HEBREOS 3:1 - Chatino Tataltepec

¹ Cu'ma̱ tya'a ngusñi na cha' ji'i̱ Cristo, cu'ma̱ nu cua ngusubi ycui' Ndyosi ji'i̱ ma̱, culacua tso'o ti' ma̱ tilaca laca Jesucristo. Cua nda ycui' Ndyosi Sti yu ji'i̱ yu cha' ya̱a̱ yu nde chalyuu, lo'o nu juani laca yu ñi'ya̱ laca sti jo'ó nu laca loo la cuentya ji'na, cha' ngusñi na cha' ji'i̱ ycui'.

HEBREOS 3:1 Referans Kwoze

2 TIMOTEO 1:9

cha' ycui' Ndyosi laca nu ngua'ni lyaá ji'na; cua ngusubi Ni ji'na cha' cua'ni na cña nu nti' Ni cha' cua'ni na. Ntaja'a̱ Ni cua'ni lyaá Ni ji'na cha' tso'o tyiquee ti Ni, masi si'i xqui'ya cha' tso'o nu ngua'ni ycui' ca na. Ntsu'u tsa tyiquee Ni ña'a̱ Ni ji'na; jua'a̱ laca cha' nu ngulu'u Jesucristo ji'na, cha' ngua ti' ycui' Ndyosi cua'ni Ni cha' tso'o lo'o na nu lo'o tya lyiji cuiñá Ni chalyuu.

FILIPENSES 3:14

Bi' cha' lacua, liñi tyucui̱i̱ nxñi na' cha' jyacua na' ji'i̱ nu cha' tlyu bi', cha' bi' laca nu cua ngua'ni cho'o ycui' Ndyosi cuentya ji'na ca su ntucua ycui' Ni. Taca caja cha' bi' ji'na ca li', xqui'ya cha' cua ngua stu'ba cha' ji'na lo'o Jesucristo.

HEBREOS 7:26

Xñi na cha' ji'i̱ Jesús lacua; bi' laca sti jo'ó nu laca loo la, nu chañi cha' taca xtyucua ji'na. Ñati̱ lubii tsiya' ti laca Ni, cha' ná ntsu'u cha' cuxi, ná ntsu'u qui'ya ji'i̱ Ni. Xa' ña'a̱ laca Jesús, nu ná nda ycui' Ndyosi chacuayá' cha' tyanu yu slo ñati̱ chalyuu nu ndu'ni tsa cha' cuxi; cua nda Sti yu su tyucua yu la cui' su tlyu ca su ntucua ycui' Ndyosi Sti yu.

EFESIOS 4:1

Preso laca na' juani xqui'ya cha' nda na' cha' ji'i̱ nu Xu'na na lo'o ñati̱. Pana nchcui' na' lo'o ma̱ cha' tso'o ti cua'ni ma̱ lo'o xa' ñati̱; ñi'ya̱ nu nchcui' cha' ji'i̱ ycui' Ndyosi nu ngua tsa'a̱ ma̱ tya lo'o ngusubi Ni ji'i̱ ma̱ tya clyo, la cui' jua'a̱ cua'ni ma̱ lo'o xa' ñati̱.

1 PEDRO 2:9

Pana cu'ma̱ ni, cua ngusubi ycui' Ndyosi ji'i̱ cu'ma̱ cha' caca ma̱ ña'a̱ tsaca taju ñati̱ nu ndyu'ni tlyu ji'i̱ ycui' Ni. Laca ma̱ ñi'ya̱ laca sca latya sti jo'ó nu cuentya ji'i̱ ycui' Ndyosi nu laca loo tsiya' ti; ñi'ya̱ tsaca taju ñati̱ lubii laca ma̱ cha' cua'ni tlyu ma̱ ji'i̱ ycui' Ndyosi lcaa tsa̱. Ndu'ni Ni lo'o ma̱: “Ñati̱ 'na laca ma̱”, nacui̱ Ni. Bi' cha' nti' tsa Ni cha' chcui' ma̱ lo'o lcaa ñati̱ lcaa ña'a̱ cha' tso'o nu ngua'ni ycui' Ndyosi lo'o ma̱; cua ngulo Ni ji'i̱ ma̱ ji'i̱ chalyuu cuxi su talya tsa ña'a̱, cha' tya'a̱ ma̱ ca su ndubi tsa xee ji'i̱ ycui' Ni.

