HEBREOS 13:21 - Chatino Tataltepec

²¹ Ycui' Ndyosi ndu'ni cha' ti̱ ti tyi'i̱ tyiquee na, lo'o juani nti' na' cha' xtyucua Ni ji'i̱ ma̱ lo'o cua ña'a̱ ca cha' nu lyiji ji'i̱ ma̱, cha' taca cua'ni ma̱ lcaa cña, ñi'ya̱ nu nti' Ni cha' cua'ni ma̱; nti' na' cha' cuentya ji'i̱ ma̱ cua'ni Ni na laca nu tso'o la nti' Ni, chacuayá' ji'i̱ Jesucristo. Lo'o jua'a̱ ná nga'a̱ cha' tye cha' cua'ni tlyu Ni ji'i̱ Cristo. ¡Jua'a̱ caca cha' lacua!

HEBREOS 13:21 Referans Kwoze

FILIPENSES 2:13

Tyi'u ti' ma̱ cha' lcaa tsa̱ ndu'ni ycui' Ndyosi cña laja ne' cresiya ji'i̱ ma̱, cha' taca cua'ni ma̱ cña ji'i̱ Ni; jua'a̱ ndu'ni Ni cha' tyaja'a̱ ma̱ cua'ni ma̱ lcaa ña'a̱ nu nti' ycui' Ndyosi cha' cua'ni ma̱.

FILIPENSES 4:13

Cua nda ycui' Cristo juersa 'na cha' talo na' ji'i̱ cua ña'a̱ ca cha', na laca nu tyacua ti xi 'na.

1 PEDRO 2:5

cha' lo'o cu'ma̱ caca ma̱ ñi'ya̱ si laca ma̱ tyuu cha' tya' sca ni'i̱ ji'i̱ ycui' Ndyosi, masi ña'a̱ lu'ú ti ma̱. Li' xñi ycui' Ni tyuu bi', cha' cuiñá Ni sca ni'i̱ nu tacati tsa cuentya ji'i̱ ycui' Ni. Chaca cha' ni, ñi'ya̱ nti' sti jo'ó nu lubii cresiya ji'i̱ tsiya' ti, jua'a̱ caca lcaa cu'ma̱, cha' taca ji'i̱ ma̱ sta ma̱ msta̱ slo ycui' Ndyosi juani xqui'ya Jesucristo; nu msta̱ bi' laca ycui' ca ma̱, si chañi cha' tyucui tyiquee ma̱ nti' ma̱ taquiya' ma̱ ji'i̱ cha' nu nchcui' ycui' Ndyosi.

2 TIMOTEO 4:18

Lo'o jua'a̱ tya cua'a Ni jna' ji'i̱ lcaa lo cha' cuxi nu tyacua na' ji'i̱; jlo ti' na' cha' ña'a̱ ti tya ña'a̱si̱i̱ Ni jna', cha' tso'o ti tyalaa na' su nclyo ycui' Ndyosi cña. Nga'aa tye tsa̱ cha' cua'ni tlyu na ji'i̱ ycui' Ndyosi ca bi'. Jua'a̱ caca cha' tu'ni.

FILIPENSES 1:11

Quiña'a̱ tsa cha' tso'o taca cua'ni ma̱ lcaa su ndi'i̱ ma̱ chalyuu xqui'ya Jesucristo, cha' ndyu'ni Cristo cña ne' cresiya ji'i̱ ma̱; bi' cha' taca cua'ni tlyu ma̱ ji'i̱ ycui' Ndyosi, taca cua'ni chi̱ ma̱ loo Ni.

2 CORINTIOS 9:8

Taca xtyucua ycui' Ndyosi ji'i̱ ma̱ lo'o quiña'a̱ tsa cha', lo'o li' tyu'u scua ji'i̱ ma̱ lcaa cha' nu lyiji ji'i̱ ma̱; lo'o jua'a̱ tya caja la ñi'ya̱ xtyucua ma̱ ji'i̱ xa' ñati̱ lo'o cua ña'a̱ ca cña tso'o.

1 PEDRO 4:2

Lo'o li' nu cha' cuxi nu ndiya ti' ñati̱ chalyuu ni, nga'aa si'i cha' bi' nu caca loo ji'i̱ ma̱ lcaa tsa̱ lo'o ndi'i̱ ma̱ chalyuu; xcui' cña nu ndiya ti' ycui' Ndyosi cha' cua'ni ma̱, bi' laca cña nu cua'ni ma̱, cha' sca ti ycui' Ndyosi caca loo ji'i̱ ma̱ li'.

