SAN MATEO 23:23 - Chatino Tataltepec

²³ ’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Tacati tsa ndu'ni ma̱ lo'o ycui' Ndyosi lo'o lcaa na xca ti nu ntsu'u ji'i̱ ma̱; si ntsu'u tii tya'a laca' tyunu' xlya ji'i̱ ma̱ ni, masi si'yu hañi, masi si'yu comino, hora ti nda ma̱ tsaca ji'i̱ ycui' Ndyosi li', masi ná ndaquiya' ma̱ ji'i̱ cha' nu ngulu'u Ni, nu ndulo la cha' ji'i̱. Cua nacui̱ ycui' Ndyosi cha' liñi ti cua'ni cuayá' ma̱ ji'i̱ ñati̱, lo'o jua'a̱ nacui̱ Ni cha' cua'ni tya'na ti' ma̱ ji'i̱ ñati̱, cha' jlya tso'o ti' ma̱ ji'i̱ ycui' Ni; pana ná nduna ma̱ cha' bi'. Ntsu'u cha' taquiya' ma̱ ji'i̱ cha' nu ndulo la bi', masi tya cua'ni ma̱ cha' tso'o ñi'ya̱ nu ndyu'ni ti ma̱ nu lo'o nda ma̱ msta̱ sube ti bi'.

SAN MATEO 23:23 Referans Kwoze

SAN LUCAS 11:42

’Tya'na tsa cu'ma̱ ngu' fariseo ―nacui̱ Jesús―. Tacati tsa ndu'ni ma̱ lo'o ycui' Ndyosi lo'o lcaa na xca ti nu ntsu'u ji'i̱ ma̱, jua'a̱ lo'o nda ma̱ msta̱ ji'i̱ Ni ne' laa; sa yu'be lcaa quixi̱' nu tso'o xtyi'i, sa yu'be lcaa quixi̱' nu nda xtyi'i ji'i̱ scuaa, nda ma̱ cha' bi' ji'i̱ ycui' Ndyosi clyo lo'o ngüi'ya ca ti ma̱ ji'i̱. Pana ná liñi ndu'ni cuayá' ma̱ ji'i̱ ñati̱, lo'o jua'a̱ ná ntsu'u tyiquee ma̱ ña'a̱ ma̱ ji'i̱ ycui' Ndyosi tsiya' ti; bi' laca cña nu nga'a̱ cha' cua'ni ma̱ yala la, masi ña'a̱ ti cua'ni ma̱ nu xa' la cña sube bi'.

SAN MATEO 9:13

Yaa clya ma̱ cua'a̱ jyaca̱ ma̱ ji'i̱ cha' nu nguscua jyo'o cusu' lo quityi, nu ndi'ya̱ nchcui': “Nti' na' cha' cua'ni tya'na ti' ma̱ ji'i̱ tya'a ñati̱ ma̱, nacui̱ ycui' Ni. Bi' nu tso'o la, masi ná ta ma̱ quiña'a̱ tsa msta̱ 'na; ni na'ni scu̱' ma̱, ná ndu'ni cha' ta ma̱ msta̱ 'na.” Jua'a̱ nscua lo quityi. Ná lijya̱ na' chalyuu cha' chcui' na' lo'o ñati̱ nu tso'o tsa ycui' ngu', nti' ngu'; cua lijya̱ na' chalyuu cha' chcui' na' lo'o ngu' nu jlo ti' cha' ntsu'u cha' cuxi tyiquee ngu', cha' caca tyuju'u ti' ngu' li'. Xtyanu ngu' ji'i̱ cha' cuxi bi' li'.

SAN LUCAS 18:12

“Tucua quiya' sca semana ná ndacu na' tyaja cha' ndu'ni tlyu na' jinu'u̱. Lo'o jua'a̱ nda na' sa yu'be lcaa na nu ngua'ni na' ngana scaa semana jinu'u̱”, nacui̱ yu fariseo bi'.

SAN MATEO 12:7

Ná ndube ti' ma̱ ñi'ya̱ nu nchcui' cha' nu nacui̱ ycui' Ndyosi, nu nscua lo quityi ndi'ya̱: “Nti' na' cha' cua'ni tya'na ti' ma̱ ji'i̱ tya'a ñati̱ ma̱”, nacui̱ Ni, “bi' cña nu tso'o la cha' cua'ni ma̱. Pana ná nti' na' cha' ta ma̱ quiña'a̱ tsa msta̱ 'na; ni na'ni scu̱' ma̱, ná ndu'ni cha' ta ma̱ 'na.” Si cua ngua cuayá' ti' ma̱ ñi'ya̱ nchcui' cha' nu nscua lo quityi bi', ná sta ma̱ qui'ya ji'i̱ ngu' cha' cuiñi ti.

SAN MATEO 23:13

’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Na ndacu̱' ma̱ tyucui̱i̱ ji'i̱ ngu', cha' ná caca tyatí̱ ngu' cha' ji'i̱ ycui' Ndyosi, cha' ná caca ycui' Ni loo ne' cresiya ji'i̱ ngu'. Ni ycui' ma̱, ná caca tyatí̱ ma̱ cha' bi', lo'o jua'a̱ ná nda ma̱ chacuayá' cha' tyatí̱ xa' la ñati̱ cha' bi'.