HEBREOS 2:17

Bi' cha' lacua, stu'ba ti ntsu'u cha' ji'i̱ Jesús lo'o ñati̱ ji'i̱ ycui' nde chalyuu. Ngujuii yu lo crusi cuentya ji'na, lo'o juani ntucua yu ca slo ycui' Ndyosi cha' chcui' yu lo'o Ni, cha' cuityi̱ Ni qui'ya nu ntsu'u ji'na. Juani laca Jesús ñi'ya̱ laca sca sti jo'ó nu laca loo la nu ndyi'u tsa ti' ji'na, nu jua'a̱ tso'o tsa ndu'ni tya'na ti' ji'na.

HEBREOS 10:21

Cua ntsu'u cha' ji'na lo'o nu Jesús bi', nu sti jo'ó nu laca loo la, cha' ycui' laca nu ndi'ya cña loo ji'i̱ lcaa na cuentya ji'i̱ ycui' Ndyosi Sti yu.

EFESIOS 4:4

Lcaa na nu ngusñi na cha' ji'i̱ Cristo, sca ti ñati̱ laca na, sca ti Xtyi'i ycui' Ndyosi ndi'i̱ lo'o na; ndu̱ ti' na cha' stu'ba ti tyacua cha' ji'na chalyuu ca nde loo la, bi' cha' cua ngusubi Ni ji'na.

1 TESALONICENSES 2:12

Nguxtyucua ya ji'i̱ ma̱ cha' tyucui tyiquee ma̱ cua'ni ma̱ ña'a̱ cha' tso'o nu nti' ycui' Ndyosi cha' cua'ni na nde chalyuu, cha' jua'a̱ xñi ma̱ cha' ji'i̱ ycui' Ndyosi cha' tsaa ma̱ ca su tlyu su xee tsa su laca Ni loo.

1 CORINTIOS 9:23

Jua'a̱ ndu'ni na' lcua ti se'i̱ su ndya'a̱ na', cha' nchcui' na' lo'o ngu' cha' tso'o ji'i̱ Jesús. Cua nti' na' cha' ñi'ya̱ ndyaca tso'o ne' cresiya 'na xqui'ya cha' bi', la cui' jua'a̱ caca tso'o ne' cresiya ji'i̱ lcaa ñati̱.

2 TIMOTEO 2:7

Culacua xi ti' nu'u̱ ji'i̱ cha' nu ngulu'u ca ti na' jinu'u̱, lo'o jua'a̱ xtyucua ycui' nu Xu'na na jinu'u̱ cha' ca cuayá' ti' nu'u̱ lcaa cha' bi'.

1 TIMOTEO 6:12

Tyucui tyiquee nu'u̱ cua'ni nu'u̱ cña ji'i̱ ycui' nu Xu'na na, xqui'ya cha' ngusñi tso'o nu'u̱ cha' ji'i̱ Ni. Cua jlo ti' nu'u̱ cha' ná nga'a̱ cha' tye chalyuu jinu'u̱, cha' ngusubi ycui' Ndyosi jinu'u̱, lo'o li' cua nda nu'u̱ cha' lo'o tyu̱u̱ tya'a ñati̱ ñi'ya̱ ngua lo'o ngusñi nu'u̱ cha' ji'i̱ Jesucristo; si'i sca cha' cuaana ti ngua bi'.

ROMANOS 15:8

Cua ñaa Cristo cha' cua'ni lyaá yu ji'i̱ ngu' judío, ñi'ya̱ nu ngüiñi cha' ji'i̱ ycui' Ndyosi lo'o jyo'o cusu' ji'i̱ ya sa'ni la; caca cuayá' ti' na jua'a̱ cha' liñi tsa cha' nu nda Ni lo'o jyo'o cusu' bi'.

HEBREOS 2:11

Na cua ngua'ni lubii Jesús ji'i̱ cresiya ji'i̱ ñati̱ chalyuu, bi' cha' juani laca ycui' Ndyosi Sti na; lcaa na nu cua ngua lubii cresiya ji'na xqui'ya Jesús ni, ntsu'u sca ti Sti na lo'o ycui' Jesús, cha' laca ycui' Ndyosi Sti na juani. Lo'o jua'a̱ ná ndube ti' Jesús, nchcui' yu cha' tya'a ycui' yu laca na.

