Masi jua'a̱ ngua'ni ngu' cña nu ngua li', pana tlyu la cña nu ngua'ni Cristo juani, cha' ndyalú tañi ycui' yu lo'o ngujuii yu lo crusi cuentya ji'na. Xqui'ya Xtyi'i ycui' Ni, bi' cha' ngua ji'i̱ Cristo ta yu tyucui ña'a̱ ycui' ca yu, cha' sca ti quiya' cati̱ qui'ya nu ntsu'u ji'na lo'o ycui' Ndyosi; nu ycui' Cristo ni, ná ntsu'u qui'ya ji'i̱ yu tsiya' ti, bi' cha' taca cua'ni lubii Ni cresiya ji'na, nu lo'o tyi'u ti' na ñi'ya̱ nu ngua'ni Ni lo'o ndyalú tañi ycui' Ni. Li' cuityi̱ Ni lcaa cha' cuxi nu ndyu'ni ñu'u̱ tsa ji'na, jua'a̱ taca ji'na cua'ni na cña ji'i̱ ycui' Ndyosi nu lu'ú ca nde chalyuu li'.
HEBREOS 6:1 - Chatino Tataltepec1 Cua'ni yala na lacua, cha' cuna tso'o na lcaa cha' nu ntsu'u ji'i̱ Cristo; cua'ni na cha' caca na ñati̱ nu nclyacua tso'o ti ti', cha' ná tso'o si xcui' na nchcui' na ji'i̱ cha' nu ngua tsa'a̱ na tya clyo ti. Juani cua jlo tso'o ti' na macala ntucua quiya' cha' ji'i̱ Cristo: cua nchcui' na ñi'ya̱ caca tyu'utsu' na ji'i̱ cha' cuxi nu ngua'ni na tya sa'ni la, ñi'ya̱ caca xñi na cha' ji'i̱ Cristo; Gade chapit la |
HEBREOS 6:1
50 Referans Kwoze
Cu'ma̱ ngu' tya'a na, nu ntsu'u tsa tyiquee na' ña'a̱ na' ji'i̱ ma̱, jua'a̱ laca cha' nu cua nda ycui' Ndyosi lo'o na, cha' nu caca ji'na nde loo la. Bi' cha' lacua, ntsu'u cha' cua'ni tye na ji'i̱ lcaa cha' cuxi nu nti' cua'ni ñu'u̱ ji'i̱ cresiya ji'na, ji'i̱ tyucui ña'a̱ na. Lo'o jua'a̱ lye tsa cua'ni na cña cha' caca na ñati̱ ji'i̱ ycui' Ni; na laca nu cua'ni na nde chalyuu, cua'ni na ji'i̱ ñi'ya̱ nti' si cua ndu̱ ycui' Ndyosi ña'a̱ Ni ji'na.
Clyo ngulu'u na' ji'i̱ ngu' judío tya'a na nu ndi'i̱ ca quichi̱ Damasco, cha' culochu̱' ngu' ji'i̱ lcaa cha' cuxi nu ntsu'u tsa tyiquee ngu' ji'i̱ tya sa'ni la, cha' xñi ngu' cha' ji'i̱ ycui' Ndyosi li'; lo'o jua'a̱ xcui' cha' tso'o ntsu'u cha' cua'ni ngu' li', cha' ca cuayá' ti' xa' ñati̱ cha' cua nguxcutsa'a̱ Ni cresiya ji'i̱ ngu' bi'. La cui' jua'a̱ ngulu'u na' ji'i̱ ngu' Jerusalén, lo'o ji'i̱ ngu' lcaa quichi̱ nu ndi'i̱ loyuu su cuentya Judea re. Lo'o li' ngulu'u na' cha' bi' ji'i̱ ngu' xa' tsu'.
Nu lo'o ñaa jyo'o Juan bi' ni, xcui' cha' liñi nchcui' yu lo'o ma̱. Liñi tsa ngua'ni yu, pana ná ngua'ni cuentya ma̱ tsiya' ti ji'i̱ cha' nu nchcui' yu lo'o ma̱. Lo'o nu ngu' cuxi nu nxñi cñi cña loo ngu' ni, cua ndaquiya' ngu' bi' ji'i̱ cha' nu nchcui' Juan bi' li'; jua'a̱ nu cuna'a̱ calle bi', ndaquiya' ngu' ji'i̱ cha' nu nchcui' Juan. Masi cua na'a̱ ma̱ ñi'ya̱ jlya ti' nu ngu' cuxi tyiquee bi' cha' nu ngulu'u Juan, ná nchca caca tyuju'u ti' ma̱ ji'i̱ qui'ya nu ntsu'u ji'i̱ ycui' ca ma̱, xqui'ya cha' ná ngusñi ma̱ cha' nu nchcui' Juan bi' tsiya' ti.
