SAN LUCAS 11:15 - Chatino Tataltepec

¹⁵ Pana ntsu'u ngu' nu nchcui' ndi'ya̱: ―Nclyo nu qui'yu cua ji'i̱ cui'i̱ cuxi chacuayá' ji'i̱ Beelzebú, nu laca xu'na lcaa lo cui'i̱ cuxi ―nacui̱ ngu'.

SAN LUCAS 11:15 Referans Kwoze

SAN MATEO 9:34

Pana xa' ña'a̱ nchcui' ngu' fariseo bi': ―Na nclyo nu Jesús jua ji'i̱ cui'i̱ cuxi nu ngusñi ji'i̱ ngu' xqui'ya nu xu'na cuiñaja nu nda chacuayá' cha' cua'ni yu jua'a̱ ―nacui̱ ngu' fariseo bi'.

SAN JUAN 10:20

Ntsu'u tsa ngu' nu nacui̱ ndi'ya̱: ―Ñi'ya̱ nti' sca nu xña'a̱, jua'a̱ nti' yu cua. Na tonto yu. Ná ntsu'u cha' cuna na cha' nu nchcui' yu cua.

SAN JUAN 8:52

Li' xa' nchcui' ngu' judío bi' lo'o Jesús chaca quiya': ―Juani jlo ti' ya cha' ñi'ya̱ nti' sca nu xña'a̱, jua'a̱ nti' nu'u̱ ―nacui̱ ngu'―. Sa'ni ngujuii jyo'o Abraham, sa'ni ngujuii nu xa' la jyo'o cusu' nu nda cha' ji'i̱ ycui' Ndyosi lo'o ñati̱. ¿Ñi'ya̱ nti' nu'u̱ lo'o nacui̱ ca ti nu'u̱: “Ná nga'a̱ cha' tye chalyuu ji'i̱ ñati̱ nu taquiya' ji'i̱ cha' nu nclyu'u na' ji'i̱”? ―nacui̱ ngu'―.

SAN JUAN 8:48

Li' nguxtyacui ngu' judío cha' lo'o Jesús: ―Liñi cha' nu nchcui' ya jinu'u̱ juani, cha' ngu' Samaria laca nu'u̱. Ñi'ya̱ nti' sca nu xña'a̱, jua'a̱ nti' nu'u̱ ―nacui̱ ngu' li'.

SAN JUAN 7:20

―Ñi'ya̱ nti' sca nu xña'a̱, jua'a̱ nti' nu'u̱ ―ndu'ni ngu' ji'i̱ Jesús li'―. ¿Tilaca nti' cujuii jinu'u̱ lacua?

SAN MATEO 10:25

Sca ti cuayá' cha' ti'í caca ji'i̱ ngu' cuañi' bi' li', ñi'ya̱ nu ndyaca ji'i̱ mstru ji'i̱ ngu'; sca ti cuayá' cña ti'i̱ caca ji'i̱ msu bi' li', ñi'ya̱ nu ndyaca ji'i̱ xu'na ngu'. Bi' cha' taca ca cuayá' ti' ma̱ cha' ti'í tsa chcui' ngu' ji'i̱ ma̱ nu ntsu'u cha' ji'i̱ ma̱ lo'o na', cha' laca̱ nu Xu'na ma̱; cua nchcui' ngu' cha' Beelzebú nu xu'na cuiñaja laca na'.

SAN MATEO 4:24

Li' nguañi cha' ji'i̱ Jesús lcaa quichi̱, hasta ca nde loyuu Siria nguañi cha' ji'i̱ yu; bi' cha' ñaa lo'o ngu' ji'i̱ lcaa ngu' quicha slo ycui' yu, cha' cua'ni yu jo'o ji'i̱ ngu'. Ñaa lo'o ngu' ji'i̱ nu quicha, masi ti'í tsa ngu' xqui'ya quicha nu ntsu'u ji'i̱ ngu'; ñaa lo'o ngu' ji'i̱ ngu' nu ntsu'u cui'i̱ cuxi ji'i̱ ngu', masi nxalú cui'i̱ ji'i̱ ngu', masi nchcu̱' tyucuí̱ tyucui ña'a̱ ngu', masi nchcuti sca tsu' ya' ngu'. Lo'o li' ngua'ni Jesús cha' ndyaca tso'o lcaa ngu' quicha bi'.

SAN MATEO 12:22

Lo'o li' ndyaa lo'o ngu' ji'i̱ chaca nu quicha slo Jesús; cua ngusñi cui'i̱ xña'a̱ ji'i̱, bi' cha' ngua cu'u̱ tu'ba yu, jua'a̱ ngua cuityi̱' yu. Hora ti ngua'ni Jesús jo'o ji'i̱ nu quicha bi', cha' xa' nchcui' yu, xa' nda Jesús xee ndyu'u cloo yu.