HEBREOS 6:6 - Chatino Tataltepec

⁶ Lo'o li' cua ndya'a̱chu̱' ngu' bi' ji'i̱ Jesús. Nga'aa caca cua'ni na cha' chaca quiya' xñi tso'o ngu' bi' cha' ji'i̱ Jesús; xcui' na nda ngu' bi' cha' ti'í ji'i̱ Jesús nu sca ti Sñi' ycui' Ndyosi, cha' ndyu'ni ngu' ñi'ya̱ laca si ntyiji'i̱ ca'a̱ ngu' ji'i̱ Jesús lo crusi chaca quiya', cha' xa' xtyí lo'o ti ñati̱ chalyuu ji'i̱ yu.

HEBREOS 6:6 Referans Kwoze

2 PEDRO 2:21

Tso'o la si ná ngua tsa'a̱ ngu' tsiya' ti ji'i̱ tyucui̱i̱ liñi su tsaa na ca slo ycui' Ndyosi; ná tso'o si ngua cuayá' ti' ngu', lo'o li' nguxtyanu ngu' tyucui̱i̱ liñi su tsaa na ca slo Ni. Nga'aa ndaquiya' ngu' bi' ji'i̱ cha' nu cua nda Cristo lo'o na li'.

HEBREOS 10:29

Lo'o juani ni, tlyu la cha' ti'í tyacua ji'i̱ tya'a ñati̱ na nu chi̱i̱ tsa nti' ña'a̱ ngu' ji'i̱ Jesús, nu sca ti Sñi' ycui' Ndyosi bi', ngu' nu lye tsa chcui' lo ji'i̱ cña nu ngua'ni nu Jesús bi'; sca ti xqui'ya cha' ngujuii yu lo crusi, bi' cha' cua ndyaca lubii cresiya ji'na. Lo'o jua'a̱ si chcui' suba' na ji'i̱ Xtyi'i ycui' Ndyosi, li' lye la cha' nchcube' tyacua ji'na, cha' xcui' tso'o tsa ndu'ni Ni lo'o na xqui'ya Xtyi'i ycui' Ni.

HEBREOS 6:4

Ná caja ñi'ya̱ cua'ni na lo'o ñati̱ nu nguxtyanu tsiya' ti ji'i̱ cha' bi'. Cua jlo ti' ngu' ñi'ya̱ laca lo'o cua ndyaala hique ngu' cha' ngulacua tso'o ti' ngu', jua'a̱ cua jlo ti' ngu' cha' tso'o tsa cua ña'a̱ ca cha' nu nda ycui' Ndyosi ya̱a̱ slo ngu'. Lo'o ngu' bi', cua ngua'ni Xtyi'i ycui' Ndyosi cña ne' cresiya ji'i̱ ngu' xqui'ya Jesús nquicha'.

1 JUAN 5:16

Lo'o ña'a̱ na ji'i̱ sca ñati̱ tya'a ngusñi na cha' ji'i̱ Jesucristo cha' ndyu'ni yu sca cha' cuxi, pana nda na cuentya cha' ná nscua cha' chcuna' chalyuu ji'i̱ yu xqui'ya cha' cuxi bi', li' tso'o la si jña na cha' clyu ti' ji'i̱ ycui' Ndyosi cuentya ji'i̱ yu tya'a na bi', cha' ná ta Ni chacuayá' cha' chcuna' chalyuu ji'i̱ yu tya'a na bi'. Pana ntsu'u qui'ya tlyu nu ná taca cua'ni clyu ti' ycui' Ndyosi ji'i̱; ná ñacui̱ na' cha' jña na cha' clyu ti' ji'i̱ Ni li', si jua'a̱ ntsu'u qui'ya ji'i̱ ngu'.

2 TIMOTEO 2:25

jua'a̱ ji'i̱ ñati̱ nu ñasi̱' ji'i̱ ngu'. Tso'o ti chcui' ngu' bi' lo'o ñati̱ nu ñasi̱', cha' jua'a̱ taca cua'ni ycui' nu Xu'na na cña ne' cresiya ji'i̱ ñati̱ nu ñasi̱' bi', cha' taca culu'u Ni ji'i̱ ngu' ñi'ya̱ laca lo'o cha' liñi bi'. Tso'o tsa si culochu̱' ñati̱ nu ñasi̱' bi' lcaa cha' cuxi nu ndyu'ni ngu',

HEBREOS 12:2

Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.

SAN MATEO 19:26

―Bi' laca sca cha' nu ná nchca cua'ni ni sca ñati̱ chalyuu; pana ycui' Ndyosi ni, nchca ji'i̱ Ni cua'ni cha' tyalaa ngu' slo Ni ―nacui̱ Jesús ji'i̱ ngu'.

SAN LUCAS 11:48

Lo'o jua'a̱ caca cuayá' ti' na cha' sca ti cuayá' cha' cuxi nu ntsu'u tyiquee ma̱ lo'o jyo'o cusu' tya'a ma̱; na cua ndyujuii jyo'o cusu' bi' ji'i̱ ñati̱ nu ngua'ni cña ji'i̱ ycui' Ndyosi cua sa'ni la, lo'o juani cu'ma̱ laca nu ndiña ma̱ ni'i̱ hique cuaá su ntsiya ngu' jyo'o nu ngua tu'ba ji'i̱ ycui' Ndyosi bi'.

HEBREOS 4:14

Lo'o cua ngusñi na cha' ji'i̱ Jesús, li' nga'a̱ cha' cua'ni na cha' tso'o ti tyanu cha' bi' ne' cresiya ji'na. Cua laca ntsu'u sca sti jo'ó nu laca loo la nu ndu̱ cuentya ji'na; Jesús laca bi', nu sca ti Sñi' ycui' Ndyosi laca yu. Cua ndyaa Jesús ca su ndi'i̱ ycui' Ndyosi Sti yu; juani ndu̱ Jesús slo Ni, nchcui' cha' ji'na lo'o Ni.

HEBREOS 10:26

Nga'aa ntsu'u xa' la msta̱ nu ta na, nga'aa ntsu'u xa' la cha' nu cua'ni na, cha' cati̱ qui'ya nu ntsu'u ji'na, si ña'a̱ ti tya cua'ni na cha' cuxi li'; cua ngua cuayá' ti' na cha' chañi tsa cha' ji'i̱ Jesús bi', lo'o jua'a̱ nga'aa cui'ya ycui' Ndyosi cha' clyu ti' ji'na si xtyanu na ji'i̱ cha' bi'.