SAN MATEO 20:30 - Chatino Tataltepec

³⁰ To' tyucui̱i̱ su tyeje tacui ngu' nga'a̱ tucua tya'a ngu' cuityi̱'; cua ndyuna ngu' cuityi̱' bi' cha' ycui' Jesús nteje tacui tyucui̱i̱ jua, bi' cha' cui̱i̱ ngusi'ya ngu' ji'i̱ yu: ―Xu'na, cua'ni tya'na ti' nu'u̱ ji'i̱ ya. Jlo ti' ya cha' la cui' ñati̱ tya'a ji'i̱ jyo'o David laca nu'u̱ ―nacui̱ ngu' cuityi̱' bi' ji'i̱ Jesús.

SAN MATEO 20:30 Referans Kwoze

SAN MARCOS 10:46

Lo'o li' ndyalaa Jesús ca quichi̱ Jericó. Nteje tacui ngu' cla'be quichi̱ bi'. Nu lo'o cua tyaa ti Jesús lo'o ngu' nu ndyaca tsa'a̱ ji'i̱, li' quiña'a̱ tsa ñati̱ ndyaa lo'o ngu' bi'. Jua'a̱ ngua li', to' tyucui̱i̱ nga'a̱ sca nu cuityi̱' nu naa Bartimeo, ndijña msta̱ ji'i̱ ngu' nu lijya̱ bi'. Sñi' Timeo laca nu quicha bi'.

SAN MATEO 22:42

―¿Ñi'ya̱ nti' cu'ma̱ cuentya ji'i̱ Cristo nu ntsu'u cha' ca̱a̱? ―nacui̱ Jesús ji'i̱ ngu' bi'―. ¿Tilaca ngua jyo'o cusu' ji'i̱ nu Cristo bi' nti' ma̱? ―Ñati̱ tya'a ji'i̱ jyo'o rey David caca nu bi' ―nacui̱ ngu' ji'i̱.

SAN MATEO 21:14

Li' ñaa xi ngu' cuityi̱' ca su ndu̱ Jesús ca ne' laa tonu bi', lo'o jua'a̱ ñaa xi ngu' nu quicha quiya'; ngua'ni Jesús cha' ndyaca tso'o ngu' quicha bi' li'.

SAN MATEO 21:9

Lo'o lcaa ngu' nxi'ya ngu' cha' chaa ti' ngu', masi ngu' nu ndyaa nde loo la, masi ngu' nu ñaa nde chu̱' la; chaa tsa ti' lcaa ngu' bi'. ―Cua'ni tlyu ya jinu'u̱, cha' la cui' ñati̱ tya'a ji'i̱ jyo'o rey David laca nu'u̱ ―nacui̱ ngu' ji'i̱ Jesús―. Tso'o tsa cua'ni ycui' Ni lo'o nu'u̱ cha' lijya̱ nu'u̱ lo'o chacuayá' ji'i̱ ycui' nu Xu'na na. Masi juani ti, cua'ni tlyu na ji'i̱ ycui' Ndyosi ―nacui̱ ngu'.

LOS HECHOS 2:30

Tu'ba ji'i̱ ycui' Ndyosi ngua jyo'o David bi'; jlo ti' yu cha' nda Ni cha' liñi lo'o yu lo'o nchcui' Ni cha' sca ñati̱ tya'a nati̱ ji'i̱ ycui' yu cala nde loo la, bi' caca nu Cristo. Caca Cristo bi' rey, ñi'ya̱ lo'o ngua ycui' David rey.

SAN LUCAS 7:21

Nu lo'o ndi'i̱ ngu' bi' slo Jesús, li' ngua'ni Jesús jo'o ji'i̱ tyu̱u̱ tya'a ñati̱; masi cua sa'ni ngusñi quicha ji'i̱ ngu', masi quicha ndya'a̱ ti, masi ngusñi cui'i̱ cuxi ji'i̱ ngu', hora ti ndyaca tso'o ngu' bi'. Lo'o nu cuityi̱', ngua'ni Jesús cha' ngulane xee cloo ngu' ña'a̱ ngu' chaca quiya'.

SAN LUCAS 4:18

Cua ngulacua̱ ycui' Ndyosi nu Xu'na na jna', nacui̱ lo quityi bi'. Cua ngua'a̱ loo Ni jna', bi' cha' cua ndi'i̱ Xtyi'i ycui' Ndyosi lo na', cha' chcui' na' cha' tso'o lo'o ngu' ti'i. Cua nda Ni jna' lijya̱a̱ cha' cua'ni cho'o na' tyiquee ñati̱ nu xñi'i̱ tsa ti', nacui̱ lo quityi bi'. Ntsu'u cha' chcui' na' lo'o ngu' nu laca preso ji'i̱ nu xña'a̱, cha' cua tyu'u ti ngu' ya' nu xña'a̱ bi'. Ta na' xee nu tyu'u ne' cresiya ji'i̱ ñati̱ nu ndyacu̱' hique ngu'. Lo'o lya' tsa ti' ngu' ji'i̱ tya'a ngu' ni, li' ta na' chacuayá' ji'i̱ ngu' cha' tyu'u ngu' laja ti.

SAN MATEO 15:22

Lo'o li' ñaa sca nu cuna'a̱ ca tyi quichi̱ bi' slo Jesús, ngusi'ya tsa nu cuna'a̱ bi' ji'i̱ Jesús li': ―Cua'ni tya'na ti' nu'u̱ 'na, Xu'na ―nacui̱ nu cuna'a̱ bi' ji'i̱ Jesús―. Nu'u̱ nu laca la cui' ñati̱ tya'a ji'i̱ jyo'o cusu' David, cua'ni nu'u̱ sca cha' tso'o lo'o na'. Nxalú tsa cui'i̱ ji'i̱ sñi' na'.

SAN MATEO 13:4

Li' lo'o nscui̱ yu si'yu bi', ndyú xi si'yu lo yuu tacalya to' tyucui̱i̱; hora ti ñaa quiñi, ndye si'yu bi' ndyacu ni'.

SAN MATEO 20:31

Pana ná ndiya ti' nu ngu' quiña'a̱ bi', cha' lye tsa ngusi'ya ngu' cuityi̱' bi' ji'i̱ Jesús. ―Cuaana ti cu'ma̱ ―nacui̱ ngu' ji'i̱ ngu' cuityi̱' bi'. Ná ndyuna ngu' cuityi̱' bi', cui̱i̱ la ngusi'ya ngu' bi' li': ―Xu'na, nu'u̱ nu laca la cui' tya'a ñati̱ ji'i̱ jyo'o David ―nacui̱ ngu' cuityi̱' bi' ji'i̱ Jesús―, cua'ni tya'na ti' nu'u̱ ji'i̱ ya.