SAN MATEO 13:46 - Chatino Tataltepec

⁴⁶ Lo'o li' nquije sca perla nu quiña'a̱ tsa nga'a̱ ji'i̱ yu bi'; hora ti ndyujui' yu lcaa na nu ntsu'u ji'i̱ yu, cha' cui'ya nu sca ti perla bi', cha' nga'aa ntsu'u na tso'o la cui'ya yu, nti' yu. (Cua nda Jesús tyucuaa cui̱i̱ bi' lo'o ngu', cha' ca cuayá' ti' ngu' cha' sca ti cha' bi' ndulo tsa ji'na, cha' quije chalyuu cucui su laca ycui' Ndyosi loo ne' cresiya ji'na.)

SAN MATEO 13:46 Referans Kwoze

EFESIOS 3:8

Ná tso'o la na' tsiya' ti que cua ña'a̱ ca ñati̱ nu ngusñi cha' ji'i̱ ycui' Ndyosi, tso'o la ngu' bi' que na'; pana nda Ni chacuayá' cha' tsa'a̱ slo ñati̱ nu ndi'i̱ xa' tsu'. Tso'o tsa cña nda Ni 'na, cha' cacha' na' cha' tso'o bi' ji'i̱ ngu', masi tya lyiji tsa cha' tye ca cuayá' ti' ycui' na' lcaa cha' tso'o nu ndu'ni Cristo lo'o ñati̱.

COLOSENSES 2:3

Xqui'ya cha' ngusñi na cha' ji'i̱ Cristo, bi' cha' taca quijeloo cha' ji'na macala su ntucua quiya' lcaa cha' nu ntsu'u tyiquee ycui' Ndyosi, masi lcaa cha' nu nda'ya hique Ni cha' cua'ni Ni nde chalyuu.

LOS HECHOS 20:24

Pana ná ntsi̱i̱ na' xqui'ya cha' nu nchcui' ngu' bi', ná ndu'ni cha' jna' masi cujuii ngu' jna'. Sca ti cha' nti' na', cha' tso'o ti tye cña nu nda ycui' Jesús jna', cha' ta na' cha' tso'o ji'i̱ ycui' Ndyosi lo'o xa' ñati̱, cha' ntsu'u tsa tyiquee Ni ña'a̱ Ni ji'i̱ ñati̱ chalyuu.

SAN MATEO 13:44

’Chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱; laca ñi'ya̱ laca sca yu'ba nu quiña'a̱ tsa nga'a̱. Nguxatsi' ngu' ji'i̱ yu'ba nu quiña'a̱ nga'a̱ bi' ne' yuu ne' lo'o ji'i̱ ngu'. Nde loo la, li' nquije ji'i̱ chaca ñati̱ mala ndyu'u cuatsi' bi', chaa tsa ti' yu li'; bi' cha' hora ti xa' ndacu̱' yu yuu lo su nguatsi' yu'ba bi', ndu'u yu ndyaa yu lquichi̱ cha' cujui' yu lcaa na nu ntsu'u ji'i̱ yu, cha' caja cñi ji'i̱ yu cha' cui'ya yu ña'a̱ tsaca lo'o bi' su nguatsi' yu'ba nu quiña'a̱ nga'a̱ bi'. Jua'a̱ ngua cha' ngujui yu'ba nu quiña'a̱ nga'a̱ bi' ji'i̱ yu.

APOCALIPSIS 21:21

Cua ndya' ca ta'a tii tyucuaa tolo'o ji'i̱ quichi̱ lo'o quee ndubi nu ngati̱ ña'a̱, nu naa quee perla; tii tyucuaa tya'a quee ngati̱ laca bi', sca ti quee ngati̱ bi' ngua'nijo'o ndya' sca tolo'o. Xcui' oro tsiya' ti nscua laja calle quichi̱ bi'; ñi'ya̱ ña'a̱ ndubi caatya̱, jua'a̱ ña'a̱ ndubi calle bi'.

GÁLATAS 6:14

Pana nu na' ni, sca ti cha' tso'o ntsu'u chalyuu nti' na', cha' nu ngujuii ycui' Jesucristo nu Xu'na na lo crusi cuentya ji'na; bi' cha' nga'aa nti' na' ta na' xa' la cha' lo'o ñati̱. Lo'o jua'a̱ xqui'ya cha' ngujuii ycui' Cristo, nga'aa caca tatsaa nu cuxi nu ntsu'u chalyuu jna', cha' nga'aa ntsu'u cha' jna' lo'o cha' cuxi nu ntsu'u chalyuu juani.

SAN MATEO 13:45

’Lo'o chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱. Laca bi' ñi'ya̱ laca si nclyana tsa sca ñati̱ ji'i̱ perla nu tso'o tsa ña'a̱. Jlo ti' yu na ca nu ndyaana yu, bi' cha' tyiquee' nclyana yu ji'i̱ perla tso'o cha' cui'ya yu ji'i̱, nti' yu.

SAN MATEO 13:47

―Lo'o chaca cha' chcui' na' lo'o ma̱, ñi'ya̱ caca lo'o laca ycui' Ni loo ne' cresiya ji'i̱ ñati̱ ―nacui̱ Jesús―. Laca ñi'ya̱ laca sca taraya tlyu nu ntucu̱ ngu' ji'i̱ lo hitya tyujo'o cha' xñi cualya, lo'o li' lcaa lo cualya ndyatí̱ ne' taraya bi'.

APOCALIPSIS 18:12

nga'aa cui'ya ngu' oro ji'i̱ ngu', masi plata, masi quee ndubi, masi tyaaca̱' quee ngati̱; nga'aa cui'ya ngu' late' ngati̱ ji'i̱ ngu', nu quiña'a̱ tsa nga'a̱, masi late' cuaa ña'a̱, masi late' sera, masi late' nu ntsu'u tyu̱u̱ tya'a color ji'i̱; jua'a̱ lcaa lo yaca nu ñaa tyijyu', lcaa na ndya' lo'o tyijya̱ sata ngati̱, masi na ndya' lo'o yaca nu quiña'a̱ nga'a̱, masi na ndya' lo'o chcua̱ ngatsi, masi na ndya' lo'o chcua̱ ti, masi na ndya' lo'o quee tacalya ti, nga'aa cui'ya ngu' ji'i̱ tsiya' ti;