HEBREOS 3:5 - Chatino Tataltepec

⁵ Tso'o tsa cña nu ngua'ni nu Moisés bi' lo'o ngua yu cña sa'ni, cha' cuentya ji'i̱ ñati̱ ji'i̱ ycui' Ndyosi nde chalyuu ngua yu cña; nchcui' tsa jyo'o bi' lcaa cha' nu ngua ti' ycui' Ndyosi cha' chcui' Ni lo'o ngu' bi'.

HEBREOS 3:5 Referans Kwoze

HEBREOS 3:2

Ndaquiya' Jesús lcaa cña nu ngulo ycui' Ndyosi Sti yu ji'i̱ yu, ndyi'u ti' yu ji'i̱ ycui' Ni nu nguane ji'i̱ yu cha' ca̱a̱ yu nde chalyuu tya clyo. La cui' jua'a̱ ndaquiya' jyo'o Moisés ji'i̱ cña nu ngulo ycui' Ndyosi ji'i̱ nu ngua sa'ni bi'.

LOS HECHOS 28:23

Li' ngüiñi cha' ji'i̱ ngu' ni tsa̱ tyu'u ti'i̱ lcaa ngu' slo Pablo. Tsa̱ bi' quiña'a̱ tsa ñati̱ ndyu'u ti'i̱ slo yu. Tyucui tsa̱ ngulu'u yu ji'i̱ ngu'; ngulu'u yu ñi'ya̱ nu nclyo ycui' Ndyosi cña, ñi'ya̱ ngua cha' nu nguscua jyo'o Moisés cuentya ji'i̱ Ni, ñi'ya̱ ngua cha' nu nguscua jyo'o cusu' nu ngua tu'ba ji'i̱ Ni lo quityi lo'o nchcui' ngu' cha' ji'i̱ Jesús.

HEBREOS 8:5

Pana nu xa' la sti jo'ó bi' ni, ñati̱ nu cajaa ti laca ngu' bi'; cua laca ti cña ndu'ni ngu'. Xqui'ya ngu' bi' nchca cuayá' ti' na cha' tso'o la tsiya' ti sti jo'ó laca Jesús, nu ntucua ca slo ycui' Ndyosi. Lo'o jua'a̱ nu chcua'ya late' nu ngüiñá jyo'o Moisés su ngua'ni tlyu jyo'o cusu' ji'na ji'i̱ ycui' Ndyosi nu ngua li', ndi'ya̱ nchcui' Ni lo'o nu cusu' bi' cuentya ji'i̱ chcua'ya bi': “Cui'ya nu'u̱ cuentya cha' cuiñá ma̱ ni'i̱ bi' ñi'ya̱ nu ngulu'u na' ji'i̱ ma̱ cha' cuiñá ma̱ ji'i̱, nu lo'o ngutu̱ nu'u̱ nchcui' nu'u̱ lo'o na' lo xlya ca'ya cua̱ bi'”, nacui̱ Ni. Pana sca na nu culiji yu'u ti ngua bi', tso'o la tsiya' ti su ntucua Ni nde cua̱.

1 TIMOTEO 1:12

Ndya tsa na' xlya'be ji'i̱ Jesucristo nu Xu'na na cha' ngua'ni Ni cha' caca cua'ni na' cña ji'i̱ Ni; ndya na' xlya'be ji'i̱ Ni cha' ngusubi Ni jna' cha' cua'ni na' cña ji'i̱ Ni, cha' jlo ti' Ni cha' ndaquiya' na' ji'i̱ Ni.

HEBREOS 9:24

Bi' cha' nga'aa ndyaa Cristo nde ne' laa nu ngüiñá ñati̱ nde chalyuu ti, masi ntucua bi' cuentya ji'i̱ ycui' Ndyosi; na cua ndyaa liñi Ni ca slo ycui' Ndyosi ca nde cua̱. Ca bi' ntucua Ni juani, cha' chcui' lo'o ycui' Ndyosi cuentya ji'na.

ROMANOS 3:21

Lo'o juani cua ngutu'u tucua sca cha' cucui nde chalyuu, ná stu'ba tsiya' ti cha' bi' lo'o cha' cusu' bi'. Lo'o nclyu'u ycui' Ndyosi cha' bi' ji'na, li' caca cuayá' ti' na ñi'ya̱ caca ca tso'o cresiya ji'na cuentya ji'i̱ ycui' Ni. Cua nscua xi cha' nu nchcui' ji'i̱ cha' bi' lo quityi cusu' bi', masi lo quityi nu nguscua jyo'o cusu' nu ngua tu'ba ji'i̱ ycui' Ndyosi nchcui' Ni lo'o ñati̱ sa'ni.

SAN JUAN 5:39

Lcaa tsa̱ nchcui' tsa ma̱ lo quityi cusu' ji'i̱ ycui' Ndyosi; nti' ma̱ cha' lo'o chcui' ma̱ lo quityi bi', li' caja chalyuu nu ná nga'a̱ cha' tye ji'i̱ ma̱. Chañi cha' nu nscua lo quityi bi', jua'a̱ taca tyuloo ñati̱ jna' lo'o chcui' ngu' lo quityi bi'.