HEBREOS 10:36

Nga'a̱ cha' talo tyiquee ma̱ masi tyiquee', si tya nti' ma̱ cua'ni ma̱ lcaa ña'a̱ cña nu nti' ycui' Ndyosi, si tya nti' ma̱ ña'a̱ ma̱ cha' nu cua nacui̱ Ni cha' caca nde loo la.

1 TESALONICENSES 5:23

Ndu'ni ycui' Ndyosi cha' ti̱ ti tyi'i̱ tyiquee na. Bi' cha' juani cua'ni Ni cha' caca ma̱ ñati̱ liñi tsiya' ti; caca tso'o tyiquee ma̱, caca lubii cresiya ji'i̱ ma̱, caca ma̱ ñati̱ nu tyucui tyiquee tsiya' ti. Si lubii cresiya ji'i̱ ma̱ lo'o ca̱a̱ ycui' Jesucristo nu Xu'na na chaca quiya', li' nga'aa ntsu'u cha' sta Ni qui'ya ji'i̱ ma̱;

1 JUAN 2:17

Yala ti tye chalyuu re, culiji jua'a̱ ti lcaa cha' cuxi nu ndiya ti' ñati̱ chalyuu; pana ñati̱ nu taquiya' ji'i̱ cha' nu nchcui' ycui' Ndyosi ni, ná nga'a̱ cha' tye chalyuu ji'i̱ ngu' bi'.

1 TIMOTEO 1:17

Bi' cha' cua'ni tlyu na ji'i̱ ycui' Ndyosi juani, cua'ni chi̱ na loo Ni, cha' ná tye tsa̱ nu laca Ni loo tyucui ña'a̱ chalyuu; ná tye cha' ji'i̱ ycui' Ndyosi, cha' ná ntsu'u cha' cajaa Ni. Ná nchca ji'na ña'a̱ na ji'i̱ Ni cha' laca na ñati̱ chalyuu ti, pana sca ti ycui' Ni laca ycui' Ndyosi. Jua'a̱ laca cha' ji'i̱ Ni tu'ni.

EFESIOS 2:10

Na cua ngüiñá Ni ji'i̱ ca ta'a na, cua ngua'ni stu'ba Ni cha' ji'na lo'o Jesucristo; juani cua nti' Ni cha' xcui' cha' tso'o ti cua'ni na lo'o ndi'i̱ na chalyuu, cha' cua laca nda Ni cña tso'o nu taca cua'ni sa scaa na nde chalyuu.

APOCALIPSIS 5:9

Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.

1 JUAN 3:22

nu lo'o jña na cha' ji'i̱ ycui' Ni, caja cua ña'a̱ ca cha' ji'na si taquiya' na ji'i̱ cña nu cua nda ycui' Ni ji'na, si cua'ni na cña nu ndiya la ti' ycui' Ni.

HEBREOS 13:16

La cui' jua'a̱ ná ca taja ti' ma̱ cua'ni ma̱ lcaa cha' tso'o, jua'a̱ xtyucua ma̱ ji'i̱ tya'a ñati̱ ma̱; bi' laca cña nu ndiya ti' Ni cha' cua'ni na cuentya ji'i̱ ycui' Ni.

1 TIMOTEO 6:16

Ná ntsu'u cha' cajaa ycui' Ndyosi tsiya' ti, ná tye cha' ji'i̱ Ni. Ndubi tsa ña'a̱ xee ca su ntucua ycui' Ndyosi, ni ná ntsu'u ñati̱ nu caca tsaa ca slo Ni jua'a̱ ti xqui'ya xee tlyu bi'. La cui' jua'a̱ ná ntsu'u ñati̱ nu cua na'a̱ ji'i̱ ycui' Ndyosi, cha' ná nchca ña'a̱ ñati̱ ji'i̱ Ni nde chalyuu. Bi' cha' cua'ni chi̱ na loo ycui' Ndyosi lacua, cha' laca Ni nu tlyu la. Jua'a̱ laca cha' tu'ni.

1 TIMOTEO 5:10

Scua ngu' xtañi ma' cusu' nu nchcui' ngu' ji'i̱ cha' tso'o tsa cña ndu'ni ma' cusu' bi': si cua ngua'ni cu'ú tso'o ma' ji'i̱ nu sube; si cua nda ma' su tyi'i̱ ñati̱ nu lijya̱ tyijyu'; si cua nguxtyucua ma' ji'i̱ tya'a ñati̱ ji'i̱ Jesucristo, masi tlyu cña ntsu'u cha' cua'ni ma'; si ngua tya'na ti' ma' ji'i̱ ñati̱ nu quicha ti'. Si jua'a̱ xcui' cña tso'o ndu'ni ma' cusu' bi', scua ngu' xtañi ma' lo quityi bi' lacua.