Nu sti jo'ó nu ya̱a̱ chalyuu tiya' la bi', la cui' jua'a̱ tya'a ñati̱ ji'i̱ jyo'o Leví, nclyu'u qui'i̱ ngu' bi' ji'i̱ ngu' Israel cha' cua'ni ngu' lcaa cña nu ngulo ycui' Ndyosi ji'i̱ ngu'. Pana ná ndalo sti jo'ó bi' cua'ni tyucui cña bi', bi' cha' juani ngutu'u tucua chaca nu laca sti jo'ó nu cuentya ji'na. Ná laca yu sti jo'ó ñi'ya̱ ngua Aarón lo'o tya'a Aarón sti jo'ó, masi laca yu sca sti jo'ó nu ñi'ya̱ ngua'ni jyo'o Melquisedec nu ngua sa'ni la, la cui' jua'a̱ cua'ni yu cuentya ji'na juani.
’Liñi tsa cha' nu ta na' lo'o ma̱ juani: Cua ña'a̱ ca ñati̱ nu taquiya' ji'i̱ lcaa cha' nu chcui' na' lo'o ngu', lcaa ñati̱ nu jlya ti' ji'i̱ ycui' Ndyosi Sti na' nu nda jna' lijya̱a̱, bi' ngu' laca nu ná nga'a̱ cha' tye chalyuu tso'o nu ta ycui' Ndyosi ji'i̱ ngu' bi'. Ná cua'ni cuayá' Ni ji'i̱ ngu' bi', ná nscua cha' cajaa ngu' bi'; lcaa tyempo tyi'i̱ ngu' bi' lo'o ycui' Ndyosi ―nacui̱ Jesús ji'i̱ ngu'―.
Chañi cha' tlyu tsa cha' tso'o ji'i̱ Jesucristo nu ngusñi na. Ndi'ya̱ nchcui' cha' bi': Nu ngua sa'ni la ni, ni sca ñati̱ ná ngua cuayá' ti' ñi'ya̱ cua'ni lyaá ycui' Ndyosi ji'i̱ ngu'; pana nu juani jlo ti' na, xqui'ya cha' ngula Jesucristo chalyuu, cha' ngua ycui' Ni sca ñati̱. Lo'o jua'a̱ nchcui' Xtyi'i ycui' Ni cha' ji'i̱ yu, cha' sca ñati̱ nu lubii tsa laca yu; cua na'a̱ xca̱ ji'i̱ ycui' Ndyosi ji'i̱ Jesús, nu ñati̱ lubii bi'. Li' nclyu'u ngu' cha' ji'i̱ Jesucristo bi' ji'i̱ ñati̱ ca quiña'a̱ tsa quichi̱ tyucui ña'a̱ chalyuu; ngusñi ñati̱ lcaa quichi̱ cha' nu nchcui' ngu' ji'i̱ Ni li'. Cua ndyaa Jesús ca slo ycui' Ndyosi Sti na nde cua̱, lo'o juani tlyu tsa laca Jesús cajua.
Nu lo'o ndube ti' na ji'i̱ ycui' Ndyosi laja lo'o nga'a̱ na xñi'i̱ ti' na, li' caja ñi'ya̱ xtyanu na ji'i̱ cha' cuxi nu ndyu'ni na; clyaá na ji'i̱ nu cuxi li', nga'aa ntsu'u cha' culacua tsa ti' na li'. Pana ñati̱ nu xñi'i̱ xi ti', nu ná ndube ti' ji'i̱ ycui' Ndyosi ni, ná ntaja'a̱ ñati̱ bi' ca tyuju'u ti' ji'i̱ qui'ya nu ntsu'u ji'i̱; chcuna' chalyuu ji'i̱ ngu' bi' jua'a̱ ti li'.
Liñi tsa laca cha' nu nchcui' ycui' Ndyosi; cua'ni Ni cha' ná xtyanu na cha' bi', si jlya ti' na cha' nu nchcui' ycui' Ndyosi ndi'ya̱: “Cua nslo ycui' nu Xu'na na tilaca laca ñati̱ ji'i̱ Ni”. Lo'o chaca cha' nchcui' ndi'ya̱: “Cua ña'a̱ ca ñati̱ nu ntsu'u cha' ji'i̱ lo'o Cristo ni, ntsu'u cha' xtyanu ngu' bi' lcaa cha' cuxi”. Jua'a̱ nacui̱ quityi ji'i̱ ycui' Ndyosi.
Nu lo'o ndyuna ngu' cha' nu nchcui' Pedro lo'o ngu', nga'aa ngua chcui' tyaala ngu' bi' lo'o Pedro. Li' ngua'ni tlyu ngu' bi' ji'i̱ ycui' Ndyosi. Ndi'ya̱ nchcui' ngu' lo'o Ni li': ―Ndyosi Sti ya, tso'o tsa ndu'ni nu'u̱ lo'o ngu' xa' tsu', masi si'i ngu' judío laca ngu' bi' ―nacui̱ ngu' ji'i̱ ycui' Ndyosi―. Ndu'ni nu'u̱ cha' ca tyuju'u ti' ngu' ji'i̱ lcaa cha' cuxi nu ntsu'u ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi'.
