SAN LUCAS 6:8 - Chatino Tataltepec

⁸ Pana hora ti ngua cuayá' ti' Jesús lcaa ña'a̱ cha' nu nclyacua ti' ngu'. Li' nacui̱ Jesús ji'i̱ yu nu nchcu̱' ya' bi': ―Tyatu̱ clya nu'u̱, yaa tyu̱ cla'be laja ngu' jua ―nacui̱ Jesús ji'i̱ nu quicha bi'. Li' ndyatu̱ yu quicha bi', ndyaa yu cajua su nacui̱ Jesús ji'i̱ yu.

SAN LUCAS 6:8 Referans Kwoze

APOCALIPSIS 2:23

hasta cujuii na' ji'i̱ ñati̱ nu ngusñi cha' ji'i̱ nu cuna'a̱ bi', nacui̱ Ni. Lo'o li' lcaa taju ñati̱ ji'i̱ Jesucristo lcua ti quichi̱, caja cha' ji'i̱ ngu' cha' cua ngua'ni tye na' ji'i̱ cha' cuxi bi'; li' taca jlya tso'o ti' ngu' cha' cua jlo ti' na' lcaa ña'a̱ cha' nu nclyacua ti' ñati̱ chalyuu. Lo'o li' ca cuayá' ti' lcaa ma̱ cha' la cui' ñi'ya̱ ngua'ni ma̱ cha' cuxi tya lo'o ya̱a̱ ma̱ chalyuu, jua'a̱ xcube' na' ji'i̱ ma̱, nacui̱ Jesús.

SAN MATEO 9:4

Pana, ngua tii Jesús ji'i̱ lcaa lo cha' nu ntsu'u tyiquee ngu' bi'. ―¿Ni cha' chi̱i̱ nti' ma̱ ña'a̱ ma̱ 'na juani? ―nacui̱ Jesús ji'i̱ mstru bi'―.

1 PEDRO 4:1

Lo'o ndyi'u ti' ma̱ cha' nchcube' Cristo nde chalyuu, li' caca nguula la ti' ma̱ cha' talo tyiquee ma̱ lo'o chcube' cu'ma̱; ñi'ya̱ nu ndalo tyiquee ycui' Cristo, jua'a̱ taca talo tyiquee ma̱ lo'o chcube' ma̱ li'. Nga'aa caca cua'ni cha' cuxi ngana ji'i̱ ma̱ si lo'o cu'ma̱ chcube' ma̱ jua'a̱.

HEBREOS 4:13

Ná taca tyu'u cuaana ti cha' tyiquee na, ni tsaca cha' nu ntsu'u ji'na, cha' ná ca cuayá' ti' ycui' Ndyosi ji'i̱ cha' bi'. Ná taca. Ña'a̱ Ni ji'i̱ lcaa ñati̱ nu cua ngüiñá Ni, nu cua ngusta Ni chalyuu; nchca tii Ni lcaa cha' nu ntsu'u ji'na. Ná taca cua'ni na ni sca cña ca slo ycui' Ndyosi cha' tyu'u cuatsi' ti sca cha', cha' nga'a̱ cha' xacui̱ na cha' ji'i̱ ycui' Ni cuentya ji'i̱ lcaa cña nu ngua'ni scaa na nde chalyuu, nu lo'o tye chalyuu ji'na.

FILIPENSES 1:28

Lo'o ndu'ni ma̱ jua'a̱, li' nga'aa ntsu'u cha' cutsi̱i̱ ma̱ ji'i̱ ngu' tya'a cusu̱u̱ ma̱, cha' taca ca cuayá' ti' ngu' cha' cua nscua cha' cuityi̱ ycui' Ndyosi ji'i̱ lcaa ñati̱ cuxi. Pana cu'ma̱ ni, cua ngulaá ma̱ ji'i̱ nu cuxi bi'; ycui' Ndyosi ndu'ni cha' taca tyiji̱loo ma̱ ji'i̱ ñati̱ cuxi bi'.

LOS HECHOS 26:26

Cua jlo ti' rey Agripa re, xqui'ya cha' nchca cuayá' ti' nu cusu' cha' bi'; bi' cha' tlyu tyiquee na' lo'o nchcui' na' lo'o nu cusu' re. Lo'o jua'a̱ jlo ti' nu cusu' ñi'ya̱ ngua cha' bi', cha' si'i na cuaana ti ngua cha' ji'i̱ Jesús.

