HEBREOS 5:12 - Chatino Tataltepec

¹² Tya sa'ni tsa ngua lo'o ndyuna ma̱ cha' ji'i̱ Cristo tya clyo; cua nteje tacui tyu̱u̱ tsa tyempo, ña'a̱ cuayá' taca caca ma̱ mstru cuentya ji'i̱ Cristo nquicha', pana ña'a̱ ti ndi'i̱ ma̱ juani. Tya nti' cha' culu'u la ngu' ji'i̱ ma̱ tya chaca quiya' ñi'ya̱ ntucua quiya' cha' ji'i̱ ycui' Ndyosi, la cui' cha' nu ngua ti' Ni cha' cacha' Ni ji'i̱ ñati̱ chalyuu. Ñi'ya̱ ndu'ni sca cubi' nu tya ntyi', cha' bilya cacu bi' tyaja, jua'a̱ ndyu'ni ma̱, cha' ná nchca ca cuayá' ti' ma̱ cha' ji'i̱ ycui' Ndyosi bi'.

HEBREOS 5:12 Referans Kwoze

HEBREOS 6:1

Cua'ni yala na lacua, cha' cuna tso'o na lcaa cha' nu ntsu'u ji'i̱ Cristo; cua'ni na cha' caca na ñati̱ nu nclyacua tso'o ti ti', cha' ná tso'o si xcui' na nchcui' na ji'i̱ cha' nu ngua tsa'a̱ na tya clyo ti. Juani cua jlo tso'o ti' na macala ntucua quiya' cha' ji'i̱ Cristo: cua nchcui' na ñi'ya̱ caca tyu'utsu' na ji'i̱ cha' cuxi nu ngua'ni na tya sa'ni la, ñi'ya̱ caca xñi na cha' ji'i̱ Cristo;

1 PEDRO 2:2

Ñi'ya̱ laca sca cubi' cuañi' nu ngula ca ti, jua'a̱ laca cu'ma̱ cuentya ji'i̱ ycui' Ndyosi, cha' tsubi' ti ngusñi ma̱ cha' ji'i̱ ycui' Ni. Lu'ba ti ntyi' cubi' cuañi' cha' ntyute' tsa; si ná cati' lu'ba ti, ná caluu cubi' tsiya' ti. Lo'o jua'a̱ cu'ma̱ ni, tso'o la si cua'ni cña ti' ma̱ cha' ca tsa'a̱ la ma̱ cha' ji'i̱ ycui' Ndyosi, cha' ñi'ya̱ nti' styi', jua'a̱ laca cha' ji'i̱ ycui' Ndyosi cuentya ji'i̱ ma̱. Cua'ni bi' cha' caca nguula la ti' tyiquee ma̱ cuentya ji'i̱ ycui' Ndyosi, cha' taca clyaá ma̱ ji'i̱ cha' cuxi.

HEBREOS 5:13

Tya cuañi' tsa ngu' nu tya ntyi'; la cui' jua'a̱ laca cu'ma̱, cha' ná jlo ti' ma̱ tsiya' ti ñi'ya̱ nga'a̱ cha' cua'ni ma̱ lo'o ngua tso'o cresiya ji'i̱ ma̱ cuentya ji'i̱ Jesús, masi ntsu'u cha' tso'o nu nga'a̱ cha' cua'ni ma̱ juani.

COLOSENSES 3:16

Nga'a̱ cha' tyanu tyucui cha' ji'i̱ Cristo ca ne' cresiya ji'i̱ ma̱. Tso'o tsa ndyu'u cha' bi', bi' cha' tso'o ti culu'u ma̱ cha' bi' ji'i̱ tya'a ma̱ ña'a̱ cuayá' nu cuna tso'o lcaa ngu'. La cui' jua'a̱ cula tu'ba ma̱ lcaa lo ji̱i̱ nu ntsu'u ji'i̱ ycui' Ndyosi, masi ji̱i̱ salmo nu nscua lo quityi nu ngua sa'ni, masi cua ña'a̱ ca ji̱i̱ nu ca'ya hique ma̱ nu nchcui' cha' ji'i̱ ycui' Ndyosi; cula tu'ba ma̱ ji̱i̱ cha' cuna ycui' Ndyosi, xqui'ya cha' tso'o tsa ntsu'u tyiquee ma̱ ña'a̱ ma̱ ji'i̱ ycui' Ni.

SAN MATEO 17:17

―Ná jlya ti' cu'ma̱ tsiya' ti ―nacui̱ Jesús ji'i̱ ngu' bi'―. Cuxi tsa cresiya ji'i̱ ma̱. Nga'aa tso'o tyanu na' slo cu'ma̱, nga'aa talo na' ji'i̱ ma̱ tsiya' ti. Pana ca̱a̱ lo'o ma̱ ji'i̱ nu quicha jua slo na' juani.

1 PEDRO 4:11

Culu'u ma̱ cha' ji'i̱ ñati̱, si bi' laca cña nu cua nda Ni ji'i̱ ma̱ cha' cua'ni ma̱; culu'u ma̱ tsa ña'a̱ cha' nu nti' ycui' Ndyosi chcui' Ni lo'o ngu'. Lo'o jua'a̱ xtyucua ma̱ ji'i̱ tya'a ñati̱ ma̱ lo'o tyucui juersa nu nda ycui' Ndyosi ji'i̱ ma̱, si bi' laca cña nu cua nda Ni ji'i̱ ma̱ cha' cua'ni ma̱. Nu lo'o ña'a̱ ngu' cña tso'o nu ndyu'ni ma̱ bi', li' cua'ni tlyu ngu' ji'i̱ ycui' Ndyosi xqui'ya Jesucristo. Lo'o li' ná nga'a̱ cha' tye cha' cua'ni tlyu ngu' ji'i̱ Cristo bi', cha' laca Cristo loo tsiya' ti. Jua'a̱ caca cha' tu'ni.

