SAN LUCAS 8:15 - Chatino Tataltepec

¹⁵ Ñi'ya̱ laca si'yu nu ndyú su tso'o tsa yuu, jua'a̱ laca lo'o ñati̱ nu tyucui tyiquee ngu' ndyuna ngu' cha' tso'o nu nda ycui' Ndyosi lo'o ngu'; ntaja'a̱ ngu' ndaquiya' ngu' cua ña'a̱ ca cha' nu nda Ni lo'o ngu'. Ndalo ngu' bi' li', ná xutacui ngu' cha' ngusñi ngu' cha' bi'. Li' tso'o tsa cha' tyu'ú ne' cresiya ji'i̱ ngu' bi'.

SAN LUCAS 8:15 Referans Kwoze

HEBREOS 10:36

Nga'a̱ cha' talo tyiquee ma̱ masi tyiquee', si tya nti' ma̱ cua'ni ma̱ lcaa ña'a̱ cña nu nti' ycui' Ndyosi, si tya nti' ma̱ ña'a̱ ma̱ cha' nu cua nacui̱ Ni cha' caca nde loo la.

SAN LUCAS 6:45

Cua ña'a̱ ca ñati̱ nu tso'o tyiquee ni, tso'o tsa nchcui' ngu' bi'; lo'o cua ña'a̱ ca ñati̱ nu cuxi tyiquee ni, cuxi ti nchcui' ngu' bi' li'. Cua ña'a̱ ca cha' nu ntsu'u ne' cresiya ji'i̱ scaa ngu', jua'a̱ nchcui' ngu'.

1 JUAN 2:3

Nu lo'o nti' na taquiya' na cua ña'a̱ ca cña nu nti' Ni cha' cua'ni na, li' taca jlo ti' na cha' chañi cha' ntsu'u cha' ji'na lo'o Jesucristo.

COLOSENSES 1:10

Lo'o li' lcaa tsa̱ lo'o ndya'a̱ ma̱ chalyuu taca cua'ni ma̱ cña, cua ña'a̱ ca cña nu nti' ycui' Ndyosi cha' cua'ni ma̱; taca cua'ni ma̱ lcaa lo cña tso'o cuentya ji'i̱ ycui' Ndyosi li', lo'o jua'a̱ taca ca cuayá' la ti' ma̱ ñi'ya̱ ndyu'u lcaa cha' ji'i̱ Ni.

COLOSENSES 1:6

Cua lijya̱ ngañi la cha' tso'o ji'i̱ Jesús bi' tyucui ña'a̱ chalyuu, lo'o jua'a̱ lijya̱ ndyaca tso'o la cresiya ji'i̱ ñati̱ macala su nduna ngu' cha' bi'. La cui' jua'a̱ ndyaca tya lo'o ndyuna ma̱ cha' bi' tya clyo; tya li' cua ndyuna ma̱ cha' ndu'ni tsa ycui' Ndyosi cha' xlya'be lo'o ñati̱, li' ngua cuayá' ti' ma̱ cha' chañi tsa laca cha' bi'.

SAN JUAN 14:15

’Taquiya' ma̱ ji'i̱ lcaa cha' nu nchcui' na' lo'o ma̱, si chañi cha' ntsu'u tyiquee ma̱ 'na ―nacui̱ Jesús―.

SAN LUCAS 11:28

Li' nguxacui̱ Jesús cha' ji'i̱: ―Si'i cha' bi' ―nacui̱―. Tso'o la ntsu'u tyiquee ñati̱ nu cua'a̱ jyaca̱ ji'i̱ lcaa cha' nu nda ycui' Ndyosi lo'o ngu', nu taquiya' ji'i̱ lcaa cha' bi'.

FILIPENSES 1:11

Quiña'a̱ tsa cha' tso'o taca cua'ni ma̱ lcaa su ndi'i̱ ma̱ chalyuu xqui'ya Jesucristo, cha' ndyu'ni Cristo cña ne' cresiya ji'i̱ ma̱; bi' cha' taca cua'ni tlyu ma̱ ji'i̱ ycui' Ndyosi, taca cua'ni chi̱ ma̱ loo Ni.

ROMANOS 7:4

Ndi'ya̱ laca na juani cuentya ji'i̱ cha' cusu' nu ndaquiya' tsa na ji'i̱ tya sa'ni la: ñi'ya̱ laca sca nu cuna'a̱ nu nga'aa ntsu'u clyo'o, jua'a̱ laca lcaa tya'a na nu ntsu'u cha' ji'na lo'o Cristo. Na cua ngujuii Cristo lo crusi, bi' cha' juani nga'aa ntsu'u cha' ji'na lo'o nu cha' cusu' bi'. Cua ngua stu'ba cha' ji'na lo'o Cristo nu lo'o ndyu'ú yu chaca quiya' lo'o cua ngujuii yu, bi' cha' taca ji'na cua'ni na cña ji'i̱ ycui' Ndyosi laja lo'o tya ndi'i̱ ti na nde chalyuu.

ROMANOS 6:22

Pana juani ni, nga'aa caca ji'i̱ nu cuxi bi' culo cña ji'i̱ ma̱, cha' cua ndyatí̱ ma̱ lo cña ji'i̱ ycui' Ndyosi. Chaa ti' ma̱ ndyu'ni ma̱ cña ji'i̱ Ni juani, cha' xcui' na ndi'i̱ ma̱ chalyuu cuentya ji'i̱ ycui' Ni; li' ná nga'a̱ cha' tye chalyuu nu ta Ni ji'i̱ ma̱ lo'o cua ndye lcaa cha'.

