SAN MATEO 12:32 - Chatino Tataltepec

³² Cui'ya Ni cha' clyu ti' ji'i̱ ñati̱ nu nchcui' cha' cuxi jna' nu cua nda Ni 'na lijya̱a̱ cha' caca na' ñati̱; pana lo'o chcui' ngu' cha' cuxi ji'i̱ cña nu ndu'ni Xtyi'i ycui' Ndyosi, li' nga'aa cui'ya ycui' Ni cha' clyu ti' ji'i̱ ngu' bi' lcaa tsa̱ lo'o tyi'i̱ ngu' chalyuu, masi tyucui tyempo nde loo la.

SAN MATEO 12:32 Referans Kwoze

SAN MARCOS 3:29

sca ti ji'i̱ ñati̱ nu nchcui' cha' cuxi ji'i̱ cña nu ndu'ni Xtyi'i ycui' Ndyosi, ná cua'ni clyu ti' ycui' Ni ji'i̱ ñati̱ bi'. Ná cuityi̱ Ni qui'ya nu ntsu'u ji'i̱ ñati̱ bi'.

SAN JUAN 7:39

Cua nti' Jesús chcui' lo'o ngu' cha' cua ta ti Ni Xtyi'i ycui' Ni cha' tyanu ne' cresiya ji'i̱ ñati̱ nu cua ngusñi cha' ji'i̱ ycui' Ni, bi' cha' nacui̱ yu jua'a̱. Bilya ta ycui' Ndyosi Xtyi'i ycui' Ni ca̱a̱ nde chalyuu, xqui'ya cha' bilya tyaa Jesús ca su tlyu su ntucua ycui' Ndyosi Sti yu.

1 TIMOTEO 1:13

Ngusubi Ni jna', masi suba' tsa nchcui' na' ji'i̱ Ni cua sa'ni la, tyempo lo'o nguxcube' na' ji'i̱ ñati̱ ji'i̱ Jesucristo; tyaala tsa na' nu ngua li'. Pana ná jlo ti' na' tyempo bi', cha' bilya xñi na' cha' tso'o ji'i̱ ycui' Ndyosi, bi' cha' ngua tya'na tsa ti' Ni jna'.

TITO 2:12

jua'a̱ cua ngulu'u Ni ji'na ñi'ya̱ taca tyi'i̱ tso'o ti na nde chalyuu. Nti' Ni cha' cua'a na ji'i̱ ycui' ca na, cha' tso'o ti cua'ni na lo'o tya'a ñati̱ na. Taca cua'ni tlyu na ji'i̱ ycui' Ndyosi nu lo'o cua ngulochu̱' na ji'i̱ lcaa cha' cuxi nu ná ndiya ti' Ni ji'i̱, nu lo'o nga'aa ndu'ni na lcaa cha' suba' nu ndiya ti' ñati̱ chalyuu ti.

EFESIOS 1:21

Ca bi' laca Cristo loo la ji'i̱ lcaa ñati̱; nga'aa ntsu'u nu tlyu la que Cristo ca bi', nga'aa ntsu'u nu culo cña ji'i̱ yu. Ná ntsu'u chaca xu'na ñati̱ nde chalyuu nu taca tyiji̱loo ji'i̱ Cristo; la cui' ti ca chaca chalyuu ca nde cua̱ ni, ná ntsu'u cui'i̱ cuxi, ni ná ntsu'u ñati̱ cuentya ji'i̱ ycui' Ndyosi nu taca tyiji̱loo ji'i̱ Cristo.

LOS HECHOS 3:19

Bi' cha' ntsu'u cha' ca tyuju'u ti' ma̱ ji'i̱ lcaa cha' cuxi nu ntsu'u tyiquee ma̱ ji'i̱, cuati jña ma̱ cha' clyu ti' ji'i̱ ycui' Ndyosi cha' cuityi̱ Ni lcaa cha' cuxi nu ngua'ni ma̱. Cua'ni nu Xu'na na cha' taca ca tso'o cresiya ji'i̱ ma̱ chaca quiya' li'.

