SAN MATEO 21:16 - Chatino Tataltepec

¹⁶ Hora ti nchcui' ngu' bi' lo'o Jesús: ―¿Ha ná ndyuna nu'u̱ cha' cuiñi nu nchcui' nu sube re cuentya jinu'u̱? ―nacui̱ ngu' bi' ji'i̱ Jesús. ―Cua ndyuna na' ―nacui̱ Jesús li'―. Si'i cha' cuiñi laca cha' nu nchcui' nu sube re. ¿Ha bilya chcui' ma̱ lo quityi nu nscua sca cha' ndi'ya̱?: Ndula tu'ba cubi', ndula tu'ba nu sube cuañi'; chañi cha' ndu'ni tlyu ngu' bi' ji'i̱ ycui' Ndyosi.

SAN MATEO 21:16 Referans Kwoze

SAN MATEO 11:25

Lo'o li' nchcui' Jesús lo'o ycui' Ndyosi Sti yu: ―Cua'ni tlyu na' jinu'u̱, Sti na'; la cui' nu'u̱ laca Xu'na ya, masi nde cua̱, masi nde chalyuu ―nacui̱ Jesús ji'i̱ ycui' Ndyosi―. Tsa xlya'be hi̱ cha' cua ngua'ni nu'u̱ cha' ngua cuayá' ti' ñati̱ nu ná jlo tso'o ti' nquicha'; pana xa' ñati̱ ñi'ya̱ nti' ngu' tii, ná nchca cuayá' ti' ngu' bi' cha' jinu'u̱. Masi ngu' nu nchca tsa ji'i̱, masi ngu' nu jlo tsa ti' lcaa cha' jinu'u̱ nti' ngu', pana ná nchca cuayá' ti' ngu' bi'.

SAN MATEO 19:4

―¿Ha bilya chcui' ma̱ lo quityi cha' ji'i̱ ycui' Ndyosi? ―nacui̱ Jesús ji'i̱ ngu' bi'―. “Clyo ngüiñá Ni ji'i̱ ñati̱, sca nu qui'yu lo'o sca nu cuna'a̱”, jua'a̱ nscua lo quityi bi'.

SAN MATEO 12:3

Lo'o li' nguxacui̱ Jesús cha' ji'i̱ ngu' bi': ―¿Ha bilya chcui' ma̱ lo quityi ji'i̱ ycui' Ndyosi nu nscua ñi'ya̱ nu ngua'ni jyo'o David sa'ni? ―nacui̱ Jesús ji'i̱ ngu'―. Ngua sca tsa̱ ntyute' tsa yu li', lo'o jua'a̱ ntyute' tsa lcaa ngu' tya'a ndya'a̱ yu.

SAN MARCOS 2:25

Nguxacui̱ Jesús cha' ji'i̱ ngu' li': ―¿Ha bilya ña'a̱ ma̱ lo quityi ji'i̱ ycui' Ndyosi nu nscua ñi'ya̱ nu ngua'ni jyo'o David? Ngua sca tsa̱ ntyute' tsa ycui' yu, lo'o jua'a̱ ntyute' tsa tya'a ndya'a̱ yu ―nacui̱ Jesús ji'i̱ ngu'―.

SAN MATEO 22:31

Chañi cha' ntsu'u cha' tyu'ú lcaa jyo'o chaca quiya'. ¿Ha bilya chcui' ma̱ cha' lo quityi nu nchcui' ycui' Ndyosi lo'o ma̱? Ndi'ya̱ nchcui' quityi bi':

SAN MARCOS 13:17

Tya'na tsa nu cuna'a̱ tana; jua'a̱ nu cuna'a̱ nu ntsu'u cubi' cuañi' nu tya ntyi', tya'na tsa caca ngu' bi' lo'o caca tsa̱ bi'.

SAN LUCAS 21:23

Tya'na tsa caca ji'i̱ ngu' cuna'a̱ nu ntsu'u sñi' tsa̱ bi'; jua'a̱ tya'na tsa caca ji'i̱ nu ngu' cuna'a̱ nu ntsu'u cubi' cuañi' nu tya ndyati', cha' lye tsa tyu'u cha' ti'í lo yuu; cuxi tsa cha' ti'í caca ji'i̱ ngu' li'.