SAN MATEO 11:21 - Chatino Tataltepec

²¹ ―¡Tya'na tsa cu'ma̱ ngu' quichi̱ Corazín! ―nacui̱ Jesús―. ¡Tya'na tsa cu'ma̱ ngu' quichi̱ Betsaida! ―nacui̱―. Cua quiña'a̱ tsa cha' tlyu nu cua na'a̱ cu'ma̱, pana ná nguju'u ti' ma̱ tsiya' ti ji'i̱ cha' cuxi nu ndyu'ni ma̱, ná nguxtyanu ma̱ cha' bi'. La cui' jua'a̱ tya sa'ni la xña'a̱ tsa ngu' quichi̱ Tiro lo'o ngu' quichi̱ Sidón, ngu' xa' tsu' ngua ngu' bi'. Pana ná ngujui ñi'ya̱ caca tyuju'u ti' ngu' bi' ji'i̱ cha' cuxi nu ngua'ni ngu', ná ngulochu̱' ngu' ji'i̱ cha' cuxi bi', cha' bilya ña'a̱ ngu' bi' cha' tlyu ñi'ya̱ nu ña'a̱ cu'ma̱ ngu' Israel; bi' cha' ná ngua xñi'i̱ ti' ngu' bi'. Ná ndyacu' ngu' late' ngata, ni ná ngusu'ba ngu' jii hique ngu' ñi'ya̱ nu ndu'ni ngu' su nscua jyo'o.

SAN MATEO 11:21 Referans Kwoze

LOS HECHOS 12:20

Lo'o li' ngua ñasi̱' tsa nu Herodes bi' ji'i̱ ngu' quichi̱ Tiro, lo'o jua'a̱ ji'i̱ ngu' quichi̱ Sidón. Nu ngua tya clyo la cua nda rey Herodes na cacu ngu' quichi̱ bi', lo'o li' nga'aa nda rey na cacu ngu', cha' ñasi̱' tsa ti' rey ña'a̱ ji'i̱ ngu'. Stu'ba ti ntsu'u tyiquee lcaa ngu' quichi̱ bi' lo'o tya'a ngu', cha' tsaa ngu' slo rey cha' chcui' ngu' lo'o. Li' tso'o tsa nchcui' ngu' quichi̱ lo'o nu cusu' Blasto nu laca cña ji'i̱ rey bi'; bi' cha' tso'o nchcui' nu Blasto bi' lo'o rey cuentya ji'i̱ ngu' quichi̱ bi', cha' tyaala' cha' ji'i̱ rey lo'o ngu' bi'.

SAN JUAN 12:21

Ñaa xi ngu' griego bi' slo Felipe li'. Quichi̱ Betsaida laca quichi̱ tyi nu Felipe bi'; nde loyuu su cuentya Galilea, ca bi' ndi'i̱ quichi̱ bi'. Li' nchcui' ngu' bi' lo'o Felipe: ―Tyu'u cha' clyu ti' jinu'u̱, cusu', cua nti' ya tyacua tya'a ya xi lo'o Jesús ―nacui̱ ngu'.

SAN LUCAS 9:10

Nu lo'o nguxtyu̱u̱ ngu' tya'a ndya'a̱ Jesús ndyalaa ngu' slo yu, li' nchcui' ngu' lo'o yu lcaa ña'a̱ cña nu ngua'ni ngu' ca su ndyaa ngu' bi'. Li' ndyaa yu lo'o nu ngu' nu ndyaca tsa'a̱ ji'i̱ bi' sca se'i̱ su ná ntsu'u ñati̱ ngua ti' yu, sca se'i̱ cacua ti quichi̱ Betsaida.

SAN MARCOS 6:45

Lo'o li' ngulo Jesús cña ji'i̱ nu ngu' nu ndyaca tsa'a̱ ji'i̱, cha' tyatí̱ ngu' ne' yaca ni'i̱ sube ti, cha' tsaa ngu' nde loo la su tsaa ycui' ca chaca tsu' tayu' hasta ca quichi̱ Betsaida. Tyanu Jesús cha' chcui' salya' lo'o nu ngu' quiña'a̱ bi', cha' tyaa ngu' quichi̱ ca to' tyi ngu'.

