HEBREOS 2:10 - Chatino Tataltepec

¹⁰ Clyo ngüiñá ycui' Ndyosi lcaa ca na nu ntsu'u chalyuu, jua'a̱ tya ña'a̱si̱i̱ Ni lcaa na; lo'o jua'a̱ nti' Ni cha' tyalaa ca ta'a na nu laca na sñi' Ni ca su tso'o tsa ca su ntucua ycui' Ni. Bi' cha' clyo ndulo tsa cha' ji'i̱ Ni cha' tye lcaa cña nu ngua'ni Jesucristo; lo'o nu juani cua ngulaá na ji'i̱ nu cuxi xqui'ya Jesús, masi ti'í tsa ngua ti' yu lo'o ngua'ni yu cña bi'.

HEBREOS 2:10 Referans Kwoze

ROMANOS 11:36

Lcaa na nu ntsu'u chalyuu, na ji'i̱ ycui' Ndyosi laca bi', cha' cua ngüiñá ycui' Ni lcaa na, cha' caca bi' cña ji'i̱ Ni. Nga'aa caca tye cha' cua'ni tlyu na ji'i̱ ycui' Ndyosi. Lo'o jua'a̱ chañi tsa cha' bi'.

HEBREOS 12:2

Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.

HEBREOS 6:20

Cuentya ji'na, cua ndyaa Jesús ca bi' nde loo la, cha' taca xtyucua yu ji'na. Ná nga'a̱ cha' tye cha' laca Jesús sti jo'ó nu laca loo la cuentya ji'na; la cui' ñi'ya̱ nu ngua'ni jyo'o Melquisedec nu ngua sa'ni, jua'a̱ cua'ni Jesús cuentya ji'na juani.

LOS HECHOS 5:31

Nchca ji'i̱ Jesús bi' cuityi̱ yu cha' cuxi nu ntsu'u ji'i̱ ñati̱ chalyuu. Ycui' Jesús laca nu Xu'na na, bi' cha' la'a tsu' cui̱ ca su ntucua Ni nda ycui' Ndyosi su tyi'i̱ Jesús. Ngua'ni Ni jua'a̱ cha' caja ñi'ya caca tyuju'u ti' na nu laca na ngu' Israel ji'i̱ qui'ya nu ntsu'u ji'na, lo'o jua'a̱ cui'ya Ni cha' clyu ti' ji'na li'.

SAN LUCAS 24:46

Nacui̱ yu ji'i̱ ngu': ―Cua sa'ni nscua cha' cajaa ycui' na' nu laca na' nu Cristo bi', lo'o tsa̱ nchca tyuna lo'o cua ngujuii na', li' nscua cha' tyu'ú na' chaca quiya'.

SAN LUCAS 24:26

¿Ha si'i na cua ntsu'u cha' chcube' nu laca Cristo bi' ñi'ya̱ nu ngua juani? Tiya' la li' tyalaa Cristo su tso'o tsa ña'a̱ su tyucua ycui' li'.

1 PEDRO 5:10

Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.

1 CORINTIOS 8:6

Pana nu ñati̱ tya'a ntsu'u cha' ji'na lo'o Jesús, sca ti ycui' Ndyosi Sti na jlya ti' na ji'i̱ tsiya' ti; la cui' ti jua'a̱ sca ti ycui' Jesucristo nu Xu'na na ngusñi na cha' ji'i̱. Ngüiñá Ni tyucui ña'a̱ chalyuu, xqui'ya Jesús ndya' lcaa lo na; cuentya ji'i̱ ycui' Jesús laca lcaa lo na nu ntsu'u chalyuu, lo'o jua'a̱ xqui'ya ycui' Jesús ndi'i̱ na chalyuu.

HEBREOS 7:28

Ñati̱ chalyuu ti laca sti jo'ó nu ndu'ni cña nu cua nacui̱ jyo'o Moisés cha' caca, ñati̱ nu tya ntsu'u qui'ya ji'i̱ laca ngu' bi'; pana nu sca ti Sñi' ycui' Ndyosi ni, lubii tsiya' ti cresiya ji'i̱ Ni. Cua tyeje tacui ti tyempo cusu' lo'o ndaquiya' tsa ngu' ji'i̱ cña nu ngulo jyo'o Moisés. Bi' cha' nguane ycui' Ndyosi ji'i̱ Sñi' ycui' ca, nu Jesús bi' ni, cha' caca Ni sti jo'ó cuentya ji'na. Cua nchcui' Sti Ni lo'o Ni: “Chacuayá' ji'i̱ ycui' ca na' caca nu'u̱ sti jo'ó”, nacui̱ ycui' Ndyosi ji'i̱ Jesús.

