SAN LUCAS 22:32 - Chatino Tataltepec

³² Pana cua ngüijña na' ji'i̱ ycui' Ndyosi Sti na' cha' jinu'u̱ Pedro, cha' ná tye cha' jlya ti' nu'u̱ 'na. Lo'o cua nteje tacui cha' cuxi bi' hi̱, nu lo'o xa' chcui' nu'u̱ cha' 'na, li' taca xtyucua nu'u̱ ji'i̱ xa' la tya'a ma̱ cha' tso'o la xñi ngu' cha' 'na.

SAN LUCAS 22:32 Referans Kwoze

ROMANOS 8:34

Ná ntsu'u nu caca xcube' ji'na li', cha' xqui'ya na cua ngujuii Jesús, xqui'ya na cua ndyu'ú yu chaca quiya'. Lo'o juani ntucua Cristo la'a tsu' cui̱ ca su ntucua ycui' Ndyosi, ndijña yu cha' clyu ti' ji'i̱ ycui' Ndyosi Sti yu cuentya ji'na.

HEBREOS 7:25

Lcaa ca tyempo, masi juani, masi nde loo la, taca ji'i̱ Ni cua'ni lyaá Ni ji'i̱ cua ña'a̱ ca ñati̱ nu xñi cha' ji'i̱ ycui' Ndyosi xqui'ya Jesús. Tyucui tyempo ndi'i̱ Jesús ca slo ycui' Ndyosi, cha' chcui' Ni lo'o ycui' Sti Ni cuentya ji'na.

2 PEDRO 3:14

Cu'ma̱ tya'a tso'o na, na ndu̱ ti' ma̱ ji'i̱ cha' bi', bi' cha' ntsu'u cha' cua'ni ma̱ xcui' cha' tso'o ti, xcui' cha' lubii ti lo'o tya'a ñati̱ ma̱, cha' ti̱ ti tyi'i̱ tyiquee ma̱ cuentya ji'i̱ ycui' Ni.

1 PEDRO 1:5

Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.

SAN LUCAS 8:13

Ñi'ya̱ laca nu chaca ycu' si'yu nu ndyú lo yuu lati tu'ba chu̱' quee, jua'a̱ laca lo'o ñati̱ nu tso'o tsa ntsu'u tyiquee ngu' lo'o ndyuna ngu' cha' tso'o bi' nquicha'. Pana ñi'ya̱ nti' nu calya sube bi', cha' ná qui'ñi ndyaa quiche su̱u̱ chu̱' quee bi', jua'a̱ nti' ñati̱ bi', cha' xti ti tyempo ndalo ngu' lo'o ngusñi ngu' cha' tso'o bi'; lo'o lya' ti' xa' ñati̱ ji'i̱ ngu' bi', yala ti tya'a̱chu̱' ngu' li'.

LOS HECHOS 3:19

Bi' cha' ntsu'u cha' ca tyuju'u ti' ma̱ ji'i̱ lcaa cha' cuxi nu ntsu'u tyiquee ma̱ ji'i̱, cuati jña ma̱ cha' clyu ti' ji'i̱ ycui' Ndyosi cha' cuityi̱ Ni lcaa cha' cuxi nu ngua'ni ma̱. Cua'ni nu Xu'na na cha' taca ca tso'o cresiya ji'i̱ ma̱ chaca quiya' li'.

1 PEDRO 1:13

Bi' cha' culacua xi ti' ma̱, tii ti' ma̱ tyi'i̱ ma̱ chalyuu, cha' lcaa tsa̱ jatya ma̱ ji'i̱ cha' tso'o nu cua tlyu xi, nu cua'ni Ni lo'o ma̱ lo'o cua'ni lyaá lyiji Ni ji'i̱ ma̱; jua'a̱ caca nu lo'o tyu'u tucua Jesucristo chaca quiya'.

HEBREOS 12:15

Cui'ya ma̱ cuentya cha' ni tsaca ngu' tya'a ma̱ ná xtyanu jua'a̱ ti lcaa cha' tso'o nu ndu'ni ycui' Ndyosi lo'o na. Lo'o jua'a̱ cui'ya ma̱ cuentya cha' ná cua'ni ñu'u̱ ma̱ ji'i̱ tyiquee xa' la ngu' tya'a ngusñi na cha' ji'i̱ Jesús. Ñi'ya̱ laca sca quixi̱' tyaala nu cua'ni ñu'u̱ ji'i̱ ñati̱ lo'o co'o ngu' hitya bi', jua'a̱ caca na ji'i̱ tya'a na lo'o ntsu'u sca cha' cuxi ji'na.

SAN MATEO 18:3

―Cha' liñi nchcui' na' lo'o ma̱ ―nacui̱ Jesús ji'i̱ ngu' bi'―, cha' ná caca tyatí̱ ma̱ cha' ji'i̱ ycui' Ndyosi cha' caca Ni loo ne' cresiya ji'i̱ ma̱ si ná cha'a̱ cha' tyiquee ma̱; nga'a̱ cha' caca tyiquee ma̱ ñi'ya̱ laca tyiquee nu piti re, cha' ná tyixi ndu'ni ngu' sube.

1 JUAN 2:19

Tya clyo ndyu'u ti'i̱ nu ngu' cuiñi bi' lo'o na, lo'o li' ngutu'u ngu' bi' ndyaa ngu'; si'i ñati̱ tya'a ntsu'u cha' ji'na lo'o Jesucristo laca ngu' bi'. Si chañi cha' tya'a ndya'a̱ na laca ngu' bi', cua ndyanu ngu' lo'o na nquicha'; pana ngutu'u ngu' bi', cha' taca ca cuayá' ti' na cha' si'i lcaa ñati̱ nu ndyu'u ti'i̱ lo'o na laca tya'a ngusñi na cha' ji'i̱ Jesucristo.