LOS HECHOS 20:24

Pana ná ntsi̱i̱ na' xqui'ya cha' nu nchcui' ngu' bi', ná ndu'ni cha' jna' masi cujuii ngu' jna'. Sca ti cha' nti' na', cha' tso'o ti tye cña nu nda ycui' Jesús jna', cha' ta na' cha' tso'o ji'i̱ ycui' Ndyosi lo'o xa' ñati̱, cha' ntsu'u tsa tyiquee Ni ña'a̱ Ni ji'i̱ ñati̱ chalyuu.

SAN JUAN 21:17

Cua ngua sna quiya' nu nchcuane Jesús ji'i̱: ―¿Ha chañi hi̱ cha' ntsu'u tyiquee nu'u̱ ña'a̱ 'na? Cua xñi'i̱ ti' Pedro cha' cua sna quiya' nchcuane Jesús ji'i̱ si chañi cha' ntsu'u tyiquee ña'a̱ ji'i̱ yu, bi' cha' nchcui' ndi'ya̱: ―Lcaa ca cha' jlo ti' nu'u̱, Xu'na ―nacui̱ Pedro ji'i̱ yu―. Cua jlo ti' nu'u̱ cha' ntsu'u tsa tyiquee na' ña'a̱ na' jinu'u̱. ―Culu'u nu'u̱ cha' 'na ji'i̱ ñati̱ 'na lacua ―nacui̱ Jesús ji'i̱―.

SAN JUAN 9:4

Lo'o tya xee nga'a̱ cha' cua'ni na cña ―nacui̱ Jesús―, lo'o cua ndyaa cuichaa nga'aa caca cua'ni ni sca na cña li'. Lo'o jua'a̱ laca lo'o na' ―nacui̱―, nga'a̱ cha' cua'ni na' lcaa ña'a̱ cña nu ngulo ycui' Ndyosi jna' lo'o nda Ni jna' lijya̱ na' ca nde ―nacui̱ Jesús―.

SAN JUAN 2:25

Ná ntsu'u cha' cacha' xa' ñati̱ ji'i̱ yu ñi'ya̱ ntsu'u cresiya ji'i̱ scaa ngu', cha' jlo tsa ti' ycui' ca yu ñi'ya̱ ntsu'u cresiya ji'i̱ lcaa ñati̱.

SAN LUCAS 5:22

Cua jlo ti' Jesús ni cha' laca nu nclyacua ti' ngu'. Li' nchcuane yu ji'i̱ ngu' bi': ―¿Ni cha' laca nti' ma̱ jua'a̱? ¿Ha nti' ma̱ cha' tucui la laca si ñacui̱ na' ji'i̱ nu quicha cua cha' cua'ni clyu ti' ycui' Ndyosi ji'i̱ qui'ya nu ntsu'u ji'i̱ yu? ¿Ha nti' ma̱ cha' yala la caca si ñacui̱ na' ji'i̱ nu quicha: “Tyatu̱ clya nu'u̱ tya'a̱ nu'u̱”? ¿Ni cña yala la cua'ni na' cuentya ji'i̱ yu cua lacua?

SAN LUCAS 6:9

Li' nda Jesús sca cha' lo'o nu ngu' nu ndu'ni ti cha' tacati bi': ―¿Ni cña tso'o la cha' cua'ni na tsa̱ tacati lacua? ―nacui̱ Jesús ji'i̱ ngu' bi'―. ¿Ha sca cña tso'o cua'ni na li'? ¿Ha tso'o la cua'ni na sca cña cuxi li', nti' ma̱? ―nacui̱―. ¿Ha tso'o la si cua'ni lyaá na ji'i̱ ñati̱ tsa̱ bi', cha' ná cajaa ngu' li'? ¿Ha tso'o la nti' cu'ma̱ masi ta na chacuayá' cajaa ñati̱ li'? ―nacui̱ Jesús ji'i̱ ngu'.

SAN MARCOS 3:3

Lo'o li' nchcui' yu lo'o nu quicha bi': ―Ca̱a̱ nu'u̱, tyu̱ cla'be ne' laa re ―nacui̱ Jesús ji'i̱.

SAN LUCAS 13:12

Lo'o na'a̱ Jesús ji'i̱ ma' cusu' bi', li' nchcui' yu lo'o ma': ―Cua ndyaca tso'o nu'u̱ juani, nga'aa tyacua quicha jua jinu'u̱ chaca quiya' ―nacui̱ yu ji'i̱ ma' cusu' bi'.