SAN MATEO 19:22 - Chatino Tataltepec

²² Lo'o ndyuna yu cuañi' bi' cha' nu nda Jesús lo'o yu, ndu'u yu ndyaa yu li'; xñi'i̱ xi ti' yu cha' nchcui' Jesús cha' bi', cha' culiya' tsa yu.

SAN MATEO 19:22 Referans Kwoze

SAN MATEO 6:24

’Ni sca ñati̱ ná taca ji'i̱ ngu' cua'ni ngu' cña ji'i̱ tucua tya'a xu'na ngu' sca tyempo ti. Ná taca taquiya' ma̱ ji'i̱ ycui' Ndyosi la cui' tyempo lo'o lye tsa ndya'a̱ cha' tyiquee ma̱ cha' ji'i̱ cñi. Si jua'a̱ ni, cua ntsu'u tucua tya'a xu'na ma̱ li'. Ná tyiquee' li' ca ti'í ti' ma̱ ji'i̱ tsaca xu'na bi', lo'o jua'a̱ ca tiji̱' ti' ma̱ ji'i̱ chaca xu'na bi'. La cui' jua'a̱ taquiya' tso'o ma̱ ji'i̱ xu'na clyo bi', lo'o jua'a̱ cñilo'o ti ma̱ ji'i̱ chaca bi' li'.

SAN MATEO 13:22

Si'yu nu ndyalú lo yuu su ngutu̱ lti quiche' ni, bi' laca ñi'ya̱ laca ñati̱ nu cua ndyuna cha' tso'o bi', pana ndya'a̱ tsa cha' tyiquee ngu' bi' ñi'ya̱ caca ji'i̱ ngu' nde chalyuu, cha' nti' tsa ngu' caca culiya' ngu'. Bi' cha' ná nchca ji'i̱ ycui' Ndyosi cua'ni sca cña tso'o ne' cresiya ji'i̱ ngu' bi'.

COLOSENSES 3:5

Cua'ni tye ma̱ lcaa cha' cuxi nu ndiya tsa ti' ma̱ ji'i̱ lacua: nga'aa cua'ni cuxi ma̱ lo'o clyo'o xa' ñati̱, nga'aa cua'ni ma̱ cha' suba' lo'o tya'a ñati̱ ma̱, nga'aa tyacui' ti' ma̱ ña'a̱ ma̱ ji'i̱ tya'a ñati̱ ma̱, cua'ni tye ma̱ ji'i̱ lcaa lo cha' cuxi nu ndijña tsa ti' tyiquee ma̱ cha' cua'ni ma̱ ji'i̱, nga'aa tyacui ti' ma̱ ji'i̱ scaa cha' tso'o nu ntsu'u chalyuu. Sca na nu ndacui ti' na ji'i̱ ni, stu'ba ti cuxi laca cha' bi' ñi'ya̱ nti' si cua'ni tlyu na ji'i̱ sca lcui̱ jo'ó ti;

EFESIOS 5:5

Sca cha' chañi tsa laca re: Ñati̱ nu jua'a̱ xcui' cha' cuxi ndu'ni ni, ná caja chacuayá' tyaa ngu' bi' ca su ntucua ycui' Ndyosi lo'o Cristo ca tiya' la, nu lo'o caca Ni loo; ñati̱ nu xcui' cha' ji'i̱ nu cuna'a̱ ntsu'u tyiquee ngu', ñati̱ nu ndu'ni suba', ñati̱ nu ndacui ti', ná caja chacuayá' tyaa ngu' bi' ca su ntucua Ni. Nu ndacui ti' na ji'i̱ sca cha' ni, laca cha' ntsu'u tsa tyiquee na ji'i̱ cha' bi', ñi'ya̱ lo'o ntsu'u tyiquee na ña'a̱ na ji'i̱ sca jo'ó.

SAN MARCOS 10:22

Lo'o ndyuna nu qui'yu bi' cha' nu nchcui' Jesús lo'o, xa' ña'a̱ ngulacua ti' li'; xñi'i̱ tsa ti' cha' culiya' tsa nu qui'yu bi'. Ndu'u ndyaa li'.

SAN MATEO 16:26

Ná tyanu cha' tso'o ji'i̱ ngu' nu lo'o cajaa ngu', masi ngua'ni tsa ngu' ngana nde chalyuu; nguna' lcaa chalyuu ji'i̱ ngu' bi' li', cha' ná taca ta ngu' caya' cha' caja la chalyuu ji'i̱ ngu'.

SAN LUCAS 18:23

Nu lo'o ndyuna nu qui'yu bi' cha' nu nchcui' Jesús, hora ti ngua xñi'i̱ ti' yu, cha' culiya' tsa yu.

SAN MATEO 14:9

Ngua xñi'i̱ xi ti' Herodes nu laca loo bi' li'; pana cua ngua'ni yu jura slo lcaa ngu' nu ndya'a̱ ta'a, bi' cha' ngulo yu cña cha' cua'ni ngu' ñi'ya̱ nu nacui̱ nu cuna'a̱ bi'.

SAN MARCOS 6:26

Xñi'i̱ tsa ti' rey li', masi ná ngua ji'i̱ tacu̱' cha' ji'i̱ nu cuna'a̱ bi'; ná caca jua'a̱, cha' slo ngu' tya'a ndyacu cua ngua'ni rey jura cha' ta lcaa na nu jña nu cuna'a̱ cuañi' bi' ji'i̱.

SAN MATEO 19:21

―¿Ha chañi cha' nti' nu'u̱ cha' ca lubii cresiya ji'nu'u̱, cha' caja chalyuu nu ná nga'a̱ cha' tye jinu'u̱? ―nacui̱ Jesús ji'i̱ yu bi'―. Si chañi cha' nu nchcui' nu'u̱, yaa clya cujui' nu'u̱ lcaa cha' tso'o nu ntsu'u jinu'u̱; tyu'u cñi cha' ta nu'u̱ ji'i̱ ngu' ti'i li'. Lo'o li' sta ycui' Ndyosi sca cha' tso'o nu tyacua jinu'u̱ ca su ntucua ycui' Ni. Lo'o cua ngua'ni nu'u̱ cha' bi', li' ca̱a̱ nu'u̱ slo na' cha' tya'a̱ nu'u̱ lo'o na'.

SAN MATEO 19:23

Li' nchcui' Jesús lo'o ngu' nu ndyaca tsa'a̱ ji'i̱: ―Cha' liñi nchcui' na' lo'o ma̱ juani ―nacui̱―, tucui tsa caca ji'i̱ ngu' culiya' cha' tyatí̱ ngu' cha' ji'i̱ ycui' Ndyosi, cha' caca Ni loo ne' cresiya ji'i̱ ngu'.

SAN JUAN 16:20

Liñi tsa cha' nu ta na' lo'o ma̱ juani ―nacui̱ Jesús ji'i̱ ngu' bi' li'―, cha' chañi xi'ya ma̱, chañi cunaa ma̱ nu lo'o cua ndya'a na', masi chaa ti' xa' la ñati̱ chalyuu. Pana ná cube tsa ti' ma̱, masi xñi'i̱ ti' ma̱; caca chaa ti' ma̱ lo'o tyu'ú na' chaca quiya' li'.