SAN LUCAS 12:10

’Cua'ni clyu ti' ycui' Ndyosi ji'i̱ ñati̱ nu chcui' cha' cuxi jna' nu lijya̱a̱ cha' caca na' ñati̱; pana ñati̱ nu chcui' cha' cuxi ji'i̱ cña nu ndu'ni Xtyi'i ycui' Ndyosi, nga'aa cua'ni clyu ti' Ni ji'i̱ ñati̱ bi'.

SAN MATEO 12:31

’Bi' cha' ndacha̱' ji'i̱ ma̱ juani cha' taca cui'ya ycui' Ni cha' clyu ti' ji'i̱ ñati̱ xqui'ya lcaa qui'ya nu ntsu'u ji'i̱ ngu', masi cuxi tsa nchcui' ngu' ji'i̱ ycui' Ni; pana lo'o cuxi tsa nchcui' ngu' ji'i̱ cña nu ndu'ni Xtyi'i ycui' Ndyosi, li' nga'aa cui'ya ycui' Ni cha' clyu ti' ji'i̱ ngu' bi' tsiya' ti.

1 TIMOTEO 1:15

Taca xñi tso'o ngu' cha' nu nchcui' ndi'ya̱: Cua ya̱a̱ Jesucristo nde chalyuu cha' cua'ni lyaá Ni ji'i̱ ñati̱ chalyuu nu ntsu'u qui'ya ji'i̱. Lo'o na', tlyu la xqui'ya na' que xa' la ñati̱, cha' cuxi tsa cña nu ngua'ni na' lo'o ñati̱ ji'i̱ Jesucristo nu ngua sa'ni la.

SAN JUAN 7:12

Quiña'a̱ tsa cha' nda ngu' quichi̱ bi' lo'o tya'a ngu' cuentya ji'i̱ Jesús. Ntsu'u ngu' nu nchcui' ndi'ya̱: “Tso'o tsa ñati̱ bi'”. Lo'o ntsu'u xi xa' la ngu' nu ndu'ni: “Si'i. Xcui' cha' cuiñi nda yu, na ñilo'o ti yu ji'i̱ ngu'”.

SAN LUCAS 23:34

Lo'o tya ndi'i̱ ngu' nu ngujui'i̱ ca'a̱ ji'i̱ ngu' lo crusi, li' nchcui' Jesús lo'o ycui' Ndyosi Sti yu: ―Sti na' ―nacui̱ yu―, cui'ya nu'u̱ cha' clyu ti' ji'i̱ ngu' re, cha' ná jlo ti' ngu' ni cha' laca ndyu'ni ngu' jua'a̱. Li' ndacha ngu' sendaru bi' ste' Jesús ji'i̱ tya'a ngu' laja lo'o ndijya ti ngu' lo'o tya'a ngu'.

SAN MARCOS 10:30

pana la cui' chalyuu juani xa' caja quiña'a̱ la cha' ji'i̱ ngu' bi', tsa ña'a̱ nu nguna' ji'i̱ ngu' bi' ngua ti' ngu'. Caja su caca tyi ngu', caja nu caca tya'a ngula ngu', caja nu caca xtya'a̱ ngu', caja nu caca sñi' ngu', caja yuu su cua'ni ngu' cña; hasta sca siyento tsa lo cua cha' bi' caja ji'i̱ ngu'. Lo'o la cui' jua'a̱ tyacua cha' ti'í ji'i̱ ngu', pana ca nde loo la caja chalyuu nu ná nga'a̱ cha' tye ji'i̱ ngu' bi'.

SAN JUAN 7:52

―¿Ha la cui' ngu' Galilea laca nu'u̱ lacua? ―nacui̱ tya'a fariseo ji'i̱ Nicodemo li'―. Lo quityi ji'i̱ ycui' Ndyosi nu nscua sa'ni ña'a̱ nu'u̱ xi, cha' caca cuayá' la ti' nu'u̱ cha' si'i nde Galilea tyu'u ñati̱ nu culu'u cha' ji'i̱ ycui' Ndyosi ji'na.

