SAN MARCOS 13:9 - Chatino Tataltepec

⁹ ’Lo'o cu'ma̱ ni, tii ti ti' ma̱ tyi'i̱ ma̱ li' ―nacui̱ Jesús―. Tejeya' ñati̱ cuxi ji'i̱ ma̱, jua'a̱ sta ngu' qui'ya ji'i̱ ma̱ slo ngu' tisiya; quiji'i̱ ngu' bi' ji'i̱ ma̱, masi ca ne' laa ji'i̱ ngu'. Nga'a̱ cha' tsatu̱ ma̱ slo ngu' gobierno, slo ngu' nu laca loo; cuentya jna' cacha' ma̱ lcaa cha' tso'o jna' ji'i̱ ngu' bi'.

SAN MARCOS 13:9 Referans Kwoze

SAN JUAN 16:2

masi ná ta ngu' chacuayá' ji'i̱ ma̱ cha' tsaa ma̱ ne' laa ji'i̱ ngu' li' ―nacui̱ Jesús―. Tyalaa sca tyempo nu culacua ti' ngu' cha' cña tacati cua'ni ngu' si cujuii ngu' ji'i̱ ngu' tya'a ma̱.

SAN MARCOS 13:5

Ngulu'u la xi Jesús ji'i̱ ngu' li': ―Cui'ya ma̱ cuentya cha' ná tucui cñilo'o ji'i̱ ma̱ ―nacui̱ Jesús―.

APOCALIPSIS 2:13

Cua jlo ti' na' lcaa ña'a̱ nu ndu'ni ma̱, nacui̱ Ni. Jlo ti' na' cha' laca Satanás loo ca su ndi'i̱ cu'ma̱; pana masi jua'a̱ laca cha', tya tso'o tsa nxñi ma̱ cha' 'na, nacui̱ Ni. Bilya tya'a̱chu̱' ma̱ ji'i̱ cha' jna'; ña'a̱ ti jlya ti' ma̱ 'na, masi tyempo cuxi nu ngua li', nu lo'o ndyujuii ngu' ji'i̱ jyo'o Antipas. Ná ndyutsi̱i̱ yu bi', nchcui' yu cha' 'na ca quichi̱ tyi ma̱ su ntucua Satanás loo.

APOCALIPSIS 2:10

Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.

APOCALIPSIS 1:9

Juan laca na', tya'a ntsu'u cha' ji'na lo'o Jesús laca na'. Ñi'ya̱ nu ndyaca ji'i̱ cu'ma̱, la cui' jua'a̱ ndyaca jna', cha' stu'ba ti ndyiji cha' ti'í ji'na cuentya ji'i̱ Jesús; pana jlya ti' na cha' Cristo laca loo ji'na juani, bi' cha' ndalo na ji'i̱ cha' ti'í nu tyacua ji'na. Nde cha' nu ngua 'na lo'o ndi'i̱ na' loyuu su naa Patmos, sca yuu piti ti nu nscua cla'be hitya. Ca bi' ntsu'u na' ne' chcua̱, xqui'ya cha' ná ntsi̱i̱ na' nchcui' na' cha' ji'i̱ ycui' Ndyosi lo'o ñati̱; nchcui' na' lcaa cha' tso'o nu cua nda Jesús lo'o na.

2 TESALONICENSES 1:5

Liñi tsa ndu'ni cuayá' ycui' Ndyosi ji'i̱ ñati̱; bi' cha' caja su tyi'i̱ ma̱ ca su laca ycui' Ndyosi loo ca nde loo la, masi xña'a̱ tsa ngu' lo'o ma̱ juani xqui'ya cha' ji'i̱ ycui' Ndyosi nu cua ngusñi ma̱.

FILIPENSES 1:29

Tso'o tsa laca cha' nda ycui' Ndyosi chacuayá' cha' ngusñi ma̱ cha' ji'i̱ Cristo; pana cua nscua cha' caja xi cha' ti'í ji'i̱ ma̱, nu lo'o cua ngusñi ma̱ cha' ji'i̱ Cristo bi'.

LOS HECHOS 21:11

Lo'o ndyalaa yu ca slo ya, li' ngulo yu juata nu ndyaaca̱' sii' Pablo, li' ya' yu lo'o quiya' yu ngusca̱' yu lo'o juata bi'. ―Cua nchcui' Xtyi'i ycui' Ndyosi lo'o na' cha' ñi'ya̱ nu ndyaaca̱' ycui' na', jua'a̱ sca̱' ngu' judío tya'a na ji'i̱ ñati̱ nu ca ji'i̱ juata re ca Jerusalén ―nacui̱ Agabo ji'i̱ ya―. Tsaa lo'o ngu' ji'i̱ ñati̱ bi' slo ngu' xa' tsu' cha' xcube' ngu' ji'i̱ yu ―nacui̱.

LOS HECHOS 9:16

Culu'u na' ji'i̱ yu ñi'ya̱ cha' ti'í nu tyacua ji'i̱ yu lo'o ta yu cha' jna' lo'o ñati̱.

LOS HECHOS 7:54

Nu lo'o ndyuna ngu' cha' nu nchcui' Esteban, ngua ñasi̱' tsa ngu' li', tyaala tsa ndi'i̱ cloo ngu' cha' ñasi̱' ngu'.

