SAN MATEO 14:31 - Chatino Tataltepec

³¹ Hora ti ngusñi Jesús ya' Pedro. ―Xti tsa tyempo ndalo nu'u̱ cha' jlya ti' nu'u̱ 'na ―nacui̱ Jesús ji'i̱ Pedro bi'―. ¿Ni cha' ná jlya tso'o ti' 'na?

SAN MATEO 14:31 Referans Kwoze

SAN MATEO 8:26

Li' nguxacui̱ Jesús cha' ji'i̱ ngu' bi': ―¿Ni cha' ntsi̱i̱ tsa ma̱? ―nacui̱ ji'i̱ ngu'―. ¡Xi tsa tyempo ndalo ma̱, cha' ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni cña! Lo'o li' ndyatu̱ Jesús, nchcui' lo'o cui'i̱ lo'o clyoo' cha' cua'a ji'i̱ cha' bi'; hora ti ngua ti̱ bi' li'.

SAN MATEO 17:20

Li' nguxacui̱ Jesús cha' ji'i̱ ngu' bi': ―Xti ti cha' jlya ti' ma̱ ji'i̱ ycui' Ni, bi' cha' ná ngua ji'i̱ ma̱ ―nacui̱ Jesús ji'i̱ ngu' bi'―. Cha' liñi nchcui' na' lo'o ma̱ juani, cha' si chañi ca cha' jlya ti' ma̱ cha' ji'i̱ ycui' Ndyosi, masi tsa lo cua sca si'yu cuxee ti nu piti tsa, si jua'a̱ ti jlya ti' ma̱ cha' ji'i̱ Ni, li' taca chcui' ma̱ lo'o ca'ya cua̱ nde: “Tyu'utsu' nu'u̱ tyaa nu'u̱ chaca se'i̱ cajua la”, ñacui̱ ma̱ ji'i̱. Lo'o li' taquiya' ca'ya bi' cha' nu nchcui' ma̱ lo'o, tyu'utsu' ca'ya bi' tsaa chaca se'i̱ li'. Ná ntsu'u cha' nu ná caca cua'ni ma̱ si chañi ca cha' jlya ti' ma̱ 'na.

SAN MARCOS 5:41

Li' ngusñi Jesús ya' nu piti bi': ―Talita, cumi ―nacui̱ Jesús ji'i̱, cha'cña ji'i̱ ngu' bi'. (Ndi'ya̱ ndyu'u cha' bi': Mbixu̱', nde cha' chcui' na' lo'o nu'u̱ juani: Tyatu̱ nu'u̱.)

SAN MARCOS 1:31

Li' ndyaa Jesús slo nu quicha bi', ngusñi yu ya' ma' cha' xtyucua yu ji'i̱ ma' tyatu̱ ma'. Hora ti ndyu'u tyique' ji'i̱ ma' bi'. Lo'o ti nguxana ma' ngua'ni cho'o xi scuaa cacu ngu' li'.

SAN MATEO 16:8

Pana, ngua tii Jesús cha' ná ngua cuayá' ti' ngu' bi'. ―¿Ni cha' ndube ti' ma̱ cha' ná lo'o xlyá teje' lijya̱ ma̱? ―nacui̱ ji'i̱ ngu' bi'―. Xti tsa cha' jlya ti' ma̱ ji'i̱ ycui' Ndyosi.

LOS HECHOS 4:30

Ta nu'u̱ chacuayá' cha' tyaca tso'o ngu' quicha; cua'ni Jesús Sñi' nu'u̱ nu xcui' lubii cresiya ji'i̱ quiña'a̱ tsa cña tonu, cha' jua'a̱ cube tsa ti' ngu' jinu'u̱. Tsa lo cua ti cha' chcui' ya juani.

SAN LUCAS 24:34

Hora ti nchcui' ngu' nu nga'a̱ ni'i̱ bi' lo'o ngu' nu ndyalaa ca ti li': ―Chañi cha' cua ndyu'ú Jesús chaca quiya' ―nacui̱ ngu'―. Cua na'a̱ Simón ji'i̱ yu.

