SAN MATEO 10:16 - Chatino Tataltepec

¹⁶ ’Cua'a̱ jyaca̱ ma̱ 'na: Ta na' ji'i̱ ma̱ cha' tsaa ma̱ xa' quichi̱ ñi'ya̱ si laca ma̱ xlya' nu ndya'a̱ laja bo'o tyaala; bi' cha' tii ti ti' ma̱ tya'a̱ ma̱ laja ñati̱, ñi'ya̱ nti' ndya'a̱ cuaña nu tii tsa ti'. Tso'o ti tya'a̱ ma̱, ná cua'ni tyaala ma̱ ji'i̱ ngu' tsiya' ti. Caca ma̱ ñi'ya̱ laca paloma, cha' masu tsa ni', ná tyaala ni' tsiya' ti.

SAN MATEO 10:16 Referans Kwoze

SAN LUCAS 10:3

Yaa clya ma̱ lacua. Su ta na' ji'i̱ ma̱ tsaa ma̱, ca bi' tyi'i̱ ma̱ laja ñati̱ cuxi ñi'ya̱ si ndi'i̱ xlya' cuañi' laja bo'o tyaala; pana tyi'i̱ ycui' Ni lo'o ma̱ cha' ná sca caca ji'i̱ ma̱ li'.

FILIPENSES 2:15

cha' ná caca ñacui̱ ngu' cha' ntsu'u qui'ya ji'i̱ ma̱ li', lo'o jua'a̱ ná caja su lyiji cua'ni ma̱ sca cha' li'. Tso'o la si caca cuayá' ti' ngu' cha' chañi cha' laca ma̱ sñi' ycui' Ndyosi tyucui tyiquee ma̱, masi xcui' ndi'i̱ ti ma̱ chalyuu laja ñati̱ cuxi, laja ñati̱ nu chi̱i̱ nti' ngu' ña'a̱ ji'i̱ tya'a ngu'. Xqui'ya cu'ma̱ nga'a̱ cha' cañi cha' ji'i̱ Jesús lcaa su ndi'i̱ ñati̱ bi'; ñi'ya̱ nu ntyiji'i̱ xee cuii nde talya, jua'a̱ caca ma̱ xee nde chalyuu,

1 CORINTIOS 14:20

Cu'ma̱ tya'a ngusñi na cha' ji'i̱ Cristo, tso'o la si ná jlo ti' ma̱ tsiya' ti na ca laca sca cha' cuxi; ñi'ya̱ laca nu sube, jua'a̱ caca ma̱ cha' ná jlo ti' ngu' sube cha' bi'. Pana nga'aa culacua ti' ma̱ ñi'ya̱ nu nclacua ti' nu sube; juani culacua tso'o ti' ma̱, ñi'ya̱ nclacua ti' ngu' cusu'.

COLOSENSES 4:5

Tii ti ti' ma̱ tyi'i̱ ma̱ slo xa' ñati̱ nu bilya xñi cha' ji'i̱ Jesucristo; ná cua'ni ma̱ cha' tonto slo ngu' bi', cha' jua'a̱ lcaa quiya' lo'o ta ngu' tyempo cha' chcui' ma̱ lo'o ngu', li' tso'o tsa ta ma̱ cha' ji'i̱ Jesús lo'o ngu'.

SAN LUCAS 21:15

La cui' hora bi' cua'ni na' cha' ca'ya cha' hique ma̱ cha' ca jlo ti' ma̱ ñi'ya̱ nu chcui' ma̱ lo'o ngu' bi', cha' ná caja cha' nu xtyacui tya'a cusu̱u̱ ma̱ lo'o ma̱, cha' ná caja ñi'ya̱ nu chcui' loo ngu' ji'i̱ ma̱.

LOS HECHOS 20:29

Jlo ti' na' cha' nu lo'o nga'aa ndya'a̱ na' ca nde, li' ca̱a̱ ñati̱ cuiñi cha' cua'ni ñu'u̱ ji'i̱ taju ñati̱ tya'a ma̱; ñi'ya̱ ndu'ni tyaala bo'o ji'i̱ sca taju xlya', jua'a̱ cua'ni ñu'u̱ nu ngu' cuiñi bi' ji'i̱ taju ñati̱ tya'a ndya'a̱ ma̱.

2 CORINTIOS 11:3

ndube tsa ti' na' si quiñu'u̱ chca cresiya ji'i̱ ma̱. Tya sa'ni ni, cua nguñilo'o nu cuaña ji'i̱ Eva, cha' tajua' tsa nchcui' nu xña'a̱ bi'. Pana ná nti' na' cha' quiñu'u̱ cha' ji'i̱ ma̱ lo'o Cristo jua'a̱, ná nti' na' cha' ñilo'o nu xña'a ji'i̱ ma̱ xqui'ya xa' ñati̱; juani tso'o tsa cha' tyucui tyiquee ma̱ cua ngusñi ma̱ cha' ji'i̱ ycui' Cristo.