1 TESALONICENSES 3:13

ndijña ya cha' cua'ni Ni cha' caca lubii cresiya ji'i̱ ma̱, cha' tyanu tso'o cha' ji'i̱ ycui' Ndyosi ne' cresiya ji'i̱ ma̱. Li' nga'aa ntsu'u cha' sta ycui' Ndyosi Sti na qui'ya ji'i̱ ma̱ tsa̱ bi', nu lo'o ca̱a̱ Jesús nu Xu'na na nde chalyuu chaca quiya'. Ca̱a̱ ycui' nu Xu'na na lo'o lcaa ñati̱ ji'i̱ Ni tsa̱ bi'.

COLOSENSES 4:12

Lo'o yu Epafras tya'a quichi̱ tyi ma̱, nda yu xlyo ni'i̱ ji'i̱ ma̱; stu'ba ti ndya'a̱ yu lo cña ji'i̱ Jesucristo lo'o ya. Lcaa tsa̱ ndijña tsa yu cha' clyu ti' ji'i̱ ycui' Ndyosi cuentya ji'i̱ cu'ma̱, ndijña yu chacuayá' ji'i̱ ycui' Ni cha' ná tya'a̱chu̱' ma̱ tsiya' ti cha' ji'i̱ Ni. Ndi'ya̱ nti' yu, cha' tyucui tyiquee ma̱ tsiya' ti cua'ni ma̱ na laca nu nti' Ni cha' cua'ni ma̱ nde lo yuu chalyuu.

COLOSENSES 3:17

Lcaa ña'a̱ cña nu nti' ma̱ cha' cua'ni ma̱, lcaa ña'a̱ cha' nu nti' ma̱ chcui' ma̱ lo'o ñati̱, chacuayá' ji'i̱ Jesús nu Xu'na na cua'ni ma̱ ji'i̱ lacua. Lo'o jua'a̱ la cui' hora bi' tya ma̱ xlya'be ji'i̱ ycui' Ndyosi Sti na xqui'ya Jesús.

FILIPENSES 4:18

Ndi'ya̱ xacui̱ na' cha' ji'i̱ ma̱ juani: Cua quiña'a̱ tsa na nda ma̱ 'na, bi' cha' cua nti' tsa na' tya na' tsa xlya'be ji'i̱ ma̱; nga'aa ntsu'u chaca na nu lyiji 'na tsiya' ti juani, tya lo'o ya̱a̱ yu Epafrodito, ya̱lo'o yu lcaa cha' tso'o nu cua nda ma̱ 'na. Ñi'ya̱ laca sca msta̱ nu ndiya tsa ti' ycui' Ndyosi ji'i̱, cha' tyixi tsa xtyi'i nda bi' nu ndacui lcua ti se'i̱, jua'a̱ laca cha' tso'o nu nda ma̱ 'na cuentya ji'i̱ ycui' Ndyosi.

EFESIOS 2:18

Lo'o juani ná ndu'ni cha' masi ngu' judío laca ya, masi xa' ñati̱ laca ma̱, sca ti lo ñati̱ laca na lo'o lcaa tya'a na xqui'ya Cristo, sca ti Xtyi'i ycui' Ndyosi ndu'ni cha' tyuloo na ji'i̱ Ni;

SAN MATEO 28:20

Culu'u ma̱ ji'i̱ ngu' bi', cha' taquiya' ngu' lcaa cña nu cua ngulu'u na' ji'i̱ ma̱. Lo'o jua'a̱ tyi'u ti' ma̱ cha' nu nchcui' na' lo'o ma̱, cha' tyi'i̱ na' lo'o ma̱ lcaa tsa̱ hasta ña'a̱ cuayá' tye chalyuu. Tsa lo cua ti cha' nacui̱ Jesús.

SAN MATEO 6:13

Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni. Jua'a̱ ñacui̱ ma̱ ji'i̱ ycui' Ndyosi.