EFESIOS 3:10

pana juani caca cuayá' ti' lcaa cui'i̱ nu laca loo nde cua̱, nu lo'o ña'a̱ cui'i̱ bi' ji'i̱ ñati̱ chalyuu nu tsa tlyu ti ndyu'ni tlyu ji'i̱ Cristo. Lo'o jua'a̱ cui'i̱ nu ngua ti' tyiji̱loo ji'i̱ ycui' Ndyosi sa'ni la ni, caca cuayá' ti' cui'i̱ bi' cha' nchca la ji'i̱ ycui' Ndyosi que cua ña'a̱ ca na nu ngüiñá ycui' Ni.

APOCALIPSIS 4:11

Ndyosi Xu'na ya, nga'a̱ cha' cua'ni tlyu ya jinu'u̱, cha' cua'ni chi̱ ya loo nu'u̱, nacui̱ ngu'. Nchca jinu'u̱ cua'ni nu'u̱ lcaa lo cña tsiya' ti nu nti' nu'u̱ cua'ni nde chalyuu. Na cua ngüiñá nu'u̱ lcaa lo na nu ntsu'u nde chalyuu; chacuayá' jinu'u̱ lu'ú lcaa na, cha' nda nu'u̱ chacuayá' cha' ndya'a̱ lcaa na lu'ú. Jua'a̱ nacui̱ ngu' lo'o ndyula tu'ba ngu' li'.

2 TIMOTEO 2:10

bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.

COLOSENSES 3:4

Nu chaca chalyuu cucui nu ngujui ji'i̱ ma̱ xqui'ya Cristo, bi' laca cha' nu ndulo la cha' ji'i̱ ma̱ juani. Stu'ba ti tyatu̱ na lo'o Cristo tsa̱ bi', nu lo'o tyu'u tucua yu lijya̱ yu chaca quiya'; li' taca caca stu'ba cha' ji'i̱ ma̱ lo'o nu Cristo bi' ca su caca tlyu la ycui' yu, ca su ntucua ycui' Ndyosi.

GÁLATAS 3:26

Sñi' ycui' Ndyosi laca lcaa cu'ma̱ juani lo'o ngusñi ma̱ cha' ji'i̱ Jesucristo, xqui'ya cha' cua ntsu'u cha' ji'i̱ ma̱ lo'o Ni.

2 CORINTIOS 3:18

Jua'a̱ laca cha' ji'na, lcaa na lo'o tya'a na nu ntsu'u cha' ji'na lo'o Jesús, tyaca̱' tyijyu' cha' cua nda nu Xu'na na xee nu tyu'u loo na. Pana ná nga'a̱ cha' tyacu̱' sca late' loo na, cha' la cui' cha' tlyu bi' laca nu ña'a̱ ti tya lye la ndyu'ni cña lo'o na cha' cha'a̱ tyucui ña'a̱ na, cha' caca na ñi'ya̱ laca ycui' Ndyosi nu Xu'na na tsiya' ti. Ca slo ycui' nu Xu'na na nu laca Xtyi'i bi', ca bi' ndyu'u nu cha' tlyu bi'.

ROMANOS 9:23

Pana ngua ti' Ni cha' caca cuayá' ti' na ñi'ya̱ tlyu tsa cha' tso'o nu ndyu'ni Ni lo'o na, cha' tya'na tsa ti' Ni ña'a̱ Ni ji'na. Tya tsubi' la cua ngusubi ycui' Ndyosi ji'na, cha' lo'o na caja cha' tso'o nu ntsu'u ji'i̱ ycui' Ndyosi ji'na.