SAN JUAN 20:21

Chaca quiya' nchcui' Jesús lo'o ngu' li': ―Ti̱ ti tyi'i̱ tyiquee ma̱, ná culacua tsa ti' ma̱ ―nacui̱ yu ji'i̱ ngu'―. Ñi'ya̱ lo'o nda Sti na' 'na lijya̱a̱ chalyuu, jua'a̱ ta na' ji'i̱ ma̱ cha' tsaa ma̱ tyucui ña'a̱ chalyuu.

JUDAS 1:1

Judas naa na', la cui' tya'a Jacobo; cña laca na' cuentya ji'i̱ Jesucristo. Nscua na' quityi re cha' tsaa ca slo lcaa cu'ma̱ nu ndaquiya' ma̱ ji'i̱ ycui' Ndyosi Sti na, cha' cua ngusubi Ni ji'i̱ ma̱. Ycui' Ndyosi laca nu ngua'ni lubii ji'i̱ cresiya ji'i̱ ma̱, lo'o ña'a̱ ti tya cña'a̱si̱i̱ Ni ji'i̱ ma̱ juani xqui'ya Jesucristo.

HEBREOS 3:14

Lcaa na lo'o tya'a na, tya ntsu'u cha' ji'na lo'o Cristo si ña'a̱ ti xñi na cha' ji'i̱ Ni ña'a̱ cuayá' nu tye chalyuu ji'na, la cui' ñi'ya̱ lo'o jlya ti' na ji'i̱ yu nu ngua tya clyo.

1 TIMOTEO 6:2

Ñati̱ nu laca msu nu cua ngüi'ya tya'a ñati̱ ji'i̱ Jesucristo sa'ni la ni, ná tso'o si cua'ni tyixi msu bi' lo'o xu'na ngu', cha' stu'ba ntsu'u tyiquee ngu' lo'o Jesucristo; ntsu'u cha' lye la cua'ni chi̱ msu bi' loo xu'na ngu', tso'o la cua'ni msu bi' cña ji'i̱ xu'na ngu', cha' nu tya'a ngusñi ngu' cha' ji'i̱ Jesús laca ngu' juani, lo'o jua'a̱ ntsu'u tyiquee ngu' ña'a̱ ngu' ji'i̱ tya'a ngu'. Stu'ba ti ngusñi ngu' cha' ji'i̱ Jesucristo, bi' cha' culu'u nu'u̱ cha' bi' ji'i̱ ngu', lo'o jua'a̱ culo nu'u̱ cña ji'i̱ ngu' cha' cua'ni ngu' lcaa lo cha' nu nscua lo quityi re.

2 TESALONICENSES 2:14

Cua ngusubi Ni ji'i̱ ma̱, bi' cha' ndyuna ma̱ cha' tso'o ji'i̱ Jesucristo nu ngulu'u ya ji'i̱ ma̱; nti' Ni cha' stu'ba ti tyi'i̱ ma̱ lo'o Jesucristo nu Xu'na na ca su tlyu su xee tsa su ndi'i̱ ycui'.

2 TESALONICENSES 1:11

Bi' cha' lcaa tsa̱ nchcui' ya lo'o ycui' Ndyosi Sti na cha' cua'ni Ni cña ne' cresiya ji'i̱ ma̱, cha' tso'o ti cua'ni ma̱ cña nu nda Ni ji'i̱ ma̱ tya lo'o ngusubi Ni ji'i̱ ma̱. Nchcui' ya lo'o Ni cha' xtyucua Ni ji'i̱ ma̱, cha' jua'a̱ cua'ni lyiji ma̱ lcaa cha' tso'o nu nclyacua ti' ma̱ cha' cua'ni ma̱ cuentya ji'i̱ ycui' Ni, lcaa lo cha' tso'o nu ndyu'ni ma̱ xqui'ya cha' ngusñi ma̱ cha' ji'i̱ ycui' Ndyosi.

1 TESALONICENSES 5:27

Nde cña nu culo na' ji'i̱ ma̱ cha' cua'ni ma̱ cuentya ji'i̱ ycui' nu Xu'na na, cha' chcui' ma̱ lcaa cha' nu nscua lo quityi re ña'a̱ cuayá' cuna lcaa ngu' tya'a na.

