SAN LUCAS 12:56 - Chatino Tataltepec

⁵⁶ ¡Cuiñi tsa cu'ma̱! Nchca ji'i̱ ma̱ ña'a̱ ma̱ sca na nu ndyaca nde chalyuu, masi sca na nu ndyaca nde cua̱; cua nslo ma̱ ji'i̱ cha' bi'. ¿Ni cha' laca ná nchca ca tii ma̱ tsiya' ti na ca ndyaca jna' nde chalyuu juani? ―nacui̱ Jesús ji'i̱ ngu'.

SAN LUCAS 12:56 Referans Kwoze

SAN MATEO 16:3

Lo'o ndi'ya̱ nchcui' ma̱ nde tlya lo'o ña'a̱ ma̱ nde cua̱: “Ca'ya tyo juani cha' lye xi ña'a̱ coo cua̱, ngata tsa ña'a̱ coo”, nacui̱ ma̱. ¿Ni cha' laca, cha' jlo tsa ti' ma̱ ñi'ya̱ caca sca tsa̱ nu lo'o ña'a̱ ti ma̱ nde cua̱? Pana ná jlo ti' ma̱ tsiya' ti ñi'ya̱ caca ji'i̱ cu'ma̱ ngu' nasiyu̱ re tyempo juani.

SAN MATEO 11:25

Lo'o li' nchcui' Jesús lo'o ycui' Ndyosi Sti yu: ―Cua'ni tlyu na' jinu'u̱, Sti na'; la cui' nu'u̱ laca Xu'na ya, masi nde cua̱, masi nde chalyuu ―nacui̱ Jesús ji'i̱ ycui' Ndyosi―. Tsa xlya'be hi̱ cha' cua ngua'ni nu'u̱ cha' ngua cuayá' ti' ñati̱ nu ná jlo tso'o ti' nquicha'; pana xa' ñati̱ ñi'ya̱ nti' ngu' tii, ná nchca cuayá' ti' ngu' bi' cha' jinu'u̱. Masi ngu' nu nchca tsa ji'i̱, masi ngu' nu jlo tsa ti' lcaa cha' jinu'u̱ nti' ngu', pana ná nchca cuayá' ti' ngu' bi'.

GÁLATAS 4:4

Pana lo'o cua ndyalaa tsa̱ nu ndu'u scua cha' nu ngüiñi ji'i̱ Ni lo'o na, li' cua nda ycui' Ndyosi ji'i̱ Sñi' ycui' ca Ni ñaa chalyuu; sñi' sca nu cuna'a̱ ngu' judío ngua nu Jesús bi', lo'o jua'a̱ ndaquiya' tsa yu ji'i̱ lcaa cha' cusu' nu jlya ti' ngu' judío.

SAN MATEO 6:2

Lo'o xtyucua ma̱ ji'i̱ ngu' ti'i ni, ná ntsu'u cha' cacha' ma̱ cha' bi' ji'i̱ xa' ñati̱. Ná cua'ni ma̱ ñi'ya̱ nu ndu'ni ngu' nu tucua cha' ntsu'u tyiquee ngu', nu nti' tsa cha' ña'a̱ xa' ñati̱ ji'i̱; nu lo'o nxtyucua ngu' bi' ji'i̱ ngu' ti'i, masi ne' laa ji'i̱ ngu' judío tya'a na, masi to' calle ti, sca ti nti' ngu' bi' cha' tso'o tsa chcui' ñati̱ ji'i̱. Ná cua'ni ma̱ jua'a̱. Cha' liñi nchcui' na' lo'o ma̱: lcaa cha' tso'o nu tyacua ji'i̱ ngu' bi' ca slo ycui' Ndyosi nquicha', cua laca ngujui cha' bi' ji'i̱ ngu' bi' nu lo'o cua na'a̱ xa' ñati̱ ti ji'i̱ ngu'.