'a̱ ngua'ni jo'o ji'i̱ lcaa ngu' quicha, ji'i̱ lcaa ngu' nu ngunu'u̱ ti'.

COLOSENSES 1:6

Cua lijya̱ ngañi la cha' tso'o ji'i̱ Jesús bi' tyucui ña'a̱ chalyuu, lo'o jua'a̱ lijya̱ ndyaca tso'o la cresiya ji'i̱ ñati̱ macala su nduna ngu' cha' bi'. La cui' jua'a̱ ndyaca tya lo'o ndyuna ma̱ cha' bi' tya clyo; tya li' cua ndyuna ma̱ cha' ndu'ni tsa ycui' Ndyosi cha' xlya'be lo'o ñati̱, li' ngua cuayá' ti' ma̱ cha' chañi tsa laca cha' bi'.

SAN MATEO 24:6

Tyempo bi' cañi cha' nxu̱u̱ tya'a ngu' nasiyu̱ re lo'o ngu' xa' nasiyu̱, lo'o jua'a̱ caja cha' ji'i̱ ma̱ cha' nxu̱u̱ tya'a ngu' nasiyu̱ tyijyu'. Ná cutsi̱i̱ ma̱ li'. Ntsu'u cha' caca jua'a̱, pana tya lyiji tye chalyuu li'.

SAN MATEO 4:23

Lo'o li' ndyaa ngu' lcaa quichi̱ su cuentya Galilea lo'o Jesús. Lcaa quichi̱ ndya'a̱ nclyu'u yu ji'i̱ ngu' ne' laa ji'i̱ ngu' judío; nchcui' yu lo'o ngu' ñi'ya̱ laca cha' tso'o ji'i̱ ycui' Ndyosi, cha' cua ngulala ti caca Ni loo ne' cresiya ji'i̱ ngu'. Lo'o jua'a̱ ngua'ni yu jo'o ji'i̱ lcaa nu quicha, masi quicha ti ti' ngu' ngua'ni Jesús cha' ndyaca tso'o ngu'.

LOS HECHOS 17:6

Pana ná nquije Pablo lo'o Silas ji'i̱ ngu', bi' cha' ngusñi ngu' ji'i̱ ycui' Jasón lo'o ji'i̱ tya'a ndya'a̱ yu, ndyaa lo'o ngu' ji'i̱ ngu' bi' ca slo ngu' tisiya. Cui̱i̱ nchcui' ngu' lo'o ngu' tisiya li', ngusta ngu' qui'ya ji'i̱ Jasón lo'o ji'i̱ tya'a ndya'a̱ yu: ―Tyaala tsa ngu' bi' ―nacui̱ nu ngu' xña'a̱ bi'―. Lcaa quichi̱ su ndya'a̱ ngu' bi' nga'aa si'i ti̱ ti ndi'i̱ ngu' quichi̱ bi' xqui'ya cha' cuxi nu nchcui' ngu' bi' ―nacui̱ ngu'―. Lo'o juani cua ndyalaa ngu' xña'a̱ bi' quichi̱ tyi na,

APOCALIPSIS 3:10

Cua ndyi'u ti' ma̱ cha' nu nacui̱ na' ji'i̱ ma̱ tsubi', cha' talo tyiquee ma̱ cha' tu̱ ti' ma̱ 'na ni tsa̱ tya̱a̱ na' chaca quiya'; bi' cha' juani cua'ni na' cha' ná sca caca ji'i̱ ma̱ lo'o tyalaa tyempo cuxi nde chalyuu. Cua lijya̱ caca cha' cuxi bi', nu cua'ni cuayá' ji'i̱ lcaa ñati̱ chalyuu.

LOS HECHOS 20:25

’Cua nguta'a̱ na' lo'o cu'ma̱, cua ngulu'u na' ji'i̱ ma̱ lcaa ña'a̱ cña nu nclyo ycui' Ni; pana juani chañi cha' nu nchcui' na' re, cha' nga'aa ña'a̱ na' ji'i̱ ma̱ chaca quiya'.

SAN MATEO 24:3

Li' ndyaa ngu' nde lo xlya ca'ya Olivos. Ca bi' ndyaca'a̱ Jesús, lo'o li' cuaana ti nchcui' ngu' nu ndyaca tsa'a̱ ji'i̱ lo'o yu, nchcuane ngu' ji'i̱: ―Cuacha' nu'u̱ ji'i̱ cua, ¿ni jacua' caca cha' cuxi bi' ji'i̱ laa tonu bi'? Lo'o jua'a̱, ¿ñi'ya̱ caca cha' lo'o ca̱a̱ nu'u̱, nu lo'o cua tye ti chalyuu? ―nacui̱ ngu' bi' ji'i̱.