COLOSENSES 3:12

Ñati̱ ji'i̱ ycui' Ndyosi laca cu'ma̱ lacua; na cua ngusubi Ni ji'i̱ ma̱, xqui'ya cha' ntsu'u tsa tyiquee Ni ña'a̱ Ni ji'i̱ ma̱. Bi' cha' ntsu'u cha' cua'ni tya'na ti' ma̱ ji'i̱ xa' ñati̱; tso'o ti cua'ni ma̱ lo'o ngu', ni ná cua'ni tyucuaa ti' ma̱ lo'o ngu', masi tiya' ti chcui' ma̱ lo'o ngu', jua'a̱ talo tsa tyiquee ma̱ ji'i̱ ngu'.

COLOSENSES 1:22

xqui'ya cha' tyucui ña'a̱ ycui' Cristo Sñi' Ni, nchcube' tsa yu lo'o ndyujuii ngu' ji'i̱ lo crusi. Jua'a̱ ngua'ni Ni tya li' cha' taca caca ma̱ ñati̱ ji'i̱ ycui' Ni, ñati̱ nu nga'aa ntsu'u yabe' hichu̱' ma̱ tsiya' ti, cha' nga'aa caca sta ngu' qui'ya ji'i̱ ma̱ lo'o Ni, nu lo'o ca̱a̱ Ni ca̱qui'ya Ni ji'na cha' tsalo'o Ni ji'na ca su ntucua Ni.

COLOSENSES 1:12

Lo'o jua'a̱ tya ma̱ xlya'be ji'i̱ ycui' Ndyosi Sti ma̱ nu cua nda chacuayá' cha' tyacua cha' tso'o ji'i̱ ma̱, la cui' ti cha' nu cua nchco'o Ni cha' tyacua ji'i̱ ñati̱ ji'i̱ ycui' Ni, nu lo'o tyalaa ngu' ca su xee tsa ca su ntucua ycui' Ni.

2 CORINTIOS 1:7

Ndyi'u tsa ti' ya ji'i̱ cu'ma̱. Jlo ti' ya cha' ñi'ya̱ ndyu'ni lya' ti' ngu' ji'i̱ ya, jua'a̱ cua'ni lya' ti' ngu' ji'i̱ ma̱; pana ñi'ya̱ nxtyucua Ni ji'i̱ ya, jua'a̱ xtyucua Ni ji'i̱ cu'ma̱.

1 CORINTIOS 1:2

Nscua na' quityi re cha' ca̱a̱ slo cu'ma̱, ngu' taju ñati̱ ji'i̱ Jesucristo nu ndi'i̱ ma̱ nde quichi̱ Corinto. Xqui'ya Jesucristo cua ngusubi Ni ji'i̱ ma̱, lo'o juani laca ma̱ ñati̱ ji'i̱ ycui' Ni; nga'a̱ cha' tyi'u ti' ma̱ ji'i̱ Ni lcua ti lo cña nu ndu'ni ma̱ su ndi'i̱ ma̱ chalyuu. Stu'ba cha' ji'i̱ ma̱ lo'o cua ña'a̱ ca ñati̱ nu ndu'ni tlyu ji'i̱ Jesucristo nu Xu'na na tyucui ña'a̱ chalyuu, cha' ñi'ya̱ laca Ni Xu'na na, jua'a̱ laca Ni Xu'na ngu' bi'.

ROMANOS 15:27

Chañi cha' tyucui tsa tyiquee ngu' bi' nda ngu' msta̱ bi'. Taca ñacui̱ na cha' ñi'ya̱ laca si na ndacui ti ngu' bi' ji'i̱ tya'a ngu', jua'a̱ laca cña nu ndyu'ni ngu' juani. Tya clyo ngu' judío laca nu cua nda cha' ji'i̱ Cristo lo'o ngu' xa' tsu'; xqui'ya cha' bi' ngua tso'o cresiya ji'i̱ ngu' cuentya ji'i̱ ycui' Ndyosi, masi ngu' xa' tsu' laca ngu'. Bi' cha' juani lo'o ngua ti'i nu ngu' judío bi', tso'o si xtyucua ngu' xa' tsu' ji'i̱ ngu' bi', cha' tya'a ñati̱ ji'i̱ Cristo laca ngu'.

