SAN LUCAS 11:49 - Chatino Tataltepec

⁴⁹ ’Tii tsa ycui' Ndyosi, bi' cha' ndi'ya̱ nchcui' Ni tya sa'ni la: “Tya culo na' cña ji'i̱ ngu' cha' ca̱a̱ ngu' slo ñati̱ chalyuu. Chcui' ngu' bi' cha' liñi lo'o xa' ñati̱ cuentya 'na. Lo'o li' cujuii ñati̱ chalyuu ji'i̱ tyu̱u̱ tya'a ngu' bi', jua'a̱ cua'ni lya' ti' ñati̱ ji'i̱ xa' la ngu' bi'”, nacui̱ quityi ji'i̱ ycui' Ndyosi bi'.

SAN LUCAS 11:49 Referans Kwoze

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

COLOSENSES 2:3

Xqui'ya cha' ngusñi na cha' ji'i̱ Cristo, bi' cha' taca quijeloo cha' ji'na macala su ntucua quiya' lcaa cha' nu ntsu'u tyiquee ycui' Ndyosi, masi lcaa cha' nu nda'ya hique Ni cha' cua'ni Ni nde chalyuu.

EFESIOS 4:11

Xqui'ya cha' tyu̱u̱ lo cha' tso'o nda Jesús lo'o ñati̱ chalyuu, bi' cha' taca cua'ni ñati̱ cña nu nda Ni ji'i̱ ngu' cha' cua'ni ngu': clyo cua ngua'a̱lo Cristo cña ji'i̱ la cui' ñati̱ nu ngua tsa'a̱ ji'i̱ yu; lo'o jua'a̱ cua nda Ni cña ji'i̱ ngu' cha' caca chcui' ngu' na laca nu cua cua'ni ti ycui' Ndyosi chalyuu; lo'o xa' la ñati̱ ji'i̱ Ni ntsu'u cña ji'i̱ cha' cacha' liñi ji'i̱ ñati̱ ñi'ya̱ caca clyaá ngu' ji'i̱ nu cuxi; lo'o jua'a̱ ngua'a̱lo Ni cña ji'i̱ ñati̱ nu caca loo ji'i̱ tya'a, cha' caca ngu' bi' mstru, cha' culu'u ngu' bi' cha' ji'i̱ ycui' Ndyosi ji'i̱ tya'a ngu'.

1 CORINTIOS 1:24

Pana xa' ña'a̱ nti' lcaa tya'a na nu cua ngusubi ycui' Ndyosi ji'na, masi laca na ngu' judío, masi laca na ngu' xa' tsu'. Sca ti cha' ji'i̱ Cristo nchcui' na, cha' ji'i̱ ycui' Cristo ntsu'u lcaa chacuayá', lcaa cha' tso'o nu cua nti' ycui' Ndyosi cha' caca cuayá' ti' na.

LOS HECHOS 22:20

Nu lo'o ngu̱ ngu' quee ji'i̱ Esteban, ndyalú tañi yu; ndyujuii ngu' ji'i̱ yu xqui'ya cha' liñi nchcui' yu cha' jinu'u̱ lo'o ngu'. Lo'o na' ni, stu'ba ti ndu̱ na' lo'o ngu' bi' li', nguna'a̱si̱i̱ na' ste' ngu' nu ndyujuii ji'i̱ yu. Tso'o nti' na' tyempo bi', nu lo'o na'a̱ na' cha' cua ngujuii yu bi'.” Jua'a̱ nchcui' na' lo'o ycui' Ndyosi ne' laa bi'.

LOS HECHOS 8:3

Lo'o nu Saulo bi' ni, ngua ti' yu cha' lye tsa xcube' yu ji'i̱ lcaa ñati̱ ji'i̱ Jesucristo li'. Ndyatí̱ yu ca ni'i̱ ji'i̱ ngu', ntejeya' yu ji'i̱ ngu' qui'yu bi', ntejeya' yu ji'i̱ ngu' cuna'a̱ bi', cha' tyaa lo'o yu ji'i̱ ngu' ne' chcua̱.

LOS HECHOS 7:57

Cui̱i̱ tsa ngusi'ya ngu' li', ndacu̱' ngu' jyaca̱ ngu' cha' nga'aa nti' ngu' cuna ngu' cha' nu nchcui' Esteban.

LOS HECHOS 1:8

Juani xa' chcui' na' lo'o ma̱, cha' caja ñi'ya̱ cua'ni ma̱ nu lo'o tyanu Xtyi'i ycui' Ndyosi ne' cresiya ji'i̱ ma̱, cha' li' taca chcui' ma̱ cha' tso'o lo'o lcaa ñati̱, nu cha' ji'i̱ ycui' na'. Chcui' ma̱ lo'o ngu' nde quichi̱ Jerusalén, jua'a̱ lo'o ngu' loyuu su cuentya Judea, jua'a̱ lo'o ngu' loyuu cacua ti nu naa Samaria bi'; chcui' ma̱ lo'o ngu' lcaa quichi̱ su ndi'i̱ ngu' chalyuu.

