HEBREOS 6:9 - Chatino Tataltepec

⁹ Cu'ma̱ tya'a tso'o na, nu ntsu'u tsa tyiquee ya ña'a̱ ya ji'i̱ ma̱, nga'aa ntsu'u cha' culacua ti' ya cha' ji'i̱ ma̱ jua'a̱, masi nchcui' ya ñi'ya̱ nu cua nchcui' ca ti ya. Cua jlo ti' ya cha' tso'o ti ndyaca ji'i̱ ma̱ juani, tya lo'o ngua'ni lyaá Jesús ji'i̱ ma̱ ji'i̱ nu cuxi.

HEBREOS 6:9 Referans Kwoze

HEBREOS 10:39

Nu na ni, ná taca tya'a̱chu̱' na ji'i̱ cha' ji'i̱ Jesús; si tya'a̱chu̱' na ji'i̱ yu, chcuna' na tyucui ña'a̱ na, ña'a̱ lo'o cresiya ji'na li'. Pana laca na ñati̱ nu tsa cu' ti xñi na cha' ji'i̱ Ni, bi' cha' ndu'ni lyaá Ni ji'na ji'i̱ nu cuxi.

HEBREOS 2:3

La cui' ti cha' caca ji'na juani, si ná taquiya' na ji'i̱ cha' nu cua ndyuna na bi', cha' clyaá na ji'i̱ nu cuxi; ná caja ñi'ya̱ clyaá na ji'i̱ ycui' Ndyosi lo'o cua ndye chalyuu, nu lo'o cua'ni cuayá' Ni ji'i̱ lcaa ñati̱. Clyo ndacha' ycui' Jesús nu Xu'na na cha' bi' ji'i̱ ñati̱ nu ngua tsa'a̱ ji'i̱ yu, jua'a̱ ndyuna ngu' bi' cha' nu nchcui' yu; tiya' la li', lo'o ji'na ndacha' ngu' bi' cha' bi'. Bi' cha' jlo ti' na cha' chañi laca cha' bi'.

2 CORINTIOS 7:10

Nu lo'o ndube ti' na ji'i̱ ycui' Ndyosi laja lo'o nga'a̱ na xñi'i̱ ti' na, li' caja ñi'ya̱ xtyanu na ji'i̱ cha' cuxi nu ndyu'ni na; clyaá na ji'i̱ nu cuxi li', nga'aa ntsu'u cha' culacua tsa ti' na li'. Pana ñati̱ nu xñi'i̱ xi ti', nu ná ndube ti' ji'i̱ ycui' Ndyosi ni, ná ntaja'a̱ ñati̱ bi' ca tyuju'u ti' ji'i̱ qui'ya nu ntsu'u ji'i̱; chcuna' chalyuu ji'i̱ ngu' bi' jua'a̱ ti li'.

HEBREOS 10:34

Lo'o jua'a̱ ndyaa na'a̱ ma̱ ji'i̱ ngu' tya'a ma̱ nu lo'o ntsu'u ngu' bi' ne' chcua̱, nguxtyucua ma̱ ji'i̱ ngu' bi' li'; masi nguaana xa' ñati̱ lcaa cha' tso'o nu ntsu'u ji'i̱ ma̱, ndalo tsa tyiquee ma̱ li'. Tso'o ntsu'u tyiquee ma̱, cha' cua jlo ti' ma̱ cha' tso'o la tsiya' ti laca nu cha' ji'i̱ Jesús nu cua ngusñi ma̱ bi'; jlo ti' ma̱ cha' ná tye chca cha' bi', cha' nu cua ndyuna ma̱ cuentya ji'i̱ Jesús.

HEBREOS 5:9

Tiya' la li', lo'o cua ngua lcaa cha' ji'i̱ Jesús cha' cua ngua'ni yu cña nu cua nda ycui' Ndyosi ji'i̱ yu cha' cua'ni yu, tya li' ntucua quiya' cha' cua'ni lyaá Jesús ji'i̱ cua ña'a̱ ca ñati̱ chalyuu nu tyaja'a̱ cua'a̱ jyaca̱ ji'i̱ cha' nu cua nchcui' yu lo'o; ná tye tsiya' ti cha' cua'ni lyaá Ni ji'na ji'i̱ cha' cuxi nu ntsu'u ji'na.

