SAN LUCAS 3:13 - Chatino Tataltepec

¹³ ―Ná tyeje tacui cuayá' cha' culo ma̱ cñi cña loo ngu' ―nacui̱ Juan ji'i̱ ngu' bi'.

SAN LUCAS 3:13 Referans Kwoze

1 CORINTIOS 6:10

lo'o jua'a̱ nu cuaana, lo'o jua'a̱ nu nxlyaá na nu ntsu'u ji'i̱ tya'a ngu', lo'o jua'a̱ nu cu'bi, lo'o jua'a̱ nu nchcui' cha' cuxi ji'i̱ tya'a ngu', lo'o jua'a̱ nu cuxi ti ndu'ni ngana ji'i̱ tya'a ngu', ná tsaa chca ñati̱ cuxi bi' ca su tso'o su ntucua ycui' Ndyosi.

SAN LUCAS 19:8

Li' ndatu̱ Zaqueo cha' chcui' lo'o Jesús: ―Ña'a̱ xi ya'a̱, cusu' ―nacui̱ yu―. Ta na' sa cla'be cha' tso'o nu ntsu'u 'na ji'i̱ ngu' ti'i. Si tya ntsu'u na nu nguaana na' cha' cua ngüiñilo'o na' ji'i̱ ngu', tya na' na bi' ji'i̱ ngu', masi jacua tsa lo cua quije ji'i̱ ngu' ―nacui̱ Zaqueo li'.

EFESIOS 4:28

Cu'ma̱ nu nguaana ma̱ na nu ntsu'u ji'i̱ ñati̱ tya tsubi' la, nga'a̱ cha' xtyanu ma̱ cña bi' ji'i̱ ma̱, clyana ma̱ cña tso'o la nu cua'ni ycui' ma̱; tso'o la si cua'ni ma̱ cña lo'o ya' ycui' ma̱, cha' jua'a̱ caja xi ñi'ya̱ nu xtyucua ma̱ ji'i̱ tya'a ma̱ nu lyiji tsa ji'i̱.

SAN MATEO 7:12

’Nga'a̱ cha' cua'ni tso'o ma̱ lo'o xa' ñati̱ si nti' ma̱ cha' tso'o ti cua'ni ngu' lo'o ma̱. La cui' cña bi' ngulo ycui' Ndyosi lo quityi nu nguscua jyo'o Moisés, lo'o jua'a̱ cha' nu nguscua xa' jyo'o cusu' nu ngua tu'ba ji'i̱ ycui' Ndyosi sa'ni la; sca ti cuayá' ndyu'u cha' nu nchcui' lcaa ngu' bi' lo quityi.

HEBREOS 12:1

Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.

SAN LUCAS 3:12

Lo'o jua'a̱ ya̱a̱ xi ngu' cuxi nu nxñi cñi cña loo ngu' cuentya ji'i̱ ngu' xa' tsu', ya̱a̱ ngu' cha' tyucuatya Juan ji'i̱ ngu'. Li' nchcuane ngu' bi' ji'i̱ Juan: ―¿Ñi'ya̱ cña cua'ni ya, mstru? ―nacui̱ ngu' bi' ji'i̱ Juan.

SAN LUCAS 3:14

Lo'o xi ngu' sendaru ndyalaa cha' cacha' ji'i̱ Juan li': ―Jua'a̱ cuare, ¿ñi'ya̱ cña cua'ni ya? ―nacui̱ sendaru bi'. ―Nga'aa xlyaá ma̱ na nu ntsu'u ji'i̱ ñati̱, ni nga'aa xcutsi̱i̱ ma̱ ji'i̱ ngu'; nga'aa sta ma̱ qui'ya laja ti ji'i̱ ngu', cha' caja cha' bi' ji'i̱ ma̱. Lo'o jua'a̱, nga'aa ñacui̱ ma̱ cha' xti ti caya' ndyiji ji'i̱ ma̱ ―nacui̱ Juan ji'i̱ ngu' sendaru bi'.