SAN JUAN 21:16 - Chatino Tataltepec

¹⁶ Xa' nchcui' Jesús lo'o chaca quiya': ―Simón, sñi' Juan ―nacui̱―, ¿ha chañi cha' hi̱ cha' ntsu'u tyiquee nu'u̱ ña'a̱ 'na? ―Xu'na̱, cua jlo ti' nu'u̱ cha' ntsu'u tsa tyiquee na' ña'a̱a̱ jinu'u̱ ―nacui̱ Pedro ji'i̱ Jesús. ―Ña'a̱si̱i̱ nu'u̱ ji'i̱ ñati̱ 'na lacua ―nacui̱ Jesús ji'i̱ li'.

SAN JUAN 21:16 Referans Kwoze

LOS HECHOS 20:28

Nu juani ntsu'u cha' ña'a̱si̱i̱ ma̱ ji'i̱ ycui' ca ma̱, lo'o jua'a̱ ña'a̱si̱i̱ ma̱ ji'i̱ ca ta'a ñati̱ ji'i̱ Jesucristo ca quichi̱ tyi ma̱, cha' cua nda Xtyi'i ycui' Ndyosi cña ji'i̱ ma̱ cha' caca ma̱ loo ji'i̱ taju ñati̱ bi'. Tlyu tsa cña nu ngua'ni ycui' nu Xu'na na cha' ca ti̱ qui'ya nu ntsu'u ji'na tya lo'o ngujuii yu lo crusi, nu lo'o ndyalú tañi ycui' ca yu.

1 PEDRO 5:2

Ntsu'u cha' ña'a̱si̱i̱ tso'o ma̱ ji'i̱ lcaa ngu' tya'a ma̱, ña'a̱ taju ngu' tya'a ma̱ ca su laca ma̱ loo ji'i̱ ngu'. Ñi'ya̱ nti' xlya', jua'a̱ laca ngu' bi'; ñi'ya̱ nti' ñati̱ nu ña'a̱si̱i̱ ji'i̱ xlya', jua'a̱ laca na, ngu' cusu' tya'a na. Nga'a̱ cha' xtyucua na ji'i̱ ngu' tya'a na cha' tyanu tachaa la cha' ji'i̱ Cristo tyiquee ngu'. Tyucui tyiquee ma̱ cua'ni ma̱ cña bi', cha' jua'a̱ nti' ycui' Ndyosi cha' cua'ni na; ná tso'o si ntsu'u cha' tatsaa ngu' tya'a ma̱ ji'i̱ ma̱ cha' cua'ni ma̱ cña bi'. Lo'o jua'a̱ ná tso'o si quiña'a̱ tsa caya' xñi ma̱ ji'i̱ ngu' cha' cua'ni ma̱ cña bi', pana tso'o la si tyucui tyiquee ma̱ cua'ni ma̱ cña bi' cuentya ji'i̱ ycui' Ndyosi.

1 PEDRO 2:25

Lo'o juani nga'aa ndya'a̱ yu'u ti ma̱, ñi'ya̱ ndya'a̱ yu'u xlya'; na cua nguxtyu̱u̱ ma̱ ñaa ma̱ ca su nga'a̱ ycui' nu Xu'na ma̱ nu ña'a̱si̱i̱ ji'i̱ cresiya ji'i̱ ma̱.

HEBREOS 13:20

Ycui' Ndyosi laca nu ngua'ni cña cha' ndyu'ú Jesucristo nu Xu'na na chaca quiya' lo'o ngujuii. Lo'o juani laca Jesús loo, cha' ña'a̱si̱i̱ Ni ji'na nu laca na ñati̱ ji'i̱ Ni, xqui'ya cha' ngujuii Ni cuentya ji'na. Nu lo'o ngujuii Jesús, li' ngüiñi cha' ji'i̱ Ni lo'o lcaa ñati̱ ji'i̱ Ni, sca cha' cucui nu ná nga'a̱ cha' tye tsiya' ti.

