SAN JUAN 10:28 - Chatino Tataltepec

²⁸ Ná nga'a̱ cha' tye chalyuu nu ta na' ji'i̱ ngu' bi', ná chcuna' cresiya ji'i̱ ngu' li'. Ná tucui caca ji'i̱ xlyaá ji'i̱ ñati̱ bi' 'na, cha' tso'o tsa ña'a̱si̱i̱ na' ji'i̱ ñati̱ bi' ―nacui̱ Jesús―.

SAN JUAN 10:28 Referans Kwoze

SAN JUAN 6:37

Lcaa ñati̱ nu cua nda Sti na' jna', ngu' nu ngusñi cha' jna' ni, caca ngu' bi' ñati̱ 'na li'. Tucuá na' cha' ji'i̱ ngu' bi', ná culo'o na' ji'i̱ ngu' cha' tyaa ngu' chaca se'i̱.

HEBREOS 7:25

Lcaa ca tyempo, masi juani, masi nde loo la, taca ji'i̱ Ni cua'ni lyaá Ni ji'i̱ cua ña'a̱ ca ñati̱ nu xñi cha' ji'i̱ ycui' Ndyosi xqui'ya Jesús. Tyucui tyempo ndi'i̱ Jesús ca slo ycui' Ndyosi, cha' chcui' Ni lo'o ycui' Sti Ni cuentya ji'na.

ROMANOS 8:29

Masi tya lo'o nguxana chalyuu, tya li' jlo ti' ycui' Ni tilaca laca nu tyaja'a̱ xñi cha' ji'i̱ Ni nde loo la. Ngua ti' Ni cha' caca na ñi'ya̱ laca Jesús, Sñi' ycui' ca Ni, ngua ti' Ni cha' caca Jesús tya'a na; quiña'a̱ tsa tya'a sñi' ycui' Ni caca na li', pana loo la laca Jesús.

SAN JUAN 18:9

Nchcui' Jesús lo'o ngu' jua'a̱, cha' caca ñi'ya̱ nu cua nchcui' ca Jesús lo'o ycui' Ndyosi Sti yu, nu lo'o cua nacui̱ yu ndi'ya̱: “Ni tsaca ñati̱ nu cua nda nu'u̱ 'na, ná nguna' ngu' 'na”.

FILIPENSES 1:6

bi' cha' cua jlo ti' na' juani cha' ña'a̱ ti tya cua'ni ycui' Ndyosi cña ne' cresiya ji'i̱ ma̱, ña'a̱ cuayá' nu tyu'u scua cña bi', nu lo'o tya̱a̱ Jesucristo chaca quiya', cha' la cui' ycui' Ni laca nu nguxana ngua'ni cña ne' cresiya ji'i̱ ma̱ tya clyo.

1 JUAN 2:25

Bi' laca cha' nu ngüiñi ji'i̱ Jesucristo lo'o na, cha' taca caja chaca chalyuu cucui nu ná nga'a̱ cha' tye ji'na.

SAN JUAN 4:14

Lo'o co'o ngu' hitya nu ta na', nga'aa tyucua nguityi ngu' tsiya' ti li' ―nacui̱―. Ta na' sca lo hitya co'o ngu' nu cua'ni cu'ú cresiya ji'i̱ ngu'. Ndi'ya̱ laca bi': ñi'ya̱ si laca sca su̱u̱ hitya nde ne' cresiya ji'i̱ ngu', jua'a̱ ná nga'a̱ cha' tye chalyuu ji'i̱ ngu' li'.

ROMANOS 8:1

Pana juani ni, ndi'ya̱ ngua'ni ycui' Ndyosi: Nga'aa ndyanu yabe' hichu̱' na, si stu'ba ntsu'u cha' ji'na lo'o Jesucristo; nga'aa taca ji'i̱ nu cuxi nu ntsu'u chalyuu cojolaqui ji'na juani, cha' Xtyi'i ycui' Ndyosi laca loo ji'na lo'o ndi'i̱ na nde chalyuu.

