SAN MATEO 11:22 - Chatino Tataltepec

²² Liñi cacha' na' ji'i̱ ma̱, cha' caca tso'o la ji'i̱ jyo'o ngu' Tiro lo'o ji'i̱ jyo'o ngu' Sidón, nu lo'o tyalaa tsa̱ tlyu lo'o cua'ni cuayá' ycui' Ndyosi ji'i̱ ñati̱ chalyuu; lye la xcube' Ni ji'i̱ cu'ma̱ li'.

SAN MATEO 11:22 Referans Kwoze

SAN MATEO 11:24

Liñi cacha' na' ji'i̱ ma̱, cha' caca tso'o la ji'i̱ jyo'o ngu' Sodoma bi' tsa̱ tlyu lo'o cua'ni cuayá' Ni ji'i̱ ñati̱ chalyuu; lye la xcube' Ni ji'i̱ cu'ma̱ li'.

SAN MATEO 10:15

Cha' liñi nchcui' na' lo'o ma̱, cha' nu lo'o tyalaa tsa̱ nu cua'ni cuayá' ycui' Ndyosi ji'i̱ lcaa ñati̱, li' xcube' tsa Ni ji'i̱ ngu' quichi̱ su ná ntaja'a̱ ngu' cuna ngu' cha' nu culu'u ma̱ ji'i̱ ngu'; tsa̱ bi' ca tso'o la cha' ji'i̱ ngu' cuxi nu nguti'i̱ quichi̱ Sodoma, nu nguti'i̱ quichi̱ Gomorra nu ngua sa'ni.

1 JUAN 4:17

Tso'o ti ntsu'u tyiquee na ña'a̱ na ji'i̱ ycui' Ndyosi, cha' nu lo'o tyalaa tsa̱ lo'o tya̱a̱ Jesucristo chaca quiya' cha' cua'ni cuayá' Ni ji'i̱ lcaa ñati̱, li' tyucui tyiquee na taca tyacua tya'a na lo'o ycui' Ni. Ndya'a̱ Ni lo'o na laja lo'o ndi'i̱ na chalyuu, ñi'ya̱ nguta'a̱ Ni lo'o Jesucristo lo'o nguti'i̱ yu nde chalyuu, bi' cha' nga'aa ntsu'u cha' cutsi̱i̱ na.

SAN MATEO 12:36

Ta na' sca cha' lo'o ma̱ juani: nu lo'o tyalaa tsa̱ nu cua'ni cuayá' ycui' Ni ji'i̱ lcaa ñati̱, li' ntsu'u cha' cacha' lyiji ycui' ca ngu' ji'i̱ lcaa cha' cuxi nu cua nchcui' ngu' nde chalyuu.

SAN LUCAS 10:14

Liñi cacha' na' ji'i̱ ma̱ cha' caca tso'o la ji'i̱ ngu' jyo'o quichi̱ Tiro, lo'o ji'i̱ ngu' jyo'o quichi̱ Sidón, nu lo'o tyalaa tsa̱ tlyu lo'o cua'ni cuayá' ycui' Ndyosi ji'i̱ ñati̱ chalyuu; lye la xcube' Ni ji'i̱ cu'ma̱ li', cha' ná nduna ma̱ tsiya' ti.

2 PEDRO 3:7

Ca tiya' la li' xa' ngulo ycui' Ndyosi cña cha' ña'a̱ ti tyanu lcaa na nu ntsu'u nde cua̱, ña'a̱ ti tyanu lcaa lo na nu ntsu'u nde chalyuu, ña'a̱ cuayá' tyalaa tsa̱ nu cua'ni cuayá' Ni ji'i̱ lcaa na. Li' tye tyaqui̱ lcaa na bi', lo'o jua'a̱ tye cha' ji'i̱ lcaa ñati̱ nu ná ntsu'u cha' ji'i̱ lo'o ycui' Ndyosi.

