SAN MATEO 15:36 - Chatino Tataltepec

³⁶ Li' ngusñi Jesús nu cati tya'a xlyá bi' lo'o cualya bi', ndya xlya'be ji'i̱ ycui' Ndyosi xqui'ya cha' ntsu'u na cacu ngu'. Li' ngusa'be Jesús xlyá lo'o cualya bi', nda yu'be bi' ji'i̱ ngu' nu ndyaca tsa'a̱ ji'i̱ cha' ta ngu' ji'i̱ nu ngu' quiña'a̱ bi'.

SAN MATEO 15:36 Referans Kwoze

ROMANOS 14:6

Si tacati tsa sca tsa̱ cuentya ji'i̱ tsaca ngu', bi' laca tsa̱ nu nga'a̱ cha' cua'ni chi̱ ngu' bi' loo ycui' Ndyosi lacua; lo'o jua'a̱ taca cua'ni chi̱ nu xa' la ñati̱ loo ycui' Ndyosi, masi ná ntsu'u cha' tacati ji'i̱ ngu' lo'o tsa̱ bi'. La cui' jua'a̱ ndyu'u cha' lo'o ñati̱ nu ná ntsi̱i̱ cacu cuaña' bi'; xqui'ya cha' ngusñi ngu' cha' ji'i̱ ycui' Ndyosi, bi' cha' ná ntsi̱i̱ ngu' bi'. Ndya ngu' xlya'be ji'i̱ ycui' Ni lo'o ndacu ngu' ji'i̱. Lo'o nu ntsi̱i̱ cacu cuaña' bi' ni, la cui' ti xqui'ya ycui' Ndyosi ntsi̱i̱ ngu' cacu ngu' ji'i̱; lo'o ngu' bi' ndya ngu' xlya'be ji'i̱ ycui' nu Xu'na na cha' nda Ni na cacu ngu'.

SAN LUCAS 22:19

Nu lo'o cua ntsu'u xlyá bi' ya' Jesús, li' ndya xlya'be ji'i̱ ycui' Ndyosi, cuati ngusa'be yu xlyá bi', cha' tacha ji'i̱ ngu'. Li' nchcui' yu lo'o ngu': ―Nde laca na', ycui' cuaña' na' laca re. Na cua nda ycui' Ndyosi Sti na' 'na cha' cajaa na' cha' caca tso'o cha' ji'i̱ cu'ma̱. Tyi'u ti' ma̱ 'na lo'o cacu ma̱ xlyá re.

LOS HECHOS 27:35

Lo'o ndye nchcui' Pablo lo'o ngu', li' ngusñi yu sca xlyá. Ndya yu xlya'be ji'i̱ ycui' Ndyosi slo lcaa ngu', ngusa'be yu xlyá bi', ndyacu yu li'.

SAN JUAN 6:11

Lo'o li' ndaya' Jesús ji'i̱ xlyá bi', ndya yu xlya'be ji'i̱ ycui' Ndyosi cha' cua nda Ni na cacu ngu'. Li' ngusa'be Jesús xlyá bi', nda yu ji'i̱ ngu' nu ndyaca tsa'a̱ ji'i̱, lo'o ngu' bi' laca nu ndacha xlyá ji'i̱ ngu' quiña'a̱ bi' ca su ndi'i̱ ngu'. Lo'o cualya bi' nda Jesús cacu ngu'. Li' ndyacu ngu' ña'a̱ cuayá' nu nguaala' ti' lcaa ngu'.

1 CORINTIOS 10:31

Tso'o lacua masi cacu ma̱, masi co'o ma̱, masi cua'ni ma̱ lcua ti lo cña nu ndyu'ni ma̱, pana tyi'u ti' ma̱ ji'i̱ ycui' Ndyosi laja lo'o cua'ni ma̱ lcaa cña bi', cha' caca cuayá' ti' ngu' li' cha' tso'o tsa laca cha' ji'i̱ ycui' Ndyosi, la cui' cha' nu cua ngusñi ma̱.

SAN JUAN 6:23

Lo'o li' ngulaa xi xa' la yaca ni'i̱ nu ngutu'u nde quichi̱ Tiberias, ndyacui to' hitya cacua ti su ndyacu ngu' xlyá nu cua nda ycui' nu Xu'na na xlya'be ji'i̱ ycui' Ndyosi cuentya ji'i̱.

SAN LUCAS 24:30

Pana nu lo'o cua nga'a̱ yu lo'o ngu' to' mesa, li' ngusñi yu sca xlyá, ndya yu xlya'be ji'i̱ ycui' Ndyosi; lo'o li' ngusa'be yu xlyá bi', cha' ta yu ji'i̱ ngu'.

SAN LUCAS 22:17

Li' ngusñi Jesús sca vaso vino, ndya xlya'be ji'i̱ ycui' Ndyosi li'. Ndi'ya̱ nacui̱ yu ji'i̱ nu ngu' nu ndyaca tsa'a̱ ji'i̱ bi' li': ―Co'o ma̱ vino nu ntsu'u ne' vaso re, lo'o jua'a̱ ta ma̱ vino re co'o ca ta'a tya'a ma̱ ―nacui̱ Jesús li'―.

SAN MATEO 14:19

Li' ngulo Jesús cña ji'i̱ nu ngu' quiña'a̱ bi', cha' tyaca'a̱ ngu' xi lo quii. Li' ndaya' yu ji'i̱ nu ca'yu tya'a xlyá teje' bi' lo'o ji'i̱ nu tucua tya'a cualya bi'; nxña'a̱ yu nde cua̱ li', ndya xlya'be ji'i̱ ycui' Ndyosi, lo'o li' nguxana yu nsa'be yu xlyá lo'o cualya bi', nda yu yu'be bi' ji'i̱ ngu' nu ndyaca tsa'a̱ ji'i̱ cha' tacha ngu' ji'i̱ ñati̱ bi'.

SAN MATEO 15:35

Li' ngulo Jesús cña ji'i̱ nu ngu' quiña'a̱ cha' tyaca'a̱ ngu' lo yuu.

1 CORINTIOS 14:16

Si ná cua'ni na jua'a̱, li' ná caja ñi'ya̱ ñacui̱ ngu' cha': “Jua'a̱ caca cha' lacua”, lo'o ndye nchcui' na li'. Cua ña'a̱ ca ñati̱ nu ndi'i̱ slo na ni, si cha' ji'na ti laca cha' nu chcui' na lo'o ndu'ni tlyu na ji'i̱ ycui' Ndyosi, nga'aa caja ñi'ya̱ chcui' ngu' li', cha' ná nchca cuayá' ti' ngu' ni cha' nda na, masi tso'o tsa ta na xlya'be ji'i̱ ycui' Ndyosi.