SAN JUAN 8:39 - Chatino Tataltepec

³⁹ Li' nguxtyacui ngu' cha' lo'o Jesús: ―Jyo'o Abraham bi' ngua jyo'o cusu' ji'i̱ ya, nu nguti'i̱ cua sa'ni la ―nacui̱ ngu'. ―Si chañi cha' laca ma̱ tya'a ñati̱ ji'i̱ jyo'o Abraham bi', li' cua'ni ma̱ ñi'ya̱ nu ngua'ni ycui' Abraham bi' ―nacui̱ Jesús ji'i̱ ngu' bi'―.

SAN JUAN 8:39 Referans Kwoze

GÁLATAS 3:7

Lo'o jua'a̱ nga'a̱ cha' ca cuayá' ti' ma̱ cha' cua ña'a̱ ca ñati̱ nu ngusñi cha' ji'i̱ Cristo, chañi cha' laca ñati̱ bi' ñi'ya laca ngu' judío, cha' ndyu'ni ngu' bi' la cui' ñi'ya̱ nu ngua'ni jyo'o Abraham, masi tyempo juani.

ROMANOS 9:7

Lo'o jua'a̱ si'i cua ña'a̱ ca ñati̱ tya'a ji'i̱ jyo'o Abraham nu chañi ca laca ngu' judío. Ná stu'ba ngua'ni jyo'o Abraham lo'o lcaa sñi' yu, cha' cua nda ycui' Ndyosi cha' lo'o yu tya tsubi' la ndi'ya̱: “Sca ti sñi' nu'u̱, nu Isaac ni, ji'i̱ bi' tucuá na' cha' ji'i̱; jua'a̱ tucuá na' cha' ji'i̱ lcaa ñati̱ nu tyu'ú ji'i̱ yu tyempo nde loo la”, nacui̱ ycui' Ndyosi ji'i̱ Abraham.

SAN JUAN 8:37

Cua jlo ti' na' cha' tya'a ñati̱ ji'i̱ jyo'o Abraham laca cu'ma̱, pana cua nti' ma̱ cujuii ma̱ jna' cha' ná ntucuá ma̱ cha' nu nchcui' na' lo'o ma̱ ―nacui̱ Jesús―.

SAN MATEO 5:45

Li' taca tyuloo ñati̱ ji'i̱ ma̱ cha' laca ma̱ sñi' ycui' Ndyosi nu ntucua nde cua̱. Ndu'ni Ni cha' stu'ba ti tyucua cuichaa, masi ca su ndi'i̱ ñati̱ cuxi, masi ca su ndi'i̱ ñati̱ tso'o; ndu'ni Ni cha' stu'ba ti ca'ya tyo, masi ca su ndi'i̱ ñati̱ tso'o, masi ca su ndi'i̱ ñati̱ cuxi. Bi' cha' tso'o la si stu'ba ti cua'ni ma̱ lo'o lcaa ñati̱.

SAN MATEO 3:9

Ná culacua ti' ma̱ cha' caca tso'o ji'i̱ ma̱ slo ycui' Ndyosi si xcui' ndyi'u ti' ma̱ ji'i̱ jyo'o cusu' ji'i̱ ma̱, nu cusu' Abraham bi'. Ná talo ycui' Ni ji'i̱ cha' cuxi nu ndu'ni ma̱ tsiya' ti, masi ñati̱ tya'a ji'i̱ jyo'o Abraham laca ma̱, nchcui' ma̱. Na cuiñi ma̱. Si nti' ycui' Ndyosi, taca ji'i̱ Ni cuiñá Ni ji'i̱ ñati̱ tya'a ji'i̱ jyo'o Abraham, masi lo'o quee to' sta'a̱ re, taca ji'i̱ Ni si nti' Ni. Nga'aa taquiya' Ni ji'i̱ cu'ma̱ li'.

GÁLATAS 3:29

Nu lo'o ngusñi na cha' ji'i̱ ycui' Cristo, li' la cui' jua'a̱ laca na ñati̱ nu ndyu'u ji'i̱ jyo'o Abraham, masi tiya' la ñaa na chalyuu. Su cua ndye, li' tyanu cha' ji'na, lcaa ña'a̱ cha' nu cua ngüiñi ji'i̱ ycui' Ndyosi lo'o nu Abraham bi' cua sa'ni la cha' tyacua ji'na.

ROMANOS 4:16

Ngüiñi cha' ji'i̱ Ni lo'o jyo'o Abraham lo'o ngusñi ti yu cha' ji'i̱ Ni, cha' caca cuayá' ti' lcaa na cha' xcui' cha' tso'o ntsu'u tyiquee Ni; bi' cha' nda Ni cha' bi' lo'o na. Ndyanu cha' bi' ji'i̱ lcaa ñati̱ ji'i̱ Abraham nu cala chalyuu ca nde loo la. Ni si'i tsa lo cua ti ñati̱ nu taquiya' ji'i̱ cha' cusu' ti laca nu tyanu cha' tso'o bi' ji'i̱, la cui' jua'a̱ tyanu cha' bi' ji'i̱ lcaa ñati̱ tya'a na nu xñi na cha' ji'i̱ ycui' Ndyosi ñi'ya̱ ngusñi ycui' Abraham cha' ji'i̱ Ni; jua'a̱ nti' na lo'o nacui̱ na cha' sti lcaa na ngua jyo'o Abraham bi' cuentya ji'i̱ ycui' Ndyosi.

ROMANOS 4:12

La cui' jua'a̱ laca tyiquee ngu' judío tya'a na nu stu'ba ti ngusñi cha' ji'i̱ Jesucristo lo'o na. Chañi cha' Abraham ngua jyo'o cusu' ji'i̱ ngu'; pana tso'o la cha' jlya ti ti' ngu' ji'i̱ ycui' Ndyosi, ñi'ya̱ jlya ti' nu jyo'o Abraham bi', masi tya lyiji clyacua̱ yu.

SAN JUAN 8:33

―Ñati̱ ji'i̱ jyo'o Abraham laca ya ―nacui̱ ngu' judío bi'―, ni sca ñati̱ bilya tatsaa ji'i̱ ya cha' cua'ni ya cña cuxi. ¿Ñi'ya̱ nti' ta nu'u̱ lo'o nacui̱ nu'u̱ cha': “Nga'aa tatsaa ngu' ji'i̱ ma̱ cha' cua'ni ma̱ cña cuxi ca su ndi'i̱ ma̱”? ―nacui̱ ngu' judío bi' ji'i̱ Jesús.

SAN JUAN 8:43

¿Ni cha' laca ná ndaca'a̱ jyaca̱ ma̱ ji'i̱ cha' nu nchcui' na' lo'o ma̱? ―nacui̱ Jesús ji'i̱ ngu' li'―. Ná nchca ji'i̱ ma̱ tsiya' ti caca cuayá' ti' ma̱ cha' nu nda na' lo'o ma̱ ―nacui̱ yu ji'i̱ ngu' judío bi'―.

SAN JUAN 8:56

Nu Abraham jyo'o cusu' ji'i̱ ma̱ ni, lye tsa ngua ti' yu ña'a̱ yu jna' lo'o cala na' chalyuu. Lo'o li' ndi'ya̱ ngua, cha' cua na'a̱ nu cusu' jna', tso'o tsa ndyu'u tyiquee yu li'.