LOS HECHOS 3:15

Lo'o li' ngüijña ma̱ chacuayá' cujuii ngu' ji'i̱ Jesús, masi ycui' Jesús laca nu nda chalyuu nu ná nga'a̱ cha' tye ji'i̱ ñati̱. Li' ngua'ni ycui' Ndyosi cha' ndyu'ú Jesús chaca quiya' lo'o cua ngujuii yu. Jlo ti' ya cha' chañi laca cha' cua ndyu'ú yu chaca quiya', cha' cua na'a̱ ya ji'i̱ yu ña'a̱ lu'ú ti yu chaca quiya'.

APOCALIPSIS 7:9

Tiya' la li' na'a̱ na' ndu̱ tsa tlyu ti ñati̱ nu cua ngua'ni lyaá Jesús ji'i̱; quiña'a̱ tsa ñati̱ nga'a̱, bi' cha' ná tucui ngua ji'i̱ culacua ji'i̱ ñati̱ bi'. Tyucui ña'a̱ chalyuu mala su ndi'i̱ ñati̱ ngutu'u ngu' ya̱a̱ ngu'; lcaa lo ñati̱ chalyuu ya̱a̱, cha' cua ña'a̱ ca quichi̱ tyi ngu' ngutu'u ngu', cua ña'a̱ ca lo cha'cña nu nchcui' ñati̱ chalyuu nchcui' ngu' bi'. Ndyatu̱ ngu' nde loo su ntucua yaca xlya tlyu, nde loo su ndu̱ nu ñi'ya̱ ña'a̱ xlya' bi'. Late' ngati̱ lacu' ngu', ntucua laca' nguiña ya' ngu' ndu̱ ngu'.

1 PEDRO 5:1

Sca ngu' cusu' nu laca loo laca na', lo'o juani nti' na' ta na' sca cui̱i̱ lo'o cu'ma̱ tya'a cusu' na. Lo'o na', cua na'a̱ na' ji'i̱ Cristo lo'o nguxcube' ngu' ji'i̱ yu, bi' cha' jlo ti' na' cha' stu'ba ti tyi'i̱ lcaa tya'a na ca slo ycui' Ndyosi; ña'a̱ na cha' tlyu nu caca li'.

1 PEDRO 1:12

Pana ná nquije cha' bi' ji'i̱ ngu' bi' li'; sca ti cha' nchcui' ycui' Ni lo'o ngu' bi', cha' si'i ycui' ngu' bi' laca nu ca cuayá' tso'o ti' ñi'ya̱ caca cha' bi' tyempo nde loo la. Pana cu'ma̱ ni, nu lijya̱ chalyuu nde loo la ji'i̱ ngu' jyo'o bi', nchca cuayá' ti' ma̱ juani, xqui'ya cha' cua ndyuna ma̱ lcaa cha' tlyu nu ngua'ni Jesucristo. Cua ndacha' liñi ya cha' bi' ji'i̱ ma̱; chacuayá' ji'i̱ Xtyi'i ycui' Ndyosi ngulu'u ya cha' bi' ji'i̱ ma̱, cha' cua nda ycui' Ndyosi Xtyi'i ycui' Ni lijya̱ lo ya nde chalyuu. Lo'o jua'a̱ lcaa xca̱ ji'i̱ ycui' Ni nu ndi'i̱ slo Ni, lcaa ngu' bi' nti' tsa ngu' ca cuayá' ti' ngu' lcaa cha' nu ngua ji'i̱ Cristo lo'o ñaa yu nde chalyuu.

HEBREOS 7:26

Xñi na cha' ji'i̱ Jesús lacua; bi' laca sti jo'ó nu laca loo la, nu chañi cha' taca xtyucua ji'na. Ñati̱ lubii tsiya' ti laca Ni, cha' ná ntsu'u cha' cuxi, ná ntsu'u qui'ya ji'i̱ Ni. Xa' ña'a̱ laca Jesús, nu ná nda ycui' Ndyosi chacuayá' cha' tyanu yu slo ñati̱ chalyuu nu ndu'ni tsa cha' cuxi; cua nda Sti yu su tyucua yu la cui' su tlyu ca su ntucua ycui' Ndyosi Sti yu.