SAN JUAN 14:19

Ca tiya' la xi, li' nga'aa ña'a̱ ñati̱ chalyuu jna'; pana cu'ma̱, tya ña'a̱ ma̱ jna'. Li' caca tso'o tyiquee ma̱, xqui'ya cha' lu'ú na'.

SAN MARCOS 14:72

Hora ti xa' ngusi'ya ndye'e. Li' ntsu'u ti' Pedro ñi'ya̱ ngua cha' nu cua nchcui' Jesús lo'o tsa̱: “Ndi'ya̱ cua'ni nu'u̱ ndyi, Pedro; chcui' nu'u̱ lo'o ñati̱ sna quiya' cha' ná nslo nu'u̱ 'na, nu lo'o tya lyiji xi'ya ndye'e tucua quiya'”. Bi' cha' nxi'ya tsa Pedro li'.

SAN MARCOS 16:7

Li' yaa clya ma̱ cacha' ma̱ ji'i̱ Pedro lo'o ji'i̱ xa' la ngu' nu ndyaca tsa'a̱ ji'i̱ yu, cha' cua tsaa ti ycui' yu nde loo ji'i̱ ma̱ nde Galilea; tyacua tya'a ma̱ lo'o yu ca bi', ñi'ya̱ nu cua nacui̱ yu ji'i̱ ma̱ tya tsubi'.

SAN MATEO 26:75

Lo'o li' ndyi'u ti' Pedro cha' nu nchcui' Jesús lo'o yu tya tsa̱ la, nu lo'o ndi'ya̱ nacui̱ Jesús ji'i̱ yu: “Nu lo'o bilya xi'ya ndye'e talya juani, sna quiya' chcui' nu'u̱ lo'o ñati̱ cha' ná nslo nu'u̱ 'na”. Jua'a̱ nacui̱ Jesús tsa̱ la, bi' cha' ndu'u Pedro ndyaa yu li'; nxi'ya tsa yu ndyaa yu cha' xñi'i̱ tsa ti' yu li'.

1 PEDRO 1:1

Pedro laca na' nu nscua na' quityi re cha' ca̱a̱ slo lcaa cu'ma̱ nu ngusñi ma̱ cha' ji'i̱ Jesús, cu'ma̱ ngu' nu ndi'i̱ tyijyu'. Ntsu'u cu'ma̱ nu ndyalaa ma̱ nde loyuu su cuentya Ponto; xi xa' la tya'a cu'ma̱ ndyalaa ma̱ nde loyuu su cuentya Galacia, jua'a̱ loyuu su cuentya Capadocia, jua'a̱ loyuu su cuentya Asia, jua'a̱ loyuu su cuentya Bitinia cua lye tsa ngañi ma̱. Cña nu nda ycui' Jesucristo 'na, bi' laca cha' tsa'a na' chcui' na' cha' ji'i̱ Ni lo'o xa' la ñati̱.

ROMANOS 8:32

Ná nda ycui' Ndyosi chacuayá' ji'i̱ Jesús cha' tya'a̱chu̱' yu ji'i̱ cña ji'i̱ Ni jua'a̱ ti, masi nu sca ti Sñi' ycui' Ni laca yu; nda Ni ji'i̱ yu cha' cajaa lo crusi cuentya ji'i̱ lcaa na lo'o tya'a na. Cua nda Ni lcaa cha' tso'o nu ji'i̱ ycui' ca Ni ji'i̱ Jesús, la cui' nu laca nu sca ti Sñi' ycui' Ni. Lo'o jua'a̱ sca ti cuayá' nu ta Ni cha' bi' ji'na, ñi'ya̱ lo'o nda Ni cha' bi' ji'i̱ Sñi' ycui' Ni.

TITO 1:1

Pablo laca na'. Ndya'a̱ na' lo cña ji'i̱ ycui' Ndyosi, lo'o jua'a̱ ngua'a̱ lo Jesucristo cña 'na cha' tsa'a̱ chcui' na' cha' tso'o ji'i̱ Jesús lo'o xa' ñati̱; nga'a̱ cha' chcui' na' lo'o ñati̱ nu cua laca ngusubi ycui' Ndyosi ji'i̱ cha' caca ngu' ñati̱ ji'i̱ ycui' Ni, cha' jlya tso'o la ti' ngu' bi' ji'i̱ Ni li'. Cua nda Jesucristo 'na lijya̱a̱ cha' ca cuayá' ti' ngu' lcaa cha' liñi ji'i̱ Ni, cha' taca cua'ni tlyu lcaa na ji'i̱ ycui' Ndyosi,

2 TIMOTEO 2:18

Nguxtyanu ngu' bi' cha' liñi ji'i̱ ycui' Ndyosi, lo'o nu juani nacui̱ ngu' bi' cha' nga'aa tyu'ú na chaca quiya': “Na cua ndyu'ú ngu' chaca quiya', lcaa ngu' nu ntsu'u cha' tyu'ú”, nacui̱ ngu' cuiñi bi'. Pana ntsu'u xi ngu' tya'a na nu cua ngusñi cha' nu nchcui' ngu' bi', lo'o juani nga'aa jlo tso'o ti' ngu' ni cha' nu jlya ti' ngu' tya clyo.