APOCALIPSIS 5:13

Li' nguañi ndyula tu'ba lcaa ñati̱ tyucui ña'a̱ chalyuu, lcaa ngu' nu cua nda ycui' Ndyosi ji'i̱ lijya̱ nde chalyuu; masi nde cua̱ su ntucua ycui' Ni, masi nde lo yuu chalyuu, masi chaca ba'a chalyuu su ndyaa ñati̱ nu ngujuii, masi lo tyujo'o, lcaa ñati̱ bi' ndyu'ni tlyu ngu' ji'i̱ ycui' Ndyosi. Ndi'ya̱ nchcui' ngu': Cua'ni tlyu na ji'i̱ ycui' nu Cusu' nu ntucua ca su tlyu, nacui̱ ngu', cua'ni chi̱ na loo Ni. Jua'a̱ nu ñi'ya̱ ña'a̱ xlya' bi', cua'ni tlyu na ji'i̱ Ni. Sca ti ycui' Ndyosi ntsu'u chacuayá' ji'i̱ Ni cha' cua'ni Ni lcaa lo cña tsiya' ti; lo'o jua'a̱ ná nga'a̱ cha' tye cha' ji'i̱ ycui' Ni tsiya' ti, nacui̱ ngu'.

APOCALIPSIS 4:6

Nde cla'be su ntucua ñati̱ bi', ngua ti' na' cha' na'a̱ na' sca tayu'; ñi'ya̱ ndubi ña'a̱ sca caatya̱, jua'a̱ ndubi ña'a̱ bi'. Tyi'i̱ ca chu̱' su ndu̱ yaca xlya tlyu bi', ca bi' ndu̱ jacua tya'a na lu'ú nu ñi'ya̱ ña'a̱ na'ni, jua'a̱ ña'a̱; ndu̱ ni' cua̱. Tyucui ña'a̱ ni' ntucua cloo ni'; masi nde sii' ni', masi nde chu̱' ni' ntucua cloo ni'.

HEBREOS 12:23

Lo'o jua'a̱ ntsu'u cha' tsaa ma̱ slo lcaa tya'a sñi' ycui' Ndyosi nu cua ndyalo'o Ni ji'i̱ ndejua tya sa'ni la, cha' cua nscua xtañi jyo'o bi' lo quityi ji'i̱ ycui' Ndyosi nde cua̱. Tso'o tsa ntsu'u tyiquee ngu' bi' ca su ndyu'u ti'i̱ ngu'. Na cua tsaa ti ma̱ la cui' slo ycui' Ndyosi nu ndu'ni cuayá' ji'i̱ lcaa ñati̱, ca su ndi'i̱ lcaa ñati̱ jyo'o nu lubii cresiya ji'i̱ xqui'ya Jesús, cha' cua ndyaca cucui tyucui ña'a̱ ngu'.

1 TESALONICENSES 4:3

cha' ndi'ya̱ nti' ycui' Ndyosi: caca lubii cresiya ji'i̱ ma̱, ná cua'ni suba' ma̱ lo'o ñati̱;

COLOSENSES 3:20

Cu'ma̱ ngu' cuañi' ni, nga'a̱ cha' taquiya' ma̱ cña nu culo ngu' cusu' ji'i̱ ma̱, cha' tso'o tsa nti' nu Xu'na na lo'o ndu'ni ma̱ jua'a̱.

FILIPENSES 2:11

Cui̱i̱ tsa chcui' lcaa ñati̱ cha' Jesucristo laca Xu'na lcaa ca chalyuu, jua'a̱ tso'o tsa cua'ni tlyu ngu' ji'i̱ ycui' Ndyosi Sti na.

GÁLATAS 1:5

Bi' cha' ná nga'a̱ cha' tye tsa̱ nu cua'ni tlyu na ji'i̱ ycui' Ndyosi. Jua'a̱ caca cha' bi' lacua.

ROMANOS 11:36

Lcaa na nu ntsu'u chalyuu, na ji'i̱ ycui' Ndyosi laca bi', cha' cua ngüiñá ycui' Ni lcaa na, cha' caca bi' cña ji'i̱ Ni. Nga'aa caca tye cha' cua'ni tlyu na ji'i̱ ycui' Ndyosi. Lo'o jua'a̱ chañi tsa cha' bi'.

2 PEDRO 3:18

Pana tso'o la ca tsa'a̱ la ma̱ cha' tso'o ji'i̱ Jesucristo nu Xu'na na, nu cua ngua'ni lyaá ji'na; li' taca tyi'i̱ tso'o la tyiquee ma̱ cuentya ji'i̱ ycui' nu Xu'na na. Cua'ni tlyu na ji'i̱ ycui' Ni nde chalyuu, lo'o jua'a̱ ná nga'a̱ cha' tye tsa̱ nu cua'ni tlyu na ji'i̱ Ni ca slo ycui' Ni. Jua'a̱ caca cha' lacua.

