SAN MATEO 10:17 - Chatino Tataltepec

¹⁷ Pana cua'ni tii ti ti' ma̱ lo'o ñati̱; ná tyiquee' tsaa lo'o ngu' ji'i̱ ma̱ slo ngu' tisiya, masi ná tyaala ma̱ ji'i̱ ngu'. Lo'o jua'a̱ quiji'i̱ ngu' ji'i̱ ma̱ ne' laa ji'i̱ ngu'.

SAN MATEO 10:17 Referans Kwoze

SAN MARCOS 13:9

’Lo'o cu'ma̱ ni, tii ti ti' ma̱ tyi'i̱ ma̱ li' ―nacui̱ Jesús―. Tejeya' ñati̱ cuxi ji'i̱ ma̱, jua'a̱ sta ngu' qui'ya ji'i̱ ma̱ slo ngu' tisiya; quiji'i̱ ngu' bi' ji'i̱ ma̱, masi ca ne' laa ji'i̱ ngu'. Nga'a̱ cha' tsatu̱ ma̱ slo ngu' gobierno, slo ngu' nu laca loo; cuentya jna' cacha' ma̱ lcaa cha' tso'o jna' ji'i̱ ngu' bi'.

SAN MATEO 23:34

Bi' cha' ta na' ji'i̱ ñati̱ 'na cha' ca̱a̱ ca slo ma̱; masi ngu' nu laca tu'ba 'na, masi ngu' nu jlo ti' cha' jna', masi ngu' mstru nu cuentya jna', ta na' ji'i̱ ngu' cha' ca̱a̱ ngu' ca slo ma̱. Jlo ti' na' cha' tyaala tsa cu'ma̱; cujuii ma̱ ji'i̱ xi ñati̱ bi', cujui'i̱ ca'a̱ ma̱ ji'i̱ xi xa' la ñati̱ bi' lo crusi, quiji'i̱ ma̱ ji'i̱ xi xa' la ñati̱ bi' lo'o reta. Masi ne' laa ji'i̱ ma̱, cua'ni lya' tsa ti' ma̱ ji'i̱ ngu' bi' ña'a̱ cuayá' nu culo'o ma̱ ji'i̱ ngu' bi', cha' ná tyanu ngu' bi' quichi̱ tyi ma̱ tsiya' ti.

LOS HECHOS 26:11

Chañi cha' lye tsa ngua'ni lya' ti' na' ji'i̱ ñati̱ bi', ngua tsa ti' na' cha' xtyanu ngu' tsiya' ti cha' ji'i̱ Jesús. Jua'a̱ ngua'ni na' lcaa ne' laa ji'i̱ ngu' judío, masi quichi̱ loyuu re, masi quichi̱ tyijyu' la su ngusna ngu', cha' ñasi̱' tsa na' ji'i̱ ngu' bi'.

SAN JUAN 16:2

masi ná ta ngu' chacuayá' ji'i̱ ma̱ cha' tsaa ma̱ ne' laa ji'i̱ ngu' li' ―nacui̱ Jesús―. Tyalaa sca tyempo nu culacua ti' ngu' cha' cña tacati cua'ni ngu' si cujuii ngu' ji'i̱ ngu' tya'a ma̱.

SAN LUCAS 12:11

’Cu'ma̱ nu laca ma̱ ñati̱ 'na ni, ná cutsi̱i̱ ma̱ nu lo'o chcui' cuayá' ngu' lo'o ma̱ ne' laa, masi nu lo'o cua'ni cuayá' ngu' ji'i̱ ma̱ slo ngu' nu laca cña. Ná culacua tsa ti' ma̱ ñi'ya̱ caca cha' nu chcui' ma̱ lo'o ngu' bi', cha' clyaá ma̱ ji'i̱ ngu';

SAN MATEO 5:22

Pana quiña'a̱ la cha' chcui' na' lo'o ma̱ juani: masi ca ti'í ti' ngu' ji'i̱ tya'a ñati̱, li' ntsu'u cha' chcube' ngu' bi'; masi na chcui' ti ngu' cha' cuxi ji'i̱ tya'a ñati̱, ntsu'u cha' tsaa ngu' bi' slo ngu' nu laca loo ca Jerusalén, cha' caca cuayá' ji'i̱ ngu' cajua li'. Lo'o jua'a̱ si ñacui̱ ngu' ji'i̱ tya'a ñati̱: “¡Na ple tsa nu'u̱! ¡Na tonto tsa hique nu'u̱!” lo'o ñasi̱' tsa ngu' ji'i̱ tya'a ñati̱, li' nga'a̱ cha' tsaa ngu' bi' ca bilyaa su ná tye cha' tyaqui̱ quii'.

LOS HECHOS 22:19

“Xu'na”, nacui̱ na' ji'i̱ nu Xu'na na li', “jlo ti' ngu' quichi̱ re cha' nguta'a̱ na' ne' laa lcaa quichi̱, cha' ngusñi na' ji'i̱ ngu' nu ntsu'u cha' ji'i̱ lo'o nu'u̱, ngusu'ba na' ji'i̱ ngu' bi' ne' chcua̱, ngujui'i̱ na' ji'i̱ ngu' bi'.