EFESIOS 2:7

Sca ti quiya' ngua'ni Ni lcaa cha' bi', cha' ca cuayá' ti' lcaa ñati̱ nu ca̱a̱ chalyuu nde loo la cha' ntsu'u tsa tyiquee Ni ña'a̱ Ni ji'i̱ ñati̱ chalyuu. Xqui'ya cha' ntsu'u tsa tyiquee Jesucristo ña'a̱ Ni ji'na, bi' cha' ca cuayá' ti' na cha' ná ntsu'u su tye cha' ndu'ni tso'o ycui' Ndyosi lo'o na;

2 CORINTIOS 6:18

caca na' Sti ma̱; jua'a̱ cu'ma̱ caca ma̱ sñi' na', masi nu cuna'a̱, masi nu qui'yu. Jua'a̱ nacui̱ ycui' Ndyosi nu Xu'na ma̱, nu lcaa tsiya' ti cña nchca ji'i̱ Ni.

2 CORINTIOS 5:18

Ycui' Ndyosi laca nu ndu'ni lcaa cha' bi', cha' cua ndyaca stu'ba cha' ji'na lo'o Ni xqui'ya Cristo. Lo'o juani cua nda Ni cña ji'na cha' chcui' na lo'o ngu' ñi'ya̱ caca stu'ba cha' ji'i̱ ngu' lo'o ycui' Ni.

2 CORINTIOS 4:17

Si'i na tlyu tsa cha' ti'í nu ndyacua ji'na chalyuu re juani, xti ti tyempo talo cha' ti'í bi'; pana tiya' la ni, tlyu tsa cha' tso'o nga'a̱ cha' tyacua ji'na ca slo ycui' Ndyosi, lo'o ná nga'a̱ cha' tye bi' tsiya' ti. Ná stu'ba cha' ti'í re lo'o cha' tso'o nu nga'a̱ cha' tyacua ji'na nde loo la.

1 CORINTIOS 2:7

Cua nda ycui' Ndyosi cha' tso'o bi' lo'o na cha' chcui' na lo'o ñati̱. Bilya caca cuayá' ti' ñati̱ chalyuu ji'i̱ cha' bi' tya sa'ni la, cha' ná nti' Ni cha' cuna ñati̱ nu ngua li'. Pana tya lo'o bilya tya' chalyuu, tya li' ngulacua ti' Ni ñi'ya̱ nu cua'ni Ni; ngua ti' ycui' Ndyosi cha' cua'ni lyaá Ni ji'na lo'o xñi na cha' ji'i̱ Jesús. Tlyu tsa cha' tso'o caca ji'na li'.

SAN JUAN 19:30

Lo'o cua nguxcui Jesús vino bi', li' nacui̱ yu: ―Cua ngua lcaa cha'. Li' ngua'ya tacui hique yu, ngujuii yu li'.

SAN JUAN 11:52

masi cajaa Jesús cuentya ji'i̱ lcaa ñati̱ lcua ti ña'a̱ chalyuu, cha' stu'ba ti caca tyiquee lcaa ñati̱ nu jlya ti' ji'i̱ ycui' Ndyosi, ngu' nu cua ngusubi ycui' Ndyosi ji'i̱ cha' caca ngu' sñi' Ni.

SAN LUCAS 13:32

Nchcui' Jesús lo'o ngu' bi' li': ―Yaa cacha' ma̱ cha' re ji'i̱ nu cusu' tyaala bi': “Tsa̱ juani lo'o tsa̱ quee tya tyi'i̱ na' xi chalyuu re cha' culo na' cui'i̱ cuxi nu ntsu'u ji'i̱ ñati̱, cha' cua'ni na' cha' tyaca tso'o xa' la ngu' quicha. Cuati tsa̱ nu nchca tyuna, li' tye cña nu nda ycui' Ndyosi Sti na' cha' cua'ni na'.” Jua'a̱ ñacui̱ ma̱ ji'i̱ nu cusu' bi'.

SAN LUCAS 2:14

Cua'ni tlyu na ji'i̱ ycui' Ndyosi, masi ca bi' ca su tlyu su ntucua Ni, masi nde lo yuu chalyuu, cha' tlyu tsa laca ycui' Ni, nacui̱ ngu' xca̱ bi' li'. Cua'ni Ni cha' ti̱ ti tyi'i̱ tyiquee ñati̱ chalyuu lo'o ca cuayá' ti' ngu' cha' ntsu'u tsa tyiquee Ni ña'a̱ Ni ji'i̱ ngu', nacui̱ ngu' xca̱ li'.