2 PEDRO 2:9

Jua'a̱ caca cuayá' ti' na cha' nchca ji'i̱ ycui' nu Xu'na na cua'ni lyaá Ni ji'i̱ ñati̱ nu tso'o cresiya ji'i̱, cha' ná tyiji̱loo nu cuxi ji'i̱ ngu' bi'. Nu lo'o cua'ni cuayá' Ni ji'i̱ lcaa ñati̱ ni, jlo ti' Ni ti ji'i̱ xcube' Ni. Cua jlo ti' Ni tilaca laca nu ntsu'u cha' cuxi tyiquee.

HEBREOS 2:3

La cui' ti cha' caca ji'na juani, si ná taquiya' na ji'i̱ cha' nu cua ndyuna na bi', cha' clyaá na ji'i̱ nu cuxi; ná caja ñi'ya̱ clyaá na ji'i̱ ycui' Ndyosi lo'o cua ndye chalyuu, nu lo'o cua'ni cuayá' Ni ji'i̱ lcaa ñati̱. Clyo ndacha' ycui' Jesús nu Xu'na na cha' bi' ji'i̱ ñati̱ nu ngua tsa'a̱ ji'i̱ yu, jua'a̱ ndyuna ngu' bi' cha' nu nchcui' yu; tiya' la li', lo'o ji'na ndacha' ngu' bi' cha' bi'. Bi' cha' jlo ti' na cha' chañi laca cha' bi'.

SAN MATEO 11:21

―¡Tya'na tsa cu'ma̱ ngu' quichi̱ Corazín! ―nacui̱ Jesús―. ¡Tya'na tsa cu'ma̱ ngu' quichi̱ Betsaida! ―nacui̱―. Cua quiña'a̱ tsa cha' tlyu nu cua na'a̱ cu'ma̱, pana ná nguju'u ti' ma̱ tsiya' ti ji'i̱ cha' cuxi nu ndyu'ni ma̱, ná nguxtyanu ma̱ cha' bi'. La cui' jua'a̱ tya sa'ni la xña'a̱ tsa ngu' quichi̱ Tiro lo'o ngu' quichi̱ Sidón, ngu' xa' tsu' ngua ngu' bi'. Pana ná ngujui ñi'ya̱ caca tyuju'u ti' ngu' bi' ji'i̱ cha' cuxi nu ngua'ni ngu', ná ngulochu̱' ngu' ji'i̱ cha' cuxi bi', cha' bilya ña'a̱ ngu' bi' cha' tlyu ñi'ya̱ nu ña'a̱ cu'ma̱ ngu' Israel; bi' cha' ná ngua xñi'i̱ ti' ngu' bi'. Ná ndyacu' ngu' late' ngata, ni ná ngusu'ba ngu' jii hique ngu' ñi'ya̱ nu ndu'ni ngu' su nscua jyo'o.

APOCALIPSIS 20:11

Lo'o li' na'a̱ na' cha' ntucua sca ñati̱ tlyu lo sca yaca xlya tlyu nu ndubi tsa ña'a̱. Li' nguti̱ lcaa chalyuu, jua'a̱ nguti̱ lcaa ca na nu ntsu'u nde cua̱, nu lo'o ndu'u tucua ycui' Ni; nga'aa tyaca̱' tsiya' ti ma nde su nguliji yu'u chalyuu bi'.

APOCALIPSIS 20:12

Lo'o li' na'a̱ na' cha' ca bi' ndi'i̱ lcaa ñati̱ nu cua ngujuii, masi ngu' cusu', masi ngu' cuañi', ndi'i̱ ngu' nde loo yaca xlya su ntucua tlyu ycui' Ni. Cua nchcana quityi li', lo'o jua'a̱ cua nchcana nu chaca quityi bi'; lo quityi bi' cua nscua xtañi ñati̱, lcaa ñati̱ nu cua ngujui chalyuu nu ná nga'a̱ cha' tye ji'i̱, cha' cua ndyu'ú ngu' chaca quiya'. Li' cuentya ji'i̱ quityi nu nguscua ycui' Ni, ngua'ni cuayá' Ni ji'i̱ lcaa ñati̱ nu cua ngujuii bi', cha' lo quityi bi' cua laca nscua lcaa cña nu ngua'ni ngu' lo'o ya̱a̱ ngu' chalyuu.