SAN JUAN 18:25

Laja li' ndu̱ Pedro to' lquii' cha' caca chcatsu̱ ti'. Nchcui' nu xa' ñati̱ nu ndi'i̱ nde bi' lo'o Pedro li': ―¿Ha lo'o nu'u̱ ndyaca tsa'a̱ ji'i̱ yu jua? Ná ntaja'a̱ Pedro ta cha' liñi lo'o ngu'. ―Ná lo'o na' ―nacui̱.

SAN JUAN 18:17

Nacui̱ nu cuna'a̱ cua' nu ndu̱ toni'i̱ bi' ji'i̱ Pedro: ―¿Ha lo'o nu'u̱ ndyaca tsa'a̱ ji'i̱ yu jua lacua? ―nacui̱ nu cuna'a̱ bi' ji'i̱. ―Si'i na' ―nacui̱ Pedro.

SAN LUCAS 19:10

Cua nda Ni 'na lijya̱a̱ cha' caca na' ñati̱ cha' clyana na' ji'i̱ ñati̱ nu nguna' chalyuu ji'i̱ xqui'ya nu cuxi, lo'o jua'a̱ cua'ni lyaá na' ji'i̱ ngu' bi'.

SAN MATEO 26:72

Chaca quiya' lye tsa nchcui' Pedro, ngua'ni yu jura li': ―Ná nslo na' ji'i̱ nu qui'yu jua tsiya' ti ―nacui̱ Pedro ji'i̱ ngu' bi' li'.

SAN MATEO 25:32

Ntsu'u cha' tyu'u ti'i̱ se'i̱ ti lcaa ñati̱ tsiya' ti tyucui ña'a̱ chalyuu; ca slo ycui' na' tyu'u ti'i̱ ngu', cha' cua'ni cuayá' na' ji'i̱ ngu'. Li' sa'be tya'a na' ji'i̱ ngu'. La cui' ñi'ya̱ nu ndu'ni ñati̱ nu ña'a̱si̱i̱ ji'i̱ xlya', jua'a̱ cua'ni na'; sca tsu' tyi'i̱ ña'a̱ latya xlya' ji'i̱ ngu', chaca tsu' tyi'i̱ ña'a̱ latya chivo ji'i̱ ngu'.

SAN MATEO 2:6

Quichi̱ sube ti laca Belén nu ntsu'u loyuu su cuentya Judea, nacui̱ ycui' Ni. Pana quichi̱ tyi sca ngu' tlyu tsa caca, masi quichi̱ sube laca juani, nacui̱ Ni. Caca nu qui'yu tlyu bi' loo, lo'o jua'a̱ ña'a̱si̱i̱ yu ji'i̱ ngu' Israel 'na. Jua'a̱ nscua lo quityi bi'.

APOCALIPSIS 7:17

Ña'a̱si̱i̱ nu ñi'ya̱ ña'a̱ xlya' bi' ji'i̱ ngu', cha' ndi'i̱ Ni la cui' ca su ntucua ycui' Ndyosi loo; bi' laca nu tsalo'o ji'i̱ ngu' su caja hitya co'o ngu' cha' caja chalyuu cucui ji'i̱ ngu' li'. Lo'o jua'a̱ xquityi Ni hitya cloo ngu' cha' nga'aa cunaa ngu' li'.

SAN JUAN 21:17

Cua ngua sna quiya' nu nchcuane Jesús ji'i̱: ―¿Ha chañi hi̱ cha' ntsu'u tyiquee nu'u̱ ña'a̱ 'na? Cua xñi'i̱ ti' Pedro cha' cua sna quiya' nchcuane Jesús ji'i̱ si chañi cha' ntsu'u tyiquee ña'a̱ ji'i̱ yu, bi' cha' nchcui' ndi'ya̱: ―Lcaa ca cha' jlo ti' nu'u̱, Xu'na ―nacui̱ Pedro ji'i̱ yu―. Cua jlo ti' nu'u̱ cha' ntsu'u tsa tyiquee na' ña'a̱ na' jinu'u̱. ―Culu'u nu'u̱ cha' 'na ji'i̱ ñati̱ 'na lacua ―nacui̱ Jesús ji'i̱―.