HEBREOS 6:10 - Chatino Tataltepec

¹⁰ Lo'o jua'a̱ liñi tsa ndu'ni ycui' Ndyosi lo'o na. Ná cjlyaa ti' Ni lcaa cha' tso'o nu cua ndyu'ni ma̱, nu lo'o nxtyucua ma̱ ji'i̱ ngu' tya'a ngusñi na cha' ji'i̱ Jesús, cha' cua quiña'a̱ xi cña ndyu'ni ma̱ cuentya ji'i̱ ngu' bi'. Xqui'ya cha' ndyu'ni ma̱ jua'a̱, bi' cha' jlo ti' xa' ñati̱ cha' ntsu'u tsa tyiquee ma̱ ji'i̱ Jesús, cha' ña'a̱ ti tya ndyu'ni ma̱ cha' tso'o lo'o ngu' juani.

HEBREOS 6:10 Referans Kwoze

SAN MATEO 10:42

Lo'o jua'a̱, si ta ñati̱ masi sca sca' ti hitya co'o ngu' cuañi' re xqui'ya cha' ngu' nu ndyaca tsa'a̱ 'na laca ngu', chañi cha' cua nguxco'o ycui' Ndyosi sca cha' tso'o nu tyacua ji'i̱ ñati̱ bi' nde loo la.

HEBREOS 13:16

La cui' jua'a̱ ná ca taja ti' ma̱ cua'ni ma̱ lcaa cha' tso'o, jua'a̱ xtyucua ma̱ ji'i̱ tya'a ñati̱ ma̱; bi' laca cña nu ndiya ti' Ni cha' cua'ni na cuentya ji'i̱ ycui' Ni.

GÁLATAS 6:10

Bi' cha' tso'o si lcaa quiya' lo'o ña'a̱ na ñi'ya̱ caca xtyucua na ji'i̱ cua ña'a̱ ca ñati̱, li' cua'ni clya na cha' xtyucua na ji'i̱ ngu' bi'. Clyo ndu'ni cha' xtyucua na ji'i̱ tya'a na, nu ngu' nu ntsu'u cha' ji'i̱ lo'o Cristo.

LOS HECHOS 10:4

Ndyutsi̱i̱ tsa Cornelio lo'o na'a̱ yu ji'i̱ xca̱ bi' li'. ―Xu'na ―nacui̱ yu―, ¿ñi'ya̱ cha' laca nti' nu'u̱ jna'? ―Cua ndyuna ycui' Ndyosi cha' nu cua nchcui' nu'u̱ lo'o Ni ―nacui̱ xca̱ bi'―. Lo'o jua'a̱ cua na'a̱ Ni cha' tso'o tsa ndu'ni nu'u̱ lo'o ngu' ti'i, bi' cha' cua ndyi'u ti' ycui' Ndyosi jinu'u̱.

1 TESALONICENSES 1:3

Ntsu'u ti' ya cha' ntsu'u tsa cha' tso'o nu ndyu'ni ma̱, cha' ntsu'u tsa tyiquee ma̱ ña'a̱ ma̱ ji'i̱ tya'a ma̱, xqui'ya cha' ngusñi ma̱ cha' ji'i̱ Jesucristo. Ndalo tsa tyiquee ma̱ xqui'ya cha' jlo ti' ma̱ cha' ntucua Jesucristo nu Xu'na na ca slo ycui' Ndyosi Sti na; bi' cha' xcui' cha' tso'o ndyu'ni ma̱, masi tlyu tsa cña.

COLOSENSES 3:17

Lcaa ña'a̱ cña nu nti' ma̱ cha' cua'ni ma̱, lcaa ña'a̱ cha' nu nti' ma̱ chcui' ma̱ lo'o ñati̱, chacuayá' ji'i̱ Jesús nu Xu'na na cua'ni ma̱ ji'i̱ lacua. Lo'o jua'a̱ la cui' hora bi' tya ma̱ xlya'be ji'i̱ ycui' Ndyosi Sti na xqui'ya Jesús.

1 TIMOTEO 6:18

Culo nu'u̱ cña ji'i̱ ngu' culiya' bi' ndi'ya̱: Xcui' cha' tso'o cua'ni ngu'; cua'ni tya'na ti' ngu' ji'i̱ xa' ñati̱, lo'o jua'a̱ tyi'u ti' ngu' ji'i̱ ngu' ti'i, cha' ta ngu' na nu lyiji ji'i̱ ngu' ti'i bi'.

SAN MARCOS 9:41

Chañi cha' nu chcui' na' lo'o cu'ma̱ juani: si ta laja ti cua ña'a̱ ca ñati̱ masi sca tasa ti hitya co'o ma̱ xqui'ya cha' ñati̱ ji'i̱ Cristo laca ma̱, nde loo la tyacua cha' tso'o ji'i̱ ñati̱ bi'.

ROMANOS 12:13

Nu lo'o lyiji sca na ji'i̱ sca ngu' tya'a ngusñi ma̱ cha' ji'i̱ Cristo, nga'a̱ cha' tya'be cha' tso'o nu ntsu'u ji'i̱ ycui' ca ma̱, cha' ta ma̱ na ji'i̱ ngu' bi', na laca nu lyiji ji'i̱ ngu'. Lcaa tyempo ta ma̱ to' tyi ma̱ cha' tyi'i̱ ñati̱ nu lijya̱ ti.