SAN MARCOS 16:7

Li' yaa clya ma̱ cacha' ma̱ ji'i̱ Pedro lo'o ji'i̱ xa' la ngu' nu ndyaca tsa'a̱ ji'i̱ yu, cha' cua tsaa ti ycui' yu nde loo ji'i̱ ma̱ nde Galilea; tyacua tya'a ma̱ lo'o yu ca bi', ñi'ya̱ nu cua nacui̱ yu ji'i̱ ma̱ tya tsubi'.

SAN MARCOS 11:23

Chañi cha' nu nchcui' na' lo'o ma̱ juani, cha' si chcui' ma̱ lo'o ca'ya re: “Tyu'utsu' nu'u̱, yaa xcua nu'u̱ nde lo hitya tyujo'o”, ñacui̱ ma̱, jua'a̱ cua'ni ycui' Ni lo'o ca'ya bi'. Jua'a̱ caca si chañi ji'i̱ ma̱ cha' jlya ti' ma̱ cha' caca sca cha' nu jña ma̱ ji'i̱ Ni, pana si ná jlya ti' ma̱ cha' nu nchcui' ycui' Ndyosi, ná caca bi' li'.

SAN MARCOS 1:41

Ngua tya'na ti' Jesús ji'i̱ nu quicha bi' li', ndyala' yu cuaña' yu quicha bi' su ngutsu'. ―Tyaja'a̱ na', cua'ni na' jo'o jinu'u̱ ―nacui̱ Jesús ji'i̱ yu quicha bi'―. Tyanu lubii cuaña' nu'u̱ juani.

SAN MATEO 6:30

Ñi'ya̱ lo'o tso'o tsa ngüiñá ycui' Ndyosi ji'i̱ queé cua, cha' nda Ni sca lo ste' bi', masi sca ti tsa̱ talo queé bi' lo'o li' tyaqui̱ ntsu'u quiya'; la cui' jua'a̱ ta ycui' Ni late' cacu' ma̱, masi xti tsa cha' jlya ti' ma̱ ji'i̱ ycui' Ni.

1 TIMOTEO 2:8

Bi' cha' lacua, lcaa se'i̱ su ndyu'u ti'i̱ ngu' nu ntsu'u cha' ji'i̱ lo'o Jesucristo tsa tlyu ti, nti' na' cha' chcui' ngu' lo'o ycui' Ndyosi. Tso'o ti tyiquee ngu' ta ngu' cha' lo'o ycui' Ndyosi li', cha' ná tso'o chcui' ngu' lo'o Ni si ñasi̱' ngu', ni ná tso'o chcui' ngu' lo'o Ni laja lo'o nxu̱u̱ tya'a ngu'.

1 PEDRO 1:5

Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.

SAN MATEO 14:30

Pana hora ti ngua tii yu cha' lye tsa ndyaca cui'i̱, ndyutsi̱i̱ tsa yu li', nguxana cha' nclyu'u yu ne' hitya li'. Lo'o ti ngusi'ya yu ji'i̱ Jesús: ―Xu'na ―nacui̱ Pedro ji'i̱―, culo nu'u̱ 'na ne' hitya re.

SAN MATEO 14:32

Lo'o li' ndyalaa lo'o Jesús ji'i̱ Pedro ca su ndacui yaca ni'i̱, ndyatí̱ ngu' ne' bi' li'; hora ti ngua ti̱ cui'i̱ li'.

SAN MARCOS 4:40

Lo'o li' nchcui' Jesús lo'o ngu' nu ndyaca tsa'a̱ ji'i̱: ―¿Ni cha' ntsi̱i̱ tsa ma̱? ―nacui̱ Jesús ji'i̱ ngu'―. ¿Ni cha' laca ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni jua'a̱? ―nacui̱.