1 CORINTIOS 10:14

Cu'ma̱ tya'a tso'o na, ntsu'u tsa tyiquee na' ña'a̱ na' ji'i̱ ma̱, bi' cha' nchcui' tsa na' lo'o ma̱ juani cha' ná cua'ni tlyu ma̱ tsiya' ti ji'i̱ lcui̱ jo'ó ji'i̱ ngu', nga'aa tsaa ma̱ su ntucua bi'.

LOS HECHOS 20:21

Sca ti cuaya' nchcui' na' lo'o lcaa ngu', masi lo'o ngu' judío tya'a na', masi lo'o xa' la ñati̱; sca ti cha' ngulu'u na' ji'i̱ lcaa ma̱, cha' nga'a̱ cha' culochu̱' ma̱ ji'i̱ lcaa cha' cuxi nu ntsu'u ji'i̱ ma̱ lo'o xñi ma̱ cha' ji'i̱ Jesucristo nu Xu'na na.

SAN MARCOS 16:16

Nu lo'o xñi ñati̱ cha' 'na, tyucuatya ngu' chacuayá' jna' li', clyaá ngu' bi' ji'i̱ nu cuxi li'. Ñati̱ nu ná tyaja'a̱ xñi cha' 'na tsiya' ti, tyanu qui'ya ji'i̱ ngu' li'.

HEBREOS 6:10

Lo'o jua'a̱ liñi tsa ndu'ni ycui' Ndyosi lo'o na. Ná cjlyaa ti' Ni lcaa cha' tso'o nu cua ndyu'ni ma̱, nu lo'o nxtyucua ma̱ ji'i̱ ngu' tya'a ngusñi na cha' ji'i̱ Jesús, cha' cua quiña'a̱ xi cña ndyu'ni ma̱ cuentya ji'i̱ ngu' bi'. Xqui'ya cha' ndyu'ni ma̱ jua'a̱, bi' cha' jlo ti' xa' ñati̱ cha' ntsu'u tsa tyiquee ma̱ ji'i̱ Jesús, cha' ña'a̱ ti tya ndyu'ni ma̱ cha' tso'o lo'o ngu' juani.

GÁLATAS 5:6

Lo'o jua'a̱ si chañi cha' stu'ba ntsu'u cha' ji'na lo'o Jesucristo, li' ná ndu'ni cha' masi ngulacua̱ na, masi ná ngulacua̱ na. Sca ti cha' ndulo tsa ji'na cha' cua'ni na, cha' xñi tso'o la na cha' ji'i̱ ycui' Ni; lo'o li' caca cua'ni na cha' tso'o ti tyu'u tyiquee na ña'a̱ na ji'i̱ tya'a ñati̱ na.

LOS HECHOS 11:18

Nu lo'o ndyuna ngu' cha' nu nchcui' Pedro lo'o ngu', nga'aa ngua chcui' tyaala ngu' bi' lo'o Pedro. Li' ngua'ni tlyu ngu' bi' ji'i̱ ycui' Ndyosi. Ndi'ya̱ nchcui' ngu' lo'o Ni li': ―Ndyosi Sti ya, tso'o tsa ndu'ni nu'u̱ lo'o ngu' xa' tsu', masi si'i ngu' judío laca ngu' bi' ―nacui̱ ngu' ji'i̱ ycui' Ndyosi―. Ndu'ni nu'u̱ cha' ca tyuju'u ti' ngu' ji'i̱ lcaa cha' cuxi nu ntsu'u ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi'.

2 CORINTIOS 7:1

Cu'ma̱ ngu' tya'a na, nu ntsu'u tsa tyiquee na' ña'a̱ na' ji'i̱ ma̱, jua'a̱ laca cha' nu cua nda ycui' Ndyosi lo'o na, cha' nu caca ji'na nde loo la. Bi' cha' lacua, ntsu'u cha' cua'ni tye na ji'i̱ lcaa cha' cuxi nu nti' cua'ni ñu'u̱ ji'i̱ cresiya ji'na, ji'i̱ tyucui ña'a̱ na. Lo'o jua'a̱ lye tsa cua'ni na cña cha' caca na ñati̱ ji'i̱ ycui' Ni; na laca nu cua'ni na nde chalyuu, cua'ni na ji'i̱ ñi'ya̱ nti' si cua ndu̱ ycui' Ndyosi ña'a̱ Ni ji'na.