HEBREOS 11:36

Xa' la tya'a ngu' bi' ni, ti'í tsa nchcui' ngu' ji'i̱ ngu' bi' laja lo'o ngujui'i̱ ngu' cuxi ji'i̱ ngu' bi', masi ngusca̱' ngu' cuxi ji'i̱ ngu' bi' lo'o carena, masi ngusu'ba ngu' ji'i̱ ngu' bi' ne' chcua̱.

2 TIMOTEO 4:15

Pana tii ti' nu'u̱ cha' ná tacu̱' nu Alejandro bi' cha' jinu'u̱, nu lo'o ta nu'u̱ cha' tso'o ji'i̱ ycui' Ndyosi lo'o ñati̱.

FILIPENSES 3:2

Tii ti ti' ma̱, cui'ya tso'o ma̱ cuentya ji'i̱ nu ngu' cuxi bi', cha' ñi'ya̱ ndu'ni xne' taja, jua'a̱ ndyu'ni ngu' bi'. Xqui'ya cha' cusu' nu jlya tsa ti' ngu' bi' ji'i̱, bi' cha' ndatsaa ngu' ji'i̱ xa' ñati̱ cha' xi'yu ngu' quiji̱ ngu', masi sca cña nu cua'ni ñu'u̱ ji'i̱ ngu' laca; si'i sca cha' tso'o laca bi'.

SAN JUAN 11:47

Bi' cha' nu ngu' sti jo'ó nu laca loo lo'o ngu' fariseo bi', nguxana nxi'ya ngu' ji'i̱ lcaa ngu' tisiya, cha' tyu'u ti'i̱ ngu'. Lo'o li' nchcui' ngu' lo'o tya'a ngu': ―¿Ñi'ya̱ cua'ni na juani? ―nacui̱ ngu'―. Quiña'a̱ tsa cha' tlyu ndyu'ni nu qui'yu bi'.

SAN MARCOS 13:12

Cuxi tsa caca tyempo li'; cujuii cuañi' ñati̱ ji'i̱ tya'a ngu' cha' cujuii ngu' ji'i̱, jua'a̱ cujuii cuañi' ngu' ji'i̱ sñi' ngu'. Lo'o nu ngu' cuañi' ni, caca ñasi̱' ngu' ji'i̱ sti ngu', ji'i̱ xtya'a̱ ngu' li'; ta nu ngu' cuañi' bi' ji'i̱ sti ngu', ji'i̱ xtya'a̱ ngu' cha' cujuii ngu' cuxi ji'i̱.

SAN MATEO 26:59

Lo'o li' lcaa ngu' tisiya, lo'o lcaa sti jo'ó nu laca loo, lo'o lcaa ngu' cusu' bi', nclyana ngu' ñi'ya̱ ca sta ngu' qui'ya ji'i̱ Jesús, cha' nti' tsa ngu' cujuii ngu' ji'i̱. Pana ná ndu'u tucua ñati̱ nu cujuii cuañi' ji'i̱ yu cuentya ji'i̱ ngu' nu laca loo bi'.

LOS HECHOS 17:14

Lo'o ngua tii ñati̱ ji'i̱ Jesucristo cha' jua'a̱ nti' ngu' judío bi', hora ti ngusalya' ngu' lo'o Pablo cha' tyaa yu tyucui̱i̱ to' tyujo'o; pana ndyanu Silas lo'o Timoteo quichi̱ bi'.

SAN MATEO 20:19

Li' tsaa lo'o ngu' bi' 'na slo ngu' xa' tsu' nu laca loo, cha' xtyí lo'o ngu' bi' 'na. Lo'o jua'a̱ quiji'i̱ ngu' bi' 'na lo'o reta, cujui'i̱ ca'a̱ ngu' bi' 'na lo crusi li'. Pana, tsa̱ nchca tyuna, li' tyu'ú na' chaca quiya' ―nacui̱ Jesús.

SAN MATEO 10:18

Ntsu'u ngu' nu tsaa lo'o ji'i̱ ma̱ slo ngu' nu laca loo cha' ñasi̱' ti ngu', hasta tyalaa ma̱ ca slo ycui' rey. Lo'o xcube' ngu' ji'i̱ ma̱ xqui'ya na', li' caja xi tyempo cha' ta ma̱ xi cha' jna' lo'o ngu' bi', masi lo'o ngu' xa' tsu'.

LOS HECHOS 9:2

cha' nti' yu culo yu quityi chacuayá' ji'i̱ cha' tsaa sca̱' yu ji'i̱ ngu' nu ngusñi cha' ji'i̱ Jesucristo. Nti' yu tsaa yu quichi̱ Damasco cha' culu'u yu quityi chacuayá' bi' ji'i̱ ngu' nu laca loo ne' laa bi', nu laa ji'i̱ ngu' judío bi'. Li' nti' Saulo sca̱' ji'i̱ ñati̱ ji'i̱ Jesucristo quichi̱ bi', cha' xtyu̱u̱ yu tya̱a̱ lo'o yu ji'i̱ ngu' nde Jerusalén; masi ngu' qui'yu, masi ngu' cuna'a̱, lcua ti ña'a̱ ñati̱ bi' tejeya' yu ji'i̱ ngu', nti' yu.