SAN MARCOS 13:13 - Chatino Tataltepec

¹³ Lye tsa caca ti'í ti' lcaa ñati̱ ji'i̱ ma̱ xqui'ya cha' ñati̱ jna' laca ma̱. Ná cube ti' ma̱; lcaa cu'ma̱ nu talo ma̱ ji'i̱ cha' cuxi bi' ña'a̱ cuayá' nu tye chalyuu, cua'ni lyaá ycui' Ni ji'i̱ ma̱ li'.

SAN MARCOS 13:13 Referans Kwoze

SAN MATEO 10:22

Lo'o jua'a̱ caca ti'í ti' lcaa ngu' ña'a̱ ngu' ji'i̱ ma̱ xqui'ya na'. Pana ñati̱ nu talo ji'i̱ lcaa cha' cuxi bi', clyaá ngu' li', caja chalyuu nu ná nga'a̱ cha' tye ji'i̱ ngu' bi'.

SAN MATEO 24:13

Pana ná cube ti' ma̱, lcaa cu'ma̱ nu talo tyiquee ma̱ ji'i̱ cha' cuxi bi', cua'ni lyaá na' ji'i̱ cu'ma̱ li', ña'a̱ cuayá' nu tye chalyuu ―nacui̱ Jesús―.

SAN LUCAS 6:22

’Lo'o jua'a̱ tso'o ti caca tyiquee cu'ma̱ masi ti'í ti' ngu' ña'a̱ ngu' ji'i̱ ma̱, masi culo'o ngu' ji'i̱ ma̱ ca su ndi'i̱ ma̱, masi suba' tsa chcui' ngu' lo'o ma̱, masi hasta nga'aa nti' ngu' chcui' ngu' lo'o ma̱, xqui'ya cha' jlya ti' ma̱ jna', na' nu cua nda Ni lijya̱a̱ cha' caca na' ñati̱;

GÁLATAS 6:9

Bi' cha' ná tso'o si ca taja ti' na cha' cua'ni na cha' tso'o laja lo'o ndi'i̱ na chalyuu. Lo'o tyalaa hora bi', li' tyu'u tucua cha' tso'o nu nacui̱ Ni cha' tyacua ji'na nde loo la, la cui' cha' nu tyiquee' tsa ngujuatya na ji'i̱; pana ntsu'u cha' talo na, cha' ná ca taja ti' na ndu'ni na cña tso'o.

ROMANOS 2:7

sca chalyuu tso'o nu ná nga'a̱ cha' tye, bi' laca nu ta Ni ji'i̱ ngu' tso'o, nu ná nchca taja ti' ndu'ni ngu' cña tso'o lo'o tya'a ngu'. Xcui' ndya'a̱ cha' tyiquee ngu' bi' ji'i̱ cha' tso'o nu ntsu'u ca slo ycui' Ndyosi, xcui' nti' ngu' cha' tyi'i̱ tso'o ti ngu' cuentya ji'i̱ Ni, xcui' ndube ti' ngu' ji'i̱ chalyuu nu lijya̱ nde loo la.

SAN JUAN 15:21

Jua'a̱ cua'ni ngu' lo'o cu'ma̱ xqui'ya na' ―nacui̱ Jesús―, cha' ná nslo ngu' tilaca laca nu nda 'na lijya̱a̱ nde chalyuu.

APOCALIPSIS 2:10

Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.

HEBREOS 10:39

Nu na ni, ná taca tya'a̱chu̱' na ji'i̱ cha' ji'i̱ Jesús; si tya'a̱chu̱' na ji'i̱ yu, chcuna' na tyucui ña'a̱ na, ña'a̱ lo'o cresiya ji'na li'. Pana laca na ñati̱ nu tsa cu' ti xñi na cha' ji'i̱ Ni, bi' cha' ndu'ni lyaá Ni ji'na ji'i̱ nu cuxi.

HEBREOS 3:14

Lcaa na lo'o tya'a na, tya ntsu'u cha' ji'na lo'o Cristo si ña'a̱ ti xñi na cha' ji'i̱ Ni ña'a̱ cuayá' nu tye chalyuu ji'na, la cui' ñi'ya̱ lo'o jlya ti' na ji'i̱ yu nu ngua tya clyo.

SAN JUAN 17:14

Lcaa cha' nu cua nchcui' nu'u̱ lo'o na', cua nda na' cha' bi' lo'o ngu' bi' ―nacui̱―. Lo'o juani, ñi'ya̱ lo'o liye' ti' ñati̱ chalyuu 'na, jua'a̱ ca liye' ti' ñati̱ ña'a̱ ji'i̱ ngu' bi', xqui'ya cha' ná ntsu'u cha' ji'i̱ ya lo'o nu cuxi nu ntsu'u nde chalyuu.

SAN LUCAS 21:17

cha' tyucui ña'a̱ chalyuu ntsu'u quiña'a̱ tsa ngu' nu ti'í ti' ngu' ña'a̱ ngu' ji'i̱ ma̱ xqui'ya na'.

SAN MATEO 24:9

’Nu lo'o xana cha' cuxi bi', tejeya' ngu' ji'i̱ ma̱ cha' xcube' ngu' ji'i̱ ma̱, hasta ña'a̱ cuayá' nu cujuii ngu' ji'i̱ ma̱, cha' ntsu'u ngu' tyucui ña'a̱ chalyuu nu caca ti'í ti' ngu' ña'a̱ ngu' ji'i̱ ma̱ xqui'ya na';

APOCALIPSIS 3:10

Cua ndyi'u ti' ma̱ cha' nu nacui̱ na' ji'i̱ ma̱ tsubi', cha' talo tyiquee ma̱ cha' tu̱ ti' ma̱ 'na ni tsa̱ tya̱a̱ na' chaca quiya'; bi' cha' juani cua'ni na' cha' ná sca caca ji'i̱ ma̱ lo'o tyalaa tyempo cuxi nde chalyuu. Cua lijya̱ caca cha' cuxi bi', nu cua'ni cuayá' ji'i̱ lcaa ñati̱ chalyuu.

SANTIAGO 1:12

Tso'o caca tyiquee ñati̱ nu ña'a̱ ti nxñi cha' ji'i̱ Jesús, masi tyacua cua ña'a̱ ca cha' ti'í ji'i̱ ngu'. Tso'o si talo ngu' tyiquee', ña'a̱ cuayá' tye cha' ti'í bi' ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi' li'; bi' laca cha' tso'o nu cua nacui̱ Ni cha' ta Ni ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni.

1 JUAN 3:13

Cu'ma̱ tya'a ngusñi na cha' ji'i̱ ycui' Ndyosi, ná quiña'a̱ tsa cha' culacua ti' ma̱ si liye' tsa ti' ñati̱ chalyuu ña'a̱ ngu' ji'i̱ ma̱.

SAN MARCOS 13:12

Cuxi tsa caca tyempo li'; cujuii cuañi' ñati̱ ji'i̱ tya'a ngu' cha' cujuii ngu' ji'i̱, jua'a̱ cujuii cuañi' ngu' ji'i̱ sñi' ngu'. Lo'o nu ngu' cuañi' ni, caca ñasi̱' ngu' ji'i̱ sti ngu', ji'i̱ xtya'a̱ ngu' li'; ta nu ngu' cuañi' bi' ji'i̱ sti ngu', ji'i̱ xtya'a̱ ngu' cha' cujuii ngu' cuxi ji'i̱.