LOS HECHOS 11:29

Li' ngüiñi cha' ji'i̱ ñati̱ ji'i̱ Jesús lo'o tya'a ngu' cha' ta ngu' msta̱ ji'i̱ tya'a ti'i ti ngu', ngu' nu ndi'i̱ quichi̱ su cuentya Judea.

GÁLATAS 5:13

Cua ngusubi ycui' Ndyosi ji'i̱ ma̱ cha' caca tyi'i̱ tso'o ti ma̱ chalyuu. Tsa bi' ti cha', tii ti ti' ma̱ tyi'i̱ ma̱ chalyuu; ná clyana ma̱ cha' cuxi nu cua'ni ma̱ laja lo'o ndi'i̱ tso'o ti ma̱, cha' si'i na ndi'i̱ tso'o ti na cha' culiji na na nu ntsu'u ji'na jua'a̱ ti. Ntsu'u cha' xtyucua na ji'i̱ tya'a ñati̱ na xqui'ya cha' ntsu'u tsa tyiquee na ña'a̱ na ji'i̱ ngu', bi' cha' ndi'i̱ tso'o ti na.

LOS HECHOS 10:31

Nchcui' yu bi' lo'o na': “Cornelio”, nacui̱ yu, “cua ndyuna ycui' Ndyosi cha' nu nchcui' nu'u̱ lo'o Ni, jua'a̱ cua na'a̱ ycui' Ni cha' tso'o tsa ndu'ni nu'u̱ lo'o ngu' ti'i; bi' cha' cua ndyi'u ti' ycui' Ndyosi jinu'u̱.

SAN JUAN 13:20

Ta na' sca cha' liñi lo'o ma̱ ―nacui̱ yu―. Nu lo'o taquiya' ma̱ ji'i̱ sca ñati̱ nu ta na' cha' tya'a̱ slo ma̱, li' stu'ba laca si taquiya' ma̱ jna'; lo'o taquiya' ma̱ jna', li' stu'ba laca si taquiya' ma̱ ji'i̱ ycui' Ndyosi Sti na' nu nda jna' lijya̱a̱.

2 TIMOTEO 4:8

bi' cha' jlo ti' na' cha' ntsu'u sca cha' tso'o nu tyacua 'na; ta ycui' nu Xu'na na cha' tso'o bi' jna' nu lo'o tyalaa tsa̱ lo'o cua'ni cuayá' Ni ji'i̱ lcaa ñati̱, cha' liñi tsa ndu'ni cuayá' ycui' Ndyosi. Ta Ni cha' tso'o bi' ji'i̱ lcaa ñati̱ nu ntajatya tsa ji'i̱ Cristo ni jacua' ca̱a̱ Ni chaca quiya', xqui'ya cha' ntsu'u tsa tyiquee ngu' ña'a̱ ngu' ji'i̱ Ni; si'i jna' ti ta Ni cha' bi'.

2 CORINTIOS 9:1

Nga'aa nti' cha' chcui' la na' lo'o cu'ma̱ cuentya ji'i̱ msta̱ nu nxti'i̱ ma̱ cha' xtyucua ji'i̱ ngu' tya'a ma̱ nu ntsu'u cha' ji'i̱ lo'o Cristo,

1 JUAN 1:9

Pana taca jlya ti' na ji'i̱ ycui' Ndyosi cha' cua'ni clyu ti' Ni ji'na ji'i̱ qui'ya nu ntsu'u ji'na, nu lo'o ñii na ji'i̱ Ni cha' ntsu'u qui'ya ji'na. Tso'o tsa ndu'ni Ni lo'o na li'; hasta cuityi̱ Ni lcaa cha' cuxi nu ntsu'u ne' cresiya ji'na, xqui'ya cha' ngujuii Jesús lo crusi.

GÁLATAS 5:6

Lo'o jua'a̱ si chañi cha' stu'ba ntsu'u cha' ji'na lo'o Jesucristo, li' ná ndu'ni cha' masi ngulacua̱ na, masi ná ngulacua̱ na. Sca ti cha' ndulo tsa ji'na cha' cua'ni na, cha' xñi tso'o la na cha' ji'i̱ ycui' Ni; lo'o li' caca cua'ni na cha' tso'o ti tyu'u tyiquee na ña'a̱ na ji'i̱ tya'a ñati̱ na.

HEBREOS 10:32

Tyi'u ti' ma̱ lacua, ñi'ya̱ nu ndyaca ji'i̱ cu'ma̱ nu ngua tya tsubi' la, cua ndyaala hique ma̱ cha' ndyuna tso'o ma̱ cha' ji'i̱ ycui' Ndyosi, lo'o li' cua quiña'a̱ tsa cha' nchcube' cua ndyacua ji'i̱ ma̱ nde chalyuu. Pana ndalo tsa tyiquee ma̱ li'; ná ngua ji'i̱ nu ngu' xña'a̱ bi' tyiji̱loo ji'i̱ ma̱,

SAN MATEO 20:7

“Ná ntsu'u ñati̱ nu nti' msu juani”, nacui̱ ngu' ji'i̱. “Yaa clya ma̱ cua'ni ma̱ xi cña ne' lo'o 'na lacua”, nacui̱ xu'na msu bi' ji'i̱ ngu' li'.

SAN MATEO 25:17

Lo'o jua'a̱ ngua'ni chaca msu nu ntsu'u tucua mil cñi plata ji'i̱, ngua'ni yu ngana ña'a̱ cuayá' nu ngujui chaca tyucuaa mil cñi plata ji'i̱ yu.