SAN JUAN 7:1 - Chatino Tataltepec

¹ Tiya' la li' xcui' nde loyuu su cuentya Galilea ndya'a̱ Jesús; nga'aa ndya'a̱ yu loyuu su cuentya Judea bi', cha' nti' tsa ngu' bi' cujuii ngu' ji'i̱.

SAN JUAN 7:1 Referans Kwoze

SAN JUAN 4:3

Nu lo'o ngua cuayá' ti' Jesús cha' cua ndyuna ngu' fariseo cha' bi', li' ndu'u yu nde loyuu su cuentya Judea, ndyaa yu chaca quiya' ca loyuu su cuentya Galilea bi' li'.

SAN MATEO 21:38

Pana na'a̱ ti ngu' bi' ji'i̱ sñi' nu culiya' bi', li' nchcui' ngu' lo'o tya'a̱ ngu': “Sñi' ycui' ndyalaa juani”, nacui̱ ngu' ji'i̱ tya'a ngu'. “Nu cua caca xu'na yaca si'yu re nde loo la, bi' cha' tso'o la si cujuii na ji'i̱ yu, cha' tyanu lo'o re cuentya ji'na”, nacui̱ ngu' bi'.

SAN JUAN 7:19

’¿Ha si'i la cui' jyo'o cusu' Moisés nu ngulu'u ji'na cha' cua'ni na lcaa cña nu nti' ycui' Ndyosi? Pana ná ndaquiya' ma̱ tsiya' ti ji'i̱ cha' bi' ―nacui̱ Jesús―. Lo'o nu juani nti' ma̱ cujuii ma̱ jna'. ¿Ni cha' laca bi'?

SAN MATEO 10:23

Tso'o xna ma̱ nde xa' quichi̱ nu lo'o lye tsa cua'ni lya' ti' ngu' ji'i̱ ma̱. Cha' liñi nchcui' na' lo'o ma juani: Bilya ta ma̱ cha' 'na lo'o ngu' Israel tya'a na nde lcaa quichi̱ tyi ngu' nu lo'o ca̱a̱ na' chalyuu chaca quiya', na' nu cua nda Ni 'na lijya̱a̱ cha' caca na' ñati̱.

LOS HECHOS 10:38

Jlo ti' ma̱ ñi'ya̱ nguti'i̱ Jesús chalyuu, la cui' Jesús Nazaret. Cua ngusubi ycui' Ndyosi Sti yu ji'i̱ Jesús, nda la Ni juersa ji'i̱ nu Jesús bi' nu lo'o ndyalaa Xtyi'i ycui' Ni lo yu. Lcaa su nguta'a̱ yu ngua'ni yu cha' tso'o lo'o ñati̱, lo'o jua'a̱ ngua'ni yu cha' ndyaca tso'o ngu' nu quicha tsa, masi ñati̱ nu ntsu'u tsa cha' ti'í ji'i̱ xqui'ya cha' ngusñi cui'i̱ cuxi ji'i̱ ngu'. Ngua'ni Jesús cña jua'a̱, cha' nguxtyucua ycui' Ndyosi ji'i̱ yu.

SAN JUAN 4:54

Cua ngua tucua quiya' nu ngua'ni Jesús sca cña tonu cuentya ji'i̱ ycui' Ndyosi nde loyuu su cuentya Galilea bi', tya lo'o nguxtyu̱u̱ yu nde Galilea.

SAN JUAN 1:19

Nda Juan cha' lo'o tyu̱u̱ tya'a sti jo'ó lo'o ngu' xirta; ngutu'u ngu' nde quichi̱ Jerusalén, ndyalaa ngu' su ndi'i̱ nu Juan bi' li'. Cua ngulo ngu' judío nu ndi'i̱ ca bi' cña ji'i̱ ngu' bi', cha' ca̱a̱ ngu' slo Juan cha' xcuane ngu' ji'i̱ Juan tilaca laca.

SAN JUAN 8:40

Pana juani nti' tsa ma̱ cujuii ma̱ jna', masi xcui' cha' liñi nclu'u na' ji'i̱ ma̱, la cui' cha' liñi nu nda ycui' Ndyosi lo'o na.

SAN JUAN 8:37

Cua jlo ti' na' cha' tya'a ñati̱ ji'i̱ jyo'o Abraham laca cu'ma̱, pana cua nti' ma̱ cujuii ma̱ jna' cha' ná ntucuá ma̱ cha' nu nchcui' na' lo'o ma̱ ―nacui̱ Jesús―.

SAN JUAN 7:25

Lo'o ndyuna xi ngu' quichi̱ Jerusalén cha' bi', li' nguxana nchcui' ngu' ji'i̱: ―Nu ñati̱ jua, ¿ha si'i na nclyana ngu' ji'i̱ yu cha' cujuii ngu' ji'i̱? ―nacui̱ ngu'―.

SAN MARCOS 11:18

Ndyuna sti jo'ó nu laca loo cha' bi', jua'a̱ ndyuna mstru cha' jo'ó. Na'a̱ ngu' cha' quiña'a̱ tsa ñati̱ ndaquiya' ngu' ji'i̱ cha' nu nclyu'u Jesús ji'i̱ ngu', bi' cha' ntsi̱i̱ nu ngu' tlyu bi' si caca tlyu la Jesús; ngua ti' nu ngu' tlyu bi' si caja ñi'ya̱ caca cujuii ngu' ji'i̱ Jesús li'.

SAN JUAN 6:1

Tiya' la li' ndu'u Jesús ndyaa nde chaca tsu' tayu' Galilea, la cui' tayu' Tiberias naa tayu' bi'.

SAN JUAN 7:11

Lo'o ndyaca ta'a bi', li' ndya'a̱ ngu' judío ndya'a̱na ngu' ji'i̱ yu: ―¿Macala ndya'a̱ yu bi'? ―ndu'ni ngu'.

SAN JUAN 7:13

Pana ntsi̱i̱ ngu' si cuna ngu' judío cha' nu nchcui' ngu', bi' cha' cuaana ti nchcui' ngu' lo'o tya'a ngu'.

SAN JUAN 7:35

―¿Macala tsaa yu jua, su ná taca quije yu ji'na? ―nacui̱ nu ngu' judío bi' ji'i̱ tya'a ngu'―. ¿Ha tsaa yu tyijyu' la ca su ndi'i̱ xa' la ngu' judío tya'a na? ¿Ha tsaa yu cha' culu'u yu cha' ji'i̱ ycui' Ndyosi ji'i̱ xa' ñati̱ nu ndi'i̱ ca bi'? ―nacui̱ ngu'―.