SAN MATEO 15:21

Lo'o li' ndu'u Jesús ndyaa nde loyuu su cuentya quichi̱ Tiro lo'o loyuu su cuentya quichi̱ Sidón; lo'o nu ngu' nu ndyaca tsa'a̱ ji'i̱ ndyaa ngu' lo'o.

JUDAS 1:11

Tya'na tsa nu ngu' cuiñi bi'. Cua ngusñi ngu' tyucui̱i̱ cuxi nu ngulu'u jyo'o Caín ji'i̱ ñati̱; cua ndu'utsu' ngu' ji'i̱ tyucui̱i̱ tso'o cha' caja cñi ji'i̱ ngu' ñi'ya̱ ngua'ni jyo'o Balaam, nu lo'o ngusñi yu caya' cuentya ji'i̱ cña cuxi nu cua cua'ni ti yu nu ngua sa'ni. Ntsu'u cha' cajaa nu ngu' cuiñi bi' tsiya' ti, ñi'ya̱ cua ngujuii jyo'o Coré nu lo'o lye tsa ngusu̱u̱ tya'a yu lo'o ycui' nu Xu'na na.

SAN JUAN 1:44

La cui' ngu' Galilea laca Felipe bi', jua'a̱ laca Andrés lo'o Pedro; quichi̱ Betsaida laca quichi̱ tyi ngu'.

SAN LUCAS 6:17

Li' nguxtyu̱u̱ Jesús ngua'ya sii' cua'a̱ bi' lo'o nu taju ñati̱ bi' ji'i̱, nguti'i̱ xi nde sca su nati̱' lo'o nu tyu̱u̱ tya'a ñati̱ nu ndyaca tsa'a̱ ji'i̱ bi'. Lo'o jua'a̱ ndyalaa quiña'a̱ tsa xa' la ñati̱ slo Jesús, ngu' nu ndu'u loyuu su cuentya Judea, lo'o jua'a̱ ngu' nu ndu'u nde quichi̱ Jerusalén, lo'o jua'a̱ ngu' nu ndu'u to' tyujo'o su ndi'i̱ quichi̱ Tiro, su ndi'i̱ quichi̱ Sidón. Cua ndyalaa ngu' ca bi', cha' cuna ngu' cha' nu nchcui' Jesús lo'o ngu'; jua'a̱ nti' ngu' cha' cua'ni Jesús jo'o ji'i̱ quicha nu ntsu'u ji'i̱ ngu'.

SAN MARCOS 8:22

Lo'o li' ndyalaa ngu' ca nde quichi̱ Betsaida. Hora ti ñaa lo'o ngu' quichi̱ ji'i̱ sca nu cuityi̱' slo Jesús. Ndijña tsa ngu' ji'i̱ yu cha' sta ya' yu hique nu quicha, ngua ti' ngu'.

SAN MARCOS 7:31

Lo'o li' ndu'u ngu' quichi̱ Tiro, ñaa ngu', nteje tacui ngu' quichi̱ Sidón, nteje tacui ngu' nde Decápolis, la cui' loyuu su nscua tii tya'a quichi̱. Li' nguxtyu̱u̱ ngu' ya̱a̱ nde to' tayu' Galilea.

SAN MARCOS 3:8

Cua ndañi ñi'ya̱ laca cha' tonu nu ndyu'ni Jesús hasta ca quichi̱ tyijyu', bi' cha' lo'o ngu' tyijyu' ndyalaa ngu' cha' ña'a̱ ngu' ji'i̱ yu; ndyalaa ngu' Judea, lo'o ngu' Jerusalén, lo'o ngu' Idumea, lo'o ngu' chaca tsu' sta'a̱ Jordán, lo'o ngu' Sidón, lo'o ngu' Tiro.