1 TESALONICENSES 5:22

pana culochu̱' ma̱ ji'i̱ lcaa cha' cuxi li'.

2 CORINTIOS 11:14

Ná tlyu cña laca cha' ndu'ni ngu' bi' jua'a̱, cha' lo'o nu xña'a̱ nu naa Satanás taca ji'i̱ ñilo'o ji'i̱ ñati̱, nu lo'o xa' ña'a̱ cua'ni loo yu ña'a̱ cuayá' nu ca ti' ngu' cha' laca yu sca xca̱ nu ndyu'u tucua lo'o xee ji'i̱ ycui' Ndyosi; pana ná chañi laca cha' bi'.

1 TESALONICENSES 2:10

Cua na'a̱ ma̱, lo'o jua'a̱ cua na'a̱ ycui' Ndyosi, cha' tso'o ti nguti'i̱ ya slo cu'ma̱ nu ntsu'u cha' ji'i̱ ma̱ lo'o Ni. Ñati̱ lubii laca ya, ná ntsu'u cha' jña ngu' qui'ya ji'i̱ ya li'.

COLOSENSES 1:9

Bi' cha' juani lu'ba ti nchcui' ya lo'o ycui' Ndyosi cuentya ji'i̱ cu'ma̱; tya lo'o ngujui cha' ji'i̱ ya cha' cua ngusñi ma̱ cha' bi', ndijña ya cha' ji'i̱ ycui' Ndyosi cha' ta Ni chacuayá' cha' caca cuayá' lyiji ti' ma̱ lcaa cha' ñi'ya̱ nu nti' Ni cha' cua'ni ma̱, cha' jua'a̱ taca culacua tso'o ti' ma̱, taca ca'ya cha' tso'o hique ma̱ xqui'ya Xtyi'i ycui' Ndyosi li'.

2 CORINTIOS 1:12

Tso'o tsa nti' ya cha' xcui' ngua'ni tyucui tyiquee ya lo'o ma̱, xcui' nda ya cha' liñi lo'o ma̱, ñi'ya̱ nu ngua'ni ya lo'o xa' ñati̱; jua'a̱ nti' ya. Ngua ji'i̱ ya cua'ni ya jua'a̱ lo'o ma̱ xqui'ya cha' lye tsa ngua'ni tya'na ti' ycui' Ndyosi ji'na laja ti; si'i cha' nda'ya cha' hique ti ya, bi' cha' ndu'ni ya jua'a̱.

2 CORINTIOS 8:20

Li' ná taca chcui' ngu' ji'i̱ ya xqui'ya cha' cua nxti'i̱ ya cñi nu nda ma̱ cha' xlya'be ti bi'.

SAN MATEO 24:25

Cua ndacha' na' cha' bi' ji'i̱ ma̱ juani, nu tya lyiji caca cha' cuxi bi',

SAN MATEO 24:45

’¿Ha ntsu'u ngu' cu'ma̱ nu tyucui tyiquee ma̱ ntaja'a̱ ma̱ cua'ni ma̱ cña 'na? Ndi'ya̱ cua'ni ma̱ lacua: Sca msu nu tso'o ni, ta xu'na yu cña ji'i̱ yu cha' caca yu loo ne' ni'i̱ ji'i̱ xu'na yu; culo xu'na yu cña ji'i̱ yu cha' xacu yu ji'i̱ lcaa ngu' nu ndi'i̱ ni'i̱ bi'.

SAN MATEO 25:2

Tonto xi nclacua ti' ca'yu tya'a nu cuna'a̱ bi', masi tso'o la nclacua ti' nu chaca ca'yu tya'a ngu' cuna'a̱ bi'.

SAN MATEO 25:4

Lo'o nu chaca ca'yu tya'a ngu' cuna'a̱ nu tso'o ti nclacua ti', lo'o candil ndya'a̱ ngu', cuati lo'o caatya̱ setye ndya'a̱ ngu'.

SAN MATEO 25:9

“Setye nu ntsu'u ne' caatya̱ ji'i̱ cua, ná tyu'u scua ji'i̱ ca ta'a na cha' tyu'u ne' candil ji'i̱ lcaa na”, nacui̱ ngu' cuna'a̱ bi'. “Tso'o la yaa clya ma̱ ca tienda cha' cui'ya ma̱ la xi.”