Ni sca ñati̱ chalyuu, bilya ña'a̱ ngu' ji'i̱ ycui' Ndyosi; pana taca ca cuayá' ti' na cha' stu'ba ntsu'u tyiquee na lo'o Ni juani, nu lo'o ña'a̱ na ji'i̱ lcaa na lo'o tya'a na, cha' ntsu'u tsa tyiquee na ña'a̱ na ji'i̱ tya'a ñati̱ na. Ñi'ya̱ ntsu'u tsa tyiquee Jesucristo ña'a̱ yu ji'i̱ ñati̱ chalyuu, jua'a̱ nga'a̱ cha' cua'ni na lo'o tya'a ñati̱ na li'.
Xqui'ya Cristo, bi' cha' jlya ti' ma̱ ji'i̱ ycui' Ndyosi, cha' cua ngua'ni ycui' Ni cha' ndyu'ú Cristo chaca quiya' lo'o cua ngujuii yu. Lo'o li' nda ycui' Ndyosi sca su tso'o su tyi'i̱ Cristo, ca su tlyu su ntucua ycui' Ni. Ngua'ni Cristo cña tonu bi', cha' taca xñi ma̱ cha' ji'i̱ ycui' Ndyosi, lo'o li' taca tyu̱ ti' ma̱ cha' caca lcaa ña'a̱ cha' nu nacui̱ Ni cha' caca.
Ni sca na, ná taca cua'ni na cha' caca tyaala' ti' tyiquee ycui' Ndyosi, si ná chañi cha' jlya ti' na ji'i̱ Ni. Si nti' na cha' jyacua na ji'i̱ Ni cha' chcui' na lo'o Ni, li' nga'a̱ cha' jlya ti' na cha' lu'ú ycui' Ndyosi; nga'a̱ cha' jlya ti' na cha' taca xtyucua Ni ji'na lo'o jña na sca cha' ji'i̱ Ni.
Lo'o yu Epafras tya'a quichi̱ tyi ma̱, nda yu xlyo ni'i̱ ji'i̱ ma̱; stu'ba ti ndya'a̱ yu lo cña ji'i̱ Jesucristo lo'o ya. Lcaa tsa̱ ndijña tsa yu cha' clyu ti' ji'i̱ ycui' Ndyosi cuentya ji'i̱ cu'ma̱, ndijña yu chacuayá' ji'i̱ ycui' Ni cha' ná tya'a̱chu̱' ma̱ tsiya' ti cha' ji'i̱ Ni. Ndi'ya̱ nti' yu, cha' tyucui tyiquee ma̱ tsiya' ti cua'ni ma̱ na laca nu nti' Ni cha' cua'ni ma̱ nde lo yuu chalyuu.
bi' cha' nda ycui' Ndyosi chalyuu ji'na chaca quiya', xqui'ya cha' cua ndyu'ú Cristo chaca quiya'. Cua ndye chalyuu ji'na ngua ti' na nquicha', xqui'ya cha' ná ndaquiya' na ji'i̱ cha' nu nchcui' ycui' Ndyosi; pana xqui'ya cha' xcui' tya'na tsa ti' Ni ña'a̱ Ni ji'na, bi' cha' cua ngulaá na ji'i̱ nu cuxi, cha' cua ngüityi̱ Ni qui'ya nu ntsu'u ji'na.
Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.
―Tso'o si caca tyuju'u ti' ma̱ ji'i̱ cha' cuxi, lcaa cha' cuxi nu ntsu'u tyiquee ma̱ xtyanu ma̱ ji'i̱ li' ―nacui̱ Pedro ji'i̱ ngu'―. Lo'o jua'a̱ tyucuatya ngu' ji'i̱ ma̱ chacuayá' ji'i̱ Jesús li'. Cuityi̱ Ni lcaa qui'ya nu ntsu'u ji'i̱ ma̱ li', jua'a̱ ta Ni Xtyi'i ycui' Ni cha' tyanu Ni ne' cresiya ji'i̱ ma̱.
cua laca yu ñi'ya̱ laca sca nu qui'yu nu ngüiñá sca ni'i̱. Tso'o tsa ngüiñi tyuu su ndu̱ quiya' ni'i̱ ji'i̱, cha' chu̱' quee tsiya' ti nscua quiya' ni'i̱ bi'. Li' lye tsa ngua'ya tyo. Lo'o cua ndyalaa hitya yuu ca quiya' ni'i̱ bi', cua xlya'ba ti ji'i̱ ni'i̱; pana ná ngua ji'i̱ hitya yuu bi' xlyú ji'i̱ ni'i̱ bi', cha' tachaa tsa ndu̱ quiya' ni'i̱ chu̱' quee bi'.
Piblisite