1 CORINTIOS 14:19

Pana nu lo'o ndyu'u ti'i̱ na cha' cua'ni tlyu na ji'i̱ ycui' Ndyosi, nti' na' cha' tso'o la si chcui' na' lo'o ma̱ sca tucua ti si'yu cha' nu nchca cuayá' ti' ma̱ cha' ca tsa'a̱ la ma̱ li'; ná ndulo cha' ji'i̱ ma̱ masi chcui' na' tii mil tya'a si'yu cha' nu nchcui' xa' ñati̱ nu ná nduna ma̱ ji'i̱ tsiya' ti, ná sca cha' laca bi'.

ROMANOS 3:2

Ndi'ya̱ laca sca cha' tso'o nu ntsu'u ji'na cha' laca na ngu' judío: Sca ti lo'o ngu' judío tya'a na cua nda ycui' Ndyosi cha' ji'i̱ Ni tya clyo.

LOS HECHOS 7:38

La cui' Moisés bi' nga'a̱ lo'o ngu' ca su ndyu'u ti'i̱ ngu' cla'be loyuu btyi bi'. Li' nchcui' xca̱ ji'i̱ ycui' Ndyosi lo'o nu cusu' bi' ca lo xlya ca'ya su naa Sinaí. Lo'o jua'a̱ nda Moisés cha' bi' lo'o lcaa ngu' bi', la cui' jyo'o cusu' ji'na laca ngu' bi'. Nu cha' nu cua nchcui' Moisés lo'o ngu' bi' li', ná nga'a̱ cha' tye cha' bi' tsiya' ti; bi' cha' tya ntsu'u cha' nu nguscua jyo'o Moisés bi', cha' ca cuayá' ti' na ji'i̱ juani.

SAN MARCOS 9:19

―Ná jlya ti' cu'ma̱ tsiya' ti ―nacui̱ Jesús ji'i̱ ngu' bi'―. Cuxi tsa cresiya ji'i̱ ma̱. Nga'aa tso'o tyanu na' slo cu'ma̱, nga'aa talo na' ji'i̱ ma̱ tsiya' ti. Pana ca̱a̱ lo'o ma̱ ji'i̱ nu quicha jua slo na' juani.

FILIPENSES 3:1

Cu'ma̱ tya'a ngusñi na cha' ji'i̱ Jesús, juani cua nti' tsa na' cha' ca chaa ti' ma̱ xqui'ya ycui' nu Xu'na na. Ná ndu'ni cha' 'na, masi tya chaca quiya' chcui' na' la cui' tya'a cha' nu nguscua na' tya clyo; ná tyiquee' xtyucua na' xi ji'i̱ ma̱, si chcui' na' chaca quiya'.

1 CORINTIOS 14:20

Cu'ma̱ tya'a ngusñi na cha' ji'i̱ Cristo, tso'o la si ná jlo ti' ma̱ tsiya' ti na ca laca sca cha' cuxi; ñi'ya̱ laca nu sube, jua'a̱ caca ma̱ cha' ná jlo ti' ngu' sube cha' bi'. Pana nga'aa culacua ti' ma̱ ñi'ya̱ nu nclacua ti' nu sube; juani culacua tso'o ti' ma̱, ñi'ya̱ nclacua ti' ngu' cusu'.

GÁLATAS 4:3

La cui' jua'a̱ laca ji'na lo'o Jesús. Lo'o tya lyiji cuna na cha' ji'i̱ Jesús, caca ñacui̱ na cha' tya sube na, xqui'ya cha' tya ndu'ni na cña nu ndatsaa cua ña'a̱ ca jo'ó ji'na, ñi'ya̱ nu ndu'ni ti xa' ñati̱.

HEBREOS 5:11

Cua quiña'a̱ tsa cha' nti' ya chcui' ya lo'o ma̱ cha' ji'i̱ Cristo, cha' quiña'a̱ tsa cha' tya lyiji ca cuayá' ti' ma̱. Pana ná nchca culu'u tso'o ya lcaa cha' bi' ji'i̱ ma̱; tlyu tsa cña caca, xqui'ya cha' ycui' cu'ma̱ ná ndyu'ni yala ma̱ cha' ca cuayá' ti' ma̱ cha' bi'.

HEBREOS 10:32

Tyi'u ti' ma̱ lacua, ñi'ya̱ nu ndyaca ji'i̱ cu'ma̱ nu ngua tya tsubi' la, cua ndyaala hique ma̱ cha' ndyuna tso'o ma̱ cha' ji'i̱ ycui' Ndyosi, lo'o li' cua quiña'a̱ tsa cha' nchcube' cua ndyacua ji'i̱ ma̱ nde chalyuu. Pana ndalo tsa tyiquee ma̱ li'; ná ngua ji'i̱ nu ngu' xña'a̱ bi' tyiji̱loo ji'i̱ ma̱,