2 CORINTIOS 12:19

Ni si'i xcui' na cua nti' ya cha' tyu'u lubii cha' ji'i̱ ya lo'o cu'ma̱; laca cha' ndube ti' ya cha' ña'a̱ ycui' Ndyosi ji'i̱ ya, bi' cha' tsa lo cua ti cha' nchcui' ya, tsa ña'a̱ cha' nu nti' ycui' Cristo cha' chcui' ya lo'o cu'ma̱. La cui' jua'a̱ lcaa cña nu ndyu'ni ya, na xtyucua ya ji'i̱ ma̱ laca cña bi', cha' ntsu'u tsa tyiquee ya ña'a̱ ya ji'i̱ cu'ma̱ tya'a tso'o na.

1 PEDRO 2:11

Cu'ma̱ ngu' tya'a tso'o na, cua nscua cha' tyi'i̱ na ca slo ycui' Ni tyempo ca nde loo la, bi' cha' nga'a̱ cha' tyi'i̱ na chalyuu juani ñi'ya̱ si laca na ngu' tyijyu' nu ná ntsu'u tyi ngu'. Lye tsa chcui' na' lo'o ma̱ juani cha' nga'aa cua'ni ma̱ cua ña'a̱ ca cha' cuxi nu ndijña tyiquee ma̱ cha' cua'ni ma̱; nga'aa taquiya' ma̱ ji'i̱ cha' cuxi bi', cha' jua'a̱ nga'aa caca ji'i̱ nu cha' cuxi bi' cua'ni ñu'u̱ ji'i̱ ma̱.

2 PEDRO 3:1

Cu'ma̱ ngu' tya'a tso'o na, cua nguscua na' sca quityi ndyaa slo cu'ma̱ tya tsubi' la. Nu juani nde nscua na' chaca quityi, cha' ca tyi'u ti' ma̱ lcaa cha' nu ji'i̱ Cristo, cha' jua'a̱ caca culacua tso'o ti' ma̱ lcaa hora.

1 JUAN 2:7

Cu'ma̱ tya'a ngusñi na cha' ji'i̱ Jesús, cua nscua cha' lo quityi re cha' tyaja'a̱ ma̱ tyu'u tso'o tyiquee ma̱ ña'a̱ ma̱ ji'i̱ tya'a ñati̱ ma̱. Si'i sca cha' nu bilya cuna ma̱ laca cha' bi'; cua ndyuna ma̱ cha' bi' tya lo'o ngusñi ma̱ cha' ji'i̱ Jesucristo tya clyo la, cha' la cui' ti cha' bi' laca nu cua nscua cua sa'ni.

JUDAS 1:3

Cu'ma̱ ngu' tya'a tso'o na nu tyaca'a tsa ma̱ 'na, nti' tsa na' scua na' quityi cha' tsaa ca slo ma̱, sca quityi nu chcui' ji'i̱ cha' tlyu nu ngua'ni Jesús cha' taca clyaá na ji'i̱ nu cuxi; pana ná ngua scua na' ji'i̱ yala ti. Lo'o nu juani nga'a̱ cha' scua na' quityi re cha' tsaa ca slo ma̱, cha' ta na' sca cui̱i̱ lo'o ma̱; nga'a̱ cha' cua'a ma̱ ji'i̱ cua ña'a̱ ca ngu' cuiñi, xqui'ya cha' ná jlya ti' ngu' ji'i̱ cha' liñi nu cua nda ycui' Ndyosi nu Xu'na na lo'o na, lcaa na nu ntsu'u cha' ji'na lo'o Jesucristo. Ná cua'a̱ jyaca̱ ma̱ tsiya' ti ji'i̱ cha' nu nchcui' ngu' cuiñi bi'.