SAN MATEO 22:11 - Chatino Tataltepec

¹¹ ’Li' ndyatí̱ ycui' rey bi', ndyaa nde ni'i̱ cha' chcui' lo'o lcaa ñati̱ nu ndi'i̱ ni'i̱ bi'. Li' na'a̱ rey cha' nga'a̱ sca nu qui'yu nu ná lacu' late' ji'i̱ ta'a.

SAN MATEO 22:11 Referans Kwoze

APOCALIPSIS 19:8

Cua nda Ni late' lubii nu ngati̱ tsa ña'a̱, nu tso'o tsa ña'a̱ cha' cacu' na. Lcaa cña tso'o nu ngua'ni ngu' bi' nde chalyuu xqui'ya cha' ngusñi ngu' cha' ji'i̱ ycui' Ni, bi' laca ñi'ya̱ ña'a̱ ste' ngu' nu tso'o tsa ña'a̱ bi'.

EFESIOS 4:24

nga'a̱ cha' xñi tso'o ma̱ cha' ji'i̱ ycui' Ndyosi cha' xa' ña'a̱ cua'ni ma̱ su ndi'i̱ ma̱ chalyuu, cha' taca cua'ni ma̱ ñi'ya̱ nu nti' ycui' Ndyosi cha' cua'ni ma̱. Bi' cha' xcui' cha' tso'o cua'ni ma̱ chalyuu, xcui' cha' lubii cua'ni ma̱, si chañi cha' laca ma̱ ñati̱ ji'i̱ ycui' Ndyosi.

2 CORINTIOS 5:3

Ni'i̱ bi' laca nu tacu̱' lo tyucui ña'a̱ na, cha' caja su tyi'i̱ cresiya ji'na, cha' ná tyi'i̱ na jua'a̱ ti.

ROMANOS 13:14

Ta ma̱ chacuayá' cha' caca loo ycui' Jesucristo nu Xu'na na ji'i̱ tyucui ña'a̱ ma̱; nga'aa taquiya' na ji'i̱ lcaa lo cha' cuxi, cha' nu tiji̱' tsa ti' na ji'i̱ xqui'ya cha' laca na ñati̱ ti.

APOCALIPSIS 16:15

“Cua'a̱ jyaca̱ ma̱”, nacui̱ Jesús, “tsiya' ca tyu'u tucua na' tya̱a̱ na' ñi'ya̱ nti' sca nu cuaana. Tso'o caca tyiquee ñati̱ nu tii ti ti' tyi'i̱ chalyuu, xqui'ya cha' ngusñi ngu' cha' jna'; nga'aa ca tyuju'u ti' ngu' bi' slo ñati̱ lo'o tyalaa hora nu tya̱a̱ na' li'.” Jua'a̱ nacui̱ Jesús ji'i̱ ñati̱ ji'i̱ Ni.

APOCALIPSIS 3:18

Ta na' sca cui̱i̱ lo'o ma̱ lacua, bi' cha' cua'a̱ jyaca̱ ma̱ ji'i̱ cha' nu chcui' na' lo'o ma̱, cha' chañi taca culu'u cha' bi' ji'i̱ ma̱ ñi'ya̱ caca xutacui cha' cuxi nu ntsu'u ji'i̱ ma̱: Nga'a̱ cha' cua'ni ma̱ cha' caja sca chalyuu cucui ji'i̱ ma̱ su nga'aa cua'ni ma̱ cha' cuxi, cha' nga'aa ntsu'u cha' ca tyuju'u la ti' ma̱ li'. Cua'ni ma̱ cha' culacua tso'o xi ti' ma̱ lacua, cha' ca cuayá' ti' ma̱ scaa cha'.

APOCALIPSIS 2:23

hasta cujuii na' ji'i̱ ñati̱ nu ngusñi cha' ji'i̱ nu cuna'a̱ bi', nacui̱ Ni. Lo'o li' lcaa taju ñati̱ ji'i̱ Jesucristo lcua ti quichi̱, caja cha' ji'i̱ ngu' cha' cua ngua'ni tye na' ji'i̱ cha' cuxi bi'; li' taca jlya tso'o ti' ngu' cha' cua jlo ti' na' lcaa ña'a̱ cha' nu nclyacua ti' ñati̱ chalyuu. Lo'o li' ca cuayá' ti' lcaa ma̱ cha' la cui' ñi'ya̱ ngua'ni ma̱ cha' cuxi tya lo'o ya̱a̱ ma̱ chalyuu, jua'a̱ xcube' na' ji'i̱ ma̱, nacui̱ Jesús.

