SAN JUAN 14:27 - Chatino Tataltepec

²⁷ ’Ndi'ya̱ cua'ni na' lo'o ma̱ cha' cua tya'a ti na': cua'ni na' cha' ti̱ ti tyi'i̱ tyiquee ma̱. Ná nchca ji'i̱ ñati̱ chalyuu tyi'i̱ ti̱ ti ngu', pana ycui' na' cua'ni na' cha' ti̱ ti tyi'i̱ ma̱ ―nacui̱ Jesús―. Nga'aa culacua tsa ti' ma̱, nga'aa cutsi̱i̱ ma̱ ―nacui̱―.

SAN JUAN 14:27 Referans Kwoze

FILIPENSES 4:7

Lo'o li' cua'ni Ni cha' ti̱ ti tyi'i̱ tyiquee ma̱, masi ná caca cuayá' ti' ñati̱ chalyuu ni cha' laca ma̱ jua'a̱. Nga'aa ca'ya cha' cuxi hique ma̱ li', nga'aa caca cuxi cresiya ji'i̱ ma̱ li', xqui'ya cha' cua ngua stu'ba cha' ji'i̱ ma̱ lo'o Jesucristo.

SAN JUAN 16:33

Cua nda na' lcaa cha' bi' lo'o ma̱ cha' ti̱ ti tyi'i̱ tyiquee ma̱ xqui'ya na' ―nacui̱―. Nde chalyuu ti'í ti' ñati̱ ña'a̱ ji'i̱ ma̱. Pana ná cube ti' ma̱, cua'ni tlyu tyiquee ma̱; na' laca̱ loo nde chalyuu, cha' cua ntiji̱loo na' tsiya' ti ji'i̱ nu xña'a̱.

2 TESALONICENSES 3:16

Cua'ni ycui' nu Xu'na na lo'o ma̱ cha' ti̱ ti tyi'i̱ tyiquee ma̱ lcaa tsa̱, masi tsa̱ tso'o ji'i̱ ma̱, masi tsa̱ cuxi ji'i̱ ma̱, xqui'ya cha' lcaa hora ti̱ ti ndi'i̱ tyiquee ycui' Ni. Lo'o jua'a̱ tyanu ycui' nu Xu'na na lo'o ma̱ li'.

COLOSENSES 3:15

Ti̱ ti tyi'i̱ tyiquee ma̱ lacua, xqui'ya cha' ycui' Ndyosi laca loo ji'i̱ ma̱; cua ngusubi Ni ji'i̱ ma̱, jua'a̱ ji'i̱ xa' la tya'a ñati̱ ma̱, cha' caca ma̱ sca ti taju ñati̱ cuentya ji'i̱ ycui' Ni. Tso'o si lcaa hora tya ma̱ xlya'be ji'i̱ ycui' Ni xqui'ya lcaa lo cha'.

2 TIMOTEO 1:7

Ná nti' ycui' Ndyosi cha' cutsi̱i̱ na; bi' cha' nda Ni Xtyi'i ycui' Ni cha' tyanu ne' cresiya ji'na, cha' ca tlyu tyiquee na, cha' tso'o ti tyu'u tyiquee na ña'a̱ na ji'i̱ tya'a ñati̱ na, cha' taca cua'ni na ñi'ya̱ nu nti' ycui' Ndyosi cha' cua'ni na lcaa tsa̱.

ROMANOS 15:13

Bi' cha' juani nti' na' cha' cua'ni Ni cha' xñi tso'o la ma̱ cha' ji'i̱ ycui' Ni, cha' tso'o tsa caca tyiquee ma̱, cha' ti̱ ti taca tyi'i̱ tyiquee ma̱ li'. Nu lo'o tyanu Xtyi'i ycui' Ndyosi ne' cresiya ji'na, li' nga'aa caca taja ti' na lo'o ntajatya na ji'i̱ ycui' Ndyosi cha' ca̱a̱ Ni.

ROMANOS 8:6

Chcuna' chalyuu ji'na, si xcui' cua'ni na cha' cuxi nu ntsu'u nde chalyuu ti; pana caja chalyuu cucui ji'na cha' ti̱ ti tyi'i̱ tyiquee na, si taquiya' na ji'i̱ lcaa cha' nu nchcui' ycui' Ndyosi.

GÁLATAS 1:3

Nti' tsa na' cha' ña'a̱ ti tya cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ cresiya ji'i̱ ma̱ xqui'ya Jesucristo nu Xu'na na.

GÁLATAS 5:22

Xa' ña'a̱ cña ndu'ni Xtyi'i ycui' Ndyosi ne' cresiya ji'na: ndu'ni Ni cha' tyu'u tyiquee na ña'a̱ na ji'i̱ tya'a ñati̱ na; jua'a̱ ndu'ni Ni cha' chaa ti' na cuentya ji'i̱ Ni, cha' ti̱ ti tyi'i̱ tyiquee na, cha' talo tyiquee na ji'i̱ tya'a ñati̱ na; jua'a̱ ndu'ni Ni cha' ca tya'na ti' na ña'a̱ na ji'i̱ ñati̱, cha' xcui' tso'o ti cua'ni na lo'o ñati̱, cha' liñi ti cua'ni na lo'o ñati̱;

ROMANOS 5:1

Jua'a̱ laca lacua; xqui'ya cha' ngusñi ti na cha' ji'i̱ Jesús, bi' cha' cua ngua tso'o cresiya ji'na cuentya ji'i̱ ycui' Ndyosi. Lo'o li' ti̱ ti ndi'i̱ tyiquee na, stu'ba ti ntsu'u cha' ji'na lo'o ycui' Ndyosi xqui'ya Jesucristo nu Xu'na na.

SAN JUAN 14:1

’Ná quiña'a̱ tsa cha' culacua ti' ma̱ cuentya 'na ―nacui̱ Jesús ji'i̱ ngu' li'―. Cua ngusñi ma̱ cha' ji'i̱ ycui' Ndyosi, jua'a̱ xñi tso'o ma̱ cha' jna' li'.

ROMANOS 5:10

Tya'a cusu̱u̱ ycui' Ndyosi ngua na; pana juani ngua stu'ba cha' ji'na lo'o Ni, nu lo'o ngujuii Sñi' ycui' Ni lo crusi. Bi' cha' juani ngua ti̱ cha' ji'na lo'o ycui' Ndyosi, lo'o jua'a̱ cua'ni lyaá Ni ji'na xqui'ya cha' cua ndyu'ú nu Jesús bi' chaca quiya'.

SAN JUAN 20:21

Chaca quiya' nchcui' Jesús lo'o ngu' li': ―Ti̱ ti tyi'i̱ tyiquee ma̱, ná culacua tsa ti' ma̱ ―nacui̱ yu ji'i̱ ngu'―. Ñi'ya̱ lo'o nda Sti na' 'na lijya̱a̱ chalyuu, jua'a̱ ta na' ji'i̱ ma̱ cha' tsaa ma̱ tyucui ña'a̱ chalyuu.

COLOSENSES 1:20

cha' jua'a̱ ngua ti' Ni cua'ni Ni, cha' chaca quiya' caca Ni loo ji'i̱ tyucui ña'a̱ chalyuu xqui'ya yu bi'. Cua nguaala' cha' ji'i̱ ycui' Ndyosi lo'o ñati̱ chalyuu lo'o ngujuii Cristo lo crusi xqui'ya na; jua'a̱ ngua'ni yu cha' xa' caca tyucui ña'a̱ chalyuu cuentya ji'i̱ ycui' Ndyosi chaca quiya', masi nde lo yuu chalyuu, masi nde cua̱.

ROMANOS 1:7

Nscua na' quityi re cha' ca̱a̱ nde quichi̱ Roma ca su ndi'i̱ ma̱. Nda na' xlyo ni'i̱ ji'i̱ ma̱ cuentya ji'i̱ ycui' Ndyosi Sti na, cuentya ji'i̱ Jesucristo nu Xu'na na, cha' ntsu'u tsa tyiquee ycui' Ndyosi ña'a̱ Ni ji'i̱ ma̱. Cua ngusubi Ni ji'i̱ ma̱ cha' tyucui tyiquee ma̱ taca caca ma̱ ñati̱ ji'i̱ Ni. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na.

1 CORINTIOS 1:3

Ndi'ya̱ nti' na': cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na.

SAN JUAN 20:19

La cui' talya tsa̱ clyo ji'i̱ semana bi', cua nga'a̱ ya' ni'i̱ su ndyu'u ti'i̱ ngu' nu ngua tsa'a̱ ji'i̱ Jesús, cha' ntsi̱i̱ ngu' ji'i̱ ngu' judío. Li' ya̱a̱ Jesús, ndatu̱ slo ngu' bi'. ―Ti̱ ti tyi'i̱ tyiquee ma̱, ná culacua tsa ti' ma̱ ―nacui̱ yu ji'i̱ ngu' bi'.

2 TESALONICENSES 1:2

Ndi'ya̱ nti' ya, cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na laja lo'o ndi'i̱ ma̱ chalyuu.

LOS HECHOS 10:36

Cua nda ycui' Ndyosi cha' lo'o ya nu laca ya ngu' Israel, cha' ti̱ ti tyi'i̱ cresiya ji'i̱ ñati̱ chalyuu xqui'ya Jesucristo, nu laca Xu'na lcaa ñati̱.

SAN LUCAS 2:14

Cua'ni tlyu na ji'i̱ ycui' Ndyosi, masi ca bi' ca su tlyu su ntucua Ni, masi nde lo yuu chalyuu, cha' tlyu tsa laca ycui' Ni, nacui̱ ngu' xca̱ bi' li'. Cua'ni Ni cha' ti̱ ti tyi'i̱ tyiquee ñati̱ chalyuu lo'o ca cuayá' ti' ngu' cha' ntsu'u tsa tyiquee Ni ña'a̱ Ni ji'i̱ ngu', nacui̱ ngu' xca̱ li'.

SAN LUCAS 1:79

Li' ta Ni xee bi' cha' tyu'ú ne' cresiya ji'i̱ ngu' nu nga'aa ndyiji ñi'ya̱ cua'ni ngu', cha' talya tsa ña'a̱ ne' cresiya ji'i̱ ngu' bi'. Masi tya lu'ú ngu' bi', pana ñi'ya̱ nti' si na cua ngujuii nti' ngu', xqui'ya cha' cuxi nu ntsu'u ne' cresiya ji'i̱ ngu'. Culu'u Cristo ji'na ñi'ya̱ cua'ni na cha' tyi'i̱ ti̱ ti na lo'o tya'a na. Cua ndye cha' nu nda Zacarías li'.

HEBREOS 13:20

Ycui' Ndyosi laca nu ngua'ni cña cha' ndyu'ú Jesucristo nu Xu'na na chaca quiya' lo'o ngujuii. Lo'o juani laca Jesús loo, cha' ña'a̱si̱i̱ Ni ji'na nu laca na ñati̱ ji'i̱ Ni, xqui'ya cha' ngujuii Ni cuentya ji'na. Nu lo'o ngujuii Jesús, li' ngüiñi cha' ji'i̱ Ni lo'o lcaa ñati̱ ji'i̱ Ni, sca cha' cucui nu ná nga'a̱ cha' tye tsiya' ti.

LOS HECHOS 18:9

Lo'o li' cua na'a̱ Pablo ji'i̱ Jesús nu Xu'na na, ñi'ya̱ si na nchcui' xcalá yu ngua. ―Ná cutsi̱i̱ nu'u̱ ―nacui̱ Jesús ji'i̱ yu―. Ná ca taja ti' nu'u̱ cha' culu'u nu'u̱ cha' jna' ji'i̱ ñati̱ ―nacui̱ Ni―.

SAN MATEO 10:26

’Bi' cha' nacui̱ na' cha' ná cutsi̱i̱ ma̱ ji'i̱ ñati̱ chalyuu ti. Lcaa cha' nu ngua'ni ngu' cuaana ti, nti' ngu', quijeloo cha' bi' ji'i̱ ñati̱ nde loo la; lcaa cha' nu ntsu'u cuatsi' ti ji'i̱ ngu', nti' ngu', caca cuayá' ti' ñati̱ ji'i̱ cha' bi' nde loo la.

APOCALIPSIS 2:10

Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.

APOCALIPSIS 1:4

Juan laca na' nu nda̱ quityi re tsaa nde cati tya'a quichi̱ loyuu su cuentya Asia, ca su ndi'i̱ taju ñati̱ nu ngusñi cha' ji'i̱ Jesucristo. Nda na' xlyo ni'i̱ ji'i̱ ma̱ chacuayá' ji'i̱ ycui' Ndyosi Sti na, jua'a̱ chacuayá' ji'i̱ Xtyi'i ycui' Ndyosi, jua'a̱ chacuayá' ji'i̱ Jesucristo. Cua nti' na' cha' ña'a̱ ti cua'ni ycui' Ndyosi cha' tso'o lo'o ma̱, ña'a̱ ti cua'ni Ni cha' ti̱ ti tyi'i̱ tyiquee ma̱. Nu ngua tya clyo lu'ú ycui' Ndyosi, na lu'ú Ni juani, lo'o ña'a̱ ti tya lu'ú Ni tyempo nde loo la. Ntucua Xtyi'i ycui' Ni nde loo su tlyu su ntucua ycui' Ni, la cui' cati tya'a cui'i̱ lubii nu nda Xtyi'i Ni laca bi'.

HEBREOS 7:2

Bi' cha' ngusa'be Abraham lcaa yu'ba nu nquije ji'i̱ yu chaca quiya', nu nguaana nu ngu' xña'a̱ bi'; tii tya'a yu'be ngusa'be yu lcaa cha' bi', lo'o li' nda yu ña'a̱ tsaca yu'be ji'i̱ nu cusu' Melquisedec bi'. Ndi'ya̱ ndyu'u xtañi nu cusu' bi': “xu'na quichi̱ nu liñi ca ndu'ni”, jua'a̱ ndyu'u cha' bi' cha'cña ji'na; lo'o jua'a̱ cha' xu'na quichi̱ Salem ngua nu cusu' bi', bi' cha' taca chcui' na: “ti̱ ti ndi'i̱ cresiya ji'i̱ ngu' xqui'ya nu xu'na ngu'”, cha' jua'a̱ ndyu'u xquicha' Salem cha'cña ji'na.

SAN JUAN 20:26

Li' cua ndu'u scua snu' tsa̱, ndyalaa ngu' nu ngua tsa'a̱ ji'i̱ Jesús toni'i̱ chaca quiya'; lo'o Tomás ndi'i̱ lo'o ngu' li'. Cua ndyacu̱' toni'i̱, li' ndyatí̱ Jesús ni'i̱ jua'a̱ ti, ndyatu̱ yu slo ngu' bi'. Li' nchcui' yu lo'o ngu': ―Ti̱ ti tyi'i̱ tyiquee ma̱.

APOCALIPSIS 21:8

Pana lcaa ñati̱ nu ntsi̱i̱ tsa cha' tyu'u cha' ji'i̱ lo'o na', jua'a̱ ñati̱ nu ná ndaquiya' jna' tsiya' ti, jua'a̱ nu chiya'a̱ tsa ndu'ni, jua'a̱ nu ndujuii ji'i̱ tya'a ñati̱, jua'a̱ nu ndu'ni suba' lo'o nu cuna'a̱, jua'a̱ nu cucha'a̱, jua'a̱ ñati̱ nu jlya tsa ti' ji'i̱ cha' cucha'a̱, jua'a̱ ñati̱ nu ndu'ni tlyu ji'i̱ lcui̱ jo'ó, jua'a̱ nu cuiñi, lcaa ngu' bi' tyaa ngu' ca lo tayu' tlyu ca su ntsu'u quii' nu ndyaqui̱ lo'o yuu sufri. Lcaa ngu' nu cua ndyaa nde tayu' bi' ni, cua ndyaa ngu' nde chalyuu talya; cua ndye cha' ngujuii ngu' tsiya' ti li'.

GÁLATAS 6:16

Lcaa ñati̱ nu ndu'ni jua'a̱ xqui'ya Jesús laja lo'o ndi'i̱ ngu' chalyuu, taca tyi'i̱ tyiquee ngu' ti̱ ti li', lo'o jua'a̱ cua'ni tya'na ti' ycui' Ndyosi ji'i̱ ngu' bi' li'; jua'a̱ cua'ni Ni lo'o lcaa na nu chañi cha' laca na ñati̱ ji'i̱ Ni.

SAN LUCAS 10:5

Nu lo'o tyalaa ma̱ toni'i̱ ji'i̱ sca ñati̱, li' ndi'ya̱ chcui' ma̱ lo'o ycui' Ndyosi cuentya ji'i̱ ñati̱ nu ndi'i̱ ni'i̱ bi': “Ti̱ ti tyi'i̱ tyiquee ngu' nu ca tyi re”, ñacui̱ ma̱ ji'i̱ ycui' Ndyosi li'.

COLOSENSES 1:2

Nda na' quityi re cha' ca̱a̱ ca slo cu'ma̱ ca quichi̱ Colosas jua, cu'ma̱ ngu' nu ntsu'u cha' ji'i̱ ma̱ lo'o ycui' Ndyosi, cu'ma̱ nu laca ma̱ ngu' tya'a na xqui'ya cha' cua ngusñi tso'o ma̱ cha' ji'i̱ Cristo. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱, ca su ndi'i̱ ma̱ ca jua.

SAN LUCAS 12:4

’Tya'a tso'o na' laca cu'ma̱, bi' cha' chcui' na' cha' re lo'o ma̱, cha' ná cutsi̱i̱ ma̱ ji'i̱ ñati̱ chalyuu nu caca cujuii ji'na, cha' nu nga'aa caca cua'ni ngu' xa' la cha' cuxi ji'na ca tiya' la, nu lo'o cua ngujuii na.