ROMANOS 16:27

Sca ti ycui' Ndyosi jlo ti' lcaa cha', bi' cha' lcaa tyempo ná nga'a̱ cha' tye cha' cua'ni tlyu na ji'i̱ ycui' Ni chacuayá' ji'i̱ Jesucristo. Jua'a̱ nti' na cha' caca tu'ni.

SAN JUAN 17:23

Nu lo'o stu'ba ti ntsu'u tyiquee na' lo'o ngu' bi', lo'o jua'a̱ stu'ba ntsu'u tyiquee nu'u̱ lo'o na' ―nacui̱―, li' chañi cha' caca stu'ba cresiya ji'i̱ ngu' lo'o tya'a ngu'. Lo'o li' caca cuayá' ti' xa' ñati̱ chalyuu cha' cua nda nu'u̱ 'na lijya̱a̱ lo yuu, cha' ñi'ya̱ lo'o tyaca'a na' jinu'u̱, jua'a̱ cua'ni tyaca'a nu'u̱ ji'i̱ ngu' nu ngusñi cha' 'na.

SAN JUAN 7:17

Si nti' ma̱ cua'ni ma̱ cña nu nti' ycui' Ndyosi cha' cua'ni ma̱, li' caca cuayá' ti' ma̱ mala ngutu'u cha' nu nclyu'u na' ji'i̱ ngu', si slo ycui' Ndyosi ngutu'u cha' bi', si sca cha' nu nda'ya hique ti na' laca cha' bi' ―nacui̱ yu―.

SAN MATEO 21:31

¿Ñi'ya̱ nti' cu'ma̱ ni? Nu tyucuaa qui'yu cuañi' bi' ni, ¿tilaca laca nu ngua'ni cña nu ngua ti' sti ngu' cha' cua'ni ngu'? ―Sñi' clyo yu, bi' laca bi' ―nacui̱ ngu' ji'i̱ Jesús li'. ―Chañi cha' ji'i̱ ma̱ ―nacui̱ Jesús ji'i̱ ngu'―. Cha' liñi nchcui' na' lo'o ma̱ juani, cha' ntsu'u ngu' cuxi, ñi'ya̱ nti' nu msu ji'i̱ ngu' xa' tsu' nu cuiñi ti nxñi quiña'a̱ tsa cñi cña loo ngu', ntsu'u ngu' bi' nu yala la tyatí̱ cha' ji'i̱ ycui' Ndyosi, cha' caca Ni loo ne' cresiya ji'i̱ ngu'; jua'a̱ ntsu'u nu cuna'a̱ calle ti nu yala la tyatí̱ ngu' cha' ji'i̱ ycui' Ndyosi, cha' caca Ni loo ne' cresiya ji'i̱ ngu'. Pana cu'ma̱ ni, tiya' tsa tyalaa cu'ma̱ ca su ntucua ycui' Ni.

SAN MATEO 7:21

’Ntsu'u tsa ngu' nu nchcui' lo'o na': “Xu'na, Xu'na”, nacui̱ ngu' 'na; pana si'i lcaa ngu' bi' nu tyatí̱ ca su laca ycui' Ni loo. Sca ti ngu' nu taquiya' ji'i̱ cha' nu nchcui' Sti na' nu ntucua nde cua̱, bi' ngu' laca nu tyatí̱ ca su laca ycui' Ni loo.

SAN MATEO 12:50

Tya'a na' laca lcaa ngu' nu ndu'ni ñi'ya̱ nu nti' Sti na' nu ntucua nde cua̱ cha' cua'ni ngu'; ñati̱ bi' laca ñi'ya̱ laca xtya'a̱ na', ñi'ya̱ laca tya'a na', masi nu qui'yu, masi nu cuna'a̱.

2 TIMOTEO 3:17

La cui' quityi bi' laca nu culu'u ji'i̱ lcaa tya'a na nu laca na ñati̱ ji'i̱ ycui' Ndyosi, ñi'ya̱ taca cua'ni tso'o na lcaa cña nu nda Ni ji'na cha' cua'ni na nde chalyuu.

HEBREOS 12:28

Lo'o jua'a̱ ná taca cha'a̱ chalyuu cucui nu ngujui ji'na xqui'ya Cristo, ná clyiji tsiya' ti bi'; bi' cha' tso'o tyu'u tyiquee na ña'a̱ na ji'i̱ ycui' Ndyosi lacua. Cua'ni chi̱ na loo ycui' Ndyosi, cha' jua'a̱ nti' Ni cha' cua'ni na; tyi'u ti' na cha' lcaa tsa̱ cua'ni tlyu na ji'i̱ ycui' Ni, cha' cube tsa ti' na ji'i̱ Ni.