GÁLATAS 3:27

Lo'o ngua stu'ba cha' ji'na lo'o Ni, li' cua ntyucuatya ngu' ji'i̱ lcaa na chacuayá' ji'i̱ Cristo, cha' jua'a̱ cua ndyanu lcaa cha' ji'i̱ Cristo ne' cresiya ji'na, ñi'ya̱ nti' si cua laca cha' bi' sca late' nu quixi̱i̱ chu̱' na.

1 CORINTIOS 4:5

Lo'o jua'a̱ cu'ma̱, ná yala tsa clyacua ti' ma̱ cha' sta ma̱ qui'ya ji'i̱ sca ñati̱; jatya ma̱ ña'a̱ cuayá' ca̱a̱ ycui' nu Xu'na na, bi' laca nu cua'ni cuayá' ji'i̱ ca ta'a na. Li' culotu̱ Ni ji'i̱ lcaa cha' cuxi nu ntsu'u cuaana ti ne' cresiya ji'na, masi sca cha' nu ná nti' na cacha' na ji'i̱ tya'a ñati̱ chalyuu na. Jua'a̱ cacha' Ni lcaa cha' nu ntsu'u ne' cresiya ji'i̱ lcaa ñati̱ chalyuu, lo'o li' ta Ni nu tso'o ji'na, cua ña'a̱ ca cha' tso'o nu ñacui̱ Ni cha' tyacua ji'i̱ scaa na.

ROMANOS 3:22

Nchcui' quityi cha' cua'ni ycui' Ndyosi cha' caca tso'o cresiya ji'na cuentya ji'i̱ ycui' Ni, si xñi na cha' ji'i̱ Jesucristo. Stu'ba ti cua'ni Ni lo'o ca ta'a na nu laca na ngu' judío; jua'a̱ lo'o lcaa ñati̱ nu cua ngusñi cha' ji'i̱ ycui' Ndyosi ca chaca tsu' chalyuu, stu'ba ti cua'ni Ni lo'o lcaa ñati̱.

SAN MATEO 13:30

Tso'o la jatya na xi cha' caluu tyucuaa lo, ña'a̱ cuayá' nu cumi̱ trigo bi'. Li' clyo culo na' cña ji'i̱ ngu' cha' tsaa ngu' xi'yu ngu' quixi̱', cha' tyaaca̱' cuentya yane ti cha' tyaqui̱ lo quii'; li' caca clacua, nu lo'o si'yu ngu' lcaa trigo cha' tyu'u co'o ne' ja'ba.”

SAN MATEO 3:12

Ñi'ya̱ ndu'ni xu'na ltya, jua'a̱ cua'ni Ni; ñi'ya̱ ndyu'u co'o yu nscua', pana ndaqui̱ yu cualya' lo'o nguti, jua'a̱ sa'be tya'a Ni ji'i̱ ñati̱, lo'o li' su'ba Ni ji'i̱ ñati̱ cuxi cha' tyaqui̱ ngu' lo quii' su nga'aa tye cha' tyaqui̱. Jua'a̱ ngulu'u Juan ji'i̱ ñati̱ nu ndya'a̱ slo.

SAN MATEO 22:10

Li' ndu'u ngu' msu bi' ndyaa ngu' nde calle; nchcui' ngu' lo'o cua ña'a̱ ca ñati̱ nu ndyacua tya'a ngu' lo'o, masi ñati̱ tso'o, masi ñati̱ cuxi. Li' ndyu'u ti'i̱ lcaa ñati̱ bi' slo rey ña'a̱ cuayá' nu ngutsa'á̱ ni'i̱ ji'i̱ rey, ndi'i̱ quiña'a̱ tsa ñati̱ nu cua ndyalaa ta'a slo rey bi'.