SAN JUAN 15:20

Tyi'u ti' ma̱ cha' nu nchcui' na' lo'o ma̱ tsubi': “Nu laca loo laca nu nclyo cña, si'i ngu' msu ti”. Ñi'ya̱ ndu'ni lya' ti' ngu' jna', jua'a̱ cua'ni lya' ti' ngu' ji'i̱ ma̱. Ná ndaquiya' ngu' ji'i̱ cha' nu ngulu'u na' ji'i̱ ngu', la cui' jua'a̱ ná taquiya' ngu' ji'i̱ cha' nu chcui' cu'ma̱ lo'o ngu' bi'.

SAN LUCAS 9:5

Si ntsu'u quichi̱ su ná ndiya ti' ngu' cha' nu nchcui' ma̱ lo'o ngu', su ná nti' ngu' cha' tyanu ma̱ slo ngu', hora ti tsaa ma̱ xa' se'i̱. Lo'o jua'a̱ salú ma̱ sñii yuu nu ntsu'u quiya' ma̱ lo'o tyu'u ma̱ quichi̱ bi'; xqui'ya cha' bi', caca cuayá' ti' ngu' quichi̱ cha' cuxi tsa cña nu ngua'ni ngu' lo'o ma̱ li'.

SAN MARCOS 6:11

Si ntsu'u sca quichi̱ su ná tyaja'a̱ ngu' ta ngu' se'i̱ tyanu ma̱, sca quichi̱ su ná tyaja'a̱ ngu' cuna ngu' cha' nu chcui' ma̱ lo'o ngu', li' tyu'u ma̱ quichi̱ bi', yaa clya ma̱ li'. Salú ma̱ sñii yuu nu ntsu'u quiya' ma̱ to' quichi̱ bi'. Jua'a̱ caca cuayá' ti' ngu' cha' cuxi tsa cña nu ngua'ni ngu' lo'o ma̱. Cha' liñi cacha' na' ji'i̱ ma̱ juani ―nacui̱ Jesús―, lo'o tyalaa tsa̱ cha' cua'ni cuayá' ycui' Ndyosi ji'i̱ lcaa ñati̱, lye la xcube' Ni ji'i̱ ñati̱ quichi̱ nu ná ntaja'a̱ cuna ngu' cha' nu nchcui' ma̱ lo'o ngu'; xti la xcube' Ni ji'i̱ jyo'o ñati̱ cuxi nu nguti'i̱ quichi̱ Sodoma, nu nguti'i̱ quichi̱ Gomorra cua sa'ni. Jua'a̱ nchcui' Jesús lo'o ngu' nu ndyaca tsa'a̱ ji'i̱.

SAN MARCOS 1:44

―Ni sca ñati̱ ná cacha' nu'u̱ ji'i̱ tilaca laca nu ngua'ni jo'o jinu'u̱ ―nacui̱ Jesús ji'i̱ nu ngua quicha bi'―. Yaa clya nu'u̱ slo sti jo'ó cha' ta nu'u̱ msta̱ ji'i̱ ycui' Ndyosi nu ngua'ni cha' ndyaca tso'o nu'u̱. Ta nu'u̱ msta̱, tsa lo msta̱ nu nacui̱ jyo'o Moisés sa'ni cha' ta na ji'i̱ ycui' Ndyosi lo'o ngua lubii cuaña' na. Jua'a̱ caca cuayá' ti' lcaa ñati̱ cha' cua ndyaca tso'o nu'u̱, nu lo'o ña'a̱ ngu' lo'o xñi sti jo'ó msta̱ nu ta nu'u̱.

SAN MATEO 5:22

Pana quiña'a̱ la cha' chcui' na' lo'o ma̱ juani: masi ca ti'í ti' ngu' ji'i̱ tya'a ñati̱, li' ntsu'u cha' chcube' ngu' bi'; masi na chcui' ti ngu' cha' cuxi ji'i̱ tya'a ñati̱, ntsu'u cha' tsaa ngu' bi' slo ngu' nu laca loo ca Jerusalén, cha' caca cuayá' ji'i̱ ngu' cajua li'. Lo'o jua'a̱ si ñacui̱ ngu' ji'i̱ tya'a ñati̱: “¡Na ple tsa nu'u̱! ¡Na tonto tsa hique nu'u̱!” lo'o ñasi̱' tsa ngu' ji'i̱ tya'a ñati̱, li' nga'a̱ cha' tsaa ngu' bi' ca bilyaa su ná tye cha' tyaqui̱ quii'.

SAN MARCOS 13:8

Xu̱u̱ tya'a ñati̱ sca tsu' lo'o ngu' chaca tsu', jua'a̱ xu̱u̱ tya'a ñati̱ sca quichi̱ tlyu lo'o ñati̱ chaca quichi̱ tlyu, tyu̱u̱ se'i̱ clyacui̱ chalyuu li'. Lo'o jua'a̱ lcua ti se'i̱ caja jbi'ña ji'i̱ ngu'. Pana lcaa cha' bi' caca lo'o chca nguxana ti cha' chcube' ñati̱ chalyuu, si'i na cua tye ti chalyuu li'.

2 JUAN 1:8

Bi' cha' tii ti ti' ma̱ tyi'i̱ ma̱ chalyuu, cha' ná culiji yu'u jua'a̱ ti lcaa cha' nu cua ndyuna ma̱ lo'o nguti'i̱ ya ca slo ma̱. Li' caja lcaa cha' tso'o nu cua nti' ycui' Ndyosi ta Ni ji'i̱ ma̱ lo'o tye chalyuu.