ROMANOS 11:17

Laca ngu' judío ñi'ya̱ si laca ngu' sca yaca cuiñii, sca yaca olivo ni. Na cua ngusi'yu ycui' Ndyosi ji'i̱ tyu̱u̱ tya'a sta̱' yaca bi', ngulotsu' Ni ji'i̱ sta̱' yaca bi' li'; pana juani la cui' ca su ngutucua sta̱' yaca bi' nquicha', ndacua ngusca̱' Ni tyu̱u̱ tya'a sta̱' yaca quixi̱', cha' xñi ca'a̱ sta̱ yaca quixi̱' bi' ji'i̱ yaca cuiñii bi'. Ñi'ya̱ laca sta̱' yaca quixi̱', jua'a̱ laca cu'ma̱ ngu' xa' tsu', cha' cua ngujui la cui' cha' tso'o ji'i̱ ma̱, ña'a̱ cha' tso'o nu ntsu'u ji'i̱ ngu' judío. Laca ma̱ ñi'ya̱ laca si sca ti su̱u̱ yaca laca ma̱ lo'o ngu' judío, si sca ti si'ye laca ma̱ lo'o ngu' bi'.

ROMANOS 9:24

Ñati̱ ji'i̱ ycui' Ndyosi laca na; stu'ba ti ngusubi Ni ji'na, masi laca na ngu' judío, masi laca na ngu' xa' tsu'.

SAN JUAN 20:27

Li' nchcui' Jesús lo'o ycui' Tomás: ―Cua̱a̱ nu'u̱ ca nde, cojo' sne ya' nu'u̱ su ntucua cuityu ya' na' ―nacui̱―. Ña'a̱ tso'o nu'u̱ su ntucua cuityu ya' na' re. Cua̱a̱ nu'u̱, cojo' ya' sii' na'. Nga'aa cua'ni nu'u̱ cha' ná jlya ti' nu'u̱ 'na, taca jlya tso'o ti' nu'u̱ 'na juani ―nacui̱ Jesús.

APOCALIPSIS 18:20

Pana cacha' na' ji'i̱ ma̱ juani, cu'ma̱ nu ndi'i̱ ca su ntucua ycui' Ndyosi nde cua̱, cua'ni ma̱ cha' ca chaa tsa ti' ma̱ lo'o tyalaa hora cati̱ quichi̱ bi'; lo'o jua'a̱ cu'ma̱ ñati̱ chalyuu nu ntsu'u cha' ji'i̱ ma̱ lo'o ycui' Ndyosi, lo'o cu'ma̱ ñati̱ nu ngua'a̱loo Ni ji'i̱ ma̱ cha' cua'ni ma̱ cña ji'i̱ Ni, lo'o cu'ma̱ nu laca ma̱ tu'ba ji'i̱ ycui' Ndyosi cha' nchcui' Ni lo'o ñati̱, cua'ni ma̱ cha' ca chaa tsa ti' ma̱ cha' liñi tsa ndu'ni Ni lo'o xcube' Ni ji'i̱ ngu' quichi̱ bi', xqui'ya cha' xña'a̱ tsa ngua'ni ngu' bi' lo'o ma̱.

APOCALIPSIS 17:14

Xcui' xu̱u̱ tya'a ngu' lo'o ycui' Ni, nu ñi'ya̱ ña'a̱ xlya' bi'; pana tyiji̱loo nu ñi'ya̱ ña'a̱ xlya' bi' ji'i̱ na'ni bi', lo'o jua'a̱ tyiji̱loo ñati̱ nu ndya'a̱ lo'o Ni ji'i̱ ni', xqui'ya cha' laca ycui' Ni Xu'na lcaa ñati̱ chalyuu, laca ycui' Ni loo la ji'i̱ lcaa ngu' nu laca loo nde chalyuu. Lo'o jua'a̱ nu ñati̱ ji'i̱ ycui' Ni ni, cua ngusubi Ni ji'i̱ ngu' bi'; na cua nguane Ni ji'i̱ ngu' bi', lo'o jua'a̱ tso'o tsa ngusñi ngu' cha' ji'i̱ ycui' Ni ―nacui̱ xca̱ 'na.

1 JUAN 1:3

Juani culu'u ya ji'i̱ ma̱ cua ña'a̱ ca cha' nu cua na'a̱ ya, culu'u ya cua ña'a̱ ca cha' nu cua ndyuna ya. Chañi laca cha' stu'ba ntsu'u tyiquee na lo'o ycui' Ndyosi Sti na, jua'a̱ lo'o Jesucristo nu sca ti Sñi' ycui' Ni. Lo'o juani cua nti' ya cha' stu'ba ti caca tyiquee ma̱ lo'o ya;

1 PEDRO 5:10

Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.