JUDAS 1:24

Sca ti ycui' Ndyosi ntsu'u chalyuu. Taca cua'ni lyaá Ni ji'na xqui'ya Jesucristo nu Xu'na na; sca ti ycui' Ni nchca ji'i̱ Ni ña'a̱si̱i̱ Ni ji'na, laja lo'o ndya'a̱ na tyucui̱i̱ tso'o nu ngulu'u Ni ji'na. Xtyucua Ni ji'na cha' ná tyeje sna quiya' na, cha' ná tyu'utsu' na ji'i̱ tyucui̱i̱ bi', ña'a̱ cuayá' nu tyalaa na tso'o ti ca su ndubi tsa ña'a̱ xee, ca su ntucua ycui' Ndyosi. Lubii tsiya' ti caca cresiya ji'na lo'o cua ndyalaa na ca slo Ni, lo'o jua'a̱ caca chaa tsa ti' na li'. Bi' cha' juani cua'ni tlyu na ji'i̱ ycui' Ndyosi nu ntucua ca su tlyu nde cua̱, cha' sca ti ycui' Ndyosi ntsu'u nu tlyu tsa laca Ni; sca ti ycui' Ni laca Ni loo ji'i̱ lcaa lo na nu ntsu'u chalyuu, jua'a̱ sca ti ycui' Ni nchca ji'i̱ Ni cua'ni Ni lcaa lo cña tonu tsiya' ti. Lu'ú ycui' Ndyosi tya lo'o bilya tya' chalyuu, lo'o jua'a̱ lu'ú Ni juani; ná nga'a̱ cha' tye tyempo cha' lu'ú Ni ca nde loo la. Jua'a̱ laca cha' lacua.

SAN JUAN 17:2

Na cua nda nu'u̱ chacuayá' jna' cha' caca na' loo ji'i̱ lcaa ñati̱, cha' ta na' chaca chalyuu ji'i̱ ñati̱ nu nda nu'u̱ 'na, chalyuu nu ná nga'a̱ cha' tye ―nacui̱ Jesús ji'i̱ ycui' Ndyosi Sti yu―.

SAN JUAN 5:24

’Liñi tsa cha' nu ta na' lo'o ma̱ juani: Cua ña'a̱ ca ñati̱ nu taquiya' ji'i̱ lcaa cha' nu chcui' na' lo'o ngu', lcaa ñati̱ nu jlya ti' ji'i̱ ycui' Ndyosi Sti na' nu nda jna' lijya̱a̱, bi' ngu' laca nu ná nga'a̱ cha' tye chalyuu tso'o nu ta ycui' Ndyosi ji'i̱ ngu' bi'. Ná cua'ni cuayá' Ni ji'i̱ ngu' bi', ná nscua cha' cajaa ngu' bi'; lcaa tyempo tyi'i̱ ngu' bi' lo'o ycui' Ndyosi ―nacui̱ Jesús ji'i̱ ngu'―.

1 JUAN 2:19

Tya clyo ndyu'u ti'i̱ nu ngu' cuiñi bi' lo'o na, lo'o li' ngutu'u ngu' bi' ndyaa ngu'; si'i ñati̱ tya'a ntsu'u cha' ji'na lo'o Jesucristo laca ngu' bi'. Si chañi cha' tya'a ndya'a̱ na laca ngu' bi', cua ndyanu ngu' lo'o na nquicha'; pana ngutu'u ngu' bi', cha' taca ca cuayá' ti' na cha' si'i lcaa ñati̱ nu ndyu'u ti'i̱ lo'o na laca tya'a ngusñi na cha' ji'i̱ Jesucristo.

1 JUAN 5:11

Nde laca cha' liñi nu tso'o tsa cha' xñi na ji'i̱, cha' cua nda ycui' Ndyosi chalyuu nu ná nga'a̱ cha' tye ji'na; Jesucristo laca nu ngulu'u ji'na ñi'ya̱ caca chalyuu bi'.