SAN LUCAS 7:34

Tiya' la li' ndu'u tucua na' nu cua nda ycui' Ndyosi lijya̱a̱ cha' caca na' ñati̱; tso'o ti ndacu na' lo'o ma̱ li', stu'ba ti nga'a̱ na' lo'o ma̱. Bi' cha' nchcui' ma̱ jna': “Ña'a̱ na ñi'ya̱ nu ndu'ni nu jua juani”, nacui̱ ma̱ ji'i̱ tya'a ma̱, “xcui' na cacu ti yu jua nti' yu, xcui' na cu'bi ti yu ndya'a̱ yu. Ná tso'o yu jua cha' laca yu tya'a tso'o ngu' nu nxñi cñi cña loo na, lo'o jua'a̱ xi xa' la ngu' cuxi laca tya'a tso'o yu”, nacui̱ ma̱ 'na.

SAN MATEO 11:19

Lo'o li' lijya̱ na' nu cua nda Ni 'na lijya̱a̱ cha' caca na' ñati̱, ndacu na' lcaa lo na lo'o ma̱, ndyi'yu na' lcaa lo na lo'o ma̱, lo'o li' nchcui' ma̱ 'na: “¡Ña'a̱ ma̱ ña'a̱! Ndacu tsa yu jua, cu'bi tsa yu”, nacui̱ ma̱ ji'i̱ tya'a ma̱. “Ná tso'o yu jua cha' tya'a tso'o yu laca ngu' nu nxñi cñi cña loo na, lo'o jua'a̱ xi xa' la ngu' cuxi laca tya'a tso'o yu”, nacui̱ ma̱ 'na. Nacui̱ ma̱ jua'a̱ cha' ná tso'o cha' nu nchcui' na', nti' ma̱; pana caca cuayá' ti' ma̱ nde loo la cha' liñi tsa cha' nu nchcui' ngu' nu nacui̱ cha' cuentya ji'i̱ ycui' Ndyosi laca na'.

SAN MATEO 13:55

La cui' sñi' cuityi yaca laca yu re. ¿Ha si'i? Lo'o María laca xtya'a̱ yu; lo'o Jacobo, lo'o José, lo'o Simón, lo'o Judas, ngu' bi' laca tya'a yu re.

SAN MATEO 8:20

Nguxacui̱ Jesús cha' ji'i̱ mstru bi' li': ―Nu naa cuatya' ni, ne' xtyuu ni' ndyu'ú ni'; lo'o jua'a̱ quiñi sube, ne' xlyati̱ ndyu'ú ni'. Pana na' ni, cua nda Ni 'na lijya̱a̱ chalyuu re cha' caca na' ñati̱, lo'o jua'a̱ ná ntsu'u su xtyii na' caja' na', ná ntsu'u su chca'a̱ cña' na'.

SAN MATEO 12:8

Lo'o jua'a̱ ta na' chaca cha' lo'o ma̱, cha' na' nu cua nda Ni 'na lijya̱a̱ cha' caca na' ñati̱ ni, laca na' loo, masi tsa̱ nu ndi'i̱ cña' ngu'.

SAN MATEO 13:22

Si'yu nu ndyalú lo yuu su ngutu̱ lti quiche' ni, bi' laca ñi'ya̱ laca ñati̱ nu cua ndyuna cha' tso'o bi', pana ndya'a̱ tsa cha' tyiquee ngu' bi' ñi'ya̱ caca ji'i̱ ngu' nde chalyuu, cha' nti' tsa ngu' caca culiya' ngu'. Bi' cha' ná nchca ji'i̱ ycui' Ndyosi cua'ni sca cña tso'o ne' cresiya ji'i̱ ngu' bi'.

SAN MATEO 13:39

cha' tya'a cusu̱u̱ na' laca nu ngusañi si'yu quixi̱' bi' lo xtya̱ 'na; la cui' nu xña'a̱ laca bi'. Tsa̱ nu lo'o xana clyaja xtya̱ ni, bi' laca ñi'ya̱ laca tsa̱ tlyu lo'o tye chalyuu; lo'o ñati̱ nu si'yu quixi̱' lo xtya̱ bi' ni, bi' laca ñi'ya̱ laca xca̱ ji'i̱ ycui' Ndyosi.

SAN MATEO 13:40

Lo'o xuti'i̱ ngu' quixi̱' cha' tyaqui̱, jua'a̱ laca ñi'ya̱ caca ji'i̱ ñati̱ lo'o tye chalyuu.