1 PEDRO 5:1

Sca ngu' cusu' nu laca loo laca na', lo'o juani nti' na' ta na' sca cui̱i̱ lo'o cu'ma̱ tya'a cusu' na. Lo'o na', cua na'a̱ na' ji'i̱ Cristo lo'o nguxcube' ngu' ji'i̱ yu, bi' cha' jlo ti' na' cha' stu'ba ti tyi'i̱ lcaa tya'a na ca slo ycui' Ndyosi; ña'a̱ na cha' tlyu nu caca li'.

1 PEDRO 3:5

Ná cuxi tyiquee tsiya' ti jyo'o ma' cusu' nu ntsu'u cha' ji'i̱ lo'o ycui' Ndyosi nu ngua cua sa'ni. Tso'o tsa ña'a̱ ma' cusu' bi', cha' ngua'ni tlyu ma' ji'i̱ ycui' Ni, lo'o jua'a̱ ndaquiya' ma' ji'i̱ cha' nu nchcui' clyo'o ma'.

HEBREOS 9:11

Lo'o juani cua ya̱a̱ Cristo, nu laca chaca lo sti jo'ó nu laca loo; cua laca nguxana ndyaca tso'o chalyuu xqui'ya Ni. Ná ndyaa Ni ngua'ni Ni cña ne' sca ni'i̱ tlyu nu ngüiñá ñati̱ ti, cha' ná ndu'ni cha' tyu'u cha' ji'i̱ Ni lo'o sca cha' nu ntsu'u nde chalyuu.

HEBREOS 6:20

Cuentya ji'na, cua ndyaa Jesús ca bi' nde loo la, cha' taca xtyucua yu ji'na. Ná nga'a̱ cha' tye cha' laca Jesús sti jo'ó nu laca loo la cuentya ji'na; la cui' ñi'ya̱ nu ngua'ni jyo'o Melquisedec nu ngua sa'ni, jua'a̱ cua'ni Jesús cuentya ji'na juani.

EFESIOS 3:6

Bilya cuna ñati̱ chalyuu cha' nu ndacha' Ni 'na. Pana ndi'ya̱ ndyu'u cha' bi': Ngu' nu si'i ngu' judío laca ngu' ni, caca ngu' bi' la cui' ñi'ya̱ laca ngu' judío nu ntsu'u cha' ji'i̱ lo'o ycui' Ndyosi, nu lo'o ca cuayá' ti' ngu' cha' ji'i̱ Cristo; si xñi ngu' bi' cha' ji'i̱ Jesucristo, lo'o ngu' bi' caca tso'o cresiya ji'i̱ ngu' cuentya ji'i̱ ycui' Ndyosi li'. Caca stu'ba cha' ji'i̱ tyucuaa lo ngu' li', cha' tsa tlyu ti tya'a ngusñi ngu' cha' ji'i̱ Cristo caca ngu'. Lo'o ji'i̱ ngu' nu si'i ngu' judío laca ngu' bi', tyacua lcaa cha' nu cua nacui̱ Ni cha' tyacua ji'i̱ ngu' xqui'ya Jesucristo.

1 CORINTIOS 10:17

Sca ti ycu' xlyá nscua lo mesa su ndacu na stu'ba ti; lo'o ndya'be xlyá bi', li' ndyiji na cacu ca ta'a na, masi tyu̱u̱ tsa tya'a na. Tsa tlyu ti ndi'i̱ na cha' stu'ba ti laca na ñati̱ ji'i̱ Jesús.

SAN JUAN 17:3

Chalyuu nu ta na' ji'i̱ ngu' laca cha' tyuloo ngu' jinu'u̱, nu'u̱ nu laca sca ti ycui' Ndyosi nu ntucua nde cua̱; lo'o jua'a̱ tyuloo ngu' jna', cha' laca na' Jesucristo nu nda nu'u̱ lijya̱a̱.

LOS HECHOS 1:15

Ngua sca tsa̱ ndyu'u ti'i̱ lcaa ñati̱ nu cua ngusñi cha' ji'i̱ Jesucristo ca quichi̱ bi'; sca siyento ntucua calaa tya'a ñati̱ ntsu'u nu ngutu'u ti'i̱ tsa̱ bi'. Li' ndatu̱ Pedro cha' chcui' yu lo'o ngu' bi':

2 CORINTIOS 9:13

cua'ni tlyu ngu' ji'i̱ ycui' Ndyosi li'. Taca ña'a̱ ngu' bi' ji'i̱ ma̱, cha' chañi cha' ndaquiya' ma̱ ji'i̱ cha' tso'o nu cua nda Cristo lo'o ma̱; ca cuayá' ti' ngu' cha' bi' lo'o ña'a̱ ngu' cña nu cua ngua'ni ma̱ cha' caja xlya'be ji'i̱ ngu' bi'. Cua'ni chi̱ ngu' loo ycui' Ndyosi li', xqui'ya cha' tso'o tsa nda ma̱ msta̱ ji'i̱ ngu' bi', la cui' ñi'ya̱ nu nda ma̱ ji'i̱ lcaa ñati̱.