JUDAS 1:21

Bi' cha' lacua, cua'a ma̱ ji'i̱ ycui' ca ma̱; cui'ya ma̱ cuentya ñi'ya̱ nu cua'ni ma̱ nde chalyuu, cha' jlo ti' ma̱ cha' ntsu'u tsa tyiquee ycui' Ndyosi ña'a̱ Ni ji'i̱ ma̱. Jatya ma̱ ni jacua' tyalaa tsa̱ lo'o ta ycui' Jesucristo nu Xu'na na chalyuu nu ná nga'a̱ cha' tye tsiya' ti ji'na, cha' tya'na tsa ti' Ni ña'a̱ Ni ji'na.

1 PEDRO 1:5

Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.

SAN JUAN 11:25

Li' nguxtyacui Jesús cha' lo'o nu cuna'a̱ bi': ―Na' laca̱ nu ndu'ni cha' tyu'ú ñati̱, na' laca̱ nu ndu'ni cha' chañi caca tso'o cresiya ji'i̱ ñati̱ ―nacui̱ Jesús―. Masi cajaa ngu', tya tyu'ú ngu' bi' chaca quiya', caja chalyuu cucui ji'i̱ ngu' si cua ngusñi ngu' cha' jna' ―nacui̱ Jesús ji'i̱ Marta―.

JUDAS 1:1

Judas naa na', la cui' tya'a Jacobo; cña laca na' cuentya ji'i̱ Jesucristo. Nscua na' quityi re cha' tsaa ca slo lcaa cu'ma̱ nu ndaquiya' ma̱ ji'i̱ ycui' Ndyosi Sti na, cha' cua ngusubi Ni ji'i̱ ma̱. Ycui' Ndyosi laca nu ngua'ni lubii ji'i̱ cresiya ji'i̱ ma̱, lo'o ña'a̱ ti tya cña'a̱si̱i̱ Ni ji'i̱ ma̱ juani xqui'ya Jesucristo.

2 TESALONICENSES 2:13

Cu'ma̱ tya'a ngusñi na cha' ji'i̱ Jesús, ntsu'u tsa tyiquee ycui' nu Xu'na na ña'a̱ Ni ji'i̱ ma̱. Lo'o jua'a̱ ntsu'u cha' tya ya xlya'be ji'i̱ ycui' Ndyosi xqui'ya cu'ma̱, cha' ngusubi Ni ji'i̱ ma̱ tya lo'o nguxana ti chalyuu cha' cua'ni lyaá Ni ji'i̱ ma̱; bi' cha' ngua'ni Xtyi'i ycui' Ni cha' ngua lubii cresiya ji'i̱ ma̱ lo'o ngusñi ma̱ cha' tso'o ji'i̱ ycui' Ndyosi.

SAN JUAN 3:36

Lo'o xñi ñati̱ cha' ji'i̱ Jesús, Sñi' ycui' Ndyosi, ná nga'a̱ cha' tye chalyuu tso'o nu ta Ni ji'i̱ ngu' bi'. Pana ñati̱ nu ná taquiya' tsiya' ti ji'i̱ cha' nu nchcui' Jesús, ná ta Ni chalyuu tso'o ji'i̱ ngu' bi'; xcube' tsa Ni ji'i̱ ngu' bi' li'.

2 TIMOTEO 1:12

bi' cha' ndyiji cha' ti'í 'na juani. Pana ná tyuju'u ti' na', cha' cua jlo ti' na' tilaca laca nu ngusñi na' cha' ji'i̱ Ni. Jlo ti' na' cha' nchca ji'i̱ Ni ña'a̱si̱i̱ Ni 'na; nchca ji'i̱ Ni xtyucua Ni 'na lo'o ndyu'ni na' cña nu nda Ni 'na, cha' taca tyu'u tso'o cña 'na tsa̱ bi' lo'o tya̱a̱ Jesús nde chalyuu chaca quiya'.

