HEBREOS 6:5 - Chatino Tataltepec

⁵ Cua jlo ti' ngu' bi', cha' cua na'a̱ ngu' cha' tso'o tsa lcaa cha' nu nacui̱ Ni ji'na cha' cua'ni Ni lo'o na; cua na'a̱ ngu' bi', cha' tlyu tsa cha' nu ndyaca lo'o cua nguxana tyalaa chalyuu cucui ji'i̱ ycui' Ndyosi ca su ndi'i̱ ngu'.

HEBREOS 6:5 Referans Kwoze

SAN LUCAS 8:13

Ñi'ya̱ laca nu chaca ycu' si'yu nu ndyú lo yuu lati tu'ba chu̱' quee, jua'a̱ laca lo'o ñati̱ nu tso'o tsa ntsu'u tyiquee ngu' lo'o ndyuna ngu' cha' tso'o bi' nquicha'. Pana ñi'ya̱ nti' nu calya sube bi', cha' ná qui'ñi ndyaa quiche su̱u̱ chu̱' quee bi', jua'a̱ nti' ñati̱ bi', cha' xti ti tyempo ndalo ngu' lo'o ngusñi ngu' cha' tso'o bi'; lo'o lya' ti' xa' ñati̱ ji'i̱ ngu' bi', yala ti tya'a̱chu̱' ngu' li'.

1 PEDRO 2:3

Cua ndyo'o cuayá' ma̱ xi styi' bi', bi' cha' ngua cuayá' ti' ma̱ cha' tso'o tsa ntsu'u tyiquee nu Xu'na na ña'a̱ Ni ji'na.

2 PEDRO 2:20

Cuxi la caca ji'i̱ ñati̱ nu cua nguxtyanu ji'i̱ cha' cuxi tsaca quiya', lo'o li' ta chacuayá' ji'i̱ nu cuxi cha' tyiji̱loo ji'i̱ chaca quiya'; na cua ngulaá ñati̱ bi' ji'i̱ lcaa cha' cuxi nu ntsu'u nde chalyuu nquicha', na cua ngua tsa'a̱ ji'i̱ Jesucristo nu Xu'na na, cha' bi' laca nu ngua'ni lyaá ji'na.

HEBREOS 2:5

Cha' ji'i̱ chalyuu cucui bi' nchcui' na juani, pana si'i nu ngu' xca̱ ji'i̱ ycui' Ndyosi laca nu cua ngujui chacuayá' ji'i̱ cha' caca ngu' loo ji'i̱ chalyuu cucui; sca ti ycui' Ndyosi culo cña li'.

SAN MARCOS 6:20

cha' ntsi̱i̱ rey Herodes ji'i̱ Juan. Jlo ti' rey cha' liñi tsa cha' nu ngua'ni Juan, lubii tsa tyiquee Juan, lo'o jua'a̱ ná ntsu'u cha' cuxi ji'i̱ yu; bi' cha' nguna'a̱si̱i̱ rey ji'i̱ yu cha' ná cua'ni nu cuna'a̱ bi' ni sca cha' cuxi lo'o. Ndiya ti' rey Herodes cuna cha' nu ngulu'u Juan ji'i̱, masi ná ngua cuayá' tso'o ti' rey ji'i̱ cha' bi'.

SAN MATEO 12:32

Cui'ya Ni cha' clyu ti' ji'i̱ ñati̱ nu nchcui' cha' cuxi jna' nu cua nda Ni 'na lijya̱a̱ cha' caca na' ñati̱; pana lo'o chcui' ngu' cha' cuxi ji'i̱ cña nu ndu'ni Xtyi'i ycui' Ndyosi, li' nga'aa cui'ya ycui' Ni cha' clyu ti' ji'i̱ ngu' bi' lcaa tsa̱ lo'o tyi'i̱ ngu' chalyuu, masi tyucui tyempo nde loo la.

EFESIOS 6:17

Smalyu chcua̱ ntucua hique ngu' sendaru cha' cua'a ji'i̱ hique ngu'. Lo'o jua'a̱ cu'ma̱, cua ngua'ni lyaá Ni ji'i̱ ma̱, bi' cha' ntsu'u nu ña'a̱si̱i̱ ji'i̱ ma̱ li'. Xñi ma̱ lcaa cha' nu nda Xtyi'i ycui' Ndyosi lo'o ma̱ cha' caja ñi'ya̱ nu chcui' ma̱ lo'o sca ñati̱, ñi'ya̱ laca si cua ngusñi ma̱ sca maxtyi cusu̱u̱ ji'i̱ sendaru.

HEBREOS 4:12

Lcaa cha' nu nchcui' ycui' Ndyosi lo'o ñati̱ ni, ñi'ya̱ nti' sca na lu'ú, jua'a̱ laca cha' bi'. Lcaa tyempo ndu'ni bi' cña ne' cresiya ji'i̱ ñati̱ nu cuna cha' bi'. Laca cha' bi' ñi'ya̱ si laca sca xlyu nu cha tsa tu'ba tyucuaa chu̱'; ndu'ni bi' cha' saala cuaña' na ña'a̱ cuayá' nu tyalaa ca su ntsu'u tyijya̱ na, ña'a̱ cuayá' tyaca̱' ycua nu ntsu'u ne' tyijya̱ na. La cui' jua'a̱ laca lo'o cuna na cha' ji'i̱ ycui' Ndyosi bi', na nchcui' ca'a̱ ti cha' bi' ji'i̱ tyucui ña'a̱ na, jua'a̱ lo'o cresiya ji'na. Lo'o nduna na sca cha' nu nchcui' ycui' Ndyosi lo'o ñati̱, liñi tsa quijeloo cha' ji'i̱ Ni, lcaa cha' nu ntsu'u tyiquee na cha' caja ji'na, lcaa cha' nu nclyacua ti' scaa na.

HEBREOS 11:3

Jlya ti' na ji'i̱ ycui' Ndyosi, bi' cha' cua ngua cuayá' ti' na cha' clyo nda ycui' Ndyosi cha', lo'o li' ndya' chalyuu nu ña'a̱ na juani; ná na'a̱ na ñi'ya̱ ngua cha' ndya' bi', tsa bi' ti cha' jlya ti' na cha' ngüiñá Ni lcaa cha' nu ña'a̱ na lo yuu chalyuu juani.

1 PEDRO 1:25

Pana scaa cha' nu nchcui' ycui' Ndyosi ni, tyanu cha' bi'; ná quiñu'u̱ cha' bi' tsiya' ti. Jua'a̱ nacui̱ quityi bi'. Lo'o jua'a̱ nu cha' tso'o ji'i̱ ycui' Ndyosi nu ngulu'u ya ji'i̱ ma̱, la cui' cha' bi' laca nu ná quiñu'u̱ tsiya' ti.