SAN JUAN 16:2

masi ná ta ngu' chacuayá' ji'i̱ ma̱ cha' tsaa ma̱ ne' laa ji'i̱ ngu' li' ―nacui̱ Jesús―. Tyalaa sca tyempo nu culacua ti' ngu' cha' cña tacati cua'ni ngu' si cujuii ngu' ji'i̱ ngu' tya'a ma̱.

SAN LUCAS 24:47

Li' ntsu'u cha' ta ngu' cha' ji'i̱ ycui' na' lo'o ñati̱ tyucui ña'a̱ chalyuu. Nde Jerusalén xana ma̱ cacha' ma̱ cha' bi' ji'i̱ ngu' clyo. Nga'a̱ cha' chcui' ma̱ lo'o ñati̱ cha' ca tyuju'u ti' ngu' ji'i̱ cha' cuxi nu ntsu'u tyiquee ngu', cha' xtyanu ngu' ji'i̱ cha' cuxi nu ndu'ni ngu'; li' cua'ni clyu ti' ycui' Ndyosi ji'i̱ lcaa qui'ya nu ntsu'u ji'i̱ ngu'.

SAN MATEO 22:6

Lo'o jua'a̱ xi xa' la ñati̱ bi' ni, ndaya' ngu' ji'i̱ msu bi', nxtyí lo'o ngu' ji'i̱ msu bi'; cuati jua'a̱ ntsu'u su ngujui'i̱ ngu' ji'i̱ msu bi' ña'a̱ cuayá' nu ndyujuii ngu' ji'i̱.

SAN LUCAS 11:48

Lo'o jua'a̱ caca cuayá' ti' na cha' sca ti cuayá' cha' cuxi nu ntsu'u tyiquee ma̱ lo'o jyo'o cusu' tya'a ma̱; na cua ndyujuii jyo'o cusu' bi' ji'i̱ ñati̱ nu ngua'ni cña ji'i̱ ycui' Ndyosi cua sa'ni la, lo'o juani cu'ma̱ laca nu ndiña ma̱ ni'i̱ hique cuaá su ntsiya ngu' jyo'o nu ngua tu'ba ji'i̱ ycui' Ndyosi bi'.

LOS HECHOS 11:27

Tyempo bi' ndyalaa tucua sna la tya'a ñati̱ nu ngua tu'ba ji'i̱ ycui' Ndyosi. Ndu'u ngu' quichi̱ Jerusalén ndyalaa ngu' quichi̱ Antioquía li'.

APOCALIPSIS 16:6

Tya ndyi'u ti' nu'u̱ ñi'ya̱ ngua lo yuu tya sa'ni la, nu lo'o cua ndyujuii ngu' ji'i̱ ñati̱ jinu'u̱; cua ndyujuii ngu' bi' ji'i̱ tyu̱u̱ tya'a ñati̱ nu ngua tu'ba jinu'u̱ cha' nchcui' nu'u̱ lo'o ñati̱. Lo'o juani la cui' ñi'ya̱ nu ngua'ni ngu' tya li', la cui' jua'a̱ nda nu'u̱ cha' ti'í ji'i̱ ngu', cha' tyi'u ti' ngu' ji'i̱ jyo'o nu cua ndyujuii ngu' ji'i̱ tya sa'ni la.

APOCALIPSIS 18:20

Pana cacha' na' ji'i̱ ma̱ juani, cu'ma̱ nu ndi'i̱ ca su ntucua ycui' Ndyosi nde cua̱, cua'ni ma̱ cha' ca chaa tsa ti' ma̱ lo'o tyalaa hora cati̱ quichi̱ bi'; lo'o jua'a̱ cu'ma̱ ñati̱ chalyuu nu ntsu'u cha' ji'i̱ ma̱ lo'o ycui' Ndyosi, lo'o cu'ma̱ ñati̱ nu ngua'a̱loo Ni ji'i̱ ma̱ cha' cua'ni ma̱ cña ji'i̱ Ni, lo'o cu'ma̱ nu laca ma̱ tu'ba ji'i̱ ycui' Ndyosi cha' nchcui' Ni lo'o ñati̱, cua'ni ma̱ cha' ca chaa tsa ti' ma̱ cha' liñi tsa ndu'ni Ni lo'o xcube' Ni ji'i̱ ngu' quichi̱ bi', xqui'ya cha' xña'a̱ tsa ngua'ni ngu' bi' lo'o ma̱.