HEBREOS 3:12

Cu'ma̱ tya'a ngusñi na cha' ji'i̱ Jesús, ña'a̱si̱i̱ ma̱ ji'i̱ ycui' ca ma̱, cha' ni tsaca ma̱ ná tya'a̱chu̱' ma̱ ji'i̱ cha' ji'i̱ ycui' Ndyosi nu lu'ú ca, cha' ná caca cuxi cresiya ji'i̱ ma̱, ñi'ya̱ si nga'aa taquiya' ma̱ cha' ji'i̱ Ni.

HEBREOS 7:28

Ñati̱ chalyuu ti laca sti jo'ó nu ndu'ni cña nu cua nacui̱ jyo'o Moisés cha' caca, ñati̱ nu tya ntsu'u qui'ya ji'i̱ laca ngu' bi'; pana nu sca ti Sñi' ycui' Ndyosi ni, lubii tsiya' ti cresiya ji'i̱ Ni. Cua tyeje tacui ti tyempo cusu' lo'o ndaquiya' tsa ngu' ji'i̱ cña nu ngulo jyo'o Moisés. Bi' cha' nguane ycui' Ndyosi ji'i̱ Sñi' ycui' ca, nu Jesús bi' ni, cha' caca Ni sti jo'ó cuentya ji'na. Cua nchcui' Sti Ni lo'o Ni: “Chacuayá' ji'i̱ ycui' ca na' caca nu'u̱ sti jo'ó”, nacui̱ ycui' Ndyosi ji'i̱ Jesús.

HEBREOS 9:15

Bi' cha' lacua, Cristo laca nu ngüiñi sca cha' cucui ji'i̱ ycui' Ndyosi lo'o ñati̱ chalyuu, masi lo'o cua ña'a̱ ca ñati̱ nu cua ngusubi ycui' Ndyosi ji'i̱. Jua'a̱ ngua'ni Cristo, nu lo'o ngujuii yu, cha' jua'a̱ ngulaá na ji'i̱ lcaa cha' cuxi nu ngua'ni na lo'o tya ndaquiya' tsa na ji'i̱ cha' cusu' bi'. Nu juani taca tyacua lcaa cha' nu cua nacui̱ ycui' Ndyosi Sti na ji'na cha' tyacua ji'i̱ lcaa ngu' nu ngusubi Ni ji'i̱; ná nga'a̱ cha' culiji yu'u cha' bi' ji'na tsiya' ti.

HEBREOS 10:19

Cu'ma̱ ngu' tya'a ngusñi na cha' ji'i̱ Cristo, tyucui chacuayá' ji'i̱ Ni cua ntsu'u ji'na juani, cha' ca̱a̱ na slo ycui' Ndyosi nu lubii tsiya' ti cha' ji'i̱ Ni. Jesús laca nu nda chacuayá' bi' ji'na, xqui'ya cha' ndyalú tañi ycui' yu lo'o ngujuii yu lo crusi, cha' cuityi̱ Ni qui'ya nu ntsu'u ji'na.

HEBREOS 10:23

Cua'ni na cha' jlya tso'o ti' na cha' nu cua ngusñi na tya clyo lacua, ná tya'a̱chu̱' na ji'i̱ cha' bi' tsiya' ti. Taca jlya ti' na ji'i̱ ycui' Ndyosi, cha' chañi cha' cua'ni Ni lcaa cha' nu cua nacui̱ Ni ji'na.

HEBREOS 13:22

Cu'ma̱ tya'a ngusñi na cha' ji'i̱ Cristo, cua'ni clyu ti' ma̱ 'na, talo tyiquee ma̱ xi 'na cha' cuna ma̱ cha' nu nchcui' na' re. Ná quiña'a̱ tsa cha' nscua na' lo quityi re, pana cua nti' na' cha' tyanu tachaa la cha' bi' ne' cresiya ji'i̱ ma̱.