SAN LUCAS 24:44

Lo'o ti nchcui' yu lo'o ngu' li': ―Cha' nu ngua ca ti 'na, bi' laca cha' nu cua ndacha' na' ji'i̱ ma̱ lo'o tya ndi'i̱ na' lo'o cu'ma̱ tya tsubi' la ―nacui̱ yu―. Cua nacui̱ na' ji'i̱ ma̱ cha' nga'a̱ cha' caca 'na lcaa cha' nu cua nscua cuentya 'na lo quityi nu nguscua jyo'o Moisés, lo'o jua'a̱ lo quityi nu nguscua jyo'o ngu' nu ngua tu'ba ji'i̱ ycui' Ndyosi nu ngua sa'ni, lo'o jua'a̱ lo quityi Salmos nscua cha' bi'.

SAN LUCAS 24:27

Li' nguxana Jesús ngulu'u yu cha' ji'i̱ ngu', ña'a̱ cha' nu cua nscua lo quityi cusu' cha' ji'i̱ ycui' yu. Nguxana ngu' lo'o quityi nu nguscua jyo'o Moisés, lo'o li' nchcui' ngu' lo lcaa quityi nu nguscua ngu' nu ngua tu'ba ji'i̱ ycui' Ndyosi nu ngua sa'ni.

1 CORINTIOS 4:2

Lo'o ñati̱ nu cui'ya loo sca cña ni, lcaa tsa̱ nga'a̱ cha' tyi'u ti' ngu' ji'i̱ lcaa cña nu culo xu'na ngu' ji'i̱ ngu'.

LOS HECHOS 7:37

La cui' Moisés ngua nu nchcui' lo'o ngu' bi' ndi'ya̱: “Cua ngulo ycui' Ndyosi cña jna' cha' ta na' cha' ji'i̱ Ni lo'o ma̱, la cui' jua'a̱ culo Ni cña ji'i̱ chaca ngu' tya'a na nde loo la”, nacui̱ nu Moisés bi' ji'i̱ ngu' nu ngua li'.

SAN LUCAS 12:42

Li' nguxacui̱ Jesús cha' ji'i̱ yu: ―¿Ha ntsu'u cu'ma̱ nu tyucui tyiquee ma̱ ntaja'a̱ ma̱ cua'ni ma̱ cña 'na? Ndi'ya̱ cua'ni ma̱ lacua: sca msu nu tso'o ni, ta xu'na yu cña ji'i̱ yu cha' caca yu loo ne' ni'i̱ ji'i̱ xu'na yu; culo xu'na yu cña ji'i̱ yu cha' xacu yu ji'i̱ lcaa ngu' nu ndi'i̱ ni'i̱ bi'.

SAN MATEO 25:21

“Tso'o tsa cña nu ngua'ni nu'u̱”, nacui̱ xu'na msu bi' ji'i̱. “Sca msu tso'o laca nu'u̱, cha' tso'o tsa ndaquiya' nu'u̱ ji'i̱ cha' 'na. Sca cña sube ti nda na' jinu'u̱ tsubi', pana ta na' cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na bi' li'.

SAN MATEO 24:45

’¿Ha ntsu'u ngu' cu'ma̱ nu tyucui tyiquee ma̱ ntaja'a̱ ma̱ cua'ni ma̱ cña 'na? Ndi'ya̱ cua'ni ma̱ lacua: Sca msu nu tso'o ni, ta xu'na yu cña ji'i̱ yu cha' caca yu loo ne' ni'i̱ ji'i̱ xu'na yu; culo xu'na yu cña ji'i̱ yu cha' xacu yu ji'i̱ lcaa ngu' nu ndi'i̱ ni'i̱ bi'.

HEBREOS 1:1

Nu ngua tya sa'ni la, tyu̱u̱ tsa quiya' cua nchcui' ycui' Ndyosi lo'o jyo'o cusu' ji'na, quiña'a̱ xi cha' nda Ni lo'o jyo'o bi'; cua nda ycui' Ndyosi cha' lo'o jyo'o bi', cha' chcui' ngu' lo'o lcaa tya'a quichi̱ tyi ngu'.

HEBREOS 3:4

Cua ña'a̱ ca ni'i̱ nu ndiñá ñati̱ ni, cua ntsu'u xu'na ni'i̱ bi'; pana ycui' Ndyosi ngüiñá lcaa ca na, lo'o lcaa ca chalyuu, lo'o lcaa ñati̱ nu ndi'i̱ chalyuu.

APOCALIPSIS 15:3

Ndyula tu'ba ngu' sca ji̱i̱ nu cua ndyula tu'ba jyo'o Moisés nu ngua sa'ni, la cui' Moisés nu ngua'ni cña ji'i̱ ycui' Ndyosi; lo'o nu ñi'ya̱ ña'a̱ xlya' bi' ndyula tu'ba la cui' ji̱i̱ bi'. Ndi'ya̱ nchcui' ji̱i̱ bi': Ndyosi Xu'na ya, lcaa cña nchca jinu'u̱; tlyu tsa cña ndu'ni nu'u̱, hasta ndube tsa ti' lcaa ñati̱ ji'i̱ cña bi'. Xcui' ndu'ni liñi nu'u̱ lo'o ñati̱ chalyuu, chañi tsa laca lcaa cha' nu nchcui' nu'u̱ lo'o ñati̱. Sca ti nu'u̱ laca Xu'na lcaa ñati̱ tyucui ña'a̱ chalyuu.