SAN MARCOS 3:28

’Chañi cha' nu nchcui' na' lo'o cu'ma̱, cha' nchca ji'i̱ ñati̱ jña ngu' cha' clyu ti' ji'i̱ ycui' Ndyosi Sti na' cuentya ji'i̱ lcaa qui'ya nu ntsu'u ji'i̱ ngu', masi cha' cuxi nu ngua'ni ngu', masi cha' cuxi nu nchcui' ngu';

SAN LUCAS 16:8

Tiya' la ngua cuayá' ti' ycui' nu laca xu'na yu ñi'ya̱ nu ndyu'ni yu. “Tajua' tsa ndyu'ni msu nu laca loo bi' 'na laja lo'o ndyu'ni yu cña”, nacui̱ nu cusu' culiya' bi'. Lo'o li' tya nchcui' Jesús lo'o ngu' bi': ―Lo'o cu'ma̱ ni, nu nti' tsa ma̱ taquiya' ma̱ ji'i̱ lcaa cha' nu nchcui' ycui' Ndyosi ―nacui̱―, taca ca tsa'a̱ ma̱ xi lo'o ña'a̱ ma̱ ñi'ya̱ nu ndu'ni xa' la ñati̱ chalyuu lo'o tya'a ngu', masi cuxi ti ngu'.

SAN LUCAS 18:30

Pana quiña'a̱ la cha' tso'o caja ji'i̱ ngu' bi' chalyuu juani, tsa ña'a̱ cha' nu nguna' ji'i̱ ngu' bi', ngua ti' ngu'; jua'a̱ nde loo la, li' caja chalyuu nu ná nga'a̱ cha' tye ji'i̱ ngu' bi'.

1 TIMOTEO 4:8

Tso'o xi cha' ngui'i̱ quiya' na cha' tya'a̱ na, ngui'i̱ ya' na cha' cua'ni na cña; pana tso'o la si qui'i̱ tyiquee na cha' taquiya' na ji'i̱ ycui' Ndyosi lcaa tyempo. Tso'o ti tyi'i̱ na nde chalyuu, nu lo'o cua'ni na cua ña'a̱ ca cña nu nti' nu Xu'na na cha' cua'ni na; la cui' tso'o ti tyi'i̱ na ca slo ycui' Ndyosi, si cua'ni na ñi'ya̱ nu nti' Ni cha' cua'ni na.

1 TIMOTEO 6:17

Lo'o jua'a̱ ntsu'u cha' culo nu'u̱ cña ji'i̱ ngu' culiya' tya'a ngusñi ma̱ cha' ji'i̱ Jesús, cha' ná cua'ni tyucuaa ti' ngu' bi' lo'o tya'a ngu'. Ná tso'o si xcui' culacua tsa ti' ngu' bi' ji'i̱ cñi ji'i̱ ngu'; la cui' ti ná culacua tsa ti' ngu' ji'i̱ lcaa cha' tso'o nu ntsu'u ji'i̱ ngu', cha' yala ti ndye cñi ji'na. Tso'o la si cube ti' ngu' bi' ji'i̱ ycui' Ndyosi nu lu'ú ca, cha' cua nda Ni lcaa lo na nu ntsu'u ji'na cha' caca tso'o tyiquee na nde chalyuu.

2 TIMOTEO 4:10

Cua nguxtyanu Demas 'na xqui'ya cha' ndiya la ti' yu ji'i̱ cha' cuxi nu ntsu'u chalyuu, ndyaa yu ca quichi̱ Tesalónica. Nda na' ji'i̱ Crescente ndyaa ca Galacia, jua'a̱ nda na' ji'i̱ Tito ndyaa ca Dalmacia;

SANTIAGO 1:27

Si tyucui tyiquee na tsiya' ti ndu'ni na cha' tacati cuentya ji'i̱ Ni, si si'i na tucua cha' ntsu'u tyiquee na, ndi'ya̱ nti' ycui' Ndyosi Sti na cha' cua'ni na li': nga'a̱ cha' xtyucua na ji'i̱ nu sube ti'i, jua'a̱ nga'a̱ cha' xtyucua na ji'i̱ nu cuna'a̱ nu ndyanu ti'i ti, nu lo'o nchcube' tsa ngu' ndi'i̱ ngu' chalyuu; pana ná tso'o tyatí̱ yu'u na lo'o cha' cuxi nu ntsu'u nde chalyuu.