ROMANOS 5:21

Nu cuxi laca loo ji'na, bi' cha' ndyijii na; pana juani nti' ycui' Ndyosi caca Ni loo ji'na, cha' tya'na tsa ti' Ni ji'na. Lo'o caca tso'o cresiya ji'na cuentya ji'i̱ Ni, li' ta Ni sca chalyuu nu ná nga'a̱ cha' tye ji'na xqui'ya Jesús nu Xu'na na.

1 TIMOTEO 1:16

Ngüi'ya tsa Jesucristo cha' clyu ti' 'na lo'o ngüityi̱ Ni qui'ya nu ntsu'u 'na, cha' culu'u ycui' Ndyosi ji'i̱ xa' la ñati̱ ñi'ya̱ caca xñi ngu' cha' ji'i̱ Ni. Ñi'ya̱ lo'o tya'na ti' Jesús jna' tya clyo, jua'a̱ ca tya'na ti' Ni ji'i̱ lcaa ñati̱ nu xñi cha' ji'i̱ Jesús ca nde loo la, cha' si jlya ti' ngu' ji'i̱ Ni, ná nga'a̱ cha' tye chalyuu ji'i̱ ngu' li'.

ROMANOS 6:23

Tsa bi' ti caya' caja ji'na lo'o ndu'ni na cha' cuxi, cha' chcuna' lyiji cresiya ji'na lo'o; pana si stu'ba ntsu'u cha' ji'na lo'o Jesús nu Xu'na na, li' ta ycui' Ndyosi sca chalyuu nu ná nga'a̱ cha' tye ji'na. Sca cha' xlya'be nu nda ti Ni ji'na laca.

ROMANOS 5:17

Ntsu'u cha' cajaa na xqui'ya qui'ya nu ntsu'u ji'i̱ nu sca ti Adán bi', masi sca ti cha' cuxi ngua'ni yu; pana tlyu la cña ndyu'ni ycui' Ndyosi cuentya ji'na juani, nu lo'o ndyu'ni lubii Ni cresiya ji'na. Quiña'a̱ tsa cha' xlya'be ngua'ni Ni lo'o na; jua'a̱ caja chalyuu cucui ji'na juani xqui'ya Jesucristo, masi sca ti ñati̱ laca bi'.

ROMANOS 5:2

Tso'o tsa ndyu'ni ycui' Ndyosi lo'o na chacuayá' ji'i̱ Cristo, nu lo'o ngusñi na cha' ji'i̱ nu Cristo bi'. Ngua'ni Ni cha' ntsu'u cha' ji'na lo'o ycui' Ni, bi' cha' nga'aa ntsu'u cha' tya'a̱chu̱' na ji'i̱ Ni; tso'o tsa ntsu'u tyiquee na, cha' jlo ti' na cha' ca tiya' la caja sca se'i̱ nu tso'o tsa su tyi'i̱ na ca su ntucua ycui' Ndyosi, cha' jua'a̱ tso'o ti ndu'ni Ni lo'o na.

LOS HECHOS 7:59

Laja lo'o ngu̱ ngu' quee ji'i̱ nu Esteban bi', nchcui' yu lo'o Jesús: ―Jesús Xu'na na' ―nacui̱ Esteban―, cua'ni nu'u̱ cha' tso'o qui'ya nu'u̱ cresiya jna'.

SAN JUAN 14:19

Ca tiya' la xi, li' nga'aa ña'a̱ ñati̱ chalyuu jna'; pana cu'ma̱, tya ña'a̱ ma̱ jna'. Li' caca tso'o tyiquee ma̱, xqui'ya cha' lu'ú na'.

SAN JUAN 6:47

Liñi tsa cha' nu nda na' lo'o ma̱ juani, cha' ñati̱ nu ngusñi cha' ji'i̱ ycui' Ndyosi ni, cua laca ngujui chalyuu nu ná nga'a̱ cha' tye ji'i̱ ngu' ―nacui̱―.