APOCALIPSIS 16:14

Msu ji'i̱ nu xña'a̱ laca cuiñaja bi'; nchcutsi̱i̱ bi' ji'i̱ ñati̱, cha' nchca ji'i̱ cua'ni cha' tlyu. Ndya'a̱ cuiñaja bi' nxuti'i̱ ji'i̱ lcaa nu laca loo chalyuu, cha' tya̱a̱ ngu' cha' cusu̱u̱ tsa̱ tlyu lo'o cua tye ti chalyuu. Cua ntsu'u cña nu cua'ni ycui' Ndyosi nu Xu'na na lo'o ndyaca cha' cusu̱u̱ bi'.

SAN LUCAS 4:5

Li' ndyaa lo'o nu xña'a̱ bi' ji'i̱ yu ca lo xlya ca'ya cua̱. Sca hora ti ngulu'u nu xña'a̱ bi' tyucui ña'a̱ chalyuu ji'i̱ Jesús.

LOS HECHOS 1:2

lcaa cha' nu ngua'ni yu lo'o nguti'i̱ yu nde chalyuu. Bilya tyaa Jesús ca slo ycui' Ndyosi lo'o ngusubi yu ji'i̱ nu tii tyucuaa tya'a ngu' nu tsaa chcui' cha' ji'i̱ ycui' yu nde chalyuu. Nguxtyucua Xtyi'i ycui' Ndyosi ji'i̱ Jesús lo'o ngulo yu cña ji'i̱ nu tii tyucuaa tya'a ngu' bi', ñi'ya̱ ntsu'u cña nu cua'ni ngu' bi'.

LOS HECHOS 11:28

Agabo naa tsaca ngu' bi'. Cua nda Xtyi'i ycui' Ndyosi sca cui̱i̱ lo'o nu Agabo bi' cha' chcui' yu lo'o ngu'. Li' nchcui' Agabo lo'o ngu' cha' cua ca̱a̱ ti sca jbi'ña tlyu tsa tyucui ña'a̱ chalyuu. Chañi cha' jua'a̱ ngua cha' nu nda Agabo bi', pana nde loo la ngua cha' bi', nu lo'o ngua Claudio rey nu laca loo.

SAN MATEO 18:19

’Chaca quiya' cacha̱' ji'i̱ ma̱ cha' chañi cha' cua'ni Sti na' nu ntucua nde cua̱ lcaa cha' nu ndijña ma̱ ji'i̱ Ni, masi tucua tya'a ti ma̱ ndu̱ ma̱, si stu'ba cha' nu ntsu'u tyiquee tyucuaa ma̱.

SAN LUCAS 2:1

Tyempo bi', ñati̱ nu laca loo la tyucui ña'a̱ chalyuu bi' ngua nu emperador; Augusto naa yu, lo'o li' ngulo yu cña cha' xcua xtañi ngu' lcaa quichi̱ lo quityi.

SAN MARCOS 13:10

Pana tya lyiji tye chalyuu li', cha' clyo ntsu'u cha' cañi cha' tso'o cuentya jna' slo lcaa ñati̱ tyucui ña'a̱ chalyuu.

LOS HECHOS 17:31

Cua ngusta Ni sca tsa̱ cha' cua'ni cuayá' Ni ji'i̱ lcaa ñati̱ chalyuu, lo'o jua'a̱ cua ngusubi Ni sca ñati̱ nu caca bese. Jesucristo laca bi'. Tso'o tsa ngua'ni Ni cha' tyanu tachaa cha' bi' ji'i̱ ñati̱ chalyuu, nu lo'o ngua'ni Ni cha' ndyu'ú nu ñati̱ bi' chaca quiya' lo'o cua ndyujuii ngu' ji'i̱.

LOS HECHOS 19:27

Cuxi tsa ndyu'u cha' bi', si nga'aa nti' ngu' cui'ya ngu' lcui̱ nu ndiñá na; nga'aa caja cña nu cua'ni na li'. Lo'o li' nga'aa tyaja'a̱ ngu' cua'ni tlyu ngu' ji'i̱ xtya'a̱ na jo'ó Diana nu laca loo tsiya' ti ne' laa ji'i̱ quichi̱ tyi na re. Juani lcaa ñati̱ loyuu su cuentya Asia ndyu'ni tlyu ji'i̱ jo'ó bi', lo'o jua'a̱ lcaa ñati̱ tyucui ña'a̱ chalyuu ndyu'ni tlyu ji'i̱. Ná tso'o si cua'ni tye ngu' cha' ji'i̱ jo'ó tlyu nu ntsu'u ji'na.

HEBREOS 1:6

Tya clyo lo'o cua ta ti ycui' Ndyosi ji'i̱ Sñi' ycui' ca Ni cha' ca̱a̱ yu chalyuu, li' nacui̱ Ni: Lcaa xca̱ nu ntsu'u cuentya jna' nde cua̱, nga'a̱ cha' cua'ni tlyu ngu' xca̱ bi' ji'i̱ Sñi' na'.

HEBREOS 2:5

Cha' ji'i̱ chalyuu cucui bi' nchcui' na juani, pana si'i nu ngu' xca̱ ji'i̱ ycui' Ndyosi laca nu cua ngujui chacuayá' ji'i̱ cha' caca ngu' loo ji'i̱ chalyuu cucui; sca ti ycui' Ndyosi culo cña li'.