SAN MARCOS 2:18 - Chatino Tataltepec

¹⁸ Ngua sca tsa̱ tacati ji'i̱ ngu' nu ngua tsa'a̱ ji'i̱ Juan lo'o ji'i̱ nu ngu' fariseo, nu tacati tsa ndu'ni ngu', nti' ngu'. Ná ndacu ngu' tyaja tsa̱ tacati bi'. Lo'o li' ndya'a̱ xi ñati̱ slo Jesús, nchcui' ngu' lo'o yu: ―Ná ndacu ngu' nu ngua tsa'a̱ ji'i̱ Juan tsa̱ juani. La cui' ti jua'a̱ ngu' fariseo ni, ná ndacu ngu' juani ―nacui̱ ngu'―. Pana nu ngu' nu ndyaca tsa'a̱ jinu'u̱ ni, ndacu ngu' juani. ¿Ni cha' ná stu'ba ndyu'ni ngu' cuentya jinu'u̱ lo'o cha' nu ndyu'ni ngu' bi'? ―nacui̱ ngu' ji'i̱ Jesús.

SAN MARCOS 2:18 Referans Kwoze

SAN LUCAS 18:12

“Tucua quiya' sca semana ná ndacu na' tyaja cha' ndu'ni tlyu na' jinu'u̱. Lo'o jua'a̱ nda na' sa yu'be lcaa na nu ngua'ni na' ngana scaa semana jinu'u̱”, nacui̱ yu fariseo bi'.

SAN MATEO 6:18

cha' ná caca cuayá' ti' xa' ñati̱ ji'i̱ ma̱ cha' ná ndyacu ma̱ tsa̱ bi'. Sca ti ycui' Ndyosi Sti na nchca cuayá' ti' ñi'ya̱ laca cha' tso'o nu ndu'ni ma̱ cuaana ti. Lo'o li' xco'o Ni cha' tso'o nu tyacua ji'i̱ ma̱ nde loo la.

SAN MATEO 6:16

’Lo'o chaca cha' ni: nu lo'o tyalaa tsa̱ ji'i̱ ma̱ lo'o ná cacu ma̱ xqui'ya cha' cua'ni tlyu ma̱ ji'i̱ ycui' Ni, ná tso'o si tyu'u cha' xñi'i̱ ti' tyiquee ma̱, ñi'ya̱ nu ndu'ni ngu' nu tucua cha' ntsu'u tyiquee ngu'. Nti' ngu' bi' cha' ña'a̱ ñati̱ ji'i̱ cha' tacati tsa nu ndu'ni ycui' ca ngu', cha' ná ndyacu ngu' tsa̱ bi'. Cha' liñi nchcui' na' lo'o ma̱, cha' cua laca ngujui cha' ji'i̱ ngu'; lcaa cha' tso'o nu tyacua ji'i̱ ngu' ca slo ycui' Ndyosi nquicha', cua ngujui cha' bi' ji'i̱ ngu' nu lo'o cua na'a̱ xa' ñati̱ chalyuu ti ji'i̱ ngu'.

ROMANOS 10:3

ná nchca cuayá' ti' ngu' bi' ñi'ya̱ ndu'ni Ni cha' ca tso'o cresiya ji'i̱ ñati̱ cuentya ji'i̱ ycui' Ni. Xa' ña'a̱ nti' ngu' bi'; cha' ji'i̱ ycui' ca ngu' nclyana ngu' ñi'ya̱ caca tso'o cresiya ji'i̱ ngu', cha' ná ntaja'a̱ ngu' jlya ti' ngu' ji'i̱ cña nu ndyu'ni ycui' Ndyosi.

SAN MATEO 23:5

Lcaa cha' nu ndu'ni nu ngu' bi' ni, ndu'ni ngu' ji'i̱ cha' ña'a̱ ti ñati̱ ji'i̱ ngu'; bi' cha' ndyaaca̱' juata su nscua cha' ji'i̱ ycui' Ndyosi hique ngu', lo'o jua'a̱ scu̱ ngu', cha' nti' ngu' cha' chcui' ñati̱ ji'i̱ ngu' cha' tacati tsa ndu'ni ngu'. Lo'o jua'a̱ nchcu' ngu' bi' payu̱ nu tonu tsa lsu ndacui lo cha' ña'a̱ ñati̱ ji'i̱.

SAN MARCOS 2:19

Li' nda Jesús sca cha' lo'o ngu' bi': ―Lo'o caja clyo'o ngu', lo'o ngu' nu ndya'a̱ lo'o cutsii ndacu ngu'; ná ndi'i̱ ngu' ntyute' ti ngu' tsa̱ bi' lo'o ndi'i̱ ngu' lo'o cutsii ―nacui̱ Jesús ji'i̱ ngu' li'―. Chaa ti' ngu' lo'o ndi'i̱ ngu' lo'o.