SAN MATEO 18:7

¡Tya'na tsa ñati̱ chalyuu re! Ntsu'u tsa cha' cuxi nu ndu'ni ñu'u̱ ji'i̱ tyiquee ñati̱. Lcaa hora ntsu'u cha' cuxi jua'a̱ nde chalyuu, pana tlyu tsa cha' caca ji'i̱ ñati̱ nu ndatsaa ji'i̱ tya'a cha' cua'ni ngu' cha' cuxi; tlyu tsa cha' ti'í tyacua ji'i̱ ñati̱ bi' nde loo la.

SAN MATEO 11:22

Liñi cacha' na' ji'i̱ ma̱, cha' caca tso'o la ji'i̱ jyo'o ngu' Tiro lo'o ji'i̱ jyo'o ngu' Sidón, nu lo'o tyalaa tsa̱ tlyu lo'o cua'ni cuayá' ycui' Ndyosi ji'i̱ ñati̱ chalyuu; lye la xcube' Ni ji'i̱ cu'ma̱ li'.

LOS HECHOS 27:3

Ndu'u ya ndyaa ya li', ca chaca tsa̱ ndyalaa ya ca quichi̱ Sidón. Tso'o tsa tyiquee nu Julio bi', nda bi' chacuayá' ji'i̱ Pablo cha' tsaa yu slo tya'a tso'o yu nu ndi'i̱ quichi̱ bi', cha' xtyucua xi tya'a yu ji'i̱ yu.

SAN LUCAS 4:26

pana nda ycui' Ndyosi ji'i̱ Elías cha' tsaa yu slo sca ti nu cuna'a̱ ti'i nu ndi'i̱ nde quichi̱ Sarepta, sca quichi̱ tyijyu' la nde loyuu su cuentya Sidón. Ná ndyaa Elías slo ni sca nu cuna'a̱ ti'i tya'a quichi̱ tyi ngu' Israel.

SAN MARCOS 7:24

Lo'o li' ndu'u Jesús ndyaa tyijyu' nde loyuu su cuentya quichi̱ Sidón, nde su cuentya quichi̱ Tiro li'. Ngua ti' yu cha' tyanu yu sca ne' ni'i̱ cuaana ti cajua; pana ná ngua ji'i̱, cha' yala ti ngujui cha' ji'i̱ ngu' macala ndi'i̱ yu.

SAN MATEO 26:24

Ñi'ya̱ nu nscua lo quityi ji'i̱ ycui' Ni, jua'a̱ nga'a̱ cha' caca 'na, na' nu cua nda Ni 'na lijya̱a̱ cha' caca na' ñati̱. Pana tya'na tsa ñati̱ nu ta 'na ya' ngu' xña'a̱, tso'o la ngua ji'i̱ yu masi ná ngula yu chalyuu tsiya' ti.

APOCALIPSIS 6:12

Lo'o li' na'a̱ na' ji'i̱ nu ñi'ya̱ ña'a̱ xlya' bi', cha' nu nchca scuá quiya' ngusuu Ni nguiña' nu nga'a̱ to' quityi bi'; lye tsa ngulacui̱ chalyuu li'. Li' ndyacu cuichaa, ngua talya xee; ñi'ya̱ laca sca late' ngata nu nchcu' ñati̱ su nscua jyo'o, jua'a̱ ña'a̱ ngua bi'. Lo'o jua'a̱ co' ni, ngua nga'a ña'a̱ bi'; ñi'ya̱ ña'a̱ tañi, jua'a̱ ña'a̱ bi'.

APOCALIPSIS 11:3

li' ta na' tucua tya'a ñati̱ nu ca̱a̱ chalyuu cha' chcui' ngu' lcaa cha' nu nti' na' ta na' lo'o ñati̱. Tyucuaa ngu' bi' tsatu̱ ngu' cla'be quichi̱ bi' tyempo li' ―nacui̱ Ni 'na―, ña'a̱ cuayá' tya'a tii tyucuaa siyento ntucua snayala tsa̱ tyu̱ ngu' bi'. Tyucui tyempo cacu' ngu' bi' late' ngata, cha' tonu tsa cha' nu ta ngu' lo'o ñati̱, ñi'ya̱ nu cua'ni na' nde loo la.