SAN JUAN 6:46 - Chatino Tataltepec

⁴⁶ ’Ná nacui̱ na' cha' cua na'a̱ ñati̱ chalyuu ji'i̱ Sti na' ―nacui̱ Jesús―. Bilya. Sca ti na' cua na'a̱ na' ji'i̱ ycui' Ni, cha' cua ngutu'u na' ca slo Ni.

SAN JUAN 6:46 Referans Kwoze

SAN JUAN 1:18

Ni sca ñati̱ ná na'a̱ ngu' ji'i̱ ycui' Ndyosi; sca ti Jesús nu ngulu'u ji'na ñati̱ chalyuu na ñi'ya̱ laca ycui' Ndyosi. Lo'o nu Jesús bi' ni, laca yu nu sca ti Sñi' ycui' Ndyosi, nu tyaca'a tsa ji'i̱ Ni.

SAN JUAN 7:29

Nslo na' ji'i̱ ycui' Ni, cha' ca slo Ni ngutu'u na' lijya̱a̱; ycui' Ni laca nu ngulo cña 'na cha' ca̱a̱ na' ca nde.

SAN LUCAS 10:22

Li' nchcui' yu lo'o ngu' nu ndyaa cuentya ji'i̱ yu bi': ―Cua nda Sti na' lcaa na jna'. Ná tucui jlo ti' cha' laca na' Sñi' ycui' Ni; sca ti ycui' Sti na', bi' nu jlo ti'. Ná tucui jlo ti' tilaca laca ycui' Sti na'; sca ti na', jlo ti' na' tilaca laca Ni. Lo'o jua'a̱ ca jlo ti' xi xa' la ñati̱ nu nti' na' cha' culu'u na' ji'i̱ ngu' tilaca laca ycui' Sti na', ca cuayá' ti' ngu' bi' li'.

SAN MATEO 11:27

Lo'o li' tya ngulu'u la Jesús xi ji'i̱ ngu': ―Lcaa chacuaya' ji'i̱ Sti na' ndyanu ya' na'. Ni sca ñati̱ ná jlo ti' ñi'ya̱ laca cha' nu ntsu'u ne' cresiya 'na nu laca̱ Sñi' ycui' Ni; sca ti ycui' Ndyosi Sti na' jlo ti' ñi'ya̱ laca cha' nu ntsu'u ne' cresiya 'na. Lo'o jua'a̱, ni sca ñati̱ ná jlo ti' ñi'ya̱ laca cha' nu ntsu'u ne' cresiya ji'i̱ Sti na'; sca ti na' nu laca̱ Sñi' ycui' Ni jlo ti' na', lo'o jua'a̱ culu'u na' cha' bi' ji'i̱ ñati̱ nu subi na' ji'i̱ cha' ca tsa'a̱ ngu' 'na.

1 TIMOTEO 6:16

Ná ntsu'u cha' cajaa ycui' Ndyosi tsiya' ti, ná tye cha' ji'i̱ Ni. Ndubi tsa ña'a̱ xee ca su ntucua ycui' Ndyosi, ni ná ntsu'u ñati̱ nu caca tsaa ca slo Ni jua'a̱ ti xqui'ya xee tlyu bi'. La cui' jua'a̱ ná ntsu'u ñati̱ nu cua na'a̱ ji'i̱ ycui' Ndyosi, cha' ná nchca ña'a̱ ñati̱ ji'i̱ Ni nde chalyuu. Bi' cha' cua'ni chi̱ na loo ycui' Ndyosi lacua, cha' laca Ni nu tlyu la. Jua'a̱ laca cha' tu'ni.

1 JUAN 4:12

Ni sca ñati̱ chalyuu, bilya ña'a̱ ngu' ji'i̱ ycui' Ndyosi; pana taca ca cuayá' ti' na cha' stu'ba ntsu'u tyiquee na lo'o Ni juani, nu lo'o ña'a̱ na ji'i̱ lcaa na lo'o tya'a na, cha' ntsu'u tsa tyiquee na ña'a̱ na ji'i̱ tya'a ñati̱ na. Ñi'ya̱ ntsu'u tsa tyiquee Jesucristo ña'a̱ yu ji'i̱ ñati̱ chalyuu, jua'a̱ nga'a̱ cha' cua'ni na lo'o tya'a ñati̱ na li'.

COLOSENSES 1:15

Ná nchca ña'a̱ na ji'i̱ ycui' Ndyosi tsiya' ti; pana nu lo'o ya̱a̱ Cristo Sñi' ycui' Ni chalyuu, li' ngujui ñi'ya̱ nu ña'a̱ na ji'i̱ ycui' Ni. La cui' yu bi' laca nu nguti'i̱ tya clyo la lo'o ycui' Ndyosi, la cui' jua'a̱ laca yu loo ji'i̱ lcaa lo na nu ngüiñá Ni chalyuu.

SAN JUAN 15:24

Ná ntsu'u qui'ya ji'i̱ ngu' bi' clyo, pana juani ni, cua nguti'i̱ na' slo ngu' bi', cua ngua'ni na' cña nu ná caca ji'i̱ xa' ñati̱ cua'ni; cua na'a̱ ngu' lcaa ña'a̱ cña tonu nu ngua'ni na', bi' cha' liye' ti' ngu' ña'a̱ ngu' jna'. Lo'o jua'a̱ ji'i̱ Sti na' liye' ti' ngu' ña'a̱ ngu' ji'i̱ Ni, bi' cha' cua ndyanu yabe' hichu̱' ngu' bi' ―nacui̱ Jesús―.

SAN JUAN 8:55

masi ná ndyuloo ma̱ ji'i̱ Ni, pana jua'a̱ ndu'ni ma̱. Nslo na' ji'i̱ Ni tu'ni. Ná taca ñacui̱ na' cha' ná nslo na' ji'i̱ Ni; cuiñi na' si jua'a̱ ñacui̱ na', ñi'ya̱ laca cu'ma̱, cha' cuiñi tsa ma̱. Chañi cha' nslo na' ji'i̱ Ni, jua'a̱ ndaquiya' na' ji'i̱ lcaa cha' nu nchcui' Ni lo'o na' ―nacui̱ Jesús ji'i̱ ngu' judío bi'―.

SAN JUAN 8:19

―¿Macala ntsu'u Sti nu'u̱ lacua? ―nacui̱ ngu' ji'i̱ Jesús li'. ―Ná nslo ma̱ jna' tsiya' ti, lo'o la cui' ti ná nslo ma̱ ji'i̱ Sti na' ―nacui̱ Jesús ji'i̱ ngu'―. Si cua ndyuloo ma̱ jna', la cui' jua'a̱ cua ndyuloo ma̱ ji'i̱ Sti na' li'.

SAN JUAN 5:37

Jua'a̱ ngulu'u liñi Sti na' cha' 'na ji'i̱ ma̱, cha' la cui' Sti na' laca nu cua nda jna' lijya̱a̱. Lo'o cu'ma̱ ni, bilya cuna ma̱ cha' nu nchcui' Ni, bilya ña'a̱ ma̱ ji'i̱ ycui' Ni.

SAN JUAN 14:7

Ndyuloo ma̱ 'na, bi' cha' jua'a̱ cua ndyuloo ma̱ ji'i̱ Sti na' li'; cua ndyuloo ma̱ ji'i̱ Ni juani, cha' cua na'a̱ ma̱ ji'i̱ ycui' Ni nu lo'o cua na'a̱ ma̱ jna'.