SAN JUAN 15:10

Lcaa tsa̱ tyi'u ti' ma̱ su ndi'i̱ ma̱ cha' ntsu'u tsa tyiquee na' ña'a̱ na' ji'i̱ ma̱. Jua'a̱ tso'o tsa caca tyiquee na' ña'a̱ na' ji'i̱ ma̱ si taquiya' ma̱ ji'i̱ lcaa cha' nu nda na' lo'o ma̱. Lo'o jua'a̱ na' ―nacui̱ Jesús― cua ngua'ni na' lcaa cña nu ngulo Sti na' 'na. Jlo ti' na' cha' ntsu'u tsa tyiquee Ni ña'a̱ Ni jna' tyucui su ndi'i̱ na'.

SAN MATEO 24:13

Pana ná cube ti' ma̱, lcaa cu'ma̱ nu talo tyiquee ma̱ ji'i̱ cha' cuxi bi', cua'ni lyaá na' ji'i̱ cu'ma̱ li', ña'a̱ cuayá' nu tye chalyuu ―nacui̱ Jesús―.

HEBREOS 2:1

Tlyu tsa cha' laca ji'i̱ Jesús juani lacua, bi' cha' nga'a̱ cha' xñi tso'o na lcaa cha' nu cua nchcui' Jesús lo'o na, cha' ná tyu'utsu' na ji'i̱ tyucui̱i̱ liñi nu ngusñi na.

EFESIOS 2:8

na cua ngulaá na ji'i̱ nu cuxi, xqui'ya cha' jua'a̱ ti ndu'ni Ni cha' tso'o lo'o na lo'o ngusñi na cha' ji'i̱ Cristo. Ni si'i sca cña nu ngua'ni ycui' ca na laca bi', sca cha' tso'o nu ngua'ni ycui' Ndyosi cuentya ji'na jua'a̱ ti laca bi'.

1 CORINTIOS 7:19

Ná ndu'ni cha' cuentya ji'i̱ ycui' Ndyosi, masi ngulacua̱ na jua'a̱, masi ná ngulacua̱ na jua'a̱; nu ndu'ni cha' cuentya ji'i̱ ycui' Ndyosi laca cha' cua'ni na cña nu nclyo Ni ji'na.

ROMANOS 7:18

Cua jlo ti' na' cha' ná tso'o laca cha' nu ntsu'u ne' cresiya jna', cha' ñati̱ chalyuu ti laca na'; masi nti' tsa na' cua'ni na' xcui' cha' tso'o nquicha', pana ná nchca jna' tsiya' ti.

ROMANOS 2:7

sca chalyuu tso'o nu ná nga'a̱ cha' tye, bi' laca nu ta Ni ji'i̱ ngu' tso'o, nu ná nchca taja ti' ndu'ni ngu' cña tso'o lo'o tya'a ngu'. Xcui' ndya'a̱ cha' tyiquee ngu' bi' ji'i̱ cha' tso'o nu ntsu'u ca slo ycui' Ndyosi, xcui' nti' ngu' cha' tyi'i̱ tso'o ti ngu' cuentya ji'i̱ Ni, xcui' ndube ti' ngu' ji'i̱ chalyuu nu lijya̱ nde loo la.

SANTIAGO 1:4

Pana cui'ya ma̱ cuentya cha' talo ma̱ tyucui tyempo lo'o ndi'i̱ ma̱ chalyuu, ña'a̱ cuayá' nu tye cha' ti'í ji'i̱ ma̱, cha' caca ma̱ ñati̱ nu tyucui tyiquee, ñati̱ nu ná sca na lyiji ji'i̱ cha' ngusñi ma̱ cha' ji'i̱ Jesús.

SAN LUCAS 8:14

Ndi'ya̱ laca cha' ji'i̱ si'yu nu ndyalú laja yaca quiche': bi' laca ñi'ya̱ laca lo'o ñati̱ nu cua ndyuna cha' tso'o bi' nquicha', pana ntsu'u tsa cña ji'i̱ ngu', ntsu'u tsa cñi ji'i̱ ngu', lo'o jua'a̱ ntsu'u tsa su culiji ngu' cñi cha' ji'i̱ ti ngu'; bi' cha' ná nchca tyanu tso'o cha' tso'o bi' ne' cresiya ji'i̱ ngu'.

SAN LUCAS 8:16

’Ná cua'a̱ ngu' xee ni'i̱, lo'o hora ti tacu̱' ngu' loo xee bi' li'; la cui' ti, ná sta ngu' ji'i̱ sca xee sca ne' qui'ña ti. Ná ndu'ni ngu' jua'a̱. Ndi'ya̱ ndu'ni ngu' lo'o sca xee: nsta ngu' ji'i̱ su cua̱, cha' clyane xee cha' tyaca̱' ña'a̱ ngu' nu ndi'i̱ ni'i̱ bi'.

ROMANOS 8:25

Pana lo'o chañi cha' tya ntajatya na ji'i̱ sca cha', li' ntsu'u cha' talo na ji'i̱, masi tya lyiji ña'a̱ na ji'i̱, masi talo na tyiquee' ña'a̱ cuayá' nu ña'a̱ na ji'i̱ cha' cua ndyu'u tucua.