SAN JUAN 6:27

Tso'o la ―nacui̱ Jesús li'―, si cua'ni cña ti' ma̱ cha' caja sca cha' nu talo ji'i̱ ma̱; chañi cha' tyaala' ti' ma̱ li', si caja chalyuu nu ná nga'a̱ cha' tye ji'i̱ ma̱. Nu na cacu na ni, xtyi'i ti talo na bi', yala ti quiñu'u̱ na bi'. Pana na' nu lijya̱a̱ cha' caca na' ñati̱, ta na' sca cha' tso'o ji'i̱ ma̱ nu cua'ni cha' tyaala' ti' ma̱, lo'o ná tye tsiya' ti cha' bi' ji'i̱ ma̱ ―nacui̱―. Na cua nda ycui' Ndyosi Sti na' chacuayá' jna' cha' ta na' cha' tso'o bi' ji'i̱ ma̱.

ROMANOS 5:9

Tso'o lacua. Cua laca ngua tso'o cresiya ji'na cuentya ji'i̱ ycui' Ndyosi, xqui'ya cha' ndyalú tañi ycui' Cristo lo'o ngujuii yu lo crusi. La cui' jua'a̱ cua lijya̱ nclyaá na juani; xqui'ya Cristo nga'aa xcube' Ni ji'na lo'o tye chalyuu.

SAN JUAN 6:68

Li' nguxacui̱ Simón Pedro cha' ji'i̱ Jesús: ―Cusu' ―nacui̱―, ¿ma nde ntsu'u chaca se'i̱ su tsaa ya cha' cuna ya lcaa ña'a̱ cha' liñi nu nchcui' nu'u̱? Ná nga'a̱ cha' tye chalyuu ji'i̱ ya si cua'a̱ jyaca̱ ya ji'i̱ cha' nu nchcui' nu'u̱ ―nacui̱―.

SAN LUCAS 23:46

Hora bi' cui̱i̱ tsa ngusi'ya Jesús: ―Sti na', qui'ya nu'u̱ cresiya 'na ―nacui̱ yu. Nu lo'o cua nchcui' yu cha' bi', hora ti ngujuii yu li'.

SAN MARCOS 13:22

Cristo cuiñi caca ngu' bi'. Lo'o jua'a̱ tyu'u tucua xi nu cuiñi nu chcui' cha' tu'ba ji'i̱ ycui' Ndyosi laca ycui' ca ngu'; cha' cuiñi ti cua'ni ngu' bi' cha' tlyu, cha' cube tsa ti' xa' ñati̱. Cua'ni ngu' cuiñi bi' jua'a̱, cha' tyiji̱loo ngu' ji'i̱ ma̱ nti' ngu', lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.

SAN JUAN 10:29

Na cua nda Sti na' ñati̱ bi' jna', lo'o jua'a̱ nga'aa ntsu'u chaca nu stu'ba tlyu lo'o ycui' Ni; bi' cha' ná tucui caca ji'i̱ xlyaá ji'i̱ ngu' bi', nu lo'o ña'a̱si̱i̱ Sti na' ji'i̱ ngu'.

1 JUAN 1:2

Ngula Jesucristo nde lo yuu chalyuu su ndi'i̱ ya, lo'o jua'a̱ cua na'a̱ ya ji'i̱ ycui' yu; bi' laca cha' nu ndacha' ya ji'i̱ ma̱ juani, cha' chañi tsa laca cha' bi'. Nclyu'u ya ji'i̱ ma̱ ñi'ya̱ laca cha' tyucui tyempo lu'ú Jesucristo, cha' ntucua yu ca slo ycui' Ndyosi Sti na clyo; jua'a̱ nclyu'u ya ñi'ya̱ ngua cha' na'